Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Me 2017

Aua Neʻi Maalili lo Outou Alofa

Aua Neʻi Maalili lo Outou Alofa

“O le a maalili le alofa o le toʻatele ona ua faatuputeleina le amioleaga.”MATA. 24:12.

PESE: 60, 135

1, 2. (a) O ai na faatatau muamua i ai upu a Iesu o loo i le Mataio 24:12? (e) E faapefea ona faamaonia mai i le tusi o Galuega, sa faaauau ona faaalia e le toʻatele o uluaʻi Kerisiano le alofa? (Tagaʻi i le ata i luga aʻe o le matua.)

NA FETALAI Iesu “o le a maalili le alofa o le toʻatele.” O se tasi lea o vala o le faailoga o le “taufaaiʻuiʻuga o le faiga o mea a le lalolagi.” (Mata. 24:3, 12) I le uluaʻi senituri, na maalili le alofa o tagata Iutaia i le Atua, e ui na faapea mai o i latou o tagata o le Atua.

2 Peitaʻi, o le toʻatele o Kerisiano na faaauau ona pisi e “folafola atu le tala lelei e uiga iā Iesu le Keriso,” ma faaalia le alofa i le Atua, uso Kerisiano, ma ē e lē talitonu. (Galu. 2:44-47; 5:42) E ui i lea, na faasolo ina maalili le alofa o nisi o soo o Iesu i le uluaʻi senituri.

3. O le ā atonu na māfua ai ona maalili le alofa o nisi o Kerisiano?

3 Na fetalai Iesu o lē ua toetū mai, i Kerisiano i le uluaʻi senituri na nonofo i Efeso e faapea: “O le mea lenei ua ou lē fiafia ai iā te oe, ona ua e tuua le uluaʻi alofa sa iā te oe.” (Faaa. 2:4) O le ā se tasi o māfuaaga atonu na tupu ai lenei tulaga? O nei uluaʻi soo o Keriso atonu na taaʻina i tagata o le lalolagi e faaletino o latou mafaufauga. (Efe. 2:2, 3) I le pei o le tele o aai tetele i aso  nei, na tumu Efeso i le uluaʻi senituri i le amioleaga. Na matuā faatāua e tagata o lenei aai tamaoaiga se olaga sologa lelei e tele meafaitino ma faafiafiaga. Na faasilisilia e tagata o latou faanaunauga manatu faapito nai lo o le alolofa i isi. Na taatele ai foʻi amioga matagā ma amioga e sili ona lē mamā.

4. (a) O ā auala ua maalili ai le alofa i aso nei? (e) O ā vala e tolu e ono tofotofoina ai lo tatou alofa ma le naunau?

4 O loo faatatau mai foʻi i aso nei le valoaga a Iesu e faatatau i le maalili o le alofa. Ua faasolo ina leai se alofa o tagata i le Atua i aso nei. E faitau miliona tagata ua fulitua i le Atua, ma saʻili atu i faalapotopotoga faaletagata mo ni vaifofō i o latou faafitauli. O lea, ua faasolo ina maalili le alofa o tagata e lē tapuaʻi iā Ieova le Atua. Peitaʻi, e pei ona tupu i le faapotopotoga i le uluaʻi senituri i Efeso, e mafai foʻi ona mautinoa naʻuā Kerisiano moni i aso nei, ma iʻu ai ina faavaivaia lo latou alofa. O le a tatou talanoaina ni vala se tolu e ono tofotofoina ai lo tatou alofa ma le naunau: (1) alofa mo Ieova, (2) naunau i upu moni o le Tusi Paia, (3) alofa mo o tatou uso.

ALOFA MO IEOVA

5. Aiseā e tatau ai ona tatou alolofa i le Atua?

5 Muamua atu i le aso lava lea na avatu ai e Iesu le lapataʻiga e faatatau i le maalili o le alofa, na ia faamatilatila ai le alofa e sili ona tāua. Na fetalai o ia: “ʻIa e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.’ O le poloaʻiga silisili ma le muamua lenā.” (Mata. 22:37, 38) O le malosi o lo tatou alofa iā Ieova e fesoasoani iā i tatou e usitaʻia ai ana poloaʻiga, tumau ai, ma ʻinoʻino i mea leaga. (Faitau le Salamo 97:10.) Peitaʻi, o loo vilivilitaʻi Satani ma lana lalolagi e faavaivaia lo tatou alofa i le Atua.

