Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Oketopa 2017

Ia Tatou Alolofa e Ala i Gaoioiga ma le Faamaoni

Ia Tatou Alolofa e Ala i Gaoioiga ma le Faamaoni

“Aua neʻi o tatou alolofa tau o le upu ma le gutu, ae e ala foʻi i gaoioiga ma le faamaoni.”​—1 IOA. 3:18.

PESE: 106, 100

1. O le ā le ituaiga alofa e silisili i isi alofa uma, ma aiseā? (Tagaʻi i le ata i luga aʻe o le matua.)

O LE alofa e faavae i mataupu silisili (a·gaʹpe), o se meaalofa mai iā Ieova. O Ieova o le Puna o lenā alofa. (1 Ioa. 4:7) O le ituaiga alofa lenei e silisili i isi alofa uma. E ui lava e aofia ai faalogona māfana ma faapelepele, ae e iloa lenei alofa i gaoioiga lē manatu faapito e faia mo isi. E tusa ai ma se tasi tusi, e faatoʻā mātaulia lenei alofa (a·gaʹpe) e ala i “gaoioiga lelei e faia mo isi.” Pe a tatou faaalia atu pe e faaalia mai foʻi e isi lenei alofa lē manatu faapito, o le a faamanuiaina, faafiafiaina, ma iai se fuafuaga o o tatou olaga.

2, 3. Na faapefea ona faaalia e Ieova le alofa lē manatu faapito i tagata?

2 Na faaalia e Ieova le alofa i tagata a o leʻi foafoaina Atamu ma Eva. Na ia faia le lalolagi ina ia nonofo ai e faavavau tagata ma olioli ai i se olaga e sili ona fiafia, nai lo o se mea e tau ina nonofo ai. Na faia e Ieova nei mea uma mo lo tatou lelei, ae e lē mo sona lelei. Na faaalia atili e Ieova le alofa lē manatu faapito e ala i le tuu atu i lana fanau i le lalolagi o le faamoemoe o le ola e faavavau i le Parataiso, lea na ia saunia mo i latou.

 3 Na faia e Ieova se gaoioiga silisili o lona alofa lē manatu faapito ina ua māeʻa le fouvalega a Atamu ma Eva. Na ia faia se faatulagaga e togiola ai ē o le a tupuga mai iā Atamu ma Eva, ma na mautinoa e Ieova e iai nisi o le a talisapaia Lona alofa. (Kene. 3:15; 1 Ioa. 4:10) O le mea moni, o le taimi lava na folafola mai ai e Ieova o le a iai se Faaola i le lumanaʻi, i lana silafaga e peiseaʻī ua uma ona faataunuu le taulaga togiola. I le pe tusa ma le 4,000 tausaga mulimuli ane, na faia ai e Ieova se faataulaga tele e ala i le foaʻi mai o lona Alo pele e toʻatasi ina ia maliu mo tagata uma. (Ioa. 3:16) Maʻeu lo tatou lotofaafetai mo le alofa lē manatu faapito o Ieova!

4. O le ā e iloa ai e mafai lava e tagata lē lelei atoatoa ona faaalia le alofa lē manatu faapito?

4 Ua mafai ona tatou faaalia le alofa lē manatu faapito ona na faia i tatou i le faatusa o le Atua. Peitaʻi, o se luʻi mo i tatou le faaalia o le alofa ona o le agasala na tuufaasolo mai. E ui i lea, e mafai lava ona tatou faaalia le alofa. Na faaalia e Apelu le alofa i le Atua e ala i le ofoina atu ma le lē manatu faapito o mea e sili ona lelei na iā te ia. (Kene. 4:3, 4) Na faaalia foʻi e Noa le alofa lē manatu faapito i tagata, e ala i le talaʻia o le feʻau a le Atua mo le tele o tausaga e ui e leai se tasi na tali lelei ane. (2 Pete. 2:5) Na faamuamua e Aperaamo lona alofa i le Atua nai lo o ona lava faalogona, ina ua faatonuina o ia e ofo atu lona atalii o Isaako e osi ai le taulaga. (Iako. 2:21) E tatou te mananaʻo foʻi e faaalia le alofa e pei o na tane faamaoni, e ui i luʻi o loo feagai ma i tatou.

