Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iulai 2017

Manumalo i le Taua mo Lou Mafaufau

Manumalo i le Taua mo Lou Mafaufau

O LOO osofaʻia oe! O loo faaaogā e Satani o lou fili sili se auupega mataʻutia e osofaʻia ai oe. O le ā lenā auupega? O faamatalaga taufaasesē! O se auupega na fafau faapitoa e osofaʻia ai lou mafaufau ae e lē o lou tino.

Na iloa lelei e le aposetolo o Paulo lamatiaga o faamatalaga taufaasesē a Satani, peitaʻi, e leʻi faapena le toʻatele o ona uso Kerisiano. O se faataʻitaʻiga, o nisi i Korinito e foliga mai na soona mautinoa naʻuā ma manatu e lē taitai ona latou paʻuʻū ona e latou te malolosi i le upu moni. (1 Kori. 10:12) O le māfuaaga lenā na avatu ai e Paulo le lapataʻiga lenei: “Ou te popole ina neʻi pei ona faasesēina o Eva e le gata i ana togafiti, e faapena foʻi ona faaleagaina o outou mafaufau, ia liliuese mai i le faamaoni ma le amio mamā e tatau ona outou faaalia i le Keriso.”​—2 Kori. 11:3.

O popolega o Paulo, ua faaalia mai ai e lē tatau ona tatou faatamala. Ina ia e manumalo i le taua mo lou mafaufau, e tatau ona e iloa āuga mataʻutia o faamatalaga taufaasesē ma puipuia mai ai oe.

O Ā ĀUGA MATAʻUTIA O FAAMATALAGA TAUFAASESĒ?

O faamatalaga taufaasesē e faaaogā e faavalea ai tagata pe pulea ai le auala e mafaufau ma gaoioi ai. E tusa ai ma le tusi Propaganda and Persuasion, o faamatalaga taufaasesē “e lē saʻo, e leaga, ma lē tonu.” E faaaogā e tagata upu e pei o le ʻpepelo, taufaavalea, ma le pulea o mafaufau’ e faamatala ai faamatalaga taufaasesē.

O ā āuga mataʻutia o faamatalaga taufaasesē? O faamatalaga taufaasesē e faasolosolo mālie ona aafia ai o tatou mafaufau e aunoa ma le iloa. E tai pei o se kasa oona e lē mafai ona vaaia ma e leai sona manogi. Talu ai e tatou te ono lē iloa āuga o faamatalaga taufaasesē, o le mea lenei na mātauina e Vance Packard o se tagata e tomai faapitoa i le mātauina o gaoioiga a tagata: “O le  toʻatele o i tatou ua tele ina aafia ma taaʻina sesē e aunoa ma lo tatou iloaina.” Ua faapea mai se tasi tagata atamai, o ona aafiaga ua “faigofie ai” i tagata ona “lolo atu i le faia o gaoioiga e matuā lē talafeagai ma leaga” e pei o ʻfasiotiga tagata, taua, le matuā faailogalanu, o le tetee i lotu ma le tele o isi amioga lē talafeagai.’​—Easily Led—A History of Propaganda.

O lea, pe afai e mafai e tagata faatauvaa ona faasesē i tatou i a latou faamatalaga taufaasesē, seʻi manatu la i le mea e mafai ona faia e Satani! Ua ia mataʻitu gaoioiga a tagata talu ona foafoaina le tagata, ma ua ia pulea nei “le lalolagi atoa.” E mafai ona ia faaaogā so o se vaega o lana lalolagi e faasalalau ai ana faamatalaga pepelo. (1 Ioa. 5:19; Ioa. 8:44) Ua matuā taulau Satani e ʻfaatauaso manatu o tagata’ ma ua ia ʻfaasesēina ai le lalolagi atoa.’ (2 Kori. 4:4; Faaa. 12:9) E faapefea ona e tetee atu i ana faamatalaga taufaasesē?

IA TAU FAASAGA I FAAMATALAGA TAUFAASESĒ

Na taʻua e Iesu se taʻiala faigofie e tau faasaga ai i faamatalaga taufaasesē: “E iloa e outou le upu moni, e tuusaʻoloto foʻi outou e le upu moni.” (Ioa. 8:31, 32) Peitaʻi, o le upu moni e masani ona osofaʻia muamua. I le pei o se fitafita i le taua, e te manaʻomia ni faamatalaga maufaatuatuaina ina ia puipuia ai mai i taumafaiga a le fili ina ia taaʻina lou mafaufau. Ua saunia mai e Ieova na faamatalaga. I le Tusi Paia, e te maua ai mea uma e te manaʻomia e tau faasaga ai i faamatalaga taufaasesē a Satani.​—2 Timo. 3:16, 17.

