Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Oketopa 2017

E Lē Aumaia e le Upu Moni “le Filemu a o le Pelu”

E Lē Aumaia e le Upu Moni “le Filemu a o le Pelu”

“Aua tou te manatu ua ou sau e avatu le filemu i le lalolagi; ou te leʻi sau e avatu le filemu a o le pelu.”​—MATA. 10:34.

PESE: 123, 128

1, 2. (a) O le ā le filemu e mafai ona tatou olioli ai i le taimi nei? (e) Aiseā ua tatou lē maua ai le filemu atoatoa i le taimi nei? (Tagaʻi i le ata i luga aʻe o le matua.)

E TATOU te mananaʻo uma i ni olaga toʻafilemu e aunoa ma ni popolega. E maʻeu lo tatou lotofaafetai ona ua foaʻi mai e Ieova le “filemu mai i le Atua,” o le filemu o le mafaufau lea e mafai ona leoleoina ai i tatou mai i manatu ma faalogona e faapopoleina ai! (Fili. 4:6, 7) Talu ai ua tuuina atu i tatou iā Ieova, ua tatou olioli ai foʻi i le “filemu ma le Atua,” o se faiā lelei lea ma ia.​—Roma 5:1.

2 Peitaʻi, e leʻi oo i le taimi a le Atua e aumaia ai le filemu atoatoa. Ua tumu nei aso e gata ai i fevaevaeaʻiga, ma o le toʻatele o tagata e iai uiga faamisa. (2 Timo. 3:1-4) I le avea ai ma Kerisiano, e tatau ona tatou tau le taua faaleagaga faasaga iā Satani ma aʻoaʻoga sesē o loo ia faaauilumaina. (2 Kori. 10:4, 5) Ae o le luʻi e sili ona faigatā i lo tatou filemu, e ono auala mai i o tatou tauaiga lē talitonu. Atonu e tauemu mai i o tatou talitonuga, tuuaʻia i tatou i le faamalepe aiga, pe faamataʻu mai foʻi o le a lē toe talia i tatou i le aiga seʻi vaganā ua lafoaʻi la tatou tapuaʻiga. O le ā lo tatou manatu e  tatau ona iai e faatatau i teteega mai i aiga? E faapefea ona tatou taulau pe a feagai ma na teteega?

LE MANATU E FAATATAU I TETEEGA I LE AIGA

3, 4. (a) O le ā le aafiaga o aʻoaʻoga a Iesu? (e) O le ā le taimi e avea ai o se luʻi le mulimuli iā Iesu?

3 Na silafia e Iesu o le a fevaevaeaʻi tagata ona o ana aʻoaʻoga, ma e manaʻomia ona lototetele ona soo e fesagaʻia teteega. O na teteega e mafai ona aafia ai faiā filemu i totonu o aiga. Na fetalai Iesu: “Aua tou te manatu ua ou sau e avatu le filemu i le lalolagi; ou te leʻi sau e avatu le filemu a o le pelu. Auā ua ou sau e faatupu fevaevaeaʻiga: o le atalii ma lona tamā, o le tama teine ma lona tinā, o le avā foʻi ma le tinā o lana tane. O le mea moni, e fai le aiga o le tagata ma ona fili.”—Mata. 10:34-36.

4 Ina ua fetalai Iesu “aua tou te manatu ua ou sau e avatu le filemu,” o lona uiga e iai nisi o lana ʻaufaalogologo na tatau ona mafaufau i āuga o le mulimuli atu iā te ia. O lana feʻau e ono fevaevaeaʻi ai tagata. O le faanaunauga o Iesu ia faaoo atu le feʻau o le upu moni a le Atua nai lo o le faatupu ai o fevaevaeaʻiga. (Ioa. 18:37) Peitaʻi, o le a avea ma luʻi le tausisia o aʻoaʻoga a Keriso pe afai e teena e uō vavalalata po o tauaiga le upu moni.

