Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) NOVEMA 2016

Ua Faamaopoopo e Tusa ai ma le Afioga a le Atua

Ua Faamaopoopo e Tusa ai ma le Afioga a le Atua

“O le poto na faataatia ai e Ieova le faavae o le lalolagi. Na ia faatumauina le lagi i le faautaga loloto.”FAATA. 3:19.

PESE: 6, 24

1, 2. (a) O le ā le tali a nisi i le manatu e faapea e iai le faalapotopotoga a le Atua? (e) O le ā o le a talanoaina i lenei mataupu?

PE E iai se faalapotopotoga a le Atua? E ono faapea mai nisi, “E te lē manaʻomia se faalapotopotoga ina ia taʻitaʻia oe. E pau le mea e te manaʻomia o sa oulua faiā ma le Atua.” Pe e saʻo lenā manatu? O le ā ua tatou iloa mai i nisi o faamaoniga?

2 O le a tatou talanoaina i lenei mataupu faamaoniga e iloa ai o Ieova, le Atua maopoopo, o Lē e sili i le faamaopoopoina o mea. O le a talanoaina foʻi auala e tatau ona tatou tali atu ai i le taʻitaʻiga e maua mai i le faalapotopotoga a Ieova. (1 Kori. 14:33, 40) I le uluaʻi senituri T.A. ma aso nei, ua fesoasoani le Tusi Paia i le vaega faalelalolagi o le faalapotopotoga a Ieova ina ia faia le galuega e sili ona telē, o le talaʻia lea o le tala lelei. Pe a tatou tausisi i le Tusi Paia ma mulimuli i taʻiala mai i lana faalapotopotoga, e tatou te faaauiluma ai le mamā, filemu, ma le autasi o le faapotopotoga atoa.

O IEOVA O LĒ E SILI I LE FAAMAOPOOPOINA O MEA

3. Aiseā ua e talitonu ai o Ieova o Lē e sili i le faamaopoopoina o mea?

3 Ua faamaonia mai i le foafoaga, o le Atua o Lē e sili i le faamaopoopoina o mea. Ua taʻua i le Faataoto 3:19: “O le poto na  faataatia ai e Ieova le faavae o le lalolagi. Na ia faatumauina le lagi i le faautaga loloto.” Ua na ʻo ni vaega itiiti o galuega a le Atua’ o loo tatou iloa, ma “e itiiti foʻi mea ua tatou faalogo ai iā te ia.” (Iopu 26:14) Peitaʻi, o mea itiiti ua tatou iloa e faatatau i paneta, fetu, ma aniva, ua tatou iloa ai le matuā maopoopo o le auala na faatulaga ai nei foafoaga. (Sala. 8:3, 4) E faitau miliona fetu o loo iai i aniva, ma o loo fegasoloaʻi i se auala maopoopo. O le pogai lea e maopoopo ai le faataamilosaga o paneta i le lā, e pei lava o loo mulimuli lelei i tulafono o le auala. O le auala ofoofogia ua faamaopoopo ai le vateatea, ua fesoasoani iā i tatou e iloa ai ua talafeagai ona tatou vivii, faamaoni, ma tapuaʻi atu iā Ieova o lē ʻna faia le lagi ma le lalolagi i le poto.’Sala. 136:1, 5-9.

4. Aiseā ua lē mafai ai e le faasaienisi ona tali le tele o fesili?

4 E tele mea ua faailoa mai e le faasaienisi e faatatau i le vateatea ma lo tatou paneta, ma ua aogā iā i tatou i vala eseese o le olaga. Peitaʻi, e lē o mafai e le faasaienisi ona tali le tele o fesili. O se faataʻitaʻiga, e lē o mafai e saienitisi e suʻesuʻeina le vateatea ona taʻu mai pe na faapefea ona iai le vateatea, pe aiseā foʻi ua tatou ola ai i le lalolagi faatasi ma le tele o isi meafaiola. E lē o mafai foʻi e tagata ona faamatala pe aiseā e malosi ai le faanaunauga o tagata ia ola e faavavau. (Fai. 3:11) Aiseā ua tele ai fesili tāua e lē o mafai ona taliina? O se tasi o māfuaaga, ona ua faaauiluma e le toʻatele o saienitisi ma isi tagata, le aʻoaʻoga o le evolusione ma manatu e lē mai i le Atua. Peitaʻi, i lana Afioga, o loo tali ai e Ieova fesili e sili ona tāua i loto o tagata i so o se vaipanoa.

