Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) NOVEMA 2016

Pe E te Matuā Faatāua le Afioga a Ieova?

Pe E te Matuā Faatāua le Afioga a Ieova?

ʻIna ua outou maua le afioga a le Atua, ona outou talia lea, o le mea moni, o le afioga a le Atua.’1 TESA. 2:13.

PESE: 96, 94

1-3. O le ā atonu na māfua ai faafitauli i le va o Evotia ma Sunetui, ma e mafai faapefea ona tatou ʻalofia faafitauli faapea? (Tagaʻi i le ata i luga aʻe o le matua.)

E MATUĀ faatāua e auauna a Ieova lana Afioga, le Tusi Paia. Talu ai e tatou te lē lelei atoatoa, o i tatou uma lava la e tatou te maua ni fautuaga mai i le Tusi Paia. O le ā le auala e tatou te tali atu ai i na fautuaga? Seʻi manatu iā Evotia ma Sunetui, o ni Kerisiano i le uluaʻi senituri. Sa iai ni faafitauli matuiā i le va o nei fafine faauuina. O ā na faafitauli? E lē o taʻua mai i le Tusi Paia. Peitaʻi, seʻi faapea o le mea lenei na tupu.

2 Seʻi faapea na valaaulia e Evotia ni uso ma tuafāfine i lona fale mo se taumafataga ma latou fiafia faatasi ai. E leʻi valaaulia Sunetui, ae na faalogo na fiafia i latou uma sa iai i lenā faatasiga. Atonu na faapea ifo Sunetui: ʻOu te ofo i le lē valaaulia o aʻu e Evotia. Na ou faapea o ia o saʻu uō lelei.’ O le lē fiafia o Sunetui, na amata ai ona ia lē toe talitonuina Evotia ma masalosalo iā te ia. O lea na faatulaga ai e Sunetui se faatasiga ma toe valaaulia ai uso ma tuafāfine lava ia, ae e leʻi valaauliaina Evotia. O lenei faafitauli i le va o Evotia ma Sunetui, sa ono saveʻu ai le filemu o  le faapotopotoga atoa. E lē o taʻuina mai i le Tusi Paia le iʻuga na oo i ai, ae atonu na talia e nei tuafāfine le fautuaga alofa a le aposetolo o Paulo.Fili. 4:2, 3.

3 E iai taimi e tulaʻi mai ai faafitauli faapea i totonu o faapotopotoga o tagata o Ieova i aso nei. Peitaʻi, e mafai ona foʻia pe ʻalofia na faafitauli pe afai e tatou te faatatauina fautuaga o loo i le Afioga a le Atua, le Tusi Paia. Pe afai foʻi e tatou te matuā faatāuaina le Afioga a Ieova, o le a tatou ola la e tusa ma faatonuga o loo iai.Sala. 27:11.

LE AFIOGA A LE ATUA MA O TATOU FAALOGONA

4, 5. O le ā le fautuaga i le Afioga a le Atua e faatatau i le pulea o o tatou faalogona?

4 E lē faigofie ona pulea o tatou faalogona pe a manatu ua lē amanaʻia i tatou, pe e lē tonu le auala e feutagaʻi mai ai se isi iā i tatou. E lagona le tigā pe a faileagaina i tatou ona o o tatou atunuu, lanu, po o foliga vaaia. Ae e sili atu ona tigā pe afai o se uso po o se tuafafine lea e na te faia mai nei tulaga! Po o iai i le Afioga a le Atua ni fautuaga e fesoasoani iā i tatou, pe a feagai ma nei tulaga ona o le tino lē lelei atoatoa?

5 Ua mātauina e Ieova faiā faaletagata talu mai le amataga o le tagata. E na te mātauina o tatou faalogona ma gaoioiga. O o tatou mafaufauga ma faalogona ita, e māfua ai ona faia ni faamatalaga po o ni gaoioiga e tatou te toe salamō ai. Maʻeu le atamai o le faatatau o le fautuaga a le Tusi Paia, ia pulea lo tatou ita ma ʻalofia le vave tigā o le loto! (Faitau le Faataoto 16:32; Failauga 7:9.) E mautinoa o i tatou uma e manaʻomia ona taumafai e ʻalofia le maʻaleʻalegofie o o tatou faalogona, ma ia faaalia atili le lotofaamagalo. E tāua tele iā Ieova ma Iesu le faamagalo atu. (Mata. 6:14, 15) Pe e manaʻomia ona faaleleia lo tatou uiga o le lotofaamagalo ma pulea o tatou faalogona?

