Skip to content

Skip to secondary menu

Skip to table of contents

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) TESEMA 2016

 TALAAGA O LE SOIFUAGA

Avea ma “Mea Uma i Tagata o Ituaiga Uma”

Avea ma “Mea Uma i Tagata o Ituaiga Uma”

“E te papatiso loa, ta teteʻa!” O upu na sa fai atu e loʻu tamā e faafefe ai loʻu tinā i le 1941. E ui i lea, na filifili lava loʻu tinā e papatiso e faailoga ai lona tuuina atu iā Ieova le Atua. Na taunuu lava tala a loʻu tamā ma ia tuua loa lo matou aiga. O le taimi lenā e na o le valu oʻu tausaga.

NA FAAOSOFIA loʻu fiafia i upu moni o le Tusi Paia a o leʻi oo i lea taimi. Na maua e loʻu tinā ni lomiga faale-Tusi Paia, ma na ou naunau i ai, aemaise lava i ata. E leʻi manaʻo loʻu tamā e talanoa mai loʻu tinā e faatatau i mea na ia aʻoaʻoina. Peitaʻi na ou fia iloa ma tuufesili i loʻu tinā, o lea na ma suʻesuʻe ai ma loʻu tinā pe a leai loʻu tamā i le fale. O le iʻuga, na ou manaʻo ai foʻi e tuuina atu loʻu ola iā Ieova, ma na ou papatiso i Blackpool i Egelani i le 1943 ina ua 10 oʻu tausaga.

AMATA ONA AUAUNA IĀ IEOVA

Na amata mai i lenā taimi ona ma auai e lē aunoa ma loʻu tinā i le faiva i le fanua. Na matou faaaogāina laau e tā ai lauga e faatomua atu ai le feʻau o le Tusi Paia. O nei laau e lē gata e tetelē ae e mamafa foʻi, lea e pe ā ma le 10 pauna (4.5 kilokalama). Seʻi mafaufau iā te aʻu o se tamaitiiti ae o loo tau amo se tasi o na laau mamafa!

Ina ua 14 oʻu tausaga, sa ou manaʻo loa ou te paeonia. Na fai mai loʻu tinā ou te talanoa muamua i lē na avea ma auauna  i uso (lea ua taʻua i aso nei o le ovasia o le matagaluega). Na fautua mai le uso ou te taumafai e aʻoaʻo se matātā e lagolagoina ai laʻu paeonia. O le mea lenā na ou faia. Ina ua māeʻa le lua tausaga na ou faigaluega ai, sa ou toe talanoa loa i se isi ovasia o le matagaluega e faatatau i le avea ma paeonia. Na ia faapea mai: “Amata loa!”

O lea, iā Aperila 1949, na ma faatau ese ai ma loʻu tinā ma foaʻi i isi a ma meafale sa i le fale na ma mautotogi ai. Na ma siitia atu i Middleton lea e latalata i Manchester, ma amata ai loa ona ma paeonia. Ina ua mavae le fā masina, na ou filifilia se uso e ma te paeonia faatasi. Na talosaga mai le lālā e ma te siitia atu i se faapotopotoga fou i Irlam. Ae na paeonia loʻu tinā ma le isi tuafafine i se isi faapotopotoga.

E ui e na o le 17 oʻu tausaga, ae na tofia i maʻua ma laʻu paga e faia sauniga ona sa toʻaitiiti uso agavaa i lenā faapotopotoga fou. Mulimuli ane, na tofia aʻu i le faapotopotoga i Buxton, lea sa toʻaitiiti le ʻautalaʻi ma na manaʻomia se fesoasoani. Ou te vaai pea i mea na tutupu i le amataga o laʻu auaunaga, o se toleniga mo isi tofiga i le lumanaʻi.

O loo matou faalauiloa atu se lauga i le lautele i Rochester i Niu Ioka, i le 1953

I le 1951, na faatumu ai laʻu talosaga e auai i le Aʻoga Faale-Tusi Paia a le Olomatamata o Kiliata. Peitaʻi, iā Tesema 1952, na poloaʻia ai aʻu ia auai i le vaegaʻau. Na ou talosaga mo se faatagaga e tuusaʻoloto ai aʻu, ona o aʻu o se faifeʻau faataimi atoa.  Peitaʻi, e leʻi amanaʻia e le faamasinoga loʻu tulaga o se faifeʻau, ma na faafalepuipui ai aʻu mo le ono masina. A o ou iai i le falepuipui, na maua laʻu valaaulia mo le vasega lona 22 o Kiliata. O lea, iā Iulai 1953, na ou malaga ai loa i Niu Ioka i le vaa e taʻua o le Georgic.