ALOFA MONI MA LE ALOFA FAATAGĀFAI

5. O ā auala e mafai ona tatou faaalia ai le alofa moni?

5 Ua taʻua i le Tusi Paia o le alofa moni e faaalia e lē “tau o le upu ma le gutu, ae e ala foʻi i gaoioiga ma le faamaoni.” (1 Ioa. 3:18) Po o lona uiga la e lē mafai ona tatou faaalia le alofa e ala i upu? E leai! (1 Tesa. 4:18) O lo tatou alofa e lē tatau ona gata i upu, aemaise pe afai ua manaʻomia e se tasi se fesoasoani. O se faaaʻoaʻoga, pe afai ua lē lava mea e tausi ai le ola o se Kerisiano, e sili atu la mea e na te manaʻomia nai lo o na o a tatou faaupuga alofa. (Iako. 2:15, 16) I se tulaga talitutusa, o lo tatou alolofa iā Ieova ma tuaoi e uunaʻia ai i tatou e ōle atu i le Atua ina ia “auina mai se ʻaufaigaluega e faia le seleselega.” I le taimi e tasi, e faia foʻi so tatou sao atoatoa i le galuega talaʻi.​—Mata. 9:38.

6, 7. (a) O le ā le “alofa e lē faatagāfai”? (e) O ā ni faaaʻoaʻoga o le alofa faatagāfai?

6 Na tusi le aposetolo o Ioane e tatau ona tatou alolofa e ala “i gaoioiga ma le faamaoni.” O lea, e lē tatau ona tatou “faatagā alofa,” ae ia tatou faaalia le “alofa e lē faatagāfai.” (Roma 12:9; 2 Kori. 6:6) O lona uiga e lē mafai ona tatou faaalia le alofa moni a o faafoliga atu o i tatou o ni tagata e alolofa moni. E tatou te ono tomānatu, ʻPe e mafai ona faapea atu e tatou te alolofa ae e faatagāfai lo tatou alofa?’ E leai! E lē o se alofa lenā mea.

7 Seʻi mafaufau i ni faaaʻoaʻoga o le alofa faatagāfai. I le faatoʻaga o Etena, na faafoliga atu e Satani e naunau moni mo le lelei o Eva, ae na manatu faapito ma faatagā alofa iā Eva. (Kene. 3:4, 5) A o soifua le tupu o Tavita, e leʻi faamaoni Aitofele i la laʻua faauōga. Na faalata e Aitofele le tupu o Tavita ina ia saʻilia ai lona lava lelei. (2 Samu. 15:31) I aso foʻi nei, o ē ua liliuese mai i le upu moni faapea ma isi, ua latou faatupu fevaevaeaʻiga i totonu o faapotopotoga. Ua latou faia faapea e ala i “upu taufaaʻoleʻole ma le taufaasesē” ina ia faafoliga atu ai e alolofa, a o le mea moni e manatu faapito mo lo latou lava lelei.​—Roma 16:17, 18.

8. O le ā le fesili e ao ona fesili ifo ai iā i tatou lava?

8 O le alofa faatagāfai o se uiga e lē lelei ona o loo faaaogā ina ia faasesē ai tagata.  O lenā ituaiga alofa atonu e mafai ona faasesēina ai tagata, ae e lē mafai ona faasesēina ai Ieova. Na fetalai Iesu o le a ʻmatuā faasalaina’ tagata faagutugutulua. (Mata. 24:51) O le mea moni, e lē mananaʻo auauna a Ieova e faaalia le alofa faatagāfai. Ae e lelei ona tatou fesili ifo, ʻPe e faamaoni i taimi uma loʻu alofa, e lē manatu faapito pe taufaasesē?’ O le a tatou iloiloina ni auala se iva e mafai ona tatou faaalia ai le alofa “e lē faatagāfai.”

