Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Me 2017

 TALAAGA O LE SOIFUAGA

Na Ou Aʻoaʻoina Isi e Ui Ou te Logonoa

Na Ou Aʻoaʻoina Isi e Ui Ou te Logonoa

Na ou papatiso i le 1941 i le 12 o oʻu tausaga. Peitaʻi, na faatoʻā ou malamalama lelei i upu moni o le Tusi Paia i le 1946. Aiseā? Seʻi oʻu faamatala atu le talaaga o loʻu olaga.

SA NONOFO oʻu mātua i Tbilisi i Georgia, ae na siitia i Kanata pe tusa o le 1910. Na la faamautū i se tamaʻi fale i se faatoʻaga i se fanua laugatasi, e latalata i Pelly i Saskatchewan i Kanata i sisifo. Na ou fanau i le 1928, ma o aʻu o le uii o le fanau e toʻaono. Na maliu loʻu tamā ae toe ono masina oʻu fanau, ma na maliu loʻu tinā a o oʻu laʻitiiti lava. E leʻi umi ae maliu foʻi loʻu tuafafine matua o Lucy, i le 17 o ona tausaga. O lea na tausia ai loa i matou ma nai oʻu tei e le tuagane o loʻu tinā, o Nick.

I se tasi aso a o oʻu laʻitiiti, na vāai mai ai lo matou aiga o oʻu tosoina le siʻusiʻu o se solofanua poʻa. Na feʻei mai ona o le popole ina neʻi aa aʻu e le solofanua, ae e leai ma se leo na ou lagonaina! Na ū loʻu tua iā i latou, ma ou te leʻi lagonaina lo latou feʻei. O le mea e faafetai ai, e leai se mea na tupu. Peitaʻi, o le aso lenā na iloa ai e lo matou aiga ou te logonoa.

Sa fautua mai se uō a lo matou aiga ina ia ave aʻu e faaaʻoga i se aʻoga mo tamaiti logonoa. O lea, na faaulu ai aʻu e Nick i le aʻoga mo tamaiti logonoa i Saskatoon i Saskatchewan. Na ou siitia atu i se nofoaga e mamao ese mai i lo matou aiga. Sa ou fefe ona e na o le lima oʻu tausaga i lenā taimi. E pau taimi na mafai ona ou asiasi ai i loʻu aiga, o aso mālōlō ma tuuaga o le aʻoga i le tau māfanafana. Mulimuli ane, sa ou aʻoaʻoina le gagana fai taga ma na ou fiafia e taaalo faatasi ma isi tamaiti.

AʻOAʻOINA UPU MONI O LE TUSI PAIA

I le 1939, na faaipoipo ai loʻu tuafafine lona lua o Marion iā Bill Danylchuck, ma la tausia loa i maʻua ma le isi oʻu tuafafine o Frances. O i laʻua tagata muamua o lo matou aiga na suʻesuʻe ma Molimau a Ieova. I tuuaga o le aʻoga i le tau māfanafana, e la te taumafai malosi e faamatala mai mea na la  aʻoaʻoina i le Tusi Paia. Ou te taʻutino atu e leʻi faigofie ona matou talanoa, ona e la te leʻi aʻoaʻoina le gagana fai taga. Peitaʻi, na la mātauina loʻu matuā naunau i mea faaleagaga. Na ou iloa na iai le sootaga o mea na la faia ma aʻoaʻoga a le Tusi Paia. O lea, na matou ō faatasi ai i le galuega talaʻi. E leʻi umi ae ou fia papatiso, ma na papatiso aʻu e Bill iā Setema 5, 1941, i totonu o se kalone ʻapa na faatumu i vai mai i se vaieli. Oka se mālūlū o le vai!

O i matou ma se vaega o tagata logonoa, i se tauaofiaga i Cleveland i Ohio i le 1946

Ina ua ou toe foʻi i le fale i le tau māfanafana i le 1946, na matou auai ai i se tauaofiaga i Cleveland, Ohio, i le Iunaite Setete. I le aso muamua o le tauaofiaga, na auauaʻi oʻu tuafāfine e fai faamaumauga mo aʻu ina ia ou malamalama i le polokalame. Peitaʻi i le aso lona lua, na ou matuā fiafia ina ua ou iloa o loo iai se vaega mo tagata logonoa, faatasi ai ma se tagata faaliliu. Maʻeu loʻu olioli ina ua ou malamalama lelei i upu moni o le Tusi Paia na aʻoaʻoina i le tauaofiaga!