6. Aiseā e tatau ai ona tatou leoleo faasaga i le loto ita?

6 O tagata e lē puleaina o latou faalogona, e masani ona maua i le loto ita. O le iʻuga, e lē mananaʻo isi e faifaimea faatasi ma i latou. E mafai ona avea se tagata loto ita ma taaʻiga leaga i totonu o le faapotopotoga. Atonu e taumafai e nanā lona ita po o lona ʻinoʻino, peitaʻi o le a ʻfaaalialia i le faapotopotoga’ ni manatu lē lelei o loo i lona loto. (Faata. 26:24-26) E ono mafai ona fesoasoani toeaina i lenā tagata ia iloa o le loto ita, ʻinoʻino, ma le teuloto o faalogona lē fiafia i isi, o ni uiga e lē taliaina i le faalapotopotoga a le Atua. O loo manino le Afioga a Ieova e faatatau i lenei manatu. (Levi. 19:17, 18; Roma 3:11-18) Pe e te ioe i lenei manatu?

MANATUA LE AUALA O LOO TAʻITAʻIA AI I TATOU

7, 8. (a) O le ā le auala o loo taʻitaʻia ai e Ieova le vaega faalelalolagi o lana faalapotopotoga? (e) O ā nisi o faatonuga o loo maua i le Afioga a le Atua, ma aiseā e tatau ai ona tatou usitaʻia?

7 O loo taʻitaʻia ma fafaga e Ieova i latou o loo i le vaega faalelalolagi o lana faalapotopotoga, e ala mai i le “pologa faamaoni ma le faautauta” lea e taʻitaʻia e Keriso, “o le ulu ia o le faapotopotoga.” (Mata. 24:45-47; Efe. 5:23) I le pei o le vaega pule i le uluaʻi senituri, e talia ma matuā faatāua e lenei pologa afioga po o feʻau mai i le Atua. (Faitau le 1 Tesalonia 2:13.) O ā nisi o taʻiala po o faatonuga ua saunia mai i le Tusi Paia mo lo tatou lelei?

8 O loo faatonuina i tatou i le Tusi Paia ia auai e lē aunoa i sauniga. (Epe. 10:24, 25) O loo faalaeiau mai foʻi ia tatou autasi i talitonuga. (1 Kori. 1:10) Ua taʻu mai i le Afioga a le Atua ia faamuamua le Malo i o tatou olaga. (Mata. 6:33) O loo faamamafa mai foʻi i le Tusi Paia lo tatou tiute ma le faaeaga o le talaʻi mai lea fale i lea fale, i nofoaga  faitele, ma talaʻi lē fuafuaina. (Mata. 28:19, 20; Galu. 5:42; 17:17; 20:20) Ua faatonuina i le Afioga a le Atua toeaina Kerisiano ia tausia le mamā o lana faalapotopotoga. (1 Kori. 5:1-5, 13; 1 Timo. 5:19-21) Ua poloaʻia foʻi e Ieova i latou uma o loo i lana faalapotopotoga, e tatau ona mamā i le itu faaletino ma le faaleagaga.2 Kori. 7:1.

9. O le ā le auala e tasi ua faaaogā e Iesu e fesoasoani iā i tatou ina ia malamalama ai i le Afioga a le Atua?

9 E ono manatu nisi e lē manaʻomia se isi e tau faamatala atu le Tusi Paia iā i latou. Peitaʻi, ua tofia e Iesu le “pologa faamaoni” ua na o le pau lea o le auala mo le saunia mai o meaʻai faaleagaga. Talu mai le 1919, ua faaaogā e Iesu Keriso o lē ua faamamaluina, lenā pologa e fesoasoani i ona soo ina ia malamalama i le Afioga a le Atua ma mulimuli i taʻiala o loo iai. Pe a tatou usiusitaʻi i faatonuga o loo i le Tusi Paia, ua tatou saosaolaumea ai i le mamā, filemu, ma le autasi i le faapotopotoga. E ao iā i tatou taʻitoʻatasi ona fesili ifo, ʻPo o oʻu faamaoni i le auala o loo faaaogā e Iesu i aso nei?’