E iloa lelei e Satani lenei mea, ona o ia o le puna o faamatalaga taufaasesē. O lea, e na te faaaogā ai lenei faiga o mea ina ia taofia ai tagata mai i le faitauina ma le suʻesuʻeina o le Tusi Paia. Aua lava neʻi e lolo atu i ana togafiti taufaaʻoleʻole! (Efe. 6:11) Nai lo o lea, ia e “malamalama lelei” i le loloto o le upu moni. (Efe. 3:18) O le a tele taumafaiga e manaʻomia ona e faia. Ae mātau le faamatalaga moni lenei na taʻua e le tusitala o Noam Chomsky: “E leai se isi e alu atu ma sasaa atu ni faamatalaga moni i lou mafaufau. O se mea e tatau ona e saʻilia mo oe lava.” O lea, ia e “saʻilia mo oe lava” le upu moni e ala i le finafinau e “matuā iloiloina Tusitusiga Paia i aso taʻitasi.”​—Galu. 17:11.

Ina ia e manumalo i le taua mo lou mafaufau, e tatau ona e iloa āuga mataʻutia o faamatalaga taufaasesē ma puipuia mai ai oe

Ia e manatua, e lē manaʻo Satani e te mafaufau lelei ma iloilo totoʻa se mea. Aiseā? Ua taʻua i se tusi e faapea, “e foliga mai e matuā telē se taaʻiga” o faamatalaga taufaasesē “pe afai e lē mafaufau  lelei tagata.” (Media and Society in the Twentieth Century) Ia aua lava neʻi tau ina faamalieina oe pe talia so o se mea ua e faalogo i ai. (Faata. 14:15) Ia faaaogā le mafaufau lelei ma le tomai e mafaufau ai na tuuina mai e le Atua ina ia fai ai mou le upu moni.​—Faata. 2:10-15; Roma 12:1, 2.

IA MATAALA I MAILEI E FEVAEVAEAʻI MA FAATOʻILALO AI

E ono faaaogā e le ʻaufaufautua i vaegaau faamatalaga taufaasesē e faalotovaivai ai pe faavaivaia ai le agaga fia tau o fitafita. Atonu e latou te uunaʻia fitafita a le fili ina ia toe fetauaʻi lava i latou, pe faasesē fitafita ina ia faaesea ai mai i le vaegaʻau. Na taʻutino e se taʻitaʻiʻau Siamani, o se tasi o māfuaaga na toʻilalo ai i le Taua Muamua a le Lalolagi, ona na ʻseetia tagata i faamatalaga taufaasesē a le fili e pei ona faasesē e se gata se lapiti.’ O loo faaaogā foʻi e Satani togafiti faapena i ana taumafaiga e faatupu fevaevaeaʻiga ma faatoʻilalo ai. O se faataʻitaʻiga, e taumafai Satani e faapogaia fevaevaeaʻiga i le va o uso ma tuafāfine Kerisiano, pe uunaʻia i latou ina ia faaesea mai i le faalapotopotoga a Ieova, ona o ni faiga e manatu nisi e lē tonu po o ni faalogona tigā.

Aua lava neʻi faasesēina ai oe! Ia taʻitaʻia oe e le Afioga a le Atua. O se faataʻitaʻiga, ina ia faatumauina le autasi i le va o uso ma tuafāfine, ua faalaeiau mai le Tusi Paia ia faaauau ona “fefaamagaloaʻi ma le lotoatoa” ma ia vave ona faaleleia feeseeseaʻiga. (Kolo. 3:13, 14; Mata. 5:23, 24) O loo lapataʻia malosi i tatou ia aua neʻi faaesea i tatou lava mai i le faapotopotoga. (Faata. 18:1) Ia iloilo le auala e te tali atu ai i faamatalaga taufaasesē a Satani. Ia fesili ifo: ʻO le ā na taʻitaʻia ai loʻu mafaufau i le taimi mulimuli na ou fesagaʻia ai lea tulaga? Pe na taʻitaʻia e le agaga o le lalolagi po o le agaga o le Atua?’​—Kala. 5:16-26; Efe. 2:2, 3.

IA MAUFAATUATUAINA LE TAʻITAʻIGA

O se fitafita e itiiti lona faamaoni i lona taʻitaʻi o le a lē lelei le auala e tau ai. E faaaogā la e le ʻaufaufautua i vaegaau faamatalaga taufaasesē, ina ia lepeti ai lagona mautinoa ma le maufaatuatuaina i le va o le fitafita ma lona taʻitaʻi. E latou te ono faaaogā faamatalaga e pei o le: “E lē mafai ona e maufaatuatuaina lou taʻitaʻi!” ma le “O le a outou toʻilalo i lana taʻitaʻiga!” Ina ia faamalosia atili a latou osofaʻiga, atonu e latou te  faaaogā ni mea sesē e ono faia e lenā taʻitaʻi. O le mea lenā o loo faia e Satani. E lē taitai ona fiu Satani i le taumafai e faavaivaia lou maufaatuatuaina o le taʻitaʻiga ua saunia mai e Ieova.