5. O ā auala e tatou te faalagolago ai i tulafono o le natura?

5 E tatou te faalagolago i tulafono o le natura ua faavaeina e Ieova, ia e lē fesuisuiaʻi ma e maufaatuatuaina. E faalagolago uma le ʻau faieletise, palama, inisinia, pailate, ma fomaʻi e faia taotoga, i nei tulafono ina ia faatino ai a latou galuega. O se faataʻitaʻiga, ua mautinoa e fomaʻi e faia taotoga e tutusa uma le fausaga o tino o tagata. O lea, e lē tau suʻea e se fomaʻi po o fea e tū ai le fatu o se tagata maʻi. O i tatou uma lava e tatou te amanaʻia tulafono o le natura, ma e afāina o tatou ola pe a lē amanaʻia na tulafono. O se faataʻitaʻiga, e lamatia le ola o se tasi pe a oso ese mai i luga o se laau ma taumafai e lele e pei o se manulele.

FAAMAOPOOPO E LE ATUA

6. Aiseā e tatau ai ona tatou faatalitalia tagata tapuaʻi o Ieova ia maopoopo?

6 E matuā mataʻina le vateatea i lona tulaga maopoopo. O lea, e tatau foʻi la ona tatou faatalitalia e finagalo Ieova ia matuā maopoopo ona tagata tapuaʻi. O le pogai lea ua saunia ai e Ieova le Tusi Paia e fai ma o tatou taʻiala. O le ola e aunoa ma le fesoasoani a le faalapotopotoga a le Atua ma ana tapulaa, o le a iʻu ai i le faanoanoa ma puapuaga.

7. O le ā e faaalia ai o le Tusi Paia o se tusi e maopoopo lelei?

7 O le Tusi Paia e lē na o se tusi ua tuufaatasia ai tusitusiga a tagata Iutaia ma Kerisiano. Nai lo o lea, o se tusi e maopoopo lelei na faagaeeina e le agaga o le Atua. E fesootaʻi uma tusi taʻitasi o le Tusi Paia. O le matua autū o loo faamatilatila mai lava i le Kenese e tau i le Faaaliga, o le faasilisilia lea o le pule silisili ese a Ieova ma le faataunuuina o lona finagalo mo le lalolagi, e ala i lona Malo lea e pule ai Keriso o le “fanau” na folafolaina mai.—Faitau le Kenese 3:15; Mataio 6:10; Faaaliga 11:15.

8. Aiseā e mafai ai ona tatou faapea atu sa maopoopo lelei tagata Isaraelu?

 8 O tagata Isaraelu anamua o se faataʻitaʻiga lelei lea o se nuu na maopoopo. O se faaaʻoaʻoga, i le Tulafono a Mose, sa faamaopoopoina i vaega “auauna fafine o ē na faia le galuega na faatulagaina, i le faitotoʻa o le faleʻie o le feiloaʻiga.” (Eso. 38:8) Sa maopoopo le auala na siitia solo ai le togālauapi a tagata Isaraelu ma le faleʻie paia. Mulimuli ane na faamaopoopo e le tupu o Tavita le ʻau sa Levī ma ositaulaga i ni vaega. (1 No. 23:1-6; 24:1-3) Ina ua usiusitaʻi tagata Isaraelu iā Ieova, sa faamanuiaina i latou e ala i le maopoopo, filemu, ma le autasi.—Teu. 11:26, 27; 28:1-14.

9. E faapefea ona faaalia na maopoopo le faapotopotoga Kerisiano i le uluaʻi senituri?

9 Sa maopoopo le faapotopotoga Kerisiano i le uluaʻi senituri, ma na latou maua aogā mai i le taʻitaʻiga a le vaega pule na faia aʻe muamua i aposetolo. (Galu. 6:1-6) Mulimuli ane, na iai nisi uso na faaopoopo i lenā vaega pule. (Galu. 15:6) Na maua foʻi fautuaga ma faatonuga e ala mai i tusi faagaeeina na tusia e sui o le vaega pule i le uluaʻi senituri, po o a latou aumea vavalalata. (1 Timo. 3:1-13; Tito 1:5-9) O ā aogā na maua e faapotopotoga mai i le mulimuli i le taʻitaʻiga a le vaega pule?