O LOO AGAʻI TELEVAVE I LUMA LE KARIOTA A IEOVA

10. O le ā le auala o loo faamatala ai i le Esekielu le vaega faalelagi o le faalapotopotoga a Ieova?

10 O loo faamatala mai i le Afioga tusia a Ieova le vaega faalelagi o lana faalapotopotoga. O se faataʻitaʻiga, na vaaia e le perofeta o Esekielu i se faaaliga le vaega faalelagi o le faalapotopotoga a le Atua, o loo faaāta mai i se kariota faalelagi. (Eseki. 1:4-28) O loo afio Ieova i lenei kariota, ma o loo agaʻi i so o se itu e uunaʻia ai e lona agaga. O le iʻuga, ua taʻitaʻia e le vaega faalelagi o lana faalapotopotoga le vaega faalelalolagi. E manino mai o loo agaʻi televave i luma le kariota! Seʻi mafaufau i le tele o suiga na faia i le faalapotopotoga a o faagasolo le sefulu tausaga ua mavae. Ia manatua o Ieova na faia na suiga. Ua lē o toe umi ona faaumatia lea e Keriso ma le ʻauagelu paia lenei lalolagi amioleaga, ma ua agaʻi televave i luma le kariota a Ieova ina ia faasilisilia lana pule silisili ese, ma faapaia lona suafa!

Maʻeu lo tatou lotofaafetai mo le toʻatele o ē tauofo o loo galulue malolosi i galuega faufale! (Tagaʻi i le palakalafa e 11)

11, 12. O ā nisi o mea ua faataunuuina e le faalapotopotoga a Ieova?

11 Seʻi manatu i mea ua faataunuuina e le vaega faalelalolagi o le faalapotopotoga a le Atua i nei aso e gata ai. Faugāfale. E faitau selau ē galulue o loo pisi i le fausiaina o le ofisa ulu fou o Molimau a Ieova i Warwick, i Niu Ioka i Amerika. E faitau afe ē tauofo i le lalolagi aoao, o loo galulue mamafa i le fausiaina o Maota fou mo Sauniga ma toe faatetelē ofisa o lālā, i le taʻitaʻiga a le Matagaluega mo Faugāfale i le Lalolagi Aoao. Maʻeu lo tatou lotofaafetai mo le toʻatele o ē ua lotomalilie e tauofo, o loo galulue malolosi i na galuega! Ia manatua o loo faamanuia Ieova i tagata talaʻi o le Malo i le lalolagi aoao, o ē o loo foaʻi ma le lotomaulalo ma le faamaoni so o se mea e latou te mafai, ina ia fesoasoani i le faatupeina o na galuega.Luka 21:1-4.

 12 Aʻoga. Seʻi manatu i aʻoga eseese o loo aʻoaʻoina ai aʻoaʻoga mai i le Atua. (Isa. 2:2, 3) O loo iai le Aʻoga mo le Auaunaga Paeonia, Aʻoga mo Tagata Talaʻi o le Malo, Aʻoga o Kiliata, Le Aʻoga e Ulufale ai i Peteli, Aʻoga mo Ovasia Matagaluega ma a Latou Avā, Aʻoga mo Toeaina o le Faapotopotoga, Aʻoga o le Faiva o le Malo, ma le Aʻoga mo Sui o Komiti o Lālā ma a Latou Avā. Ioe, e naunau Ieova e aʻoaʻoina ona tagata! O loo faalauiloa atu foʻi aʻoaʻoga faale-Tusi Paia i la tatou Upega tafaʻilagi o le jw.org, lea o loo maua ai lomiga i le faitau selau o gagana. O loo iai i lenei tuatusi vaega faapitoa mo fanau, aiga, faapea se vaega o loo faamatala ai mea o loo tutupu. Po ua e faaaogāina le jw.org i lau faiva ma le tapuaʻiga a le aiga?