AʻOAʻO ATU LE UPU MONI

Na taatele le lotonuu i lenā taimi ona faatoʻā uma le Taua Lona Lua a le Lalolagi. Ae ina ua uma le tauaofiaga ma ou toe foʻi i le aʻoga, na ou maumauaʻi ia faamaoni iā Ieova. O lea, ou te leʻi toe fāʻalo ai i le fuʻa ma usu le vii o le fuʻa. Ou te leʻi toe auai i le faamanatuina o aso mālōlō po o sauniga faalotu. E leʻi fiafia faiaʻoga ma na taumafai e faafefe aʻu, ma faia ni tala pepelo ina ia sui ai loʻu mafaufau. Na mātauina e tamaiti o laʻu aʻoga lenei mea, ma na ou maua ai avanoa e molimau atu iā i latou. Mulimuli ane na talia e tamaiti aʻoga e pei o Larry Androsoff, Norman Dittrick, ma Emil Schneider le upu moni. O loo faaauau ona latou auauna ma le faamaoni iā Ieova e oo mai i le asō.

Pe a ou asiasi i isi aai, ou te taumafai lava e molimau atu i tagata logonoa. O se faaaʻoaʻoga, na ou molimau atu iā Eddie Tager i se nofoaga e faapotopoto ai tagata logonoa i Montreal. O Eddie o se alii talavou na auai i se kegi. Mulimuli ane, na auai o ia i le faapotopotoga e faaaogā ai le gagana fai taga i Laval i Quebec, seʻia oo ina maliu i le tausaga ua teʻa. Na ou feiloaʻi foʻi i le talavou o Juan Ardanez, o lē na tinoū e suʻesuʻe e pei o tagata Perea, ina ia faamautinoa le moni o le feʻau o le Tusi Paia. (Galu. 17:10, 11) Na ia talia foʻi le upu moni ma auauna ma le faamaoni o se toeaina i Ottawa i Ontario, seʻia oo ina maliu o ia.

Molimau atu i le auala i le amataga o vaitausaga o le 1950

Na ou siitia i Vancouver i le 1950. E ui lava ou te fiafia e talaʻi i tagata logonoa, ae e lē galo iā te aʻu le taimi na ou molimau atu ai i le auala iā Chris Spicer, o se fafine e lelei lana faalogo. Na talia e Chris se tusiga o mekasini, ma na manaʻo ou te feiloaʻi i lana tane o Gary. O lea, na ou asiasi atu ai i lo la fale ma na umi la matou talanoaga e ala i le  tusitusi o a matou faamatalaga. E pau lenā o le taimi na matou talanoa ai. I nai tausaga mulimuli ane, na faateʻia aʻu ina ua matou toe feiloaʻi i se tauaofiaga i Toronto i Ontario. O le aso lenā sa papatiso ai Gary. O lenā mea mataʻina na tupu, na faamanatu mai ai iā te aʻu le tāua o le talaʻi pea, auā e tatou te lē iloa po o ai o le a taliaina le upu moni.

Mulimuli ane, na ou toe foʻi i Saskatoon. O i inā na ou feiloaʻi ai i se tinā na talosaga mai e matou te suʻesuʻeina le Tusi Paia ma lana masaga teine e logonoa, o Jean ma Joan Rothenberger. Na aʻoʻoga le masaga i le aʻoga mo tamaiti logonoa lea na ou aʻoga ai. E leʻi umi ae molimau atu le masaga i tamaiti o le la vasega. Mulimuli ane, e toʻalima tamaiti o le vasega na avea ma Molimau a Ieova. O se tasi o i latou o Eunice Colin. Na ou feiloaʻi muamua iā Eunice i le aʻoga mo tamaiti logonoa i loʻu tausaga faaiʻu. Na aumai e Eunice i lenā taimi se lole ma talosaga mai e ma te uō. Mulimuli ane, na avea Eunice o se tagata e tāua i loʻu olaga, ona na avea ma aʻu avā!

O i maʻua ma Eunice i le 1960 ma le 1989

Ina ua iloa e le tinā o Eunice o loo fai le suʻesuʻega faale-Tusi Paia a Eunice, na ia talosaga atu i le pule o le aʻoga ia tauanau Eunice e taofi lana suʻesuʻega. Na fao foʻi e le pule o le aʻoga tusi na faia ai le suʻesuʻega a Eunice. Peitaʻi, na maumauaʻi Eunice e faamuamua Ieova i lona olaga. Na fia papatiso o ia ae na fai i ai ona mātua, “O le taimi lava e te Molimau a Ieova ai, e lē toe taliaina oe i le aiga lenei!” Na tuua e Eunice lona aiga i le 17 o ona tausaga, ma na tausia ma le agalelei o ia e se aiga Molimau a Ieova i lenā vaipanoa. Na faaauau lana suʻesuʻega, ma na papatiso mulimuli ane ai. Na ma faaipoipo i le 1960 ae e leʻi auai mai ona mātua. Peitaʻi, a o faagasolo tausaga na faasolo ina la faaaloalogia i maʻua, ona o o ma talitonuga ma le auala na tausia aʻe ai la ma fanau.

