Skip to content

Skip to table of contents

Alisa

Ua Lotomalilie e Ofo Atu i Latou Lava​—I Take

Ua Lotomalilie e Ofo Atu i Latou Lava​—I Take

E TELE taumafaiga sa faia e Kerisiano i le uluaʻi senituri ina ia oo atu le “tala lelei o le malo” i le toʻatele o tagata. (Mata. 24:14) Sa iʻu lava ina faimalaga atu nisi i atunuu ese. O se faaaʻoaʻoga, sa alu atu le aposetolo o Paulo i le vaipanoa o loo iai nei Take, ma talaʻi atu i le tele o nuu a o faagasolo ana malaga faamisionare. * Pe tusa ma le 2,000 tausaga mulimuli ane i le 2014, na toe faia ai se tauiviga faapitoa mo le talaʻiga i Take. Aiseā na faia ai lenā tauiviga? O ai i latou na auai ai?

“O LE Ā LE MEA O LOO TUPU?”

E silia i le 2,800 le ʻautalaʻi i Take ae e 79 miliona le aofaʻi o tagata o le atunuu. I se fua faatatau, pe tusa e toʻatasi le tagata talaʻi i le 28,000 tagata o le atunuu. Pe a manatu i ai, e na o ni nai tagata o lenei atunuu o loo mafai ona oo atu i ai le ʻautalaʻi. O le sini o le tauiviga faapitoa, ina ia oo atu le talaʻiga i le toʻatele o tagata i se taimi puupuu. Pe tusa ma le 550 uso ma tuafāfine e tautatala i le gagana Take i isi atunuu, na malaga mai i Take ma talaʻi faatasi ma le ʻautalaʻi i inā a o faagasolo le tauiviga. O ā iʻuga na iʻu i ai?

Na avatu ai se molimau tele. Na tusi mai se faapotopotoga i Istanbul e faapea: “Ina ua vāai mai tagata iā i matou, na fesili mai: ʻE iai se tou fono faapitoa o fai i inei? O loo matou vaaia Molimau a Ieova i so o se mea!’” Na tusi mai se faapotopotoga i le aai o Izmir: “Na fesili se tamāloa e faigaluega i se fale taxi i se toeaina o le faapotopotoga, ʻO le ā le mea o loo tupu? Matuā toʻatele le tou ʻautalaʻi!’” Ioe, sa mātauina e tagata le tauiviga.

Steffen

Na matuā fiafia le ʻautalaʻi mai i isi atunuu i le tauiviga. Na taʻua e Steffen mai i Tenemaka: “O aso uma lava na ou talaʻi ai i tagata e leʻi faalogo muamua lava e faatatau iā Ieova. Na ou iloa sa ou faalauiloa moni atu lava le suafa o Ieova.” Na tusi mai Jean-David mai i Falani e faapea: “E na o le tasi se auala na matou talaʻi ai mo le tele o itula. O le manaia ia! O le toʻatele o tagata e latou te lē iloa Molimau a Ieova. Na toetoe o aiga uma lava na matou faia ai ni talanoaga, faaali i ai se tasi o a tatou vitiō, ma tuu i ai ni lomiga.”

Jean-David (ogatotonu)

Pe tusa ma le 60,000 lomiga na ofo i le na o le lua vaiaso e le ʻautalaʻi e toʻa 550. O le mea moni o lenei tauiviga na avatu ai se molimau tele.

 Na faateleina ai le maelega mo le faiva. Na iai se aafiaga lelei o lenei tauiviga faapitoa i uso i Take. Na amata ona mafaufau le toʻatele e faatatau i le auaunaga faataimi atoa. Sa siitia i le 24 pasene le aofaʻi o paeonia sauatoa i Take, a o faagasolo le 12 masina talu ona māeʻa le tauiviga.

