Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) OKETOPA 2016

Aua Neʻi Galo le Agalelei i Tagata Ese

Aua Neʻi Galo le Agalelei i Tagata Ese

“Aua neʻi galo le agaga talimālō [po o le agalelei i tagata ese].”EPE. 13:2.

PESE: 124, 79

1, 2. (a) O ā luʻi o loo fesagaʻia e le toʻatele o tagata ese i aso nei? (Tagaʻi i le ata i luga aʻe o le matua.) (e) O le ā ua faamanatu mai i le Tusi Paia, ma o ā fesili ua lāgā ai?

I LE silia i le 30 tausaga ua mavae, na siitia ai Osei [1] e lē o se Molimau a Ieova i lenā taimi, mai i Kana ae alu atu i Europa. Na ia taʻua: “E leʻi umi ae ou iloaina e lē ano mai le toʻatele iā te aʻu. Sa faateʻia foʻi aʻu i le tau a le atunuu. Ina ua ou tuua le malae vaalele ma ou faalogoina le mālūlū mo le taimi muamua i loʻu olaga, sa ou tagi.” E silia i le tausaga e leʻi maua se galuega lelei a Osei, ona sa faigatā iā te ia le gagana. Sa ia lagona le tuua toʻatasi ma le misia o lona aiga ona ua mamao ese mai iā i latou.

2 Seʻi mafaufau i le auala e te manaʻo e tali mai ai isi iā te oe pe afai na e iai i lenā tulaga. Pe e te lē talisapaia le faafeiloaʻi ma le māfana o oe i le Maota mo Sauniga, e tusa po o le ā lou atunuu po o le lanu? Ua faalaeiauina i le Tusi Paia Kerisiano moni: “Aua neʻi galo le agaga talimālō [po o le agalelei i tagata ese].” (Epe. 13:2)  O lea seʻi o tatou iloilo fesili nei: O le ā le silafaga a Ieova i tagata ese? Aiseā e ono manaʻomia ai ona sui la tatou vaaiga e faatatau i tagata ese? E faapefea ona tatou fesoasoani iā i latou mai i isi atunuu, ia lagona le talileleia i a tatou faapotopotoga?

LE SILAFAGA A IEOVA I TAGATA ESE

3, 4. E tusa ai o le Esoto 23:9, o le ā le auala na faatalitalia e feutagaʻi ai tagata anamua o le Atua ma tagata ese, ma aiseā?

3 Ina ua uma ona laveaʻi e Ieova ona tagata mai i Aikupito, sa ia tuu atu iā i latou ni tulafono e faaalia ai le manatu mamafa i le toʻatele e lē o ni Isaraelu na aufaatasi ma i latou. (Eso. 12:38, 49; 22:21) E masani lava o tagata mai i isi atunuu e lē tagolima, o lea na faia ai ma le alofa e Ieova ni sauniuniga mo i latou. O se tasi o na sauniuniga o le faataga lea o i latou e ao mai mea mai i le fanua.Levi. 19:9, 10.

4 Nai lo o le faatonu o tagata Isaraelu ia faaaloalo i tagata ese, na talosaga atu Ieova ia faaalia le tigā alofa iā i latou. (Faitau le Esoto 23:9.) Sa iloa e tagata Isaraelu “lagona o le tagata ese.” A o leʻi avea i latou ma pologa, sa teena tagata Eperu e tagata Aikupito ona o le faamaualuluga o Aikupito i lo latou atunuu, po o le lē fiafia foʻi i tapuaʻiga ese. (Kene. 43:32; 46:34; Eso. 1:11-14) Sa matuā faigatā le olaga o tagata Isaraelu a o aumau o ni tagata ese. Peitaʻi, na faatalitalia i latou e Ieova ia feutagaʻi ma tagata ese e pei o ni “tagatānuu” iā i latou.Levi. 19:33, 34.

5. O le ā e fesoasoani iā i tatou e faaatagia atu ai le manatu mamafa o Ieova, i tagata ese mai i isi atunuu?

5 E tatou te mautinoa e manatu mamafa foʻi Ieova i tagata mai i isi atunuu o loo auai i a tatou sauniga. (Teu. 10:17-19; Mala. 3:5, 6) Pe a manatunatu i luʻi o loo latou fesagaʻia, e pei o le faailoga tagata po o le faigatā o le gagana, o le a tatou saʻilia ai ni auala e faaalia ai le agalelei ma le tigā alofa iā i latou.1 Pete. 3:8.

