Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) NOVEMA 2016

Ua Latou Saʻoloto Mai i Lotu Sesē

Ua Latou Saʻoloto Mai i Lotu Sesē

“Loʻu nuu e, ia outou ō ese mai iā te ia.”FAAA. 18:4.

PESE: 72, 82

1. E faapefea ona tatou iloa o le a saʻoloto tagata o le Atua mai i Papelonia le Aai Tele, ma o ā fesili o le a tatou iloiloina?

I LE mataupu ua mavae, na tatou aʻoaʻoina ai le auala na saisaitia ai Kerisiano faamaoni i Papelonia le Aai Tele. Ae o le mea e fiafia ai, e lē faaauau ona iai Kerisiano i lenā tulaga. O le poloaʻiga lenei a le Atua: “Loʻu nuu e, ia outou ō ese mai iā te ia.” (Faitau le Faaaliga 18:4.) O le a leai se uiga o lenei poloaʻiga, pe afai e leai se tasi e mafai ona saʻoloto mai i taaʻiga a le emepaea o lotu sesē i le lalolagi aoao. E tatou te naunau ia iloa po o anafea na saʻoloto atoatoa ai tagata o le Atua mai i le saisaitia ai i Papelonia! Peitaʻi e tatau ona tatou taliina muamua fesili nei: O le ā na faia e Tagata Aʻoga o le Tusi Paia e tusa ai ma Papelonia le Aai Tele, a o lumanaʻi le 1914? Na faapeʻī le maelega o o tatou uso i le galuega talaʻi, a o faagasolo le Taua Muamua a le Lalolagi? Pe e iai se sootaga o lo latou manaʻomia o faasaʻoga a o faagasolo lenā taimi, ma lo latou saisaitia ai i Papelonia?

“LE PAʻŪ O PAPELONIA”

2. O le ā na filifili uluaʻi Tagata Aʻoga o le Tusi Paia e fai e tusa ai ma lotu sesē?

2 I le tele o tausaga a o lumanaʻi le Taua Muamua a le Lalolagi,  na iloa ai e Charles Taze Russell ma ana aumea, e lē o aʻoaʻoina e lotu ua faapea mai o Kerisiano, upu moni o le Tusi Paia. O lea na latou filifili ai e lē toe iai sa latou vaega e faia i lotu sesē. Iā Novema 1879, na faamatala tuusaʻo ai i le Zion’s Watch Tower lo latou tulaga e faavae mai i le Tusi Paia: “O lotu uma e faapea mai o se taupou mamā ua avea ma faletua o Keriso, ae o le mea moni o loo aufaatasi ma lagolagoina e le lalolagi (manufeʻai), e tatau ona tatou taʻusalaina o se lotu talitane e pei ona taʻua ai i le Tusi Paia,” o se taʻu e faasino atu iā Papelonia le Aai Tele.—Faitau le Faaaliga 17:1, 2.

3. O le ā le gaoioiga maumauaʻi na faia e Tagata Aʻoga o le Tusi Paia, e faaalia ai na latou iloa e tatau ona vavaeese mai i lotu sesē? (Tagaʻi i le ata i luga aʻe o le matua.)

3 Na iloa e tane ma fafine e matataʻu i le Atua le mea e tatau ona latou faia. E lē mafai ona latou maua faamanuiaga a le Atua, pe afai e faaauau ona latou lagolagoina lotu sesē. O lea na faia ai e le toʻatele o Tagata Aʻoga o le Tusi Paia, ni tusi e faamavae ai mai i lotu na latou auai ai. Na faitau atu e nisi a latou tusi faamavae a o faalogologo le ʻaulotu. I vaipanoa na faasā ai le faia faapea, na faaoo atu e nisi kopi o a latou tusi i sui taʻitasi o le lotu. E latou te leʻi mananaʻo e toe iai ni a latou fesootaʻiga ma lotu sesē! I tausaga muamua atu, o lenei gaoioiga lototele na matuā lamatia ai o latou ola. Peitaʻi, e oo ane i le 1870, ua amata ona lē toe lagolagoina lotu e faigāmalo i le tele o atunuu. Nai lo o le fefefe ina neʻi faasalaina i na atunuu, na saʻoloto tagata e talanoa i mataupu e faatatau i lotu, ma faailoa atu lo latou lē lagolagoina o lotu.