Ina ua ou taunuu, sa ou auai i le fonotaga a le New World Society i le 1953. Ina ua uma, sa ou malaga atu i se nofoaafi i le itu i saute o Lansing i Niu Ioka, lea sa iai le aʻoga. E leʻi tele ni aʻu tupe ona faatoʻā tatala aʻu mai i le falepuipui. O lea, ina ua taunuu le nofoaafi, na tatau ona puʻe le pasi ou te alu ai i le itu i saute o Lansing, ma na ou talosaga i se tasi o le pasese mo se 25 sene e totogi ai loʻu pasese.

SE TOFIGA I SE ATUNUU ESE

Na maua mai i le Aʻoga o Kiliata ni toleniga aogā, na fesoasoani iā i matou ina ia ʻavea ma mea uma i tagata o ituaiga uma,’ a o iai i le galuega faamisionare. (1 Kori. 9:22) Na tofia i matou e toʻatolu ma Paul Bruun ma Raymond Leach e auauna i Filipaina. Sa matou faatali mo ni nai masina mo ni visa, ona matou folau atu lea mo aso e 47 e ui atu i Rotterdam, le Sami Metitirani, le Alāvai i Suez, le Vasa Initia, Meleisia, ma Hong Kong! Na matou taunuu i Manila iā Novema 19, 1954.

O laʻu paga misionare o Raymond Leach, na ma malaga i se vaa i Filipaina mo le 47 aso

Sa amata i lenā taimi ona matou faamasani i tagata fou, i se atunuu fou, ma se gagana fou. Na tofia muamua i matou i se faapotopotoga i le aai o Quezon, lea o le toʻatele o tagata e nonofo ai e tautatala i le gagana Peretania. E uma ane le ono masina e itiiti ni upu Tagalog na matou iloa. Ae o le isi matou faaeaga na sosoo ai na foʻia ai lenā faafitauli.

I se tasi o aso iā Me 1955, ina ua matou taunuu i le fale mai i le talaʻiga, na ma maua ai ma le uso o Raymond ni tusi i le potu. Na faailoa mai ai ua tofia i maʻua o ni ovasia o matagaluega. E na o le 22 oʻu tausaga i le taimi lenā, ae o lea tofiga na ou maua ai nisi avanoa ina ia “avea aʻu ma mea uma i tagata o ituaiga uma.”

O loo fai saʻu lauga i le lautele i se fonotaga matagaluega i le gagana Bicol

O se faataʻitaʻiga, o laʻu lauga muamua lava i le lautele o se ovasia o le matagaluega, na fai i luma o se faleoloa. E leʻi umi ae ou iloa o se tulaga masani i Filipaina i na taimi, pe a fai se lauga lautele e tatau ona fai i nofoaga faitele. O lea a o oʻu asiasi i faapotopotoga, na ou faia lauga i nofoaga faitele e pei o fale taalaelae, maketi, luma o fale o le malo, malae taalo, paka, ma magāala i le taulaga. I se tasi taimi i le aai o San Pablo, na lē faia ai laʻu lauga i le maketi ona o le tetele o timuga. Na ou talosaga atu i uso na taʻimua ina ia faia le lauga i le Maota mo Sauniga. Ina ua uma le lauga, na fesili mai uso pe e tatau ona lipoti le sauniga o se sauniga mo le lautele, ona e leʻi faia i se nofoaga faitele.

O fale lava o uso na ou nofo ai. E ui e lē o ni fale e taugatā lo latou fausaga, ae na mamā i taimi uma. O le tele o taimi ou te moe i luga o se fala e fofola i luga o laupapa. Na ou iloa foʻi le auala talafeagai e tāʻele ai ona e leʻi iai ni puipui o mea e tāʻeʻele ai. Sa ou faimalaga solo i sipi ma pasi, ma o nisi taimi ou te alu i vaa pe a asiasi i isi motu. E leʻi iai lava saʻu taavale i le taimi atoa na ou auauna ai o se ovasia o le matagaluega.

O le galue i le faiva i le fanua ma le asiasi i faapotopotoga, na fesoasoani ou te aʻoaʻoina ai le gagana Tagalog. Ou te leʻi auai i se aʻoga e aʻoaʻo ai le gagana, ae na ou aʻoaʻoina e ala i le faalogologo i uso i taimi o talaʻiga ma sauniga. Sa mananaʻo uso e fesoasoani mai ou te aʻoaʻoina le gagana, ma na ou talisapaia lo latou onosaʻi ma a latou fautuaga faamaoni.

