Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) SETEMA 2016

Puipuia le Tala Lelei i Luma o Tagata Aloaʻia o le Malo

Puipuia le Tala Lelei i Luma o Tagata Aloaʻia o le Malo

“O LENEI tagata o le ipu ia ua filifilia mo aʻu, e talaʻi atu loʻu igoa i nuu ese faapea foʻi ma tupu.” (Galu. 9:15) Na fetalai le Alii o Iesu e faatatau i se tamāloa Iutaia faatoʻā liliu i le faa-Kerisiano, lea na lauiloa mulimuli ane o le aposetolo o Paulo.

O se tasi o na “tupu” o le Emeperoa Roma o Nero. O le ā sou faalogona pe a faapea o le a e tulaʻi i luma o lenā taʻitaʻi ina ia puipuia lou faatuatua? Ua faalaeiauina Kerisiano ina ia faaaʻoaʻo iā Paulo. (1 Kori. 11:1) O se tasi o auala e mafai ona tatou faia ai faapea, o le faaaʻoaʻo lea i le auala na taulima ai e Paulo faiga faaletulafono i ona aso.

O le Tulafono faa-Mose sa avea ma tulafono i Isaraelu, ma sa avea foʻi o se taʻiala tau amio mo tagata Iutaia i so o se vaipanoa. Ina ua mavae le Penetekoso 33 T.A., sa lē toe manaʻomia ona tausia e tagata tapuaʻi moni le Tulafono a Mose. (Galu. 15:28, 29; Kala. 4:9-11) E ui i lea, sa tautatala faaaloalo pea Paulo ma isi Kerisiano e faatatau i le Tulafono, lea sa mafai ai ona latou molimau atu i le toʻatele o tagata Iutaia e aunoa ma teteega. (1 Kori. 9:20) O le mea moni, o le tele lava o tulaga, na molimau atu Paulo i totonu o sunako i tagata na iloa le Atua o Aperaamo. Na mafai ona ia fetufaaʻi ma i latou e faavae i Tusitusiga Eperu.—Galu. 9:19, 20; 13:5, 14-16; 14:1; 17:1, 2.

Na filifilia e le ʻauaposetolo Ierusalema e avea ma uluaʻi nofoaga autū o faatonuga mo le galuega talaʻi. Sa latou aʻoaʻo atu pea i le malumalu. (Galu. 1:4; 2:46; 5:20) E iai taimi na faimalaga atu ai Paulo i Ierusalema, ma mulimuli ane na taofia ai o ia i le falepuipui. Na amata mai ai i inā se iloiloga faafaamasinoga lea na iʻu ai ina ave o ia i Roma.

FAAAOGĀ E PAULO LE TULAFONO A ROMA

O le ā le vaaiga a taʻitaʻi o le malo o Roma i talitonuga na talaʻia e Paulo? Ina ia tali lenā fesili, e aogā lo tatou iloaina o le vaaiga a le malo o Roma i isi tapuaʻiga. E latou te leʻi faamalosia tagata ese i la latou emepaea ina ia lafoaʻia a latou tapuaʻiga, seʻi vaganā ua lamatia ai la latou faigāmalo po o tulaga tau amio a tagata.

 E telē le saʻolotoga na tuu atu e le malo o Roma i tagata Iutaia. Na taʻua i le tusi Backgrounds of Early Christianity: “Sa olioli tagata Iutaia i o latou tulaga na iai i le emepaea o Roma. . . . Na maua e tagata Iutaia le saʻolotoga e fai ai la latou tapuaʻiga, nai lo o le tapuaʻi i atua o Roma. Sa pulea o latou olaga i a latou lava tulafono.” E leʻi faamalosia foʻi i latou e auai i vaegaʻau. * Sa puipuia e le tulafono a Roma le lotu Iutaia, o lea sa faaaogā tatau ai e Paulo lenā puipuiga, e finau ai mo le faa-Kerisiano i luma o taʻitaʻi Roma.

Sa taumafai malosi ē tetee iā Paulo e faasesē tagata lautele ma taʻitaʻi o malo ina ia teena o ia. (Galu. 13:50; 14:2, 19; 18:12, 13) Seʻi manatu i se mea na tupu: Na faalogo toeaina o le faapotopotoga Kerisiano i Ierusalema i se tala ua salalau i tagata Iutaia e faapea, ua talaʻia e Paulo se feʻau e “fulitua iā Mose.” O nei faamatalaga e ono taʻitaʻia ai tagata Iutaia faatoʻā liliu i le faa-Kerisiano e manatu, e lē faaaloalo Paulo i faatulagaga a le Atua. E lē gata i lea, na ono faailoa atu foʻi e le ʻau Saniterini o le faa-Kerisiano e fulitua i le lotu Iutaia. Pe ana tupu lenā mea, o le a faasalaina tagata Iutaia na aufaatasi ma Kerisiano. O le a inosia i latou ma faasā ona toe molimau i le malumalu po o sunako. Ina ia faamaonia le sesē o nei faamatalaga, na faalaeiau ai e toeaina o le faapotopotoga Paulo ina ia alu i le malumalu, ma faia se mea e lē manaʻomia ona ia faia ae e lē o se mea sesē.—Galu. 21:18-27.

O le faia faapea e Paulo, na ia maua ai avanoa e ʻtū mo le tala lelei ma faamautū ai faaletulafono.’ (Fili. 1:7) Na vevesi tagata Iutaia i le malumalu ma mananaʻo e fasioti Paulo. Na taofia Paulo e le taʻitaʻiʻau Roma. A o sauni atu mo le sasaina o Paulo, na faailoa atu e Paulo o ia o se tagatānuu o Roma. Na iʻu ina ave Paulo i Kaisareia lea na pulea mai ai e Roma Iutaia. Maʻeu ni avanoa lē laumaua na ia avatu ai se molimau malosi i luma o taʻitaʻi o le malo! E lē taumatea na ia faailoa atu ai talitonuga faa-Kerisiano iā i latou e leʻi iloa lelei lea talitonuga.