IA FAAMAONI IĀ IEOVA MA LAGOLAGOINA LANA FAALAPOTOPOTOGA

13. O le ā lo tatou tiute tauave o ni tagata tapuaʻi faamaoni o Ieova?

13 Maʻeu se faaeaga o le avea ma vaega o le faalapotopotoga a Ieova! Talu ai ua tatou iloa tapulaa ma mea e finagalo i ai le Atua, o lo tatou tiute tauave la le faia o le mea saʻo ma lagolagoina lana pule silisili ese. A o paʻū atu lenei lalolagi i le leaga, e tatau ona tatou “ʻinoʻino i le leaga” e pei foʻi o Ieova. (Sala. 97:10) E tatou te lē fia aufaatasi ma tagata faalēmataʻu e ala i le faapea atu, “e lelei le leaga, ma e leaga le lelei.” (Isa. 5:20) Talu ai e tatou te mananaʻo ia faafiafia le Atua, o lea e tatou te taumafai ai ia tumau ona mamā i le itu faaletino, tau amio, ma le faaleagaga. (1 Kori. 6:9-11) E tatou te alolofa iā Ieova ma faatuatuaina o ia. Ua tatou filifili e faamaoni iā te ia, e ala i le tausia o ana tapulaa o loo faaalia manino mai i lana Afioga. E tatou te faia foʻi taumafaiga uma ina ia mulimuli i na tapulaa i o tatou aiga, faapotopotoga, galuega, aʻoga, ma so o se mea lava. (Faata. 15:3) Seʻi iloilo nisi o auala e faamaonia atu ai lo tatou faamaoni i le Atua.

14. E faapefea i mātua Kerisiano ona faaalia le faamaoni i le Atua?

14 Tausia aʻe o fanau. E faaalia e mātua Kerisiano le faamaoni iā Ieova, e ala i le aʻoaʻoina o a latou fanau e tusa ai ma lana Afioga. O mātua e matataʻu i le Atua, e lē soona taaʻina i manatu faaleaganuu e faatatau i le tausia aʻe o fanau. E lē taliaina i totonu o se aiga Kerisiano le agaga o lenei lalolagi. (Efe. 2:2) O se tamā Kerisiano ua papatiso, e lē manatu e faapea: ʻO le matou aganuu, o fafine e aʻoaʻoina le fanau.’ E manino le faamatalaga a le Tusi Paia i lenei mataupu: “O outou tamā, . . . ia tausia pea [lau fanau] i aʻoaʻiga ma apoapoaʻiga [faatonuga e taʻitaʻia ai le mafaufau] a Ieova.” (Efe. 6:4; fpl.) O mātua e matataʻu i le Atua, e mananaʻo ia pei a latou fanau o Samuelu, auā sa faatasi Ieova ma Samuelu a o tuputupu aʻe.1 Samu. 3:19.

15. E faapefea ona faaalia lo tatou faamaoni iā Ieova pe a faia ni filifiliga tāua?

15 Faia o filifiliga. Pe a tatou faia filifiliga tāua i le olaga, o se tasi o auala e faaalia ai lo tatou faamaoni i le Atua, o le saʻili lea o se fesoasoani mai i lana Afioga ma lana faalapotopotoga. Ina ia faataʻitaʻi le tāua o le faia faapea, seʻi manatu i se mataupu faigatā ua aafia ai le toʻatele o mātua. O le masani a nisi mātua ua siitia i isi atunuu, e auina atu a latou pepe faatoʻā fananau ina ia tausi e o latou tauaiga, ae faaauau ona galulue ma saʻili tupe i atunuu fou ua nonofo ai. E moni o lenei mataupu o se filifiliga a le tagata lava ia, ae ia manatua e faamasinoina i tatou e le Atua i a tatou filifiliga e fai. (Faitau le Roma 14:12.) Po o se mea atamai le faia o ni filifiliga tāua e faatatau i o tatou aiga ma galuega totogi, e aunoa ma le tilofaʻia muamua o le Tusi Paia? E mautinoa e leai! E tatou te manaʻomia le fesoasoani a lo  tatou Tamā i le lagi, auā e lē mafai e i tatou lava ona faatonu o tatou ala.Iere. 10:23.

16. O le ā le filifiliga sa tatau ona faia e se tasi fafine ina ua fanau lana tama tama, ma o le ā na fesoasoani iā te ia e faia ai le filifiliga saʻo?

