Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Iulai 2017

ʻInā Vivii Atu ia iā Ioa!’​—Aiseā?

ʻInā Vivii Atu ia iā Ioa!’​—Aiseā?

ʻInā vivii atu ia iā Ioa! Auā o le mea mālie lea, ua tatau ona viia o ia!’​—SALA. 147:1.

PESE: 59, 3

1-3. (a) E foliga mai o le ā le taimi na tusia ai le Salamo 147? (e) O le ā e tatou te aʻoaʻoina mai i le iloiloina o le Salamo 147?

E ALAGATATAU ona viiviia se tasi pe a lelei ona ia faatinoina se galuega, pe faaalia foʻi ni uiga lelei faa-Kerisiano. Pe afai e tatou te faia faapea i tagata, e sili atu la ona tele māfuaaga ua tatau ai ona tatou vivii atu iā Ieova le Atua! E tatou te viia o ia ona o lona mana e lē mafaatusalia lea e vaaia i ana foafoaga ofoofogia, po o lona alofa tele i tagata e pei ona faamaonia i lana sauniuniga o le taulaga togiola e ala mai i lona Alo.

2 Na faagaeetia le tusitala o le Salamo 147 ia vivii atu iā Ieova. Sa ia faalaeiau foʻi isi ia latou vivii faatasi atu i le Atua.​—Faitau le Salamo 147:1, 12, 20.

3 E tatou te lē iloa po o ai na tusia lenei salamo, peitaʻi e foliga mai na soifua le faisalamo i le taimi na toe faafoʻisia ai e Ieova tagata Isaraelu i Ierusalema mai i le faaaunuua ai i Papelonia. (Sala. 147:2) O le toe faafoʻisia o tagata o le Atua i lo latou nofoaga mo le tapuaʻiga moni, e mautinoa na uunaʻia ai le faisalamo e vivii atu iā Ieova. Peitaʻi, e iai isi māfuaaga na ia taʻua e ao ai ona faia faapea. O ā na māfuaaga? O ā māfuaaga e ao ai ona e alaga atu ʻAleluia!’ pe ʻIa viia Ioa’?​—Faaa. 19:1, fpl; Sala. 147:1.

 E FAAMĀLŌLŌ E IEOVA Ē UA LOTO MOMOMO

4. O ā lagona o tagata Isaraelu na ave faapagota ina ua faasaʻoloto e le tupu o Kuresa, ma aiseā?

4 Seʻi faaata lagona o tagata Isaraelu a o ave faapagota i Papelonia. Na taufaifai atu ē na ave faapagotaina i latou e faapea: “Ia outou usu mai iā i matou se pese o Siona.” O le taimi lenā ua faatafunaina Ierusalema, lea sa avea ma māfuaaga sili e latou te olioli ai iā Ieova. (Sala. 137:1-3, 6) E leʻi fia pepese tagata Iutaia ona o le loto momomo ma na latou manaʻomia ni faamāfanafanaga. Peitaʻi, e pei ona valoia e le Afioga a le Atua, na laveaʻia e Ieova ona tagata e ala iā Kuresa le tupu o Peresia. Na faatoʻilalo e Kuresa Papelonia ma ia folafola atu: ʻUa tofia aʻu e Ieova e fauina se fale i Ierusalema. O so o se tasi o outou mai i lona nuu uma, ia faatasi Ieova lona Atua iā te ia. Inā alu aʻe ia o ia.’ (2 No. 36:23) Maʻeu le faamāfanafanaina ai o tagata Isaraelu sa i Papelonia i lenei mea!

5. O le ā na taʻua e le faisalamo e faatatau i le mana o Ieova e faamālōlō ai?

5 Sa avatu e Ieova faamāfanafanaga e lē gata i le nuu atoa o Isaraelu ae e faapea foʻi i tagata taʻitoʻatasi. O loo faia foʻi faapea e Ieova i aso nei. Na tusi le faisalamo e faatatau i le Atua e faapea: “Ua faamālōlō e ia o ē ua loto momomo, ma fusifusia o latou manuʻa tigā.” (Sala. 147:3) Ioe, e manatu mamafa mai Ieova i ē o loo feagai ma faafitauli i le itu faaletino po o le itu tau faalogona. E naunau Ieova ina ia faamāfanafana mai iā i tatou ma faatoʻafilemu o tatou faalogona mafatia. (Sala. 34:18; Isa. 57:15) E na te foaʻi mai le atamai ma le malosi ina ia tatou onosaia ai so o se faafitauli.​—Iako. 1:5.

6. E mafai faapefea ona aogā iā i tatou upu a le faisalamo o loo i le Salamo 147:4? (Tagaʻi i le ata i luga aʻe o le matua.)

