Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iulai 2017

Fesili Mai le ʻAufaitau

Fesili Mai le ʻAufaitau

Pe e talafeagai i se Kerisiano ona ia umia se laau malosi, e pei o se tamaʻi fana po o se fana telē ina ia puipuia ai mai i isi tagata?

E iai gaoioiga talafeagai e mafai ona faia e Kerisiano ina ia faamautinoa ai lo latou saogalemu, ae e latou te faia faapea e ōgatusa ma mataupu silisili o le Tusi Paia. E lē o lagolagoina e mataupu silisili o le Tusi Paia le faaaogāina o auupega faaletino e pei o tamaʻi fana, fana tetelē, po o isi lava ituaiga fana, ina ia puipuia ai mai i isi tagata. Seʻi o tatou iloiloina manatu o loo mulimuli mai:

E paia i le silafaga a Ieova le ola, aemaise lava le ola o le tagata. Na iloa e le faisalamo o Tavita o Ieova o le “puna o le ola.” (Sala. 36:9) O lea, pe a filifilia e se Kerisiano ni gaoioiga talafeagai e puipuia ai o ia po o ana meatotino, e na te faia le mea sili ina ia ʻalofia ai le maumau o le ola o se tagata ma nofosala ai i le toto.​—Teu. 22:8; Sala. 51:14.

E ui o le faaaogāina o so o se auupega e ono iʻu ai ina nofosala i le toto, ae o fana e sili atu ona faigofie ona fasiotia ai se tasi, a lē i se tulaga faafuaseʻi pe faia foʻi ma le loto i ai. * E lē gata i lea, pe afai e iloa atu e se tagata o loo alu atu e osofaʻi o loo uu mai e le isi tagata se fana, e ono faateteleina ai faalogona lotoa ma e ono iʻu ai i le fasiotia o se tasi.

Ina ua fetalai Iesu i ona soo ia ave ni pelu i lona pō mulimuli i le lalolagi, e leʻi mafaufau Iesu e mo lo latou puipuiga. (Luka 22:36, 38) Nai lo o lea, na finagalo Iesu e ave se pelu ina ia aʻoaʻo atu ai iā i latou se lesona tāua, ia aua neʻi o latou faia ni gaoioiga sauā, e oo lava i le  taimi na osofaʻia ai i latou e se motu o tagata na faaauupegaina. (Luka 22:52) Ina ua faaaogā e Peteru se pelu e osofaʻia ai le pologa a le ositaulaga sili, na faatonu e Iesu Peteru: “Ia toe sulu lau pelu i lona faamoega.” Ina ua uma, ona taʻua lea e Iesu o se upu moni faavae, o se mataupu silisili o loo taʻitaʻia ai ona soo e oo mai i aso nei: “O i latou uma e tago i le pelu, e faaumatia i le pelu.”​—Mata. 26:51, 52.

E tusa ai o le Mika 4:3, o tagata o le Atua e latou te “tuʻi a latou pelu e fai ma suōtosina, ma a latou tao e fai ma pelu e teu ai laau.” O le vala lenei e iloa ai Kerisiano moni, ma ua ōgatusa ma le fautuaga lenei a le aposetolo o Paulo: “Aua le taui atu le leaga i le leaga i se tasi. . . . Afai e mafai iā te outou, ia nonofo filemu ma tagata uma.” (Roma 12:17, 18) E ui lava i le tele o tulaga faigatā na oo iā Paulo e aofia ai le “lamatia i tagata faomea,” ae sa ola o ia e tusa ai ma ana upu ma mulimuli i mataupu silisili o le Tusi Paia, nai lo o le faasilia o lona lava saogalemu. (2 Kori. 11:26) Na ia maufaatuatuaina le Atua ma le atamai o loo i Lana Afioga, lea e ʻsili ona lelei nai lo o meafaigaluega e tau ai.’​—Fai. 9:18.