 NA TAUSIA AʻU E IEOVA

O loʻu atalii o Nicholas ma lana avā o Deborah, o loo auauna i le Peteli i Lonetona

E ui o i maʻua o ni mātua logonoa, ae na ma tausia aʻe se fanau tama e toʻafitu e lē logonoa. E leʻi faigofie lenei tulaga! Peitaʻi, na ma faamautinoa e latou te iloa le gagana fai taga, ina ia lelei a matou fesootaʻiga ma mafai ai ona ma aʻoaʻoina i latou i le upu moni. Sa telē foʻi le fesoasoani a uso ma tuafāfine o le faapotopotoga. O se faataʻitaʻiga, na tusi mai se matua e faailoa mai o loo faaaogā e se tasi o le ma fanau ni upu e lē talafeagai i totonu o le Maota mo Sauniga. Na mafai ona ma taulimaina le faafitauli i le taimi lava lenā. O loo faaauau ona auauna ma le faamaoni iā Ieova la ma fanau tama e toʻafā o James, Jerry, Nicholas, ma Steven, faatasi ma o latou aiga. O loo auauna uma i latou e toʻafā o ni toeaina. E lē gata i lea, o loo fesoasoani Nicholas ma lana avā o Deborah i galuega faaliliu i le gagana fai taga i le lālā i Peretania. O loo fesoasoani foʻi Steven ma lana avā o Shannan i galuega faaliliu i le gagana fai taga i le lālā i le Iunaite Setete.

O oʻu atalii o James, Jerry, ma Steven ma a latou avā, o loo lagolagoina le galuega talaʻi i le gagana fai taga i auala eseese

Na maliu si aʻu avā o Eunice i le maʻi o le kanesa, a ua toe tasi le masina atoa le 40 tausaga talu ona ma faaipoipo. Na faaalia e Eunice le lototele a o tauivi ma lenei maʻi tugā. Na faamalosia lona faatuatua ona o le faamoemoe o le toetū. Ou te tulimataʻia ma le naunau le aso o le a ou toe feiloaʻi atu ai iā te ia.

Faye ma James, Jerry ma Evelyn, Shannan ma Steven

Iā Fepuari 2012, na ou paʻū ai ma gau loʻu suilapalapa, ma ou mautinoa ai ua ou manaʻomia se fesoasoani. O lea na ou alu ai loa ma matou nonofo faatasi ma se tasi o oʻu atalii ma lana avā. O loo matou auai i le faapotopotoga e faaaogā ai le gagana fai taga i Calgary, ma o loo faaauau ona ou auauna o se toeaina. O se tulaga e maofa ai, o le taimi muamua lea ua ou auai ai i se faapotopotoga e faaaogā ai le gagana fai taga! Na mafai la faapefea ona ou agaʻigaʻi i luma faaleagaga, ae ua leva ona ou auai i se faapotopotoga faa-Peretania talu mai le 1946? E faamaoni Ieova i lana folafolaga e na te tausia tamaiti e leai ni tamā. (Sala. 10:14) Ou te matuā talisapaia taumafaiga uma a i latou na faia faamaumauga mo aʻu, aʻoaʻoina le gagana fai taga, ma taumafai malosi e faaliliu mo aʻu.

Auai i se aʻoga paeonia i le Gagana Faagūgū a Amerika (ASL) i le 79 o oʻu tausaga

O le mea moni, e iai taimi na ou lagona ai le lotovaivai ma le fiu ona ou te leʻi malamalama i tala na fai, pe e leʻi malamalama foʻi tagata i manaʻoga o ē logonoa. Peitaʻi, a o oʻu tauivi ma na faalogona, na ou mafaufau i upu a Peteru iā Iesu: “Le Alii e, o ai a matou ō i ai? Ua iā te oe upu o le ola e faavavau.” (Ioa. 6:66-68) E pei o le toʻatele o uso ma tuafāfine logonoa e matou te tupulaga, ua ou iloa onosaʻi. Ua ou iloa faatalitali iā Ieova ma lana faalapotopotoga, ma e tele aogā ua ou maua mai ai. E anoanoaʻi taumafa faaleagaga ua ou maua i laʻu gagana i lenei taimi, ma ua ou olioli i faatasitasiga i sauniga ma tauaofiaga i le Gagana Faagūgū a Amerika. O le mea moni, ua ou tofo i se olaga fiafia ma faamalieina i le auaunaga iā Ieova, lo tatou Atua silisili ese.