5. O ā tulaga na feagai ma soo o Iesu?

5 Na faaaofia e Iesu teteega mai i aiga i puapuaga e tatau ona onosaia e ona soo. (Mata. 10:38) Ina ia avea ma ē e mulimuli i le Keriso, na tatau i ona soo ona onosaia tauemuga po o le teena e o latou aiga. E ui i lea, e sili atu mea na latou mauaina nai lo o mea na latou tuua.​—Faitau le Mareko 10:29, 30.

6. O le ā e tatau ona manatua pe a tetee o tatou tauaiga i a tatou taumafaiga ina ia tapuaʻi iā Ieova?

6 E tusa pe e tetee o tatou tauaiga i a tatou taumafaiga ina ia tapuaʻi iā Ieova, e tatou te alolofa pea iā i latou. Peitaʻi, e tatau ona manatua e faamuamua lo tatou alofa mo le Atua ma Keriso. (Mata. 10:37) E tatau foʻi ona manatua o le a taumafai Satani e faaaogā lo tatou alofa i o tatou aiga, ina ia lafoaʻia ai lo tatou faamaoni. Seʻi o tatou tilofaʻia ni faaaʻoaʻoga o ni teteega mai i aiga, ma auala e tatou te taulau manuia ai i le fesagaʻia o na teteega.

SE PAAGA LĒ TALITONU

7. O le ā le vaaiga e tatau ona iai i se tasi pe afai e lē talitonu lana paaga?

7 Ua lapataʻi mai le Tusi Paia e faapea o ē e faaipoipo “e oo puapuaga i o latou tino.” (1 Kori. 7:28) Pe afai e lē talitonu lau paaga, atonu la e sili atu popolega ma mafatiaga o loo e fesagaʻia i lau faaipoipoga. Peitaʻi, e tāua ona e vaai i lou tulaga e pei ona silasila mai i ai Ieova. O le lē mulimuli o lau paaga iā Keriso, e lē o se māfuaaga talafeagai lea e te lua nonofo eseese ai pe tatala la oulua faaipoipoga. (1 Kori. 7:12-16) E ui e lē o taulamua le tane lē talitonu i mataupu faaleagaga, ae e tatau pea ona faaaloalo i ai ona o ia o le ulu o le aiga. E tatau foʻi i se tane Kerisiano ona faaalia pea le alofa faataulaga ma le faapelepele i lana avā lē talitonu.​—Efe. 5:22, 23, 28, 29.

8. O ā fesili e mafai ona e fesili ifo ai pe a taumafai lau paaga e faatapulaa lau auaunaga?

8 Ae faapefea pe afai e taumafai lau paaga e faatapulaa lau auaunaga? O se faataʻitaʻiga, e iai se tuafafine na faatonu e lana tane lē talitonu ia faatapulaa aso o le vaiaso e talaʻi ai. Pe afai e faapena lou tulaga, ia fesili ifo: ʻPo o fai mai laʻu tane e aua neʻi oʻu toe tapuaʻi iā Ieova? Pe afai e leai, pe e mafai la ona ou gauaʻi pea i lana talosaga?’ O le faaalia o le magafagafa e mafai ona ʻalofia ai le tele o feeseeseaʻiga i le faaipoipoga.​—Fili. 4:5.

9. E faapefea i se Kerisiano ona aʻoaʻo lana fanau ia faaaloalo i lo latou matua lē talitonu?

 9 E mafai foʻi ona avea ma luʻi le aʻoaʻoina o fanau, aemaise lava pe afai e lē talitonu lau paaga. O se faataʻitaʻiga, e manaʻomia ona e aʻoaʻo lau fanau ina ia usiusitaʻi i le poloaʻiga a le Tusi Paia: “Ia e āva i lou tamā ma lou tinā.” (Efe. 6:1-3) Ae faapefea pe afai e lē o mulimuli lau paaga i tapulaa maualuluga tauamio a le Tusi Paia? Ia e faataatia se faaaʻoaʻoga e ala i le faaalia pea o le faaaloalo i lau paaga. Ia e taulaʻi atu i ona uiga lelei ma faailoa atu e te talisapaia o ia. Ia ʻalofia le faia o faamatalaga lē lelei e faatatau i lau paaga a o faalogo lau fanau. Nai lo o lea, ia faamatala atu i lau fanau e tatau i tagata taʻitoʻatasi ona filifili pe auauna iā Ieova. O amioga lelei foʻi a le fanau e ono fesoasoani e tosina mai ai le paaga lē talitonu i le tapuaʻiga moni.