10. O le ā na iʻu i ai ina ua usitaʻia e uluaʻi faapotopotoga poloaʻiga na faia e le vaega pule? (Tagaʻi i le ata i luga aʻe o le matua.)

10 Faitau le Galuega 16:4, 5Sa faailoa atu e uso na femalagaaʻi e fai ma sui o le vaega pule, “poloaʻiga na faia e le ʻauaposetolo ma toeaina i Ierusalema.” A o usitaʻia e faapotopotoga na poloaʻiga, sa “faaauau ai ona faamalosia le faatuatua o faapotopotoga, ma faatuputeleina ai mai i lea aso i lea aso.” Pe e iai se lesona e tatou te aʻoaʻoina mai i la latou faaaʻoaʻoga, e aogā iā i tatou i le faapotopotoga i aso nei?

PO O E MULIMULI I TAʻIALA?

11. O le ā le auala e tatau ona tali atu ai tane tofia, pe a latou maua ni taʻiala mai i le faalapotopotoga a le Atua?

11 O le ā e tatau ona fai e Komiti o Lālā, ovasia o matagaluega ma toeaina o faapotopotoga, pe a latou maua ni taʻiala mai i le faalapotopotoga a le Atua i aso nei? Ua poloaʻia i tatou uma i le Afioga a Ieova ia usitaʻi ma gauaʻi. (Teu. 30:16; Epe. 13:7, 17) E lē tatau ona iai se uiga faitio pe fouvale i totonu o le faalapotopotoga a le Atua, auā o na uiga e matuā aafia ai le alofa, filemu, ma le autasi o faapotopotoga. E leai se Kerisiano faamaoni e na te fia faaalia uiga lē faaaloalo ma lē faamaoni e pei o Tioterifi. (Faitau le 3 Ioane 9, 10.) Ia tatou fesili ifo: ʻPo o oʻu faalaeiau i oʻu uso ma tuafāfine ia faamaoni iā Ieova? Po o vave ona ou talia ma lagolagoina le taʻitaʻiga mai i uso o loo taʻimua?’

12. O le ā le suiga ua faia i le auala e tofia ai toeaina ma auauna o le faiva?

12 Seʻi manatu i se faaiʻuga na faia talu ai nei e le Vaega Pule. I le mataupu “Fesili Mai le ʻAufaitau” i Le Olomatamata o Novema 15, 2014, na faamatala ai se suiga i le auala e tofia ai toeaina ma auauna o le faiva. Na taʻua i lea mataupu, sa tuu atu e le vaega pule i le uluaʻi senituri i ovasia femalagaaʻi e latou te faia ia tofiga. O lea, ina ia ōgatusa ma lenā faatulagaga, talu mai Setema 1, 2014, ua tofia e ovasia o matagaluega toeaina ma auauna o le faiva. E taumafai le ovasia o le matagaluega ia iloa tane ua faatutū atu, ma galulue faatasi ma i latou i le talaʻiga pe a talafeagai. E mātau foʻi e le ovasia le aiga o le uso ua faatū atu. (1 Timo. 3:4, 5) Pe a uma, e iloilo ma le faaeteete e le ʻautoeaina ma le ovasia o le matagaluega  agavaa faale-Tusi Paia mo auauna o le faiva ma toeaina.1 Timo. 3:1-10, 12, 13; 1 Pete. 5:1-3.