PE E AO ONA SUI LA TATOU VAAIGA I TAGATA ESE?

6, 7. O le ā e faaalia ai na mafai ona manumalo Kerisiano i le uluaʻi senituri, i uiga faailoga tagata na mauaa iā i latou?

6 Sa mafai e Kerisiano i le uluaʻi senituri ona manumalo i uiga faailoga tagata na mauaa i tagata Iutaia. I le Penetekoso 33 T.A., sa faaalia e i latou na nonofo i Ierusalema le agaga talimālō, i tagata faatoʻā liliu i le faa-Kerisiano mai i atunuu eseese. (Galu. 2:5, 44-47) O le agalelei o Kerisiano Iutaia i uso talitonu mai i isi atunuu, na faaalia ai sa latou malamalama i le uiga o le upu “talimālō,” o le agalelei lea i tagata ese.

7 Peitaʻi, a o tuputupu aʻe le uluaʻi faapotopotoga Kerisiano, sa tulaʻi mai se tulaga na aofia ai le faailoga tagata. Na muimui tagata Iutaia e tautatala i le gagana Eleni, ona e leʻi faaaofia o latou fafine ua maliliu a latou tane i le tufatufaina o meaʻai. (Galu. 6:1) Ina ia foʻia lenei faafitauli, na tofia ai e aposetolo tane e toʻafitu ina ia faamautinoa ua aofia uma tagata i le tufatufaina o meaʻai. O nei tane uma na iai o latou igoa Eleni, ma e foliga mai na mananaʻo le ʻauaposetolo ia foʻia so o se feeseeseaʻiga, atonu na iai i le va o uluaʻi Kerisiano ona o le eseese o a latou aganuu.Galu. 6:2-6.

8, 9. (a) O le ā e ono faaalia ai o loo iā i tatou se uiga faailoga tagata pe lotonuu? (e) O le ā e tatau ona liaʻi ese mai i o tatou loto? (1 Pete. 1:22)

8 E tusa pe e tatou te iloaina pe leai, ae e matuā taaʻina i tatou i a tatou aganuu. (Roma 12:2) Atonu foʻi e tatou te faalogo i tuaoi, tagata e tatou te faigaluega pe aʻoʻoga faatasi, o faia ni tala faalumaluma e faatatau i ē e ese aganuu, atunuu, po o lanu. O le ā se aafiaga iā i tatou o na ituaiga manatu faailoga tagata? E faapefea ona tatou tali atu pe a faia e se tasi ni tala ula e faatatau i lo tatou  atunuu, atonu e ala i le soona faatelē o se tala e faatatau i la tatou aganuu?

9 Na umi se taimi o tauivi le aposetolo o Peteru ma uiga faailoga tagata faasaga i ē e lē o ni Iutaia. Peitaʻi, na faasolosolo ona ia liaʻi ese lenā uiga mai i lona loto. (Galu. 10:28, 34, 35; Kala. 2:11-14) Pe afai foʻi e tatou te mātauina ua iā i tatou se lagona faailoga tagata pe lotonuu, e tatau ona taumafai malosi e liaʻi ese mai i o tatou loto. (Faitau le 1 Peteru 1:22.) E tatou te ono manatunatu i le mea moni e faapea, e leai se isi o i tatou e tatau ona mauaina le faaolataga auā o i tatou uma e lē lelei atoatoa, e tusa lava po o le ā lo tatou atunuu. (Roma 3:9, 10, 21-24) Aiseā la e tatou te manatu ai e sili atu i tatou nai lo o isi? (1 Kori. 4:7) E tatau ona pei la tatou vaaiga o le vaaiga a le aposetolo o Paulo, o lē na apoapoaʻi atu i ona uso Kerisiano faauuina ʻua lē o toe tagata ese i latou po o ē ua aumau, a ua avea ma tagata o le aiga o le Atua.’ (Efe. 2:19) O le taumafai malosi e liaʻi ese manatu faailoga tagata e faatatau i ē e ese o latou atunuu, o le a fesoasoani iā i tatou e oofu ai i le tagata fou.Kolo. 3:10, 11.

AUALA E FAAALIA AI LE AGALELEI I TAGATA ESE

10, 11. Na faapefea ona faaatagia atu e Poasa le silafaga a Ieova i tagata ese, i le auala na la feutagaʻi ai ma Ruta le Moapi?