Ia aʻoaʻo lau fanau i upu moni o le Tusi Paia i so o se taimi talafeagai (Tagaʻi i le palakalafa e 10)

10. E faapefea ona aʻoaʻo e se matua Kerisiano lana fanau i upu moni o le Tusi Paia pe a eseese a la tapuaʻiga ma lana paaga?

10 I nisi taimi, e faatonu ai e le paaga lē talitonu le fanau ina ia auai i aso faamanatu faapaupau pe aʻoaʻo i latou i talitonuga a lotu sesē. E ono faasā e nisi tane a latou avā Kerisiano mai i le aʻoaʻoina o le fanau i le Tusi Paia. E ui i lea, e faia e se avā Kerisiano taumafaiga uma ina ia aʻoaʻo le fanau i upu moni o le Tusi Paia. (Galu. 16:1; 2 Timo. 3:14, 15) O se faataʻitaʻiga, atonu e faasā e se tane lana avā Kerisiano mai i le faia o se suʻesuʻega faale-Tusi Paia ma le la fanau lāiti, pe ave foʻi i sauniga faa-Kerisiano. E faaaloalo le avā i le faaiʻuga a le tane, ae e mafai lava ona ia talanoa atu i le fanau e faatatau i le upu moni i ni avanoa talafeagai. O le faia faapea, e aʻoaʻo ai e le avā le fanau i amioga  tatau ma le poto e faatatau iā Ieova. (Galu. 4:19, 20) Mulimuli ane, o le a faia e le fanau a latou lava filifiliga i le tapuaʻiga e auai ai.​—Teu. 30:19, 20. *

TAUAIGA E TETEE I LE TAPUAʻIGA MONI

11. O lē a e ono faapogaia ai ni feeseeseaʻiga i le va ma tauaiga e lē o ni Molimau?

11 Atonu i le taimi muamua e tatou te leʻi faailoa atu i o tatou aiga o loo tatou suʻesuʻe ma Molimau a Ieova. Peitaʻi, a o tuputupu aʻe lo tatou faatuatua, na tatou iloa ai e manaʻomia ona faailoa atu iā i latou o tatou talitonuga. (Mare. 8:38) Atonu ua tulaʻi mai ni feeseeseaʻiga i le va ma lou aiga e lē o ni Molimau a Ieova ona o lou tumau ma le lototele. O lea, seʻi o tatou tilofaʻia nisi o auala e faaitiitia ai na feeseeseaʻiga ma tumau ai pea ona e faamaoni.

12. Aiseā e ono tetee mai ai o tatou tauaiga, ma e faapefea ona tatou malamalama i o latou faalogona?

12 Ia taumafai e malamalama i faalogona o o tatou tauaiga lē talitonu. A o matuā faafiafiaina i tatou ona ua aʻoaʻoina le upu moni o le Tusi Paia, e ono manatu o tatou tauaiga ua faasesēina i tatou po ua avea foʻi ma vaega o se lotu māvae. E ono manatu ua tatou lē toe alolofa iā i latou ona ua tatou lē faamanatuina faatasi aso faamanatu ma i latou. Atonu e faapopoleina foʻi i latou ina neʻi faasala i tatou e le Atua pe a tatou feoti. E tatau ona tatou taumafai e malamalama i o latou manatu, ma faalogologo lelei ina ia iloa mea o loo latou popole ai. (Faata. 20:5) Na taumafai le aposetolo o Paulo e malamalama i “tagata o ituaiga uma” ina ia mafai ona faasoa atu i ai le tala lelei, ma e tāua foʻi ona tatou faia faapea.​—1 Kori. 9:19-23.