4. A o faagasolo le Taua Muamua a le Lalolagi, o le ā le vaaiga a Tagata Aʻoga o le Tusi Paia e faatatau iā Papelonia le Aai Tele?

4 Na iloa e Tagata Aʻoga o le Tusi Paia e lē lava le tau ina faailoa atu i o latou tauaiga, uō vavalalata, ma tagata o lotu, ua latou vavaeese mai i lotu sesē. Na manaʻomia ona iloa e le lalolagi atoa le tulaga moni o Papelonia le Aai tele, o lotu ua faatusaina i se fafine talitane! O lea, iā Tesema 1917 e oo i le amataga o le 1918, na maelega ai le faitau afe o Tagata Aʻoga o le Tusi Paia, e tufatufa atu kopi e 10,000,000 o le sāvali, “Le Paʻū o Papelonia” (The Fall of Babylon). O lenei sāvali na faaalialia ai ma le lototele le mea moni e faatatau i lotu ua faapea mai o Kerisiano. Seʻi manatu i le matuā feita o taʻitaʻi lotu, ae e leʻi faavaivai ai Tagata Aʻoga o le Tusi Paia mai i le faia pea o lenei galuega tāua. Sa latou maumauaʻi e usiusitaʻi “i le Atua o le pule, nai lo o tagata.” (Galu. 5:29) O le ā ua tatou iloa mai ai i inei? Ua faaalia mai ai e leʻi saisaitia nei tane ma fafine Kerisiano iā Papelonia le Aai Tele a o faagasolo le taua, ae ua faasolo ina latou saʻoloto mai i lotu sesē ma fesoasoani i isi ina ia faia foʻi faapea.

MAELEGA I LE TAIMI O LE TAUA MUAMUA A LE LALOLAGI

5. Aiseā e tatou te faapea atu ai na matuā maelega le ʻauuso a o faagasolo le Taua Muamua a le Lalolagi?

5 I tausaga ua teʻa, na tatou talitonu ai e leʻi fiafia le finagalo o Ieova i ona tagata, ona e latou te leʻi maelega i le galuega talaʻi a o faagasolo le Taua Muamua a le Lalolagi. Na tatou manatu o le māfuaaga lenā na faataga ai e Ieova Papelonia le Aai Tele e saisaitia ona tagata mo se taimi puupuu. Peitaʻi, na faamatala mulimuli ane e uso ma tuafāfine faamaoni na auauna i le Atua a o faagasolo le 1914-1918, i le avea ai o se vaega, na faia e tagata o le Atua mea uma e gata ai lo latou mafai ina ia faaauau ai le galuega talaʻi. E iai faamaoniga maumaututū o lenei manatu. O le malamalama lelei i  mea na tutupu i Tagata Aʻoga o le Tusi Paia a o faagasolo lenā taimi, e fesoasoani iā i tatou e manino lelei ai i nisi o mea na tutupu o loo faamauina i le Tusi Paia.

6, 7. (a) O ā luʻi na fesagaʻia e Tagata Aʻoga o le Tusi Paia a o faagasolo le Taua Muamua a le Lalolagi? (e) Aumai ni faaaʻoaʻoga o le maelega o Tagata Aʻoga o le Tusi Paia.