E sili atu ona tāua i Kerisiano le ola nai lo o meafaitino. “E lē ola se tasi i le tele o ana mea ua iā te ia.” (Luka 12:15) O lea, pe a lē mafai e ni upu agamalu ona taofia ai se tagata faomea o loo faaauupegaina, o Kerisiano atamamai e mulimuli i le mataupu silisili o loo i fetalaiga a Iesu e faapea: “Aua le tetee atu i le tagata amioleaga.” E ono manaʻomia foʻi ona tuu atu a tatou meafaitino e ave ma i latou. (Mata. 5:39, 40; Luka 6:29) * O le mea e sili ona tāua o le puipuia o o tatou ola. Pe afai e ʻalofia le ʻfaalialiavale o a tatou meafaitino’ ma e mātaulia i tatou o ni Molimau a Ieova e tausia le filemu, atonu o le a lē taulaʻi mai ai tagata solitulafono sauā iā i tatou.​—1 Ioa. 2:16; Faata. 18:10.

E amanaʻia e Kerisiano lotofuatiaifo o isi. (Roma 14:21) Pe a iloa ane e iai se tasi o le faapotopotoga o loo iai sana fana ina ia puipuia ai mai i isi tagata, e ono faateʻia pe oo foʻi ina tausuai ai isi Kerisiano. O le alofa e uunaʻia ai i tatou e faamuamua le lelei o isi, e tusa lava pe e lafoaʻia ai se mea atonu o loo iai la tatou aiā tatau faaletulafono e umia ai.​—1 Kori. 10:32, 33; 13:4, 5.

E taumafai Kerisiano e avea ma faaaʻoaʻoga lelei. (2 Kori. 4:2; 1 Pete. 5:2, 3) Pe afai e faaauau ona umia e se Kerisiano se fana ina ia puipuia ai mai i isi tagata, ae ua uma ona ave i ai ni fautuaga mai i le Tusi Paia, e lē mafai la ona avea o ia o se faaaʻoaʻoga lelei. O le a lē agavaa o ia mo ni tiute tauave po o ni faaeaga faapitoa i le faapotopotoga. E faapena foʻi se Kerisiano e faaauau ona umia se laau malosi ona o lana galuega. O se mea lelei la le saʻili o se isi galuega! *

O le auala e puipuia ai e se Kerisiano ia lava, lona aiga, po o ana meatotino, o le filifiliga lenā a le tagata lava ia e pei lava o le filifilia o se galuega. Peitaʻi, o loo atagia mai i mataupu silisili o le Tusi Paia le atamai o le Atua ma lona alofa iā i tatou. O le faaaloalo la i na mataupu silisili, e filifili ai Kerisiano taʻumatuaina faaleagaga e lē umia se laau malosi ina ia puipuia ai mai i isi tagata. Ua latou iloa o le saogalemu moni ma tumau, e maua e i latou o ē e maufaatuatuaina le Atua e ala i le ola e tusa ai ma mataupu silisili o le Tusi Paia.​—Sala. 97:10; Faata. 1:33; 2:6, 7.

A o faagasolo le puapuaga tele, o le a faalagolago Kerisiano iā Ieova ma o le a lē taumafai e puipuia i latou lava

^ pala. 3 E ono filifili se Kerisiano e umia se laau malosi (e pei o se tamaʻi fana po o se fana telē) ina ia tafana ai manu mo meaʻai, pe puipuia ai mai i manu feʻai. Peitaʻi, pe afai e lē o faaaogāina, e ao ona aveese pulu pe talai ma loka i se mea e malupuipuia ai. I atunuu e faasā ai i le tulafono ona umia se fana pe iai foʻi ni tulafono i le auala e faaaogā ai fana, e ao i Kerisiano ona usitaʻia na tulafono.—Roma 13:1.

^ pala. 2 E tusa ai o le mataupu e faatatau i le puipuia o se tasi mai i feusuaʻiga e fai faamalosi, tagaʻi i le mataupu “How to Prevent Rape” (“Auala e Puipuia ai Mai i Feusuaʻiga e Fai Faamalosi”) i le Awake! o Mati 8, 1993.

^ pala. 4 Mo nisi faamatalaga i le fesili e faatatau i le taliaina o se galuega e aofia ai le umia o se laau malosi, tagaʻi i Le Olomatamata o Novema 1, 2005, itu. 31; ma Le Olomatamata faa-Peretania o Iulai 15, 1983, itu. 25-26.