O loo faamatala i le Galuega mataupu e 24 le faamasinoina o Paulo e Filiki, o le kovana o Roma i Iutaia, o lē ua faalogo i talitonuga o Kerisiano. Na molia e tagata Iutaia Paulo i lona solia o tulafono a Roma i auala nei e tolu. Sa latou faapea mai na ia faatupu fouvalega i tagata Iutaia i le emepaea, taulamua i se lotu faatupu faalavelave, ma taumafai e solivale le malumalu lea sa i lalo o le puipuiga a Roma. (Galu. 24:5, 6) O na moliaga na ono faasalaina ai o ia i le oti.

E tāua i Kerisiano i aso nei ona mafaufau i le auala na taulima ai e Paulo na moliaga. Sa tumau pea lona toʻafilemu ma ona uiga faaaloalo. Sa faasino atu Paulo i le Tulafono ma le ʻau Perofeta, ma taʻua lana aiā e tapuaʻi ai i ʻle Atua o ona augātamā.’ O le aiā tatau lenā sa maua e tagata Iutaia i lalo o le tulafono a Roma. (Galu. 24:14) Mulimuli ane, na mafai e Paulo ona puipuia ma faailoa lona faatuatua i luma o le kovana na sosoo ai o Pokio Feso, ma luma o le tupu o Herota Akeripa.

Ina ia maua se faamasinoga lē faaituʻau, na talosaga atu Paulo: “Ou te tagi atu iā Kaisara!”—o le taʻitaʻi e sili ona malosi i lenā taimi.—Galu. 25:11.

FAAMASINOGA O PAULO I LUMA O KAISARA

Mulimuli ane, na faapea atu se agelu iā Paulo: “E tatau ona e tulaʻi i luma o Kaisara.” (Galu. 27:24) Na taʻua e le emeperoa Roma o Nero i le amataga o lana nofoaiga, e na te lē taulimaina faamasinoga uma. I uluaʻi tausaga e valu o lana pulega, na masani ona ia tuuina atu lenā matafaioi i isi. Na taʻua i se tasi tusi, pe a filifili Nero e faia se faamasinoga, e faia i lona lava maota ma e fesoasoani iā te ia ni faufautua lauiloa ua lava le tomai.—The Life and Epistles of Saint Paul.

E lē o taʻua i le Tusi Paia pe na faia e Nero le faamasinoga o Paulo, pe na ia tofia se isi e  faalogologo i le apili a Paulo, ona faamatala atu lea iā Nero. I nei tulaga uma, atonu na faamatala atu e Paulo o loo ia tapuaʻi i le Atua o tagata Iutaia, ma faalaeiau tagata uma ia faaalia le faaaloalo tatau i le faigāmalo. (Roma 13:1-7; Tito 3:1, 2) E foliga mai na taulau manuia Paulo i le puipuia o le tala lelei i luma o taʻitaʻi o le malo, auā na faasaʻoloto o ia e Kaisara.—Fili. 2:24; File. 22.

LA TATOU MATAFAIOI O LE PUIPUIA O LE TALA LELEI

Na fetalai Iesu i ona soo: “O le a molia foʻi outou i luma o kovana ma tupu ona o aʻu, e fai ma molimau iā i latou atoa ma atunuu.” (Mata. 10:18) O se faaeaga lo tatou molimau atu e faatatau iā Iesu i lenā auala! Atonu o le a tatou manumalo i faamasinoga a o puipuia le tala lelei. Peitaʻi, o faaiʻuga e faia e tagata e lē mafai ona “faamautū ai faaletulafono” le tala lelei i se tulaga atoatoa. E na o le Malo o le Atua e mafai ona aumaia le mapusaga tumau mai i faiga lē tonu.—Fai. 8:9; Iere. 10:23.

E oo foʻi i aso nei, ua faamamaluina le suafa o Ieova a o puipuia e Kerisiano lo latou faatuatua. E pei o Paulo, e tatau ona tatou toʻafilemu, faamaoni, ma taumafai e faatalitonu isi i o tatou talitonuga. Na faailoa atu e Iesu i ona soo, e lē manaʻomia ona latou ʻmuaʻi manatunatu i se upu e tali atu ai, auā e na te tuuina atu upu ma le atamai i o latou gutu, e lē mafai ai e ē e faasagatau ona tetee pe e finau mai.’—Luka 21:14, 15; 2 Timo. 3:12; 1 Pete. 3:15.

Pe a puipuia e Kerisiano lo latou faatuatua i luma o tupu, kovana, po o isi tagata maualuluga, e mafai ona latou molimau atu i tagata e faigatā ona oo i ai le feʻau faa-Kerisiano. O nisi manumalo mai i faamasinoga ua toe fetuunaʻi ai tulafono a atunuu, ma puipuia ai le saʻolotoga e talaʻi ma faia le tapuaʻiga. Ae po o ā lava iʻuga o faamasinoga, o le lototetele o auauna a le Atua e faafiafiaina ai o ia.

E faapaiaina le suafa o Ieova pe a puipuia lo tatou faatuatua

^ pala. 8 Na taʻua e James Parkes: “Na iai i tagata Iutaia le aiā e tausia ai pea a latou aso faamanatu. O se tū masani a le malo o Roma le tuuina atu o avanoa i tagata, ma latou saʻoloto ai e faia a latou lava tapuaʻiga i vaega uma o le emepaea.”