6 O le mea moni, na faia e Tagata Aʻoga o le Tusi Paia na soifua a o faagasolo le Taua Muamua a le Lalolagi (1914-1918), se molimau tele i lenā taimi. E leʻi faigofie ona latou faia faapea, ona o nisi o māfuaaga. O le a tatou talanoaina ni māfuaaga se lua. Muamua, o le galuega autū i lenā taimi sa aofia ai le tufatufaina atu o lomiga faale-Tusi Paia. Ina ua faasā e taʻitaʻi o malo le tufatufaina o le tusi The Finished Mystery i le amataga o le 1918, na faigatā mo le toʻatele o uso ona fai le galuega talaʻi. O le taimi lea e latou te leʻi masani e faaaogā na o le Tusi Paia i le galuega talaʻi, auā sa latou faalagolago i le tusi The Finished Mystery e faamatala atu ai le upu moni. O le māfuaaga lona lua, ona o le pepesi o le fulū Sepania i le 1918. O le pepesi o lenei faamaʻi oti na faigatā ai i le ʻautalaʻi ona faimalaga solo ma talaʻi atu. Peitaʻi, e ui lava i nei luʻi ma isi tulaga faigatā, ae na faia e Tagata Aʻoga o le Tusi Paia o se vaega, le mea e gata ai lo latou mafai ina ia faaauau le galuega talaʻi.

Na matuā maelega Tagata Aʻoga o le Tusi Paia! (Tagaʻi i le palakalafa e 6, 7)

7 I le 1914, na faaali ai e se vaega toʻaitiiti o Tagata Aʻoga o le Tusi Paia le “Photo Drama of Creation” (Ata o le Foafoaga), i le silia i le 9,000,000 tagata. O lenei ata o se tuufaatasiga o ata gaoioi ma ata e lē gaoioi e iai leo, na faamatala ai le talafaasolopito o le tagata mai lava i le taimi o le foafoaga seʻia oo i le iʻuga o le Afe Tausaga. E matuā mataʻina lenei tulaga. Seʻi manatu i ai, e toʻatele atu le aofaʻi o tagata na matamata i lenā ata i le 1914, nai lo o le aofaʻi o le ʻautalaʻi o le Malo i le lalolagi aoao i aso nei! Ua faailoa mai foʻi i lipoti, e 809,393 ē na auai i sauniga i le Iunaite Setete i le 1916, ma na siitia lenā aofaʻi i le 949,444 i le 1918. Sa matuā maelega na Tagata Aʻoga o le Tusi Paia!

8. Na faapefea ona tausia manaʻoga faaleagaga o uso a o faagasolo le Taua Muamua a le Lalolagi?

8 A o faagasolo le Taua Muamua a le Lalolagi, na faia taumafaiga uma ina ia saunia pea meaʻai faaleagaga ma faalaeiauga mo Tagata Aʻoga uma o le Tusi Paia. O nei sauniuniga na faamalosia ai uso ia faaauau  i le galuega talaʻi. Na taʻua e Richard H. Barber, o se tagata talaʻi maelega i lenā taimi: “Na mafai pea ona matou aauina atu nisi o ovasia femalagaaʻi, faaauau ona tufatufa atu le lomiga The Watch Tower, ma auina atu i Kanata lea sa faasā ai. Na mafai ona ou lafoina atu kopi ua faalaiti o le tusi The Finished Mystery i nisi o uō na fāoa faamalosi a latou tusi. Na talosaga mai foʻi le uso o Rutherford ia faatulaga ni tauaofiaga i nisi o aai i le itu i sisifo o le Iunaite Setete, ma auina atu failauga ina ia taumafai e faalaeiau le ʻauuso.”

MANAʻOMIA NI FAASAʻOGA

9. (a) Aiseā na manaʻomia ai e tagata o le Atua ni faasaʻoga mai i le 1914-1919? (e) O le ā e leʻi uiga atu i ai lo latou manaʻomia o ni faasaʻoga?

9 E lē o mea uma na faia e Tagata Aʻoga o le Tusi Paia mai i le 1914-1919, na ōgatusa ma mataupu silisili o le Tusi Paia. E ui i lo latou faamaoni, ae e lē o taimi uma na saʻo ai o latou manatu e faatatau i le gauaʻi i pule o malo. (Roma 13:1) O lea, i le avea ai o se vaega, e lē o taimi uma na latou solitū ai i faigātaua. O se faataʻitaʻiga, ina ua poloaʻia e le peresitene o le Iunaite Setete e avea le aso 30 o Me, 1918, e fai ma aso tatalo mo le filemu, na uunaʻia i le Watch Tower Tagata Aʻoga o le Tusi Paia ina ia auai i lenā aso tatalo. O nisi o uso na latou avatu ni fesoasoani tau tupe ina ia lagolagoina ai le taua, ma na iai nisi o uso na auai i le taua ma tauave auupega. E ui i nei tulaga, ae e lē tatau ai ona tatou manatu e faapea na saisaitia i latou i Papelonia le Aai Tele ona na latou manaʻomia ni faasaʻoga. Nai lo o lea, na latou malamalama e tatau ona vavaeese mai i lotu sesē, ma na toetoe lava a latou saʻoloto atoatoa mai i lenā emepaea, a o faagasolo le Taua Muamua a le Lalolagi.—Faitau le Luka 12:47, 48.