Şirin

Sa faamatala e i latou na auai mai i isi atunuu le aafiaga o le tauiviga i la latou faiva ina ua toe foʻi. Na tusi Şirin mai i Siamani: “Sa faigofie i uso i Take ona molimau atu lē fuafuaina. Ou te mā tele e molimau atu lē fuafuaina. Ae e faafetai ona o le tauiviga faapitoa, o faaaʻoaʻoga a uso i Take, faatasi ai ma le tele o tatalo, ua mafai ai ona ou faia se mea e leʻi mafai ona ou faia muamua. Ua mafai foʻi ona ou talaʻi ma ofo atu sāvali i nofoaga e faatali ai nofoaafi! Ua ou lē toe mā e pei o le taimi muamua.”

Johannes

Na taʻua e Johannes mai i Siamani: “Sa ou aʻoaʻoina ai ni lesona mo laʻu faiva. E matuā mananaʻo uso i Take e faailoa atu le upu moni i le toʻatele o tagata e mafai ai. E latou te molimau atu i so o se avanoa. Sa ou filifili e faia foʻi faapea pe a ou toe foʻi i Siamani. Ua toʻatele atu tagata ua ou talaʻi i ai i le taimi lenei nai lo o le taimi muamua.”

Zeynep

Na faapea mai Zeynep mai i Falani: “Ua matuā aogā lenei tauiviga i laʻu faiva. Ua fesoasoani e atili ai ona ou lototele ma faatuatuaina Ieova.”

Ua atili māfana ai faiā a le ʻautalaʻi. E manatua pea le alofa ma le autasi o uso mai i atunuu eseese. Na faapea mai Jean-David lea na taʻua muamua: “Na matou ʻtofo’ i le agaga talimālō o uso.” Na faapea atili mai o ia: “Na latou talia i matou o ni a latou uō ma o ni tagata o o latou aiga. Sa faaavanoa o latou fale mo i matou. Na ou iloa o i tatou o se ʻauuso i le lalolagi aoao. Sa ou faitau i lenei manatu i le tele o taimi i a tatou lomiga. Ae o lea la ua ou tofo totino lava i ai. Na atili ai ona ou mitamita i le avea ai o aʻu ma tagata o Ieova, ma ou te faafetai iā Ieova mo lenei faaeaga matagofie.”

Claire (ogatotonu)

Ua faapea mai Claire mai i Falani: “Pe e matou te ō mai i Tenemaka, Falani, Siamani, po o Take, ae sa  avea i matou uma o se aiga e tasi. Sa peiseaʻī na aveesea atoatoa e le Atua tuaoi na vaevaeina ai nei atunuu.”

Stéphanie (ogatotonu)

Na faaopoopo mai Stéphanie mai i Falani e faapea: “Na matou aʻoaʻoina mai i le tauiviga faapitoa, o le alofa iā Ieova e autasia ai i tatou, ae e lē o aganuu po o gagana.”

NA IAI NI AOGĀ TUMAU

O le toʻatele o i latou na auai mai i isi atunuu, ua amata ona mafaufau e siitia mai i Take, ina ia fesoasoani i le galuega tele o loo manaʻomia pea ona faia. E toʻatele i latou ua siitia mai i inei ma e matuā talisapaia i latou.

O se faaaʻoaʻoga, o se vaega i se nofoaga maotua e na o le toʻa 25 le ʻautalaʻi. E na o le toʻatasi lava le toeaina sa iai i le tele o tausaga. Ae seʻi mafaufau i lo latou fiafia ina ua siitia mai ni tagata talaʻi se toʻaono mai i Siamani ma Holani i le 2015, e fesoasoani iā i latou!

