Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) SETEMA 2016

Po o Faamamaluina le Atua i Ou Laʻei?

Po o Faamamaluina le Atua i Ou Laʻei?

“Ia faia mea uma lava ina ia faamamaluina ai le Atua.”—1 KORI. 10:31.

PESE: 34, 61

1, 2. Aiseā e maualuluga ai tapulaa mo laʻei a Molimau a Ieova? (Tagaʻi i le ata i luga aʻe o le matua.)

O LE lipoti lenei a se nusipepa i Holani e faatatau i se fono a taʻitaʻi lotu: ʻO le toʻatele o tagata na lē ano i o latou laʻei, aemaise pe a vevela. Ae e lē faapena le tauaofiaga a Molimau a Ieova. E laʻei e tama ma tamāloloa peleue ma fusiua, ae e talafeagai le uumi o sakete o teine ma fafine.’ E masani ona viiviia Molimau a Ieova ona o le ʻteuteu iā i latou i ofu e talafeagai, onomea ma mafaufau lelei, ia tatau ma ē ua faapea mai latou te matataʻu i le Atua.’ (1 Timo. 2:9, 10) Na talanoa le aposetolo o Paulo e faatatau i fafine, peitaʻi e faatatau foʻi lenei taʻiala i tane Kerisiano.

2 E tāua iā i tatou o tagata o Ieova laʻei talafeagai, ma e tāua foʻi i le Atua o loo tatou tapuaʻi i ai. (Kene. 3:21) Ua faamautinoa mai i le Tusi Paia e maualuluga tapulaa a le Alii Silisili Ese, e faatatau i laʻei ma teuga a ona tagata tapuaʻi moni. O lea la, e lē tatau ona fua a tatou filifiliga i laʻei ma teuga na o mea e tatou te fiafia i ai. Peitaʻi, e tatau ona faafiafiaina ai foʻi Ieova le Alii Silisili Ese.

3. O le ā e tatou te aʻoaʻoina e faatatau i laʻei mai i le Tulafono a le Atua mo Isaraelu?

 3 O se faaaʻoaʻoga, sa iai i le Tulafono a le Atua mo Isaraelu ni faatonuga e puipuia ai i latou mai i amioga lē mamā a atunuu na siʻomia ai i latou. Na faailoa mai i le Tulafono le inosia e Ieova o laʻei e faigatā ona iloa ai le eseesega o tamāloloa ma fafine, lea ua avea o se aʻega i aso nei. (Faitau le Teuteronome 22:5.) E tusa ai ma taʻiala a le Atua e faatatau i laʻei ma teuga, ua tatou mautinoa ai e lē fiafia le Atua i laʻei ua pei ai tamāloloa o ni fafine, ae e pei ai fafine o ni tamāloloa, po o laʻei e faigatā ona iloa ai le eseesega o tamāloloa ma fafine.

4. O le ā e fesoasoani i Kerisiano e faia ai filifiliga lelei e faatatau i laʻei?

4 Ua iai i le Afioga a le Atua mataupu silisili e fesoasoani i Kerisiano e faia ai filifiliga lelei i le auala e laʻei ai, e tusa po o fea e nonofo ai, o aganuu po o le tau a le atunuu. E tatou te lē manaʻomia se lisi umī o laʻei e onomea ma lē talafeagai. Nai lo o lea, e taʻitaʻia i tatou e mataupu silisili o le Tusi Paia, ae e iai lava lo tatou saʻolotoga e filifilia ai ofu e tatou te fiafia i ai. Seʻi o tatou iloilo nisi o mataupu silisili o le Tusi Paia e fesoasoani iā i tatou e faamautinoa ai “po o le ā le finagalo o le Atua, lea e lelei, e mālie, ma lelei atoatoa,” pe a filifilia o tatou laʻei.—Roma 12:1, 2.

ʻUA MATOU FAAILOA ATU I MATOU O NI AUAUNA A LE ATUA’

5, 6. O le ā le aafiaga e tatau ona iai i isi ona o o tatou laʻei?