AUALA E FAAALIA AI LE ʻALOFA E ALA I GAOIOIGA MA LE FAAMAONI’

9. O le ā e uunaʻia i tatou e fai ona o le alofa moni?

9 Ia fiafia e faatino galuega e tusa pe e lē o iloa mai e isi. E tatau ona tatou lotomalilie e faatino ni galuega alofa mo o tatou uso i se auala “lilo” e lē iloa mai e isi, pe afai e mafai. (Faitau le Mataio 6:1-4.) E leʻi faia faapena e Anania ma Safaira. Nai lo o le faia o se foaʻi faalilolilo, na la gugutu ma le faamaualuluga e faapea e telē le la foaʻi ma na faasalaina ai i laʻua ona o le fiaamiotonu. (Galu. 5:1-10) I se faaeseesega, o le alofa moni e uunaʻia ai i tatou e auauna atu i o tatou uso e aunoa ma le fia faaalialia, po o le mananaʻo foʻi e amanaʻia i tatou e isi. O se faaaʻoaʻoga, o uso o loo fesoasoani i le Vaega Pule i le saunia o meaʻai faaleagaga, e latou te lē faauaʻi atu tagata iā i latou pe faailoa mai foʻi mataupu na latou galulue ai.

10. E faapefea ona tatou tausolomua e faaaloalo i isi?

10 Ia tausolomua e faaaloalo i isi. (Faitau le Roma 12:10.) Na faataatia e Iesu le faaaʻoaʻoga o le faaaloalo i isi, e ala i le faia o se galuega e sili ona faatauvaa. (Ioa. 13:3-5, 12-15) Atonu e manaʻomia ona tatou taumafai malosi e atiaʻe le lotomaulalo ina ia faaaloalo ai i isi, e ala i le faia o ni galuega faapena. E oo foʻi i aposetolo na faatoʻā malamalama lelei i le faaaʻoaʻoga a Iesu ina ua latou maua le agaga paia. (Ioa. 13:7) E mafai ona tatou faaaloalo i isi e ala i le lē soona faatāua o i tatou lava ona o tulaga tau aʻoaʻoga, tamaoaiga, po o faaeaga i le auaunaga iā Ieova. (Roma 12:3) Nai lo o le matauʻa i ē e viiviia e isi, e tatou te olioli faatasi ma i latou e tusa pe e tatou te manatu, e tatau foʻi ona faaaloalogia pe e viiviia i tatou i se mea lelei na faia.

11. Aiseā e tatau ai ona tatou faamālō atu ma le faamaoni?

11 Ia faamālō atu ma le faamaoni i ou uso. E ao ona tatou saʻili ni avanoa e faamālō atu ai i isi, auā o faaupuga faapena e “lelei e atiaʻe ai.” (Efe. 4:29) E tatau ona tatou faamālō atu ma le faamaoni, auā afai e leai, o lona uiga ua tatou taufaasee i isi pe ʻalofia foʻi lo tatou tiute tauave o le saunia o ni aʻoaʻiga. (Faata. 29:5) E faatagāfai lo tatou alofa pe afai e tatou te faamālō atu i se tasi, ae e tatou te toe faia ona tala pe a liliu mai lona tua. Na ʻalofia e le aposetolo o Paulo lenā mailei ma faataatia se faaaʻoaʻoga lelei i le faaalia o le alofa moni i le faamālō atu i isi. O se faaaʻoaʻoga, na ia faamālō atu ma le faamaoni i Kerisiano i Korinito e tusa ai ma ni gaoioiga na latou faia. (1 Kori. 11:2) Ae ina ua manaʻomia ona aʻoaʻia i latou, na ia faamatala manino atu i se auala agalelei māfuaaga o na aʻoaʻiga.​—1 Kori. 11:20-22.