6. O ā iʻuga ua oo i ai ona ua maalili le alofa i le Atua?

6 Ua sesē le vaaiga a le lalolagi e faatatau i le alofa. Nai lo o le alolofa i Lē na foafoaina mea, ua avea tagata ma “ē e alolofa iā i latou lava.” (2 Timo. 3:2) I lenei lalolagi o loo pulea e Satani, ua faaauiluma ai “tuʻinanauga o le tino, ma tuʻinanauga o mata, ma le faalialiavale o meafaitino a se tasi.” (1 Ioa. 2:16) Na lapataʻia e le aposetolo o Paulo ona uso Kerisiano i le faamalie o manaʻoga o le tino, e faapea: “O le uaʻi atu i le tino, e iʻu ai i le oti . . . auā o le uaʻi atu i le tino ua avea ai se tasi ma fili o le Atua.” (Roma 8:6, 7) Ioe, o ē ua faaaogā o latou ola e saʻili ai meafaitino pe faamalie o latou tuʻinanauga taufeusuaʻiga, ua iʻu i ni olaga faanoanoa ma le tele o tigā.1 Kori. 6:18; 1 Timo. 6:9, 10.

7. O ā lamatiaga o loo feagai ma soo o Keriso i aso nei?

7 I nisi o atunuu, o tagata e talitonu aʻiaʻi e leai se Atua, o ē e masalosalo po o soifua moni le Atua, ma tagata e talitonu i le evolusione, ua latou faaauiluma manatu e faavaivaia ai le alofa i le Atua ma le talitonu iā te ia. Ua latou faatalitonu le toʻatele e faapea, o sē e talitonu i Lē na foafoaina mea o se tagata lea e leʻi aʻoaʻoina ma e valea. I le taimi e tasi, ua faaaloalogia saienitisi ma ua tosina ese ai tagata mai i Lē na foafoaina mea. (Roma 1:25) Pe a tatou faalogo i na aʻoaʻoga, e tatou te ono tuulafoaʻia ai Ieova ma iʻu ai ina malili lo tatou alofa.Epe. 3:12.

8. (a) O ā tulaga e lotovaivai ai o loo feagai ma le toʻatele o auauna a Ieova? (e) O le ā le faamautinoaga o loo maua i le Salamo 136?

8 O le lotovaivai e mafai foʻi ona faavaivaia ai lo tatou faatuatua, ma iʻu ai ina maalili lo tatou alofa i le Atua. O i tatou uma lava e iai taimi e feagai ai ma tulaga e lotovaivai ai i lenei lalolagi leaga o loo pulea e Satani. (1 Ioa. 5:19) Atonu o loo tatou feagai  ma faafitauli o le soifua matua, le lē lelei o le soifua mālōlōina, po o le lē lava o le faasoa. Atonu foʻi o loo tatou tauivi ma faalogona o le lē taulau, o faamoemoega lē taunuu, po o o tatou lava vaivaiga faaletagata. Peitaʻi, e lē tatau ona avea nei tulaga po o faalogona ma itu e tatou te manatu ai ua tuua e Ieova i tatou. Nai lo o lea, ia manatunatu loloto i mau o loo faamautinoa mai ai, e tumau e faavavau le alofa o Ieova mo i tatou. O se faataʻitaʻiga, ua taʻua i le Salamo 136:23: “O lē na manatuaina i tatou ina o faamaulaloina i tatou: auā e faavavau lava lona alofa faamaoni.” Ioe, e lē mavae le alofa faamaoni o Ieova i ana auauna. O lea, e mafai ona tatou mautinoa e faafofoga ma tali mai o ia i a tatou tatalo ma “ʻaiʻoiga.”Sala. 116:1; 136:24-26.

9. Na faapefea ona maua e Paulo le malosi e faatumauina ai lona alofa iā Ieova?

9 I le pei o le faisalamo, na maua e Paulo le malosi e ala i le manatunatu i le tausiga e lē mavae a Ieova. Na tusi Paulo: “O Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?” (Epe. 13:6) O le maufaatuatuaina e Paulo o le tausiga alofa a Ieova, na fesoasoani iā te ia e tauivi ai ma faafitauli o le olaga. E leʻi avea tulaga faigatā ma itu e faavaivaia ai o ia. O le mea moni, na tusia e Paulo nisi o tusi faalaeiau a o avea ai ma pagota. (Efe. 4:1; Fili. 1:7; File. 1) Na tumau pea lona alofa i le Atua e oo lava i taimi na matuā tofotofoina ai o ia. Na faapefea ona ia maua le malosi? Na faalagolago pea o ia i le “Atua o faamāfanafanaga uma, o lē na te faamāfanafanaina i tatou i o tatou puapuaga uma.” (2 Kori. 1:3, 4) E faapefea ona tatou faaaʻoaʻo iā Paulo ma faatumauina pea le malosi o lo tatou alofa mo Ieova?