5 Na faagaeeina le aposetolo o Paulo e faamatilatila le tāua o le mataupu silisili o loo i le 2 Korinito 6:4. (Faitau.) E telē le feʻau e taʻu atu e o tatou foliga vaaia e faatatau iā i tatou. O le toʻatele o tagata e faavae o latou manatu e faatatau iā i tatou i mea e “vaai” i ai o latou mata. (1 Samu. 16:7) I le avea ai ma faifeʻau a le Atua, e tatou te iloa o laʻei ma teuga e lē o se mataupu e manatu māmā i ai. O mataupu silisili ua tatou iloa mai i le Afioga a le Atua, e tatau ona uunaʻia ai i tatou e ʻalofia ofu fufusi, po o ofu faatosina. O le a tatou ʻalofia ai foʻi ofu e faaalialia pe faamatilatila ai o tatou itutino sā. E lē tatau ona lē lelei ni faalogona o se tasi pe faamalosia o ia e tilotilo ese, ona o le auala e tatou te laʻei ai.

6 Pe a mamā, onomea, ma fai faalelei o tatou laʻei, o le a faaaloalo tagata iā i tatou o ni faifeʻau a le Alii Pule Silisili Ese o Ieova. Atonu o le a latou tosina mai ai foʻi i le Atua o loo tatou tapuaʻi i ai. O le onomea foʻi o o tatou laʻei o le a taʻuleleia ai la tatou faalapotopotoga. O le iʻuga, o le a sili ona uaʻi mai ai isi i la tatou feʻau faasaoola.

7, 8. O ā taimi e matuā tāua ai ona onomea o tatou laʻei?

7 O lo tatou tiute tauave i lo tatou Atua paia, o tatou uso ma tuafāfine ma tagata i le oganuu, o le faia lea o o tatou laʻei i se auala e faamamaluina ai Ieova ma le feʻau o loo tatou talaʻia. (Roma 13:8-10) E matuā tāua lenei vala pe a tatou auai i gaoioiga faa-Kerisiano, e pei o sauniga, po o le galuega talaʻi. E tatau ona faia o tatou laʻei ʻia tatau ma ē ua faapea mai latou te matataʻu i le Atua.’ (1 Timo. 2:10) O le mea moni, o nisi laʻei e talafeagai i se tasi vaipanoa ae e lē talafeagai i se isi vaipanoa. O lea, e tatau i tagata o Ieova i le lalolagi aoao ona manatu mamafa i tū ma agaifanua a atunuu, ina ia aua neʻi tausuai tagata.

Po o faamamaluina le Atua i ou laʻei? (Tagaʻi i le palakalafa e 7, 8)

 8 Faitau le 1 Korinito 10:31. Pe a tatou auai i fonotaga ma tauaofiaga, e tatau ona onomea ma talafeagai o tatou laʻei nai lo o le atagia atu o aʻega ua taatele i le lalolagi. E oo foʻi i le taimi e nonofo ma ō ese ai mai i faletalimālō, faapea taimi o evaevaga a o leʻi faia po ua māeʻa le tauaofiaga, e tatau ona ʻalofia le faatalalē ma le faainaelo i o tatou laʻei. O lea, o le a tatou mitamita ai e faailoa atu o i tatou o Molimau a Ieova. O le a tatou saʻoloto ai foʻi e molimau atu pe a maua le avanoa.

9, 10. E faapefea i le Filipi 2:4 ona aafia ai le auala e filifili ai o tatou laʻei?

9 Faitau le Filipi 2:4. Aiseā e tatau ai i Kerisiano ona mafaufau i aafiaga o o latou laʻei i o latou uso tapuaʻi? O se tasi o māfuaaga, ona e taumafai malosi tagata o le Atua e faatatau le fautuaga lenei: “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga.” (Kolo. 3:2, 5) E tatou te lē mananaʻo e faafaigatā i uso talitonu ona usitaʻia lenei fautuaga. O uso ma tuafāfine na lafoaʻia se olaga o amioga lē mamā, atonu o loo latou tauivi pea ma na faanaunauga sesē. (1 Kori. 6:9, 10) E mautinoa e tatou te lē mananaʻo e faafaigatā lenā tauiviga mo i latou.

10 Pe a tatou faatasitasi ma uso ma tuafāfine faaleagaga, e tatau ona saosaolaumea o tatou laʻei i le avea o le faapotopotoga o se nofoaga e puipuia ai le tulaga mamā. O le tulaga lenā e tatau ona iai pe a auai i sauniga po o se  faatasiga faasamasamanoa. E iai la tatou saʻolotoga e filifili ai o tatou laʻei. Peitaʻi, o lo tatou tiute tauave le faia o laʻei e faigofie ai i isi ona faatumau le tulaga mamā, ma tausisia ai tapulaa a le Atua i le paia i mafaufauga, upu, ma gaoioiga. (1 Pete. 1:15, 16) O le alofa moni “e lē amio valea” ma “e lē saʻili mo lona lava lelei.”—1 Kori. 13:4, 5.