6 Na sosoo ai ma le uaʻi atu o le faisalamo i le lagi, ma ia faapea mai o Ieova e na te “faitauina le aofaʻiga o fetu,” ma “valaauina foʻi i latou uma i o latou igoa.” (Sala. 147:4) Aiseā e foliga mai ai ua sui le mataupu ma faasino atu i mea i le vateatea? Seʻi mātau le manatu lenei: Na mafai ona iloa atu e le faisalamo fetu, ae e na te leʻi iloa lo latou aofaʻi. A o faagasolo tausaga, ua matuā faatupulaʻia le aofaʻi o fetu e mafai ona tatou iloa atu. E manatu nisi e faitau piliona fetu o loo iai i lo tatou aniva o le Milky Way, ma atonu e faitau tiliona aniva i le vateatea aoao! E lē mafai ona tatou faitauina le aofaʻi o fetu. Peitaʻi, e faaigoa e Lē na foafoaina mea fetu uma i o latou igoa. O lona uiga, e silafia lelei e Ieova fetu taʻitasi. (1 Kori. 15:41) Ae e faapefea ana foafoaga o tagata o loo i le lalolagi? E silafia e le Atua le mea o loo iai fetu taʻitasi i so o se taimi, ma e na te silafia lelei foʻi oe. E na te silafia lelei le mea o loo e iai, o ou faalogona moni, ma le mea tonu o loo e manaʻomia i so o se taimi.

7, 8. (a) O le ā e malamalama i ai Ieova e faatatau iā i tatou? (e) Aumai se faaaʻoaʻoga e faaalia ai le alofa o Ieova i le fesoasoani i tagata lē lelei atoatoa?

7 E lē gata e naunau totino mai Ieova iā te oe, ae e tigā alofa foʻi o ia ma e iai lona mana e fesoasoani ai iā te oe i ou faafitauli i le olaga. (Faitau le Salamo 147:5, fpl.) Atonu e te manatu e faigatā tele le tulaga o loo e fesagaʻia, ma e mamafa tele le avega o loo e tauaveina. E malamalama le Atua i le mea e gata mai ai lou malosi, ma e na te ʻmanatua o le efuefu lava oe.’ (Sala. 103:14) O lo tatou tulaga lē lelei atoatoa e tatou te toe faia ai mea sesē na tatou faia muamua. Seʻi manatu i lo tatou salamō i se tala na tatou faia, ni faanaunauga sesē e oso aʻe i lea taimi ma lea taimi, po o lagona matauʻa ona o mea ua maua e isi! E lē iai iā Ieova nei vaivaiga, peitaʻi e lē mafaamatalaina lona malamalama e faatatau iā i tatou.

 8 Atonu na fesoasoani le aao malosi o Ieova ina ia faamalosia oe mai i ni tulaga faigatā. (Isa. 41:10, 13) O se faaaʻoaʻoga o Kyoko, o se tuafafine paeonia na matuā lotovaivai ina ua sui lona faaeaga. Na faapefea ona faaalia e Ieova sa malamalama i faafitauli o Kyoko? E toʻatele tagata i lana faapotopotoga fou na malamalama i ona faalogona. Sa ia lagona e pei o loo faapea mai Ieova: “Ou te alofa iā te oe, e lē gata ona o oe o se paeonia, ae ona o oe o loʻu afafine ma ua e tuuina mai lou ola iā te aʻu. Ou te manaʻo ia fiafia lou olaga i le avea ai ma aʻu Molimau!” Ua faapefea ona faaalia atu e Ieova iā te oe ʻe lē mafaamatalaina lona malamalama’?

E SAUNIA E IEOVA MEA E TATOU TE MANAʻOMIA

9, 10. O le ā e saunia muamua mai e Ieova a o fesoasoani iā i tatou? Aumai se faaaʻoaʻoga.

9 O nisi taimi o mea e te manaʻomia atonu o meafaitino. O se faataʻitaʻiga, e te ono popole o le a lē lava ni meaʻai mo oe. Peitaʻi, o Ieova na faia le faataamilosaga masani lea e manaʻomia ina ia totō ma ola ai meaʻai mo meafaiola uma, e oo lava i tamaʻi oreva o loo fetagisi i le fia aai. (Faitau le Salamo 147:8, 9.) Pe afai e faaauau ona fafaga e Ieova tamaʻi oreva, e mafai la ona e mautinoa o le a ia saunia mai foʻi mea faaletino e te manaʻomia.​—Sala. 37:25.