13. E faapefea ona faaalia o loo tatou lagolagoina le taʻitaʻiga e tatou te maua mai i toeaina?

13 E ao ona tatou mulimuli i taʻiala mai i le Tusi Paia e tatou te maua mai i toeaina. O nei leoleo mamoe faamaoni i le faalapotopotoga a le Atua, ua taʻitaʻia i faatonuga e “aogā” pe “malosi ai” o loo i le Afioga a le Atua. (1 Timo. 6:3; fpl.) Seʻi manatu i le fautuaga a Paulo e faatatau i ē faalogogatā na iai i le faapotopotoga. O nisi e leʻi “galulue ae e isuisu fua i mea e leai sa latou feʻau i ai.” E mautinoa na apoapoaʻia i latou e toeaina, peitaʻi na faaauau ona latou teena le fautuaga. Na faapefea ona feutagaʻi le faapotopotoga ma se tagata faapena? Na fautua atu Paulo: “Ia faailogaina lea tagata, ma aua neʻi toe auaumea ma ia.” Ae i le isi itu, sa lē tatau foʻi ona feutagaʻi ma ia e pei o se fili. (2 Tesa. 3:11-15) I aso nei, e ono faia e toeaina se lauga lapataʻi e faatatau i le faaauau ona faia e se tasi o se gaoioiga e taʻuleagaina ai le faapotopotoga, e pei o le tuutala ma se tagata e lē talitonu. (1 Kori. 7:39) O le ā le auala e te tali atu ai pe a faia e toeaina se lauga faapena? Pe afai o e iloa le tulaga o loo faamatala i le lauga, po o le a e taumafai e ʻalofia le faatasitasi ma lenā tagata i taimi faasamasamanoa? O lou naunau alofa ma le maumauaʻi, atonu e uunaʻia ai lea tagata e lafoaʻi lona ala lē lelei. [1]

IA TUMAU ONA MAMĀ, FILEMU, MA AUTASI

14. E faapefea ona tatou saosaolaumea i le mamā o le faapotopotoga?

14 E mafai ona tatou saosaolaumea i le mamā faaleagaga o le faapotopotoga, e ala i le mulimuli i le taʻitaʻiga o loo maua i le Afioga a le Atua. Seʻi manatu i le mea na tupu i Korinito anamua. Sa uaʻi atoatoa atu Paulo i le talaʻiga i lenā aai, ma sa alofa i ona uso po o le “ʻaupaia” i inā. (1 Kori. 1:1, 2) E mautinoa sa matuā faapopoleina Paulo auā sa tatau ona ia taulimaina le faafitauli e faatatau i le faitaaga, lea na manatu māmā i ai le faapotopotoga. Na poloaʻi atu Paulo i toeaina ia tuu atu le tagata faitaaga iā Satani, o lona uiga ia faateʻaina lea tagata. Ina ia tumau le tulaga mamā o le faapotopotoga, na manaʻomia ona aveesea e toeaina le “fefete.” (1 Kori. 5:1, 5-7, 12) Pe a tatou lagolagoina le faaiʻuga a toeaina e faateʻaina se tagata fai mea sesē e lē salamō, ua tatou fesoasoani la e faatumau le mamā o le faapotopotoga, ma atonu e uunaʻia ai lea tagata ia salamō ma saʻili mo le faamagaloga a Ieova.

15. E faapefea ona tatou faatumau le filemu i le faapotopotoga?

15 Sa iai se isi faafitauli na manaʻomia ona taulima i Korinito. Sa molia e nisi o latou uso tapuaʻi i le faamasinoga. Na fesili atu Paulo iā i latou i se fesili faatupu manatu: “Aiseā e tou te lē onosaʻi ai pe a agaleagaina outou?” (1 Kori. 6:1-8) E iai foʻi tulaga faapena ua tutupu i aso nei. O nisi taimi e lepetia ai le filemu i le va o uso ona o le lē taulau o ni faiga faapisinisi, ua iʻu ai ina gau le tele o tupe pe tuuaʻia ai se tasi i ni faiga faapiʻopiʻo. Ua molia e nisi o latou uso i le faamasinoga. Peitaʻi, ua fesoasoani mai le Afioga a le Atua ia tatou iloa, e sili atu le maumau o tupe nai lo o le faalumaina o le suafa o le Atua po o le saveʻuina o le filemu i le faapotopotoga. [2] Ina ia foʻia ni faafitauli matuiā ma feeseeseaʻiga, e tatau ona tatou faatatauina le fautuaga a Iesu. (Faitau le Mataio 5:23, 24; 18:15-17.) Pe a tatou faia faapea, ua tatou faaauiluma le autasi o tagata tapuaʻi o Ieova.