Ia alofa iā Ieova (Tagaʻi i le palakalafa e 10)

10. E faapefea ona faatumau le malosi o lo tatou alofa mo Ieova?

10 Na taʻua e Paulo se tasi o auala autū e faatumauina ai le malosi o lo tatou alofa mo Ieova. Na tusi atu o ia i ona uso talitonu: “Ia tatalo e lē aunoa.” Na toe tusi mulimuli ane: “Ia finafinau i le tatalo.” (1 Tesa. 5:17; Roma 12:12) O le fesootaʻi e ala i le tatalo o le faavae lea mo se faiā māfana ma le Atua. (Sala. 86:3) Pe a faaalu le taimi e faailoa atu ai iā Ieova o tatou manatu ma faalogona moni, o le a tatou mafuta vavalalata atu ai i lo tatou Tamā i le lagi, o Lē e “Faafofoga tatalo.” (Sala. 65:2) O le a faalolotoina foʻi lo tatou alofa mo Ieova pe a mātauina o loo ia tali mai i a tatou tatalo. O le a tatou talitonu ai “e latalata Ieova iā i latou uma e valaau atu iā te ia.” (Sala. 145:18) O le maufaatuatuaina o le tausiga alofa a Ieova, o le a fesoasoani ina ia tatou fesagaʻia ai nisi tofotofoga o le faatuatua i le lumanaʻi.

NAUNAU I UPU MONI O LE TUSI PAIA

11, 12. E faapefea ona faatuputeleina lo tatou naunau i upu moni o le Tusi Paia?

11 I le avea ai ma Kerisiano, e tatou te faatāua ma taliaina upu moni. O le Afioga a le Atua o le puna sili lea o le upu moni. Na tatalo Iesu i lona Tamā: “O lau afioga o le upu moni lea.” (Ioa. 17:17) O le naunau i le upu moni e amata mai i le mauaina o le poto saʻo i le Afioga a le Atua. (Kolo. 1:10) Peitaʻi, e lē lava le tau ina aʻoaʻoina o le poto saʻo. Mātau faamatalaga a lē na tusia le Salamo mataupu e 119, e fesoasoani iā i tatou e malamalama ai i le uiga o le naunau i upu moni o le Tusi Paia. (Faitau le Salamo 119:97-100.) Po o tatou faaalu le taimi e mafaufau pe manatunatu loloto ai i mau o le Tusi Paia a o faagasolo le aso? O le a tatou talisapaia atili upu moni o le Tusi Paia, pe a manatunatu loloto i aogā o le faatatauina o na upu moni i o tatou olaga.

12 Na toe faapea mai le faisalamo: “Maʻeu lava le suamalie o au afioga i loʻu gutu, e sili atu nai lo o le meli!” (Sala. 119:103) O  lomiga faale-Tusi Paia o loo saunia mai e le faalapotopotoga a le Atua, ua pei o ni meaʻai e tofo lelei. E lē faatopelauina ona tatou aai i ni meaʻai e tatou te fiafia i ai. I se tulaga talitutusa, e tatou te lē mananaʻo e faatopelau le faia o a tatou suʻesuʻega, ae ia faaalu se taimi e faia ai. O le iʻuga, o le a tatou olioli ai i “upu e logoleleia” o le upu moni, faigofie ona tatou manatua mea na faitau i ai, ma faaaogā e fesoasoani ai i isi.Fai. 12:10.

13. O le ā na fesoasoani iā Ieremia e naunau ai i upu moni o le Afioga a le Atua, ma o ā ni aafiaga iā te ia?

13 Na naunau le perofeta o Ieremia i upu moni o le Afioga a le Atua. Mātau le aafiaga o fetalaiga a le Atua i le loto o Ieremia. “Na maua au afioga, ona ou ʻai ai lea; ma na avea foʻi lau afioga ma mea e fiafia ma olioli ai loʻu loto; auā ua taʻua aʻu i lou suafa, Ieova e, le Atua o ʻau.” (Iere. 15:16) I se uiga faafaatusa, na taumafa ma faamalū e Ieremia afioga tāua a le Atua, e ala i le faaalu o le taimi e manatunatu loloto i ai. O le iʻuga, na atiaʻe ai lona lototalisapaia mo le faaeaga na ia maua, o le tauaveina lea o le suafa o le Atua. Po o avea lo tatou naunau i upu moni o le Tusi Paia, e uunaʻia ai i tatou e talisapaia le faaeaga tutasi o le tauave o le suafa o le Atua, ma folafola atu lona Malo i lenei taimi o le iʻuga?