10 E mautinoa sa faaatagia atu e Poasa le silafaga a Ieova i tagata ese, i le auala na la feutagaʻi ai ma Ruta le Moapi. Ina ua sau Poasa e asiasi lona fanua i le taimi o le seleselega, sa ia mātauina se fafine ese e galue malosi o loo ia aoina karite e mulimuli atu i ē e selesele. Ina ua faalogo Poasa na talosaga lenei fafine mo se faatagaga e ao ai karite, e ui lava sa iai lana aiā e faia ai faapea, sa faataga ma le agalelei e Poasa o ia e ao karite, ma fai atu i lana ʻaufaigaluega ia to mai ni karite mai i faaputuga ma tuu atu e ao e ia.Faitau le Ruta 2:5-7, 15, 16.

11 E faaalia mai i la laʻua talanoaga mulimuli ane, sa matuā manatu mamafa Poasa iā Ruta ma lona tulaga faigatā o se tagata ese. Sa ia valaaulia Ruta e faalatalata i ana auauna fafine, ina ia aua ai neʻi faileagaina o ia e tauleleʻa na galulue i le fanua. Sa faamautinoa foʻi e Poasa e lava lelei meaʻai ma vai e maua e Ruta, e pei lava foʻi o lana ʻaufaigaluega. E lē gata i lea, e leʻi tautala faatauvaa Poasa i lenei fafine ese e mativa, ae sa ia faamāfanafana atu iā te ia.Ruta 2:8-10, 13, 14.

12. O le ā se aafiaga lelei o le faaalia o le agalelei i tagata ese?

12 E lē gata na faagaeetia Poasa i le alofa lē manatu faapito o Ruta iā Naomi le tinā o lana tane, ae na maofa foʻi i le avea o Ruta ma sē e tapuaʻi iā Ieova. O le agalelei o Poasa, o se faailoaga lenā o le alofa faamaoni o Ieova i se fafine na ʻsulufaʻi i lalo o apaʻau o le Atua o Isaraelu.’ (Ruta 2:12, 20; Faata. 19:17) I aso foʻi nei, o a tatou gaoioiga agalelei e mafai ona fesoasoani i “ituaiga uma o tagata,” ia iloa le upu moni ma lagona le alofa o Ieova iā i latou.1 Timo. 2:3, 4.

Pe e tatou te faafeiloaʻi ma le māfana i latou faatoʻā siitia mai i isi atunuu pe a taunuu i le Maota mo Sauniga? (Tagaʻi i le palakalafa e 13, 14)

13, 14. (a) Aiseā e tatau ai ona tatou taumafai malosi e faafeiloaʻi tagata ese i le Maota mo Sauniga? (e) E faapefea ona e foʻia faalogona o le faigatā ona talanoa atu i tagata e ese a latou aganuu?

13 E mafai ona tatou faaalia le agalelei i tagata ese faatoʻā siitia mai i isi atunuu, e ala i le faafeiloaʻi ma le māfana o i latou i le Maota mo Sauniga. E tatou te ono mātauina i nisi taimi e matamumuli ē fou mai i isi atunuu, ma e nonofo na o i latou. Talu ai o le auala na ola aʻe ai po o lo latou tulaga tau tamaoaiga, e latou te ono manatu ai e faatauvaa i latou nai lo o tagata o isi atunuu po o lanu. O lea, ia tatou tausolomua e faaalia le naunau moni ma le māfana iā i latou. E mafai ona fesoasoani iā te oe le polokalame o le JW Language, e aʻoaʻo ai le auala e faafeiloaʻi ai tagata faatoʻā siitia mai i isi atunuu i a latou lava gagana.—Faitau le Filipi 2:3, 4.

 14 Atonu e faigatā ona e talanoa atu iā i latou e ese a latou aganuu. Ina ia foʻia na faalogona, e mafai ona e faamatala atu iā i latou se mea e faatatau iā te oe. O le a e iloa ai e tele atu mea e tou te tutusa ai nai lo o mea e eseese ai, ma o aganuu uma lava e iai itu lelei ma itu lē lelei.

FESOASOANI I TAGATA UMA IA LAGONA O LOO TALILELEIA I LATOU

15. O le ā e fesoasoani iā i tatou ina ia malamalama atili ai e faatatau i ē o loo tau faamasani i se atunuu fou?

15 Ina ia fesoasoani i isi e lagona o loo talileleia i latou i le faapotopotoga, ia fesili ifo iā te oe, ʻPe ana faapea o aʻu lea ou te i le isi atunuu, o le ā le auala ou te manaʻo e feutagaʻi mai ai isi iā te aʻu?’ (Mata. 7:12) Ia onosaʻi iā i latou o loo taumafai e faamasani i se atunuu fou. Atonu i le taimi muamua e tatou te lē malamalama lelei i o latou mafaufauga po o le auala e tali mai ai. Ae nai lo o le faatalitalia o i latou e talia la tatou aganuu, aiseā e lē talia ai i latou e tusa ma o latou tulaga o loo iai?—Faitau le Roma 15:7.