O le foaʻi atu i uso ma tuafāfine lima vaivai e faaalia ai lo tatou alofa ma le agaga talimālō (Tagaʻi i le palakalafa e 12)

12. E faapefea ona tatou faaalia le alofa moni pe a tatou talimālō i isi?

12 Ia faaalia le agaga talimālō. Ua poloaʻia i tatou e Ieova ia limafoaʻi i o tatou uso ma tuafāfine. (Faitau le 1 Ioane 3:17.) Peitaʻi, e tatau ona saʻo le uunaʻiga e tatou te faia ai faapea, ma ʻalofia so o se uunaʻiga manatu faapito. Ia tatou fesili ifo: ʻPo ou te talimālō tau lava o aʻu uō mamae, uso e iai tofiga, po o ē e mafai ona toe tauia loʻu agalelei? Po o oʻu saʻilia ni avanoa e faaalia ai le limafoaʻi i uso ma tuafāfine ou te lē masani lelei i ai, po o ē e lē mafai ona toe tauia loʻu  agalelei?’ (Luka 14:12-14) Seʻi faapea e iai se Kerisiano ua lē lava le faasoa ona o le lē fuafua lelei o ana tupe faaalu, po o se tasi e lē faafetai mai pe a tatou talimālō i ai. Pe a tutupu na tulaga, e ao ona tatou utagia lenei fautuaga: “Ia faaalia le agaga talimālō o le tasi i le isi e aunoa ma le tomumu.” (1 Pete. 4:9) Pe a e faatatauina lenei fautuaga, o le a faafiafiaina oe ona o lou agaga foaʻi o loo faia ma se uunaʻiga saʻo.​—Galu. 20:35.

13. (a) Aiseā e manaʻomia ai ona tatou faapalepale i ē e vaivai? (e) E faapefea ona tatou fesoasoani i ē e vaivai?

13 Ia fesoasoani i ē e vaivai. E iloa le moni o lo tatou alofa pe a utagia le faatonuga a le Tusi Paia “ia fesoasoani i ē vaivai, ma ia faapalepale i tagata uma.” (1 Tesa. 5:14) E ui lava o le toʻatele o ē na vaivai faaleagaga ua toe malolosi i le faatuatua, ae e iai lava nisi o loo manaʻomia ona faaauau pea ona tatou faapalepale ma fesoasoani i ai. E mafai ona tatou faasoa i ai ni manatu faalaeiau mai le Tusi Paia, valaaulia ina ia tatou galulue faatasi i le talaʻiga, po o le faaavanoa o se taimi e faalogologo atu ai iā i latou. E lē gata i lea, nai lo o le manatu e faapea e “malosi” pe e “vaivai” se uso po o se tuafafine, ia tatou amanaʻia le mea moni e tofu uma i tatou ma itu e malolosi ai ma itu e vaivai ai. E oo foʻi i le aposetolo o Paulo na ia amanaʻia ona lava vaivaiga. (2 Kori. 12:9, 10) O lea, o i tatou uma lava e tatou te manaʻomia le fesoasoani a o tatou uso Kerisiano.

14. O le ā le tele e tatou te taumafai ai ina ia tausia le filemu ma o tatou uso?

14 Ia tausia le filemu. E faia a tatou taumafaiga malolosi ina ia tausia le filemu ma o tatou uso, e tusa pe e tatou te manatu ua faauigasesē a tatou gaoioiga po o se faamatalaga, pe e lē tonu foʻi le auala ua feutagaʻi mai ai nisi iā i tatou. (Faitau le Roma 12:17, 18.) O le faatoese atu e mafai ona faaleleia ai ni faalogona tigā o se isi, ae e tatau ona tatou faatoese atu ma le faamaoni. O se faaaʻoaʻoga, nai lo o le tau ina faapea atu “Ou te faatoese atu iā te oe,” e mafai ona e taʻutino lou sesē ma faapea atu, “Ou te faatoese atu ona ua tigā ou faalogona i laʻu tala na fai.” E matuā tāua le tausia o le filemu i le faaipoipoga. E lē tatau i se ulugalii ona faafoliga atu e fealofani i luma o tagata, ae afai e na o i laʻua e lē fetautalaaʻi, e tautatala i upu malolosi, pe e faasauā foʻi i le isi.