OFU TALAFEAGAI MO LE TAIMI MA LE NOFOAGA TALAFEAGAI

11, 12. O le ā se manatu e tatau ona tatou manatua pe a filifilia laʻei?

11 Pe a filifilia laʻei, e manatua e auauna a le Atua ʻe iai le taimi mo mea uma e tutupu ma galuega uma.’ (Fai. 3:1, 17) E moni e aafia le filifiliga o o tatou laʻei ona o le eseese o tau a atunuu, siʻomaga, ma tulaga o mea. Peitaʻi, e lē suia tapulaa a Ieova pe a suia le tau a se atunuu.—Mala. 3:6.

12 I le tau māfanafana, atonu o se luʻi le faamautinoa o loo atagia atu i o tatou laʻei, le faaaloalo ma le mafaufau lelei. O lea, e talisapaia e o tatou uso ma tuafāfine pe a tatou ʻalofia le faia o ofu fufusi pe e matuā ʻōʻō, lea e mafai ona iloa atu ai isi vaega o le tino. (Iopu 31:1) E lē gata i lea, pe a tafafao i se matafaga po o se vai tāʻele, e tatau ona onomea o tatou ofu tāʻele. (Faata. 11:2, 20) E tusa po ua taatele i le lalolagi le faia o ofu tāʻele faatosina, ae e tatau iā i tatou o auauna a Ieova ona mafaufau i le faamamaluina o le Atua paia lea e tatou te alolofa i ai.

13. E faapefea i le fautuaga o loo i le 1 Korinito 10:32, 33 ona aafia ai le auala e filifili ai o tatou laʻei?

13 E iai se isi mataupu silisili tāua e fesoasoani iā i tatou e filifilia ai ofu talafeagai. E tatou te manatu mamafa i lotofuatiaifo o o tatou uso tapuaʻi ma isi tagata. (Faitau le 1 Korinito 10:32, 33.) O lo tatou tiute tauave le ʻalofia o laʻei e mafai ona tausuai ai isi. Na tusi Paulo: “Ia taʻitasi i tatou ma faafiafia i lona tuaoi i le mea lelei, ina ia atiaʻe ai o ia.” Na ia taʻua le māfuaaga: “Auā e oo lava i le Keriso, na te leʻi faafiafia i lona lava loto.” (Roma 15:2, 3) Ioe, na faamuamua e Iesu le faia o le finagalo o le Atua ma le fesoasoani i isi, nai lo o ona lava manaʻoga. O lea, e tatou te ʻalofia laʻei e tatou te fiafia i ai, lea e ono taofia ai le faalogo mai o tagata i la tatou talaʻiga.

14. E faapefea ona toleni e mātua fanau ia faamamaluina le Atua i a latou laʻei ma teuga?

14 O le tiute tauave o mātua Kerisiano le aʻoaʻo o o latou aiga e faatatau mataupu silisili o le Tusi Paia. E aofia ai le faamautinoa o loo latou taumafai ma a latou fanau e faafiafia le finagalo o Ieova, e ala i o latou laʻei ma teuga onomea. (Faata. 22:6; 27:11) E mafai e mātua ona atiaʻe i a latou fanau le faaaloalo mo le Atua paia, e ala i le faataatia o le faaaʻoaʻoga lelei mo i latou, ma avatu i ai faatonuga alofa ma aogā. O se mea lelei i mātua le faasino i fanau o nofoaga ma auala e maua ai ofu talafeagai. O lona uiga, e lē na o le filifilia o ofu e fiafia i ai, ae o ofu foʻi e mafai ona faataunuu ai lo latou faaeaga, o le avea ma sui o Ieova le Atua.

FAAAOGĀ MA LE ATAMAI LE FILIFILIGA SAʻOLOTO

15. O le ā e fesoasoani iā i tatou i le filifilia o o tatou laʻei?

15 Ua iai i le Afioga a le Atua taʻiala aogā e fesoasoani iā i tatou e faia ai filifiliga atamai e faamamaluina ai le Atua. E ui i lea, e mafai lava ona tatou filifilia laʻei e tatou te fiafia i ai. E eseese laʻei ma teuga  e tatou te fiafia i ai, faapea o tatou tulaga tau tupe. Peitaʻi, e tatau ona mamā, onomea, ma talafeagai o tatou laʻei ma se fuafuaga o loo fai, ma ia ōgatusa ma tu ma aganuu a se atunuu.