E faapefea ona puipuia oe? Ia e maumauaʻi e piiama atu pea i le faalapotopotoga a Ieova, ma lagolagoina ma le faamaoni le taʻitaʻiga ua ia saunia mai e tusa lava po o ā uiga lē lelei e te ono mātauina. (1 Tesa. 5:12, 13) Pe a feagai ma osofaʻiga e ono faaleagaina ai mai iā i latou ua fulitua i le upu moni, po o isi o loo taumafai e faasesē o tatou mafaufau e tusa pe e foliga mai e saʻo o latou manatu, ia ʻaua neʻi vave fenuminumiaʻi lou mafaufau.’ (2 Tesa. 2:2; Tito 1:10) Ia mulimuli i le fautuaga na tuuina atu i le talavou o Timoteo. Ia tausisi pea i le upu moni ua e aʻoaʻoina ma ia e manatua le auala na e maua ai le upu moni. (2 Timo. 3:14, 15) E mautinoa e anoanoaʻi faamaoniga e faaalia ai, e mafai ona e maufaatuatuaina le auala o loo faaaogā e Ieova mo le toetoe 100 tausaga e taʻitaʻia ai i tatou i le ala o le upu moni.​—Mata. 24:45-47; Epe. 13:7, 17.

AUA NEʻI FAAVAIVAIA OE I FAIGA TAUFAAMATAʻU

Ia manatua, e lē o togafiti uma a Satani e iloagatā. E iai taimi e na te faaaogā ai faiga taufaamataʻu, “o se tasi o faiga taufaasesē ua umi ona ia faaaogāina.” (Easily Led—A History of Propaganda) O se faataʻitaʻiga, na tusi Philip M. Taylor o se polofesa i Peretania e faapea, na pulea e tagata Asuria o latou fili i se “faiga taufaamataʻu faatasi ai ma se isi togafiti.” O le a faaaogā e Satani le fefe i tagata, le fefe i sauāga, le fefe i le oti, ma so o se isi lava faalogona fefe ina ia taumafai e pulea ai oe ma faavaivaia oe mai i le auauna atu iā Ieova.​—Isa. 8:12; Iere. 42:11; Epe. 2:15.

Ia aua lava neʻi faatagaina Satani e na te faaaogā le fefe e faalotovaivai ai oe ma lepetia lou faamaoni. Na fetalai Iesu: “Aua tou te matataʻu i ē e fasiotia le tino, auā pe a uma, ona lē toe mafai lea ona latou faia o se isi mea.” (Luka 12:4) Ia e maufaatuatuaina atoatoa le folafolaga a Ieova o le a ia leoleoina oe, tuuina mai “le mana lea e sili atu i le malosi o tagata,” ma fesoasoani iā te oe e fesagaʻia so o se taumafaiga ina ia faafefe ai oe e lolo atu i se mea.​—2 Kori. 4:7-9; 1 Pete. 3:14.

Atonu e te fesagaʻia ni tulaga mataʻutia e te lotovaivai ai. Peitaʻi, ia manatua upu faalaeiau a Ieova iā Iosua: “Ia lototele ma faamalosi. Aua le fefe pe mataʻu, auā e faatasi Ieova lou Atua ma oe i mea uma e te alu i ai.” (Iosua 1:9) Pe a poʻia oe i popolega, ia vave ona sulu atu iā Ieova i le tatalo ma faailoa atu ou popolega. E mafai ona e mautinoa o le a ʻleoleoina lou loto ma lou mafaufau i le filemu mai i le Atua,’ ina ia e maua ai le malosi e tetee ai i faiga uma a Satani.​—Fili. 4:6, 7, 13.

Po o e manatua faamatalaga taufaamataʻu a Ravesaki le avefeʻau a tagata Asuria faasaga i tagata o le Atua? Na peiseaʻī na ia faapea atu, ʻE leai se mea e mafai ona puipuia outou mai iā Asuria. E oo lava i lo outou Atua o Ieova e leai se mea e mafai ona ia faia mo outou.’ Na ia faapea atu foʻi ma le faasausili: ʻO Ieova lava ia na fetalai mai iā i matou ia faaumatia lenei atunuu.’ O le ā le tali mai a Ieova? “Aua e te fefe ona o upu na e faalogo i ai, na upuleagaina ai aʻu e auauna a le tupu o Asuria.” (2 Tu. 18:22-25; 19:6) O lea na auina mai ai e Ieova se agelu ma fasiotia tagata Asuria e 185,000 i le pō e tasi!​—2 Tu. 19:35.

IA ATAMAI E ALA I LE FAALOGO PEA IĀ IEOVA

Pe na e matamata i se ata tifaga ma e iloa atu ai se tasi ua faasesēina ma taʻitaʻisesēina? Pe na e faapea ifo: ʻAua e te talitonu i ai! O lenā e pepelo atu iā te oe!’ Ia faaata la o loo valaau mai faapena agelu iā te oe: “Aua neʻi faasesēina oe i pepelo a Satani!”

O lea, aua e te talitonu i faamatalaga ma faiga taufaasesē a Satani. (Faata. 26:24, 25) Ia faalogo atu iā Ieova ma maufaatuatuaina o ia i mea uma e te faia. (Faata. 3:5-7) Ia e tali atu i lana ʻaiʻoiga alofa e faapea: “Loʻu atalii e, ia atamai oe ma faafiafia ai loʻu loto.” (Faata. 27:11) O le faia faapea, o le a e manumalo ai i le taua mo lou mafaufau!