10. O le ā na maumauaʻi Tagata Aʻoga o le Tusi Paia e fai ona o le paia o le ola?

10 E leʻi malamalama atoatoa Tagata Aʻoga o le Tusi Paia i vala uma o le solitū faa-Kerisiano, e pei ona tatou manino ai i aso nei. Peitaʻi, na latou iloa lelei e faasā i le Tusi Paia le fasioti tagata. E ui lava la na iai uso na auai i le Taua Muamua a le Lalolagi ma tauave auupega, ae na latou maumauaʻi e lē faaaogāina na auupega ina ia fasioti ai isi tagata. O nisi o i latou nei na faapito i luma i le taua, ma le faamoemoe o le a fasiotia ai i latou.

11. O le ā le tali atu a taʻitaʻi o malo ina ua mumusu Tagata Aʻoga o le Tusi Paia e auai i vaegaʻau?

11 Na matuā ita le Tiapolo ona o le solitū o uso i le taimi o le taua, e ui lava e latou te leʻi solitū atoatoa. O le iʻuga, na ia faapogaia ai “faalavelave e ala i le poloaʻiga.” (Sala. 94:20) Na faailoa atu e James Franklin Bell, o se taʻitaʻiʻau i le vaegaʻau a le Iunaite Setete, i la latou talanoaga ma le uso o J. F. Rutherford ma W. E. Van Amburgh e faapea, na taumafai le Matagaluega o Faamasinoga a le Iunaite Setete e faatū atu se tulafono i le Fono Faitulafono, e faataga ai le faasalaga oti mo i latou e mumusu e auai i vaegaʻau. Sa faasino tonu atu lana faamatalaga i Tagata Aʻoga o le Tusi Paia. Na matuā ita James ma faapea atu i le uso o Rutherford: “E leʻi pasia lenā tulafono ona na taofi e Wilson [Peresitene o le Iunaite Setete]; ae e matou te iloa le auala e maua ai outou, ma o le mea lenā o le a matou faia!”

12, 13. (a) Aiseā na tuuina atu ai le faasalaga i uso e toʻavalu ina ia faafalepuipui mo se taimi umi? (e) Pe na mou atu lo latou maumauaʻi e usiusitaʻi iā Ieova ina ua faafalepuipuiina? Faamatala.

12 Na taulau lava le faamataʻu atu a taʻitaʻi o le malo ina ua molia le uso o Rutherford, Van Amburgh, ma isi e toʻaono, o sui o le Sosaiete o le Olomatamata. Ina ua lau  lo latou faasalaga, na faapea atu le faamasino: “O le lotu o loo auai ai nei tamāloloa, e sili atu ona mataʻutia nai lo o se vaega o fitafita a Siamani . . . E lē gata e latou te tetee i le malo, tetee i le vaegaau, ae ua latou taʻuleaga foʻi faifeʻau uma o lotu uma. E tatau ona mamafa lo latou faasalaga.” (Faith on the March, itu. 99, tusia e A. H. Macmillan) O le iʻuga, na tuuina atu le faasalaga ia faafalepuipui sui e toʻavalu o Tagata Aʻoga o le Tusi Paia mo se taimi umi, i Atlanta i Georgia. Peitaʻi, ina ua māeʻa le taua, na toe tatala i latou ma faalēaogāina moliaga e faasaga iā i latou.