Ia naunau i upu moni o le Tusi Paia (Tagaʻi i le palakalafa e 14)

14. E faapefea ona faatuputeleina lo tatou naunau i upu moni o le Tusi Paia?

14 E ese mai i le faitauina o le Tusi Paia ma a tatou lomiga faale-Tusi Paia, o ā nisi auala e mafai ona faatuputeleina ai lo tatou naunau i upu moni o le Tusi Paia? O se tasi o auala tāua, o le auai lea e lē aunoa i sauniga a le faapotopotoga. O le suʻesuʻeina o le Tusi Paia i vaiaso taʻitasi e ala i le fesoasoani a Le Olomatamata, o se auala autū lea o loo aʻoaʻoina ai i tatou. Ina ia malamalama lelei i le mataupu o loo talanoaina, e manaʻomia ona tatou sauniuni lelei mo suʻesuʻega taʻitasi o Le Olomatamata. O se tasi o auala e faia ai faapea, o le tilofaʻia lea o mau uma o loo sii mai. I aso nei, ua mafai ona kopi Le Olomatamata mai i le Upega tafaʻilagi o le jw.org, pe faitau i ai i le JW Library i le tele o gagana. Ua faigofie ona tatou faitau i mau sii i mataupu taʻitasi mo suʻesuʻega, ona o polokalame i masini faaonapōnei. Po o le ā lava le auala o loo tatou  faaaogāina, ae o le faaalu o le taimi e faitau māeʻaeʻa ai ma manatunatu loloto i mau o loo faitauina, o le a faatuputeleina ai lo tatou naunau i upu moni o le Tusi Paia.—Faitau le Salamo 1:2.

ALOFA I O TATOU USO

15, 16. (a) O le ā ua poloaʻia i tatou i le Ioane 13:34, 35 e fai? (e) E faapefea i le alofa i o tatou uso ona fesootaʻi i lo tatou alofa i le Atua ma le naunau i le Tusi Paia?

15 I le pō mulimuli o Iesu i le lalolagi, na ia fetalai atu ai i ona soo: “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”Ioa. 13:34, 35.

16 O le alofa i o tatou uso ma tuafāfine, e fesootaʻi atu i lo tatou alofa iā Ieova. O le mea moni, e ō faatasi le alofa i o tatou uso ma le alofa i le Atua. Na tusi le aposetolo o Ioane: “O lē e lē alofa i lona uso, o lē ua ia vaai atu i ai, e lē mafai ona ia alofa i le Atua, o lē ua ia lē vaai atu i ai.” (1 Ioa. 4:20) E lē gata i lea, e fesootaʻi le alofa iā Ieova ma o tatou uso i lo tatou naunau i le Tusi Paia. Aiseā? Talu ai o lo tatou naunau i upu moni o le Tusi Paia, e uunaʻia ai i tatou e usiusitaʻi ma le lotoatoa i poloaʻiga a le Tusi Paia, ia alolofa i le Atua ma o tatou uso.1 Pete. 1:22; 1 Ioa. 4:21.

Ia alofa i uso ma tuafāfine (Tagaʻi i le palakalafa e 17)

17. O ā nisi o auala e tatou te faaalia ai le alofa?

17 Faitau le 1 Tesalonia 4:9, 10. O ā nisi o auala aogā e tatou te faaalia ai le alofa i totonu o a tatou faapotopotoga? Atonu o loo manaʻomia e se uso po o se tuafafine matua se auala e malaga ai i sauniga. E ono manaʻomia e se tuafafine ua maliu lana tane se fesoasoani mo le faaleleia o ni vaega o lona fale. (Iako. 1:27) O uso ma tuafāfine talavou ma ē matutua o loo aafia i le lotovaivai, lotomafatia, po o isi luʻi, e latou te manaʻomia la tatou fesoasoani, faalaeiauga, ma faamāfanafanaga. (Faata. 12:25; Kolo. 4:11) E faamaonia le moni o lo tatou alofa i o tatou uso e ala i upu ma gaoioiga. E faaalia ai lo tatou matuā manatu mamafa i “ē tatou te aiga i le faatuatua.”Kala. 6:10.

18. O le ā e fesoasoani iā i tatou e foʻia ai ni feeseeseaʻiga lāiti ma o tatou uso talitonu?

18 Na valoia i le Tusi Paia “o aso e gata ai” o lenei faiga amioleaga o mea, o le a matilatila ai uiga manatu faapito ma le matapeʻapeʻa. (2 Timo. 3:1, 2) I le avea ai ma Kerisiano, e tatau ona tatou taumafai malosi ina ia faaloloto lo tatou alofa i le Atua ma o tatou uso, faapea le naunau i upu moni o le Tusi Paia. E moni e iai taimi e ono tulaʻi mai ai ni feeseeseaʻiga lāiti i lo tatou va ma uso talitonu. Peitaʻi, o se matuā faamanuiaga i le faapotopotoga atoa pe a uunaʻia i tatou e le alofa, e foʻia so o se feeseeseaʻiga i se auala alofa! (Efe. 4:32; Kolo. 3:14) Tau ina ia lē maalili lo tatou alofa! Nai lo o lea, seʻi faaauau ona malosi lo tatou alofa mo Ieova ma o tatou uso, faapea lo tatou naunau i lana Afioga.