16. Aiseā e tatau ai ona tatou faatalitalia tagata o le Atua ia autasi?

16 O loo faaalia mai i le Afioga a Ieova le  māfuaaga e tatau ai ona tatou faatalitalia ona tagata ia autasi. Na pese le faisalamo: “Faauta! Maʻeu le lelei ma le matagofie pe a nonofo faatasi o uso i le autasi!” (Sala. 133:1) Ina ua usitaʻi tagata Isaraelu iā Ieova, sa maopoopo i latou ma autasi. Na valoia e Ieova le tulaga o ona tagata ina ua fetalai: “Ou te autasia i latou e pei o se lafu i le lotoā.” (Mika 2:12) Na valoia foʻi e Ieova e ala mai i le perofeta o Sefanaia e faapea: “Ou te tuuina atu ai i nuu le gagana mamā [o upu moni o le Tusi Paia], ina ia latou valaau uma lava i le suafa o Ieova, ma latou auauna soosootauʻau ai iā te ia.” (Sefa. 3:9) Maʻeu lo tatou loto faafetai mo le faaeaga o le tapuaʻi atu ma le autasi iā Ieova!

E taumafai toeaina e avatu le fesoasoani faaleagaga i se tasi ua uia se ala sesē (Tagaʻi i le palakalafa e 17)

17. E tatau faapefea i toeaina ona taulima ni mataupu o ni mea sesē, ina ia faatumauina ai le mamā ma le autasi o le faapotopotoga?

17 Ina ia faatumauina le autasi ma le mamā o se faapotopotoga, e tatau i toeaina ona vave taulima mataupu faafaamasinoga ma ia faia i se auala alofa. Na iloa e Paulo e lē taaʻina le alofa o le Atua i ni faalogona ootia, ma e lē lilo i Lana silasila mea sesē. (Faata. 15:3) O le pogai lea na tusia ai e Paulo le tusi o Muamua Korinito, o se tusi e malosi ae e alofa. I ni masina mulimuli ane na tusia ai le Lua Korinito, e faaalia ai na iai se faaleleiga ona na faatatau e toeaina fautuaga a Paulo. Pe a uia e se Kerisiano se laasaga sesē ae e na te leʻi iloaina, e tatau i tane ua agavaa ona taumafai e faasagatonu lenā tagata i le agaga o le agamalu.—Kala. 6:1.

18. (a) O ā auala na fesoasoani ai fautuaga o le Afioga a le Atua i faapotopotoga i le uluaʻi senituri? (e) O le ā o le a talanoaina i le mataupu o loo sosoo mai?

18 E manino mai na fesoasoani fautuaga faagaeeina o le Afioga a le Atua, i Kerisiano i le uluaʻi senituri i Korinito ma isi vaipanoa ina ia faatumauina le mamā, filemu, ma le autasi i a latou faapotopotoga. (1 Kori. 1:10; Efe. 4:11-13; 1 Pete. 3:8) O le iʻuga, e tele mea na mafai ona faataunuuina e o tatou uso ma tuafāfine i lenā taimi i le faiva. O le pogai lea na faapea mai ai Paulo ua ʻtalaʻiina atu le tala lelei i foafoaga uma i lalo o le lagi.’ (Kolo. 1:23) I aso foʻi nei, o loo autasi ma maopoopo tagata o Ieova, ma o loo latou talaʻia atu le tala lelei i le lalolagi aoao. O le a faamatala i le mataupu o sosoo mai, nisi faamaoniga e iloa ai e latou te matuā faatāua le Tusi Paia, ma ua maumauaʻi e faamamaluina le Alii Pule Silisili Ese o Ieova.Sala. 71:15, 16.

^ [1] (palakalafa e 13) Tagaʻi i le tusi Ua Faamaopoopo Ina ia Faia le Finagalo o Ieova, itu. 134-136.

^ [2] (palakalafa e 15) Mo nisi faamatalaga e faatatau i tulaga e ono filifili ai se Kerisiano e uia se gaoioiga faaletulafono e faasaga i se isi Kerisiano, tagaʻi i le tusi ʻIa Faatumau iā te Outou i le Alofa o le Atua,’ itu. 223 ma le faaopoopoga muamua i le pito i lalo.