13. O le ā le auala e tatau ona tatou talanoa atu ai i o tatou tauaiga lē talitonu?

13 Ia talanoa atu i se auala agamalu. Ua faapea mai le Tusi Paia, “Ia lē aunoa ona outou tautatala atu i upu e logolelei.” (Kolo. 4:6) E mafai ona tatou talosaga atu iā Ieova mo lona agaga paia, ina ia tatou faaalia ai le fua o le agaga pe a talanoa atu i o tatou tauaiga. E lē tatau ona tatou taumafai e finau ma i latou i o latou talitonuga sesē uma. Pe a latou faatigā mai e ala i ni gaoioiga po o ni faamatalaga, e mafai ona tatou faaaʻoaʻo i le ʻauaposetolo. Na tusi Paulo, “pe a upuleagaina, e matou te faamanuia atu; pe a sauāina, e matou te tumau; pe a taʻuleagaina, e matou te ʻaiʻoi atu” ma le agamalu.​—1 Kori. 4:12, 13.

14. O ā aogā o le tausisi i amioga lelei?

14 Ia tausisi i amioga lelei. E ui e aogā le talanoa atu i se auala agamalu i tauaiga tetee, ae e sili atu ona tāua a tatou amioga lelei. (Faitau le 1 Peteru 3:1, 2, 16.) E ala i au faaaʻoaʻoga, ia iloa mai e lou aiga o loo olioli Molimau a Ieova i ni faaipoipoga fiafia, tausia lelei a latou fanau, ma o loo ola i ni olaga mamā tau amio ma faamalieina. E tusa lava foʻi pe e lē talia e o tatou tauaiga le upu moni, ae e tatou te olioli i le faafiafiaina o le finagalo o Ieova e ala i lo tatou faamaoni.

15. E faapefea ona tatou fuafua mamao i ni tulaga e ono tulaʻi mai ai ni finauga?

15 Ia fuafua mamao. Ia mafaufau i tulaga e ono tulaʻi mai ai ni finauga, ma manatunatu pe e faapea ona taulima. (Faata. 12:16, 23) Ua faapea mai se tuafafine mai i Ausetalia: “Na matuā tetee le tamā o laʻu tane i le upu moni. A o ma leʻi vili atu e asi o ia, e ma te tatalo iā Ieova e fesoasoani mai ia ma ʻalofia le tali atu i se auala ita. E ma te sauniunia mataupu e matou te talanoa ai ina ia maua ai pea ni talanoaga lelei. E ma te faatapulaa foʻi le uumi o na talanoaga ina ia ʻalofia ai ni finauga i tapuaʻiga.”

16. O ā auala e mafai ona e feagai ai ma faalogona e pei ua e agaleaga i ou tauaiga?

 16 O le mea moni, e lē mafai ona tatou ʻalofia feeseeseaʻiga uma ma o tatou tauaiga lē talitonu. O na feeseeseaʻiga e tatou te lagona ai e pei ua tatou agaleaga iā i latou, aemaise ona e tatou te alolofa faapelepele i ai ma mananaʻo e faafiafia i latou. Pe a oo na lagona iā te oe, ia maumauaʻi e faamuamua lou faamaoni iā Ieova nai lo o lou alofa mo lou aiga. O lou maumauaʻi faapena o le a fesoasoani i ou tauaiga e iloa ai le matuā tāua o le auauna iā Ieova. Ia manatua foʻi, e lē mafai ona e faamalosia isi ina ia talia le upu moni. Nai lo o lea, ia latou iloa mai i lau faaaʻoaʻoga le aogā o le mulimuli i ala o Ieova. Ua tuuina atu e lo tatou Atua alofa o Ieova le avanoa e latou te filifili ai le ala e uia, e pei foʻi ona ia faia iā i tatou.​—Isa. 48:17, 18.