16, 17. (a) O ā mea e mafai ona tatou faia ina ia vavalalata atu ai iā i latou e ese aganuu? (e) O ā ni auala talafeagai e mafai ona tatou fesoasoani ai i ē mai i isi atunuu o loo i le faapotopotoga?

16 O lo tatou iloa e faatatau i atunuu ma aganuu a isi, o le a faigofie ai ona tatou talanoa atu iā i latou. I la tatou tapuaʻiga a le aiga, ia faaaofia ai se taimi e fai ai ni saʻiliʻiliga e faatatau i aganuu a tagata faatoʻā siitia mai i le faapotopotoga po o le oganuu. O se isi auala e vavalalata ai i ē e ese o latou atunuu, o le valaaulia lea o i latou i o tatou fale mo se taumafataga. Talu ai ua “tatalaina [e Ieova] le faitotoʻa o le faatuatua mo nuu ese,” pe e lē mafai foʻi la ona tatala atu o tatou faitotoʻa i tagata ese e “tatou te aiga i le faatuatua”?Galu. 14:27; Kala. 6:10; Iopu 31:32.

Pe e tatou te faaalia le agaga talimālō iā i latou faatoʻā siitia mai i isi atunuu? (Tagaʻi i le palakalafa e 16, 17)

17 O le faaalu o se taimi faatasi ma se aiga mai i se isi atunuu, o le a tatou talisapaia ai a latou taumafaiga fitā ina ia faamasani i la  tatou aganuu. E tatou te ono mātauina ai o loo latou manaʻomia se fesoasoani i le aʻoaʻoina o le gagana. E mafai foʻi ona tatou faasino i latou i faalapotopotoga e fesoasoani ina ia maua ni o latou fale ma galuega. O le faia faapea e matuā aogā i le olaga o se uso talitonu.Faata. 3:27.

18. O le ā le faaaʻoaʻoga o le faaaloalo ma le lotofaafetai e mafai ona faaaʻoaʻo i ai i latou mai i isi atunuu?

18 Peitaʻi, e ao iā i latou mai i isi atunuu ona fai le mea sili e mafai ina ia faamasani ai i le aganuu a se atunuu fou. Sa faataatia e Ruta se faaaʻoaʻoga lelei o lenei vala. Muamua, sa ia faaalia le faaaloalo i le aganuu a lona atunuu fou, e ala i le talosagaina o se faatagaga e ao ai karite. (Ruta 2:7) E leʻi manatu māmā o ia i lenei tulaga ona e faapea e iai lana aiā e faia ai. Lua, sa ia faailoa atu lona lotofaafetai mo le agalelei na faaalia iā te ia. (Ruta 2:13) Pe a faaalia e i latou mai i isi atunuu na uiga lelei, o le a faaaloalogia i latou e tagata ma uso talitonu i lea atunuu.

19. O ā māfuaaga e ao ai ona tatou talia ma le fiafia tagata ese o loo aufaatasi ma i tatou?

19 E tatou te fiafia ona o le agalelei faifua o Ieova, ua faataga ai tagata mai i atunuu uma ina ia faalogo i le tala lelei. Atonu e leʻi mafai ona fai ni a latou suʻesuʻega faale-Tusi Paia pe auaufaatasi ma tagata o Ieova i o latou atunuu. Ae o lea ua latou maua le avanoa e auaufaatasi ai ma i tatou. Pe e lē tatau la ona tatou fesoasoani iā i latou ina ia aua neʻi manatu o loo tatou faaesea i latou? E tusa pe e lē tele ni a tatou meafaitino po o se fesoasoani e saunia atu, ae o lo tatou agalelei iā i latou e faaatagia atu ai le alofa o Ieova iā i latou. O lea, i le avea ai ma ē e “faaaʻoaʻo i le Atua,” seʻi o tatou fai le mea sili e tatou te mafai, ina ia talia ai ma le fiafia tagata ese o loo aufaatasi ma i tatou.Efe. 5:1, 2.

^ [1] (palakalafa 1) Ua suia le igoa.