13 E ui lava sa latou iai i le falepuipui, ae sa maumauaʻi nei tane e toʻavalu e usiusitaʻi i tulafono a le Atua. E faapefea ona tatou iloa? Na latou tusi atu i le peresitene o le Iunaite Setete mo se faatagaga ina ia faasaʻoloto ai i latou. I la latou tusi, na latou taʻua ai ua taʻu mai e le Tusi Paia iā i latou e aua le fasioti tagata. O so o se tasi lava la ua tuuina atu i le Atua ae lē usitaʻi ma le loto i ai iā te ia, e na te lē maua le finagalo malie o le Atua ma o le a faaumatia. Na latou faamatala atu o le māfuaaga lenā e lē mafai ai ona latou fasiotia se tagata, ma o le a latou lē faia lava faapea. Maʻeu lo latou lototetele e tusi atu i le peresitene! E mautinoa sa maumauaʻi uso e usiusitaʻi iā Ieova.

UA IʻU INA FAASAʻOLOTOINA

14. Faamatala mai i le Tusi Paia mea na tutupu mai i le 1914-1919.

14 O loo faamatala i le Malaki 3:1-3, le vaitaimi mai i le 1914 seʻia oo i le amataga o le 1919, o le taimi mo le faamamāina o le ʻaufaauuina o “atalii o Levi.” (Faitau.) A o faagasolo lenā taimi, na asia ai e Ieova le Atua o “le Alii moni,” faatasi ma Iesu Keriso “o le avefeʻau o le feagaiga,” le malumalu faaleagaga ina ia asiasia i latou o loo auauna ai. Ina ua māeʻa lo latou mauaina o faasaʻoga manaʻomia, na nofosauni tagata o Ieova ua faamamāina e faatino nisi faaeaga i le auaunaga. I le 1919, na tofia ai le “pologa faamaoni ma le faautauta” e saunia meaʻai faaleagaga mo le aiga o le faatuatua. (Mata. 24:45) O le taimi loa lenā na saʻoloto ai tagata o le Atua mai i taaʻiga uma a Papelonia le Aai Tele. Talu mai lenā taimi, ona o le agalelei faifua o Ieova ua faaauau ai ona faatuputeleina lo latou poto e faatatau i le finagalo o le Atua, ma lo latou alofa mo lo latou Tamā o i le lagi. Maʻeu lo latou lotofaafetai ona o lenei faamanuiaga! [1]

15. E faapefea i lo tatou saʻoloto mai i Papelonia le Aai Tele ona aafia ai i tatou?

15 O se fiafiaga sili le saʻoloto mai i Papelonia le Aai Tele! Ua matuā lē taulau taumafaiga a Satani ina ia tafiesea atoatoa Kerisiano moni mai i le lalolagi. Peitaʻi, e tatau ona tatou manatua le māfuaaga ua faasaʻoloto ai i tatou e Ieova. O lona finagalo ina ia faasaoina tagata uma. (2 Kori. 6:1) E anoanoaʻi tagata lotofaamaoni o loo saisaitia pea i lotu sesē. E manaʻomia ona faailoa atu iā i latou le auala e saʻoloto ai, ma e mafai ona tatou fesoasoani iā i latou. O lea, o le a tatou faia mea uma ina ia fesoasoani ai iā i latou e maua le saʻolotoga, a o tatou faaaʻoaʻo i o tatou uso i le senituri ua mavae!

^ [1] (palakalafa e 14) E tele vala e talitutusa ai le faaaunuua o tagata Iutaia i Papelonia mo le 70 tausaga, ma le tulaga na oo i Kerisiano ina ua aliaʻe mai i latou na fulitua i le upu moni. Peitaʻi, o le faaaunuua ai o tagata Iutaia e lē o se faaataga faavaloaga lea o le mea na oo i Kerisiano. O se tasi o mea e eseese ai, o le umi na saisaitia ai. E lē tatau ona tatou taumafai e fai ni faatusatusaga faavaloaga o faamatalaga taʻitasi o mea na tutupu a o faaaunuua tagata Iutaia, e peiseaʻī o loo faatatau atu i mea na tutupu i Kerisiano faauuina i tausaga a o lumanaʻi le 1919.