16 Ina ua fanau le tama tama a se tasi fafine a o nonofo i se isi atunuu, na la filifili ma lana tane e auina atu le la tama i lo la atunuu moni ina ia tausia e mātua o lana tane. I le taimi lenā, ua amata ona suʻesuʻe le fafine ma se Molimau a Ieova i le Tusi Paia. Sa agaʻigaʻi i luma le fafine ma ia aʻoaʻoina, o lana tiute tauave mai i le Atua, o le tausia aʻe lea o lana tama ina ia tapuaʻi iā Ieova. (Sala. 127:3; Faata. 22:6) Sa tatalo faatauanau lenei fafine iā Ieova e faatatau i lenei mataupu, e pei ona taʻu mai i le Tusi Paia ia tatou faia. (Sala. 62:7, 8) Sa talanoa atu foʻi i lē na faia lana suʻesuʻega ma isi i le faapotopotoga. E ui lava na uunaʻia o ia e ona tauaiga ma uō ia ave lana tama i mātua o lana tane, ae na filifili o ia e tuu lana tama e na te tausia. Na maofa le tane i le auala na avea ai le faapotopotoga ma sulufaʻiga mo lana avā ma le la pepe. O lea na suʻesuʻe ai e le tane le Tusi Paia ma amata ona auai faatasi ma lana avā ma le la tama i sauniga. Pe e te manatu na lagona e lenei fafine na tali mai Ieova i lana tatalo faatauanau? E mautinoa o lona lagona lenā.

17. O ā taʻiala ua tatou maua e faatatau i tagata suʻesuʻe o le Tusi Paia?

17 Mulimuli i taʻiala. O se isi auala tāua e faaalia ai lo tatou faamaoni i le Atua, o le mulimuli lea i taʻiala ua tatou maua mai i lana faalapotopotoga. O se faataʻitaʻiga, seʻi manatu i fautuaga na aumai e faatatau i a tatou tagata suʻesuʻe o le Tusi Paia. Ua fautuaina i tatou o le taimi lava e mautū ai se suʻesuʻega ma se tasi i le tusi O ā Aʻoaʻoga Moni a le Tusi Paia? ia faaalu ni nai minute pe a māeʻa suʻesuʻega taʻitasi, ina ia faauaʻi atu le tagata i le faalapotopotoga a Ieova. E mafai ona faia faapea e ala i le faaaogā o le vitiō O ā Mea o Loo Faia i se Maota mo Sauniga? ma le polosiua O Ai o Loo Faia le Finagalo o Ieova i Aso Nei? Pe a māeʻa ona suʻesuʻe le tusi Aʻoaʻoga Moni ma se suʻesuʻega ua agaʻigaʻi i luma, ua fautuaina i tatou ia suʻesuʻe le tusi ʻIa Faatumau iā te Outou i le Alofa o le Atua,’ e tusa lava po ua uma ona papatiso lenā tagata. Ua aumaia e le faalapotopotoga lenei taʻiala ina ia fesoasoani i soo fou ia “mausalī i le faatuatua.” (Kolo. 2:7) Po o e mulimuli i na fautuaga mai i le faalapotopotoga a Ieova?

18, 19. O ā nisi o māfuaaga e tatau ai ona tatou faafetai atu iā Ieova?

18 E tele māfuaaga e tatau ai ona tatou faafetai atu iā Ieova. O loo tatou nofo aitalafu iā te ia, auā pe ana leai o ia semanū e lē mafai ona tatou gaoioi ma ola ai i lenei lalolagi. (Galu. 17:27, 28) Ua ia tuuina mai iā i tatou se meaalofa e matuā tautele, o lana Afioga le Tusi Paia. E tatou te talia ma le lotofaafetai le Tusi Paia o le feʻau a le Atua, e pei foʻi ona maua e Kerisiano i Tesalonia le Afioga a le Atua ma talia.1 Tesa. 2:13.

19 Ua fesoasoani le Afioga tusia a le Atua ina ia tatou mafuta vavalalata atu ai iā Ieova, ma ua ia mafuta vavalalata mai foʻi iā i tatou. (Iako. 4:8) Ua aumaia e lo tatou Tamā i le lagi se faaeaga matagofie, o le avea lea o i tatou ma vaega o lana faalapotopotoga. Maʻeu lo tatou lotofaafetai mo na faamanuiaga! Ua pei o tatou lagona o le faisalamo o lē na pese: “Inā faafetai atu ia iā Ieova, auā e lelei o ia: Auā e faavavau lava lona alofa faamaoni.” (Sala. 136:1) E 26 taimi o loo taʻua ai i le Salamo 136 le faaupuga “e faavavau lava lona alofa.” Pe afai e faaauau ona tatou faamaoni iā Ieova ma lana faalapotopotoga, o le a tatou tofo i le moni o nei upu faamāfanafanaloto, auā o le a tatou maua ai le ola e faavavau!