Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Me 2017

Olioli i se Olaga Faigofie

Olioli i se Olaga Faigofie

NA FAAIPOIPO Daniel ma Miriam iā Setema 2000 ma faamautū ai i le aai o Barcelona i Sepania. Na faapea mai Daniel, “Sa ma ola i se olaga masani. O le lelei o a ma galuega na mafai ai ona ma aai i faleʻaiga taugatā, faimalaga i isi atunuu, ma faatau ofu taugatā. Na ma auai foʻi e lē aunoa i le faiva i le fanua.” Peitaʻi, na iai se suiga i o ma olaga.

I se tauaofiaga na faia i le 2006, na matuā pāʻia ai le loto o Daniel i se lauga na lāgā ai le fesili: “Po o tatou faia le mea e sili e fesoasoani ai i ē ʻua tautevateva atu i le faaumatiaga,’ ina ia latou maua le ala i le ola e faavavau?” (Faata. 24:11) Na faamatilatila i le lauga le tiute tauave o le faailoa atu o le feʻau faasaoola o le Tusi Paia. (Galu. 20:26, 27) Na taʻua e Daniel, “Na ou lagona e pei lava o loo fetalai mai Ieova iā te aʻu.” Na taʻua foʻi i le lauga, o le faalautele atu o le faiva a se tasi o le a faateleina ai lona olioli. Na iloa e Daniel le moni o lenā manatu auā o le taimi lenā ua amata ai le paeonia a Miriam, ma ua tofo i faamanuiaga e olioli ai.

Na faapea mai Daniel, “Na ou filifili loa o le a ou faia se suiga tele.” O le mea lenā na ia faia. Na faaitiitia ona itula faigaluega, amata lana paeonia, ma mafaufau i le olioli e mafai ona la tofo i ai ma Miriam, pe a la auauna i se nofoaga o loo tele ai le manaʻoga mo ni faifeʻau talaʻi o le Malo.

LUʻI MA SE FAAMANUIAGA MULIMULI ANE

Iā Me 2007, na faamavae ai Daniel ma Miriam mai i a la galuega ma malaga atu loa i Panama, o se atunuu na la asiasi muamua i ai. O le la oganuu fou lea e aofia ai motu eseese o Bocas del Toro i le Vasa Karipiane, ma o le toʻatele o ē e nonofo ai o tagata Guaymi. Na manatu Daniel ma Miriam e mafai ona la nonofo i Panama mo le valu masina e faaaogā ai a la tupe na teu.

Na la malaga i atumotu e ala i vaa ma pasika. E la te manatua le taimi muamua na la malaga ai i a la pasika i le pe ā ma le 20 maila (32 km), i ni aʻega maualuluga i le mūtinitini o le lā. Na toeitiiti matapogia Daniel ona o le matuā vaivai. Peitaʻi, na talileleia i laʻua e aiga Guaymi na iai i auala na la uia, aemaise ona o lea ua la aʻoaʻoina ni upu i le gagana a lea vaipanoa. E leʻi umi ae o la faia ni suʻesuʻega faale-Tusi Paia e 23.

Peitaʻi, na suia lo la olioli i le faanoanoa ina ua uma a la tupe na teu. Na taʻua e Daniel: “Na maligi o ma loimata ina ua ma mafaufau e toe foʻi i Sepania. Na ma faanoanoa ona o le a tuua a ma suʻesuʻega faale-Tusi Paia.” Peitaʻi, na maua se tala fiafia i le masina mulimuli ane. Na faapea mai Miriam: “Na tofia i maʻua e auauna o ni paeonia faapito. Na matuā faafiafiaina i maʻua ona o le a faaauau pea lo ma tofiga!”

LO LA FIAFIAGA SILI

Talu ai o suiga i le faalapotopotoga i le 2015, na tofia ai Daniel ma Miriam e faaauau le la auaunaga o ni paeonia sauatoa. O le ā nei o le a la faia? Na la maufaatuatuaina le folafolaga o loo i le Salamo 37:5: “Ia e tuuina atu iā Ieova lou ala, ma faalagolago atu iā te ia, ona gaoioi lea o ia.” Na maua ni a la galuega totogi e lagolagoina ai a la paeonia, ma o loo la auauna nei i se faapotopotoga i Veraguas i Panama.

Ua faapea mai Daniel: “A o ma leʻi tuua Sepania, e ma te leʻi mautinoa pe e mafai ona ma ola i se olaga faigofie. Peitaʻi, o le auala lenā o loo ma ola ai, ma e leai se mea e ma te matitiva ai.” O le ā lo la fiafiaga sili? Ua la faapea mai, “O lo ma fiafiaga sili le fesoasoani e aʻoaʻo tagata lotomaulalo e faatatau iā Ieova.”