A o faagasolo taimi, o faaeaga fou na ou maua na uunaʻia ai aʻu ia fai nisi  fetuunaʻiga. I le 1956 ina ua asiasi mai le uso o Nathan Knorr, na tofia ai aʻu e vaaia mataupu e feutagaʻi ai ma le lautele i le tauaofiaga a le atunuu. E leʻi iai soʻu tomai i lea tofiga, ae na lotomalilie isi e fesoasoani mai iā te aʻu. E leʻi atoa se tausaga ae toe faatulaga foʻi se isi tauaofiaga a le atunuu, ma na asiasi mai ai le uso o Frederick Franz mai i le ofisa ulu. A o oʻu auauna ai o le ovasia o le tauaofiaga, na ou aʻoaʻoina ai le naunau o le uso o Franz e fetuunaʻi e fua i tulaga o tagata. Na matuā fiafia uso i Filipaina ina ua ofu e le uso o Franz le ofu faaleaganuu a Filipaina e taʻu o le barong Tagalog, a o fai lana lauga lautele.

Na manaʻomia ona ou faia nisi fetuunaʻiga ina ua tofia aʻu e avea o se ovasia o le itumalo. I lenā taimi, na matou faaalia ai le ata The Happiness of the New World Society, ma o le tele o taimi na faaali i nofoaga taalaelae. E iai iniseti na faalavelave i taimi e faaali ai le ata. E fiafia nei iniseti i le malamalama o le masini na faaali ai le ata, ma e uma ane ua pipii i le masini. O le galuega tele le taumafai e faamamā le masini pe a uma. E leʻi faigofie le faaaliga o nei ata, peitaʻi na lagona le faamalieina ona o le tali lelei mai o tagata, a o latou aʻoaʻoina vala o le faalapotopotoga a Ieova i le lalolagi aoao.

Na uunaʻia e patele Katoliko nisi tagata o le malo ia aua neʻi talia a matou talosaga mo fonotaga. Na latou taumafai foʻi e faalavelave  i taimi o a matou fonotaga, e ala i le tā o logo o a latou falesā e latalata i nofoaga na faia ai fono. Peitaʻi, na agaʻigaʻi pea i luma le galuega ma o le toʻatele i na vaipanoa ua avea nei ma tagata tapuaʻi o Ieova.

TOFIGA NA MANAʻOMIA AI NISI FETUUNAʻIGA

I le 1959, na ou mauaina ai se tusi na faailoa mai ai ua tofia aʻu e auauna i le ofisa o le lālā. E tele atu isi mea ua ou aʻoaʻoina ona o lenei faaeaga. Mulimuli ane, na tofia aʻu e faia asiasiga o le sone i nisi o atunuu. O se tasi o na malaga na ou masani ai iā Janet Dumond, o se misionare i Taialani. Na ma fesootaʻi pea mo se taimi ma mulimuli ane ma faaipoipo. Ua 51 tausaga o ma auauna fiafia faatasi o se ulugalii.

Maʻua ma Janet i se tasi o motu o Filipaina

Na ou maua le faaeaga e asiasi ai i tagata o Ieova i atunuu e 33. Maʻeu loʻu lotofaafetai ona o tofiga na ou auauna ai mai i le amataga o laʻu auaunaga, na fesoasoani e sauniunia ai aʻu e feagai ma ituaiga tagata eseese! O nei asiasiga ua faalautele atili ai laʻu vaai, ma fesoasoani ou te iloa ai le auala o loo autasia ai e le alofa o Ieova ituaiga uma o tagata.Galu. 10:34, 35.

E faia e lē aunoa so ma sao i le talaʻiga

O LOO FAAAUAU ONA FETUUNAʻI

Maʻeu se faaeaga o le auauna faatasi ai ma o tatou uso i Filipaina! E faasefulu taimi ua sili atu ai le aofaʻi o le ʻautalaʻi ua iai nei, nai lo o le taimi na amata ai laʻu auaunaga i inei. O loo faaauau ona ma auauna ma Janet i le ofisa o le lālā o Filipaina i le aai o Quezon. E ui lava ua silia ma le 60 tausaga talu ona ou auauna i se atunuu ese, ae e manaʻomia pea ona ou nofosauni e faia fetuunaʻiga i so o se mea e faatonu mai e Ieova. O suiga na faia talu ai nei i le faalapotopotoga, ua manaʻomia ai ona tatou faia ni fetuutuunaʻiga i la tatou auaunaga i le Atua ma o tatou uso.

E faafiafiaina pea i maʻua i le faatupulaʻia o le aofaʻi o Molimau

E ma te faia taumafaiga uma ia talia so o se mea e finagalo i ai Ieova, ma o le olaga sili lea ona faamalieina ai. E ma te taumafai foʻi e faia fetuunaʻiga manaʻomia ma auauna pea mo o tatou uso. Ioe, e ma te naunau pea ia “avea ma mea uma i tagata o ituaiga uma,” pe a tusa ai ma le finagalo o Ieova.

O loo ma auauna pea i le ofisa o le lālā i le aai o Quezon