16. O ā aogā o a tatou taumafaiga e saʻili laʻei talafeagai?

16 E lē faigofie i taimi uma le saʻilia o laʻei e onomea ma talafeagai. O le tele o faleoloa e na o laʻei ma teuga ua taatele e latou te faatauina. O lea e manaʻomia ai le taimi ma taumafaiga ina ia saʻilia sakete, ofu soloatoa, ofu a luga, suti, ma ofuvae e onomea ma e lē fufusi. E mātau ma talisapaia e uso tapuaʻi a tatou taumafaiga e saʻili laʻei mananaia ma talafeagai. E sili atu foʻi le faamalieina e tatou te maua mai i le faamamaluina o lo tatou Tamā o i le lagi, nai lo o so o se mea na tatou faataulaga.

17. O ā vala e iloa ai pe e talafeagai ona fai se ʻavaalalo a se uso?

17 Pe e talafeagai ona fai se ʻavaalalo a se uso? I le Tulafono a Mose, sa tatau ona fai le ʻava a se tamāloa. Peitaʻi, e lē o toe ola Kerisiano i lalo o le Tulafono a Mose ma e lē manaʻomia ona latou tausia. (Levi. 19:27; 21:5; Kala. 3:24, 25) I nisi aganuu, e talia ma talafeagai ai se ʻavaalalo e teu lelei, ma e lē taofia ai le uaʻi mai o tagata i le feʻau o le Malo. O le mea moni, o nisi uso tofia e iai a latou ʻavaalalo. E ui i lea, e filifili nisi uso e lē faia ni a latou ʻavaalalo. (1 Kori. 8:9, 13; 10:32) Ae i nisi aganuu, e lē o se mea e masani ai le fai o ni ʻavaalalo, ma e manatu e lē talafeagai mo se faifeʻau Kerisiano. Afai o le tulaga lea, o le iai la o se ʻavaalalo a se uso, e lē faamamaluina ai le Atua, ma e taʻuleagaina ai lea uso.—Roma 15:1-3; 1 Timo. 3:2, 7.

18, 19. E faapefea ona fesoasoani le Mika 6:8 iā i tatou, a o taumafai e faafiafia le Atua i o tatou laʻei?

18 Maʻeu lo tatou lotofaafetai ona e lē o aumaia e Ieova se lisi umī mo laʻei ma teuga. Nai lo o lea, ua ia faatagaina i tatou e faatino a tatou filifiliga saʻoloto ma faia filifiliga talafeagai, lea e tatau ona taʻitaʻia e mataupu silisili o le Tusi Paia. O lea, e oo lava i o tatou laʻei ma teuga, e mafai ona faailoa atu ai o loo tatou mananaʻo e ʻsavavali ma lo tatou Atua ma le faamaulalo.’—Mika 6:8.

19 O lo tatou faamaulalo e aofia ai le amanaʻia o lo tatou tulaga faatauvaa pe a faatusatusa i le paia o Ieova, auā e tatou te faalagolago atoatoa atu iā te ia mo taʻiala e sili ona lelei. O le faamaulalo foʻi e aofia ai le faaaloalo i faalogona ma manatu o isi. O lea, e tatou te ʻsavavali ma lo tatou Atua ma le faamaulalo,’ e ala i le faaōgatusa o o tatou olaga ma ana tapulaa maualuluga, ma faaalia le faaaloalo i faalogona ma manatu o isi.

20. O le ā le aafiaga e tatau ona iai i isi ona o o tatou laʻei ma teuga?

20 O o tatou laʻei e tatau ona faaalia manino atu ai, o i tatou o tagata tapuaʻi o Ieova. E tatau ona iloa e uso ma tuafāfine ma tagata lautele, ua talafeagai ona avea i tatou ma sui o le Atua paia. E maualuluga ana tapulaa ma e tatou te fiafia e ola e ōgatusa ma na tapulaa. E faamālō i uso ma tuafāfine o loo lelei o latou foliga vaaia ma amio, lea ua tosina mai ai tagata lotofaamaoni i le feʻau faasaoola o loo i le Tusi Paia, ma faamamaluina ma faafiafiaina ai Ieova. O le faia o filifiliga atamai i le auala e laʻei ai, e mautinoa o le a faamamaluina ai pea Lē o loo laʻei i le “mamalu ma le matagofie.”—Sala. 104:1, 2.