15. E faapefea ona faaalia le moni o lo tatou lotofaamagalo?

15 Ia faamagalo atu ma le lotoatoa. O le faamagalo atu e aofia ai le faamagalo o se tasi na faatigā mai, ma lē toe teulotoina ni faalogona ita i lenā tagata. O le ʻonosaʻi o le tasi i le isi i le alofa, ma matuā naunau e tausia le autasi i le agaga i le fusi o le filemu,’ e mafai ai ona tatou faamagalo atu ma le lotoatoa i ē atonu e lē o iloa na faatigā mai iā i tatou. (Efe. 4:2, 3) Ae ina ia moni lo tatou lotofaamagalo, e tatau ona pulea o tatou mafaufauga ina ia ʻlē faitauina ai mea leaga e fai mai iā i tatou.’ (1 Kori. 13:4, 5) Afai e faaauau ona tatou teuloto ni faalogona ita, e lē gata  e mafai ona faaleagaina ai la tatou faiā ma se uso po o se tuafafine, ae faapea foʻi la tatou faiā ma Ieova. (Mata. 6:14, 15) E mafai foʻi ona faaalia le moni o lo tatou lotofaamagalo e ala i le tatalo mo ē na agasala mai iā i tatou.​—Luka 6:27, 28.

16. O le ā lo tatou manatu e tatau ona iai e faatatau i faaeaga i le auaunaga iā Ieova?

16 Ia faataulaga lo tatou lava lelei. Pe a maua ni o tatou faaeaga i le auaunaga iā Ieova, e ao ona tatou manatu i ai o ni avanoa e faaalia ai le moni o lo tatou alofa e ala i le lē ʻsaʻilia o so tatou lava lelei, a ia faaauau ona saʻili le lelei o isi.’ (1 Kori. 10:24) O se faaaʻoaʻoga, e masani ona vave taunuu uso ua tofia o ni tautua e vaavaaia nofoa i a tatou fonotaga ma tauaofiaga. Nai lo o le manatu i lo latou tofiga o se avanoa lea e taofi ai nofoa e sili ona lelei mo i latou ma o latou aiga, e filifili le toʻatele o nei uso e nonofo i ni nofoa atonu e lē lelei i vaega ua tofia ai i latou. O le faataulaga o lo latou lava lelei, ua faaalia ai e nei uso le alofa lē manatu faapito. E faapefea ona tatou mulimuli i la latou faaaʻoaʻoga lelei?

17. O le ā se gaoioiga e tatau ona faia e se tasi na agasala matuiā?

17 Ia taʻutino ma lafoaʻi agasala faalilolilo. Ua taumafai nisi Kerisiano na faia ni agasala matuiā e ufiufi a latou agasala, ina ia ʻalofia ai le māsiasi po o le faatigā i faalogona o isi. (Faata. 28:13) Peitaʻi, e lē o se gaoioiga alofa le faia faapea, auā e aafia ai le tagata na faia le agasala faapea foʻi ma isi. E mafai ona taofiofia ai le galue o le agaga paia o le Atua i le faapotopotoga, ma lamatia ai le tulaga filemu o le faapotopotoga atoa. (Efe. 4:30) O le alofa moni e uunaʻia ai Kerisiano na faia ni agasala matuiā, e talanoa atu i le ʻautoeaina mo se fesoasoani o loo latou manaʻomia.​—Iako. 5:14, 15.

18. O le ā le tāua o le alofa moni?

18 O le alofa e silisili i isi uiga uma. (1 Kori. 13:13) O le alofa e mātaulia ai i tatou o soo o Iesu ma o ē e faaaʻoaʻo iā Ieova, le Puna o le alofa. (Efe. 5:1, 2) Na tusi Paulo e faapea, ʻPe a leai soʻu alofa, ua ou lē aogā.’ (1 Kori. 13:2) Tau ina ia faaauau ona tatou faaalia le alofa e lē tau “o le upu,” ae e ala foʻi i “gaoioiga ma le faamaoni.”