PE A TUUA IEOVA E SE TASI O LE AIGA

17, 18. O le ā e fesoasoani iā te oe pe a tuua Ieova e se tasi o lou aiga?

17 E pei o se tutuʻi o le pelu le tigā o o tatou faalogona pe a faateʻaina pe vavaeese se tasi o le aiga mai i le faapotopotoga. E faapefea ona tatou fesagaʻia faalogona tigā faapena?

18 Ia tausisi pea i lau faasologa faaleagaga. Ia faamalosia pea lou itu faaleagaga e ala i le faitau e lē aunoa o le Tusi Paia, sauniuni ma auai i sauniga faa-Kerisiano, faia se sao i le faiva i le fanua, ma tatalo mo le malosi ina ia tumau ai. (Iuta 20, 21) Ae faapefea pe a e lagona e lē o iai lou loto i lau auaunaga, o loo tau lava ina fai? Aua neʻi faavaivai! O se faasologa lelei faaleagaga e mafai ona fesoasoani e pulea ai ou manatu ma faalogona. Seʻi manatu i le mea na tupu i le tusitala o le Salamo 73. Na iā te ia se vaaiga sesē ma na matuā atuatuvale ai o ia. Peitaʻi, na mafai ona toe faasaʻo ona mafaufauga ina ua alu i le maota mo le tapuaʻiga i le Atua. (Sala. 73:16, 17) E mafai foʻi ona e faia faapea e ala i le tapuaʻi ma le faamaoni iā Ieova.

19. E faapefea ona e amanaʻia le faatulagaga a Ieova mo aʻoaʻiga?

19 Ia amanaʻia le aʻoaʻiga a Ieova. O lenei faatulagaga e maua ai e tagata uma aogā tumau, e aofia ai ma le tagata faimea sesē, e ui lava e tigā i le taimi muamua. (Faitau le Eperu 12:11.) O se faataʻitaʻiga, ua faatonu i tatou e Ieova ia ʻaua neʻi tatou toe faifaimea faatasi’ ma tagata faimea sesē e lē salamō. (1 Kori. 5:11-13) E ui i le tigā o o tatou faalogona, ae e tatau ona tatou ʻalofia ni fesootaʻiga masani ma se tagata faateʻaina o le aiga e ala i le telefoni, feʻau tusitusia, tusi, imeli, ma polokalame i le Initaneti.

20. O le ā e mafai ona tatou faamoemoe pea i ai?

20 Ia faamoemoe pea. O le alofa “e faamoemoe i mea uma,” e aofia ai le faamoemoe o le a toe foʻi mai iā Ieova ē na tuua o ia. (1 Kori. 13:7) Pe a e mātauina faamaoniga ua amata ona suia le loto o sou tauaiga vavalalata, e mafai ona e tatalo ina ia maua e ia le malosi mai i le Tusi Paia ma tali atu ai i le augani a Ieova e faapea: “Ia foʻi mai iā te aʻu.”​—Isa. 44:22.

21. O le ā e tatau ona e faia pe a iai ni feeseeseaʻiga i lou aiga ona o lou mulimuli iā Iesu?

21 Na fetalai Iesu pe a tatou faamuamua tagata nai lo o ia, e tatou te lē agavaa la e mulimuli atu iā te ia. Peitaʻi, na mautinoa e Iesu o le a lototetele ona soo e tumau ma le faamaoni iā te ia e ui i teteega mai i aiga. Pe afai ua aumaia “le pelu” i lou aiga ona o lou mulimuli iā Iesu, ia faalagolago iā Ieova e fesoasoani mai ina ia e taulau manuia ai i na luʻi. (Isa. 41:10, 13) E te maua le olioli i le iloaina o loo e faafiafiaina Ieova ma Iesu, ma o le a la tauia lou faamaoni.

^ pala. 10 Mo nisi faamatalaga e faatatau i le aʻoaʻoina o fanau i se aiga e lē upu moni le isi o le paaga, tagaʻi i le mataupu “Fesili Mai le ʻAufaitau” i Le Olomatamata o Aokuso 15, 2002.