AUAUNA I LE MEA O LOO TELE AI LE MANAʻOGA

O le ā ua taʻua e i latou ua fai si umi o auauna ai i le mea o loo tele ai le manaʻoga i Take, e faatatau i o latou olaga i inā? O le mea moni, e lē faigofie i nisi taimi, ae e matuā tauia le auauna ai i le mea o loo tele ai le manaʻoga. Seʻi mātau faamatalaga a nisi o i latou:

Federico

Ua faapea mai Federico, o se uso faaipoipo na siitia mai i Sepania ma ua silia i le 40 ona tausaga: “O le lē tele o ni meafaitino, ua ou saʻoloto ma mafai ai ona ou taulaʻi atu i mea e sili ona tāua.” Pe e na te faalaeiau isi ina ia faia lenei auaunaga? Ua ia faapea mai: “Ioe! Pe a e siitia i se isi atunuu ina ia fesoasoani i tagata e iloa Ieova, o le mea moni ua e tuu atu iā Ieova e na te tausia oe. E te lagona ai ua sili atu le tausiga a Ieova nai lo o se isi lava taimi.”

Rudy

Ua faapea mai Rudy, o se uso faaipoipo mai i Holani ma ua lata i le 60 ona tausaga: “E matuā lagona le faamalieina i le auauna ai i le mea o loo tele ai le manaʻoga, ma faailoa atu le upu moni i le anoanoaʻi  o tagata e leʻi faalogo muamua lava i ai. O se fiafiaga tele le vaai atu i le fiafia o tagata ua taliaina le upu moni.”

Sascha

Ua taʻua e Sascha, o se uso faaipoipo na siitia mai i Siamani ma ua silia i le 40 ona tausaga: “O taimi uma lava ou te talaʻi ai, ou te tau ai i tagata ua faatoʻā faalogo i le upu moni. Ou te matuā fiafia ona ua iai se avanoa mo na tagata ina ia iloa ai Ieova.”

Atsuko

Ua faapea mai Atsuko, o se tuafafine faaipoipo mai i Iapani ma ua silia i le 30 ona tausaga: “I taimi ua teʻa, sa ou manaʻo lava ia oo mai loa Amaketo. Ae ina ua ou siitia mai i Take, ou te faafetai iā Ieova i lona onosaʻi pea. O le tele lava o loʻu iloa o le auala o loo faatonutonu ai e Ieova le galuega talaʻi, o le atili foʻi lenā ona ou manaʻo e mafuta vavalalata atu iā te ia.”

Ua faapea mai Alisa, o se tuafafine mai i Rusia ma ua silia teisi i le 30 ona tausaga: “O le auauna iā Ieova i lenei vala o le auaunaga, ua fesoasoani ou te tofo ai i le lelei o Ieova.” (Sala. 34:8) Ua ia toe faapea mai: “Ua avea Ieova ma oʻu Tamā, o se Uō māfana, ma ua ou malamalama lelei iā Ieova ona o le siʻomaga fou ua ou iai nei. E tele taimi fiafia, mea mananaia na tutupu, ma faamanuiaga matagofie ua tofo i ai loʻu olaga!”

IA “VĀAI ATU I LE FAATOʻAGA”

Ua oo atu le tala lelei i le toʻatele o tagata i Take ona o lenei tauiviga faapitoa. Peitaʻi, e telē lava le oganuu e leʻi oo i ai se talaʻiga. O aso uma lava e feiloaʻi ai i latou ua siitia atu i Take i tagata e leʻi faalogo lava e faatatau iā Ieova. Pe e te fia auauna i se oganuu faapena? Pe afai o lea, e matou te faalaeiau oe ina ia ʻtepa aʻe ma vaai atu i le faatoʻaga, ua matua mo le seleselega.’ (Ioa. 4:35) Pe e mafai ona e fesoasoani i se vaega o le lalolagi o loo iai se oganuu “ua matua mo le seleselega”? Pe afai e mafai, ia amata nei loa ona faia ni laasaga talafeagai ina ia ausia ai lenā sini. Ia e mautinoa i lenei mea: E lē mafaatusalia le tele o faamanuiaga o le a e maua, pe a faateleina sou sao i le folafolaina atu o le tala lelei i “tuluʻiga uma o le lalolagi”!​—Galu. 1:8.

^ pala. 2 Tagaʻi i le polosiua ʻMatamata i le Nuu Lelei,’ itu. 32-33.