10 O le vala e sili ona tāua, e saunia mai e Ieova le tausiga faaleagaga ma foaʻi mai “le filemu mai i le Atua, e silisili i mea uma lava e manatu i ai.” (Fili. 4:6, 7) O se faaaʻoaʻoga, o Mutsuo ma lana avā o ē na vāai i le auala na fesoasoani ai Ieova iā i laʻua, ina ua mavae le sunami i Iapani i le 2011. Na faasaoina o la ola mai i le sunami e ala i le feʻaʻei i le taualuga o lo la fale. Ae na toetoe o a la meatotino uma na faaleagaina ai i lenā aso. Na la nonofo i le pō pogisa ma malūlū i se potu i le fogāfale lona lua o lo la fale ua faaleagaina. Ina ua malama le taeao na la saʻili mo ni faalaeiauga faaleagaga. E pau le tusi na la mauaina, o le 2006 Yearbook of Jehovah’s Witnesses. Na vave ona tau le vaai a Mutsuo i le ulutala “O Sunami e Pito i Sili Ona Mataʻutia” (The Deadliest Tsunamis Ever Recorded). O loo faamatala ai se mafuiʻe i Sumatra i le 2004, lea na faapogaia ai sunami e sili ona mataʻutia ua faamauina i le talafaasolopito. Na fetagisi Mutsuo ma lana avā a o faitau i tala o mea na tutupu i uso ma tuafāfine. Na la lagona ua saunia mai e Ieova faalaeiauga faaleagaga i le taimi tonu lava na la manaʻomia ai. Na saunia foʻi ma le alofa e Ieova o la manaʻoga faaletino. Na la maua fesoasoani laveaʻi mai i o la uso faaleagaga. Ae o le mea na sili ona faamalosia ai i laʻua o asiasiga a sui o le Komiti o le Lālā. Ua faapea mai Mutsuo: “Na ou lagona e pei o loo iai Ieova i autafa o i matou taʻitoʻatasi ma tausia i matou. Maʻeu le faamāfanafanaina ai!” E saunia muamua mai e Ieova le tausiga faaleagaga, ona ia faamalieina lea o o tatou manaʻoga faaletino.

AOGĀ O LE MANA LAVEAʻI O LE ATUA

11. O le ā e manaʻomia ona faia e i latou e fia maua aogā mai i le mana laveaʻi o le Atua?

11 E nofosauni Ieova i taimi uma e fesoasoani ma ʻavatu le mapusaga i ē e agamalu.’ (Sala. 147:6a) Ae o le ā e manaʻomia ona tatou faia ina ia maua ai aogā mai i le fesoasoani a Ieova? E tatau ona iai sa tatou faiā lelei ma ia. Ina ia iai lenā faiā, e manaʻomia ona tatou atiaʻe le agamalu. (Sefa. 2:3) O ē agamalu e faatalitali atu i le Atua e na te faasaʻo so o se faiga lē tonu ma faamuta o latou mafatiaga. E maua e i latou na le finagalo malie o Ieova.

12, 13. (a) Ina ia maua aogā mai i le fesoasoani a le Atua, o le ā e tatau ona tatou ʻalofia? (e) O ai e fiafia i ai Ieova?

12 I le isi itu, ʻua lafo ifo e Ieova o ē e amioleaga i le laueleele.’ (Sala. 147:6e)  E malolosi nei upu! Ina ia tatou tofo i le alofa faamaoni o Ieova ma ʻalofia lona toʻasā, e tatau ona tatou ʻinoʻino i mea e na te inosia. (Sala. 97:10) O se faataʻitaʻiga, e tatau ona tatou ʻinoʻino i feusuaʻiga lē mamā. O lona uiga, e tatau ona tatou ʻalofia so o se mea e ono taʻitaʻia atu ai i tatou i le faia o na amioga lē mamā, e aofia ai ata matagā taufeusuaʻiga. (Sala. 119:37; Mata. 5:28) E lē faigofie lenei tauiviga, ae e tauia a tatou taumafaiga ona e maua ai le faamanuiaga a Ieova.

13 E lē mafai ona tatou tauina lenei tauiviga i lo tatou lava malosi. E tatau ona tatou faalagolago iā Ieova. Po o le a fiafia lona finagalo pe a tatou taumafai e faasaoina i tatou lava i le “malosi o le solofanua,” o mea ia e liliu atu i ai tagata mo se fesoasoani? Leai! E lē tatau foʻi ona tatou faalagolago i ʻvae malolosi o le tagata,’ e peiseaʻī e mafai e i tatou po o isi tagata ona aumaia le faaolataga. (Sala. 147:10) Nai lo o lea, e tatau ona tatou tatalo atu iā Ieova ma talosaga atu mo lana fesoasoani. E lē pei Ieova o tagata faufautua auā e lē fiu o ia e faafofoga mai i a tatou ōlega, e tusa lava pe tatou te talosaga soo atu mo lana fesoasoani. “E fiafia Ieova iā i latou e matataʻu iā te ia, o i latou e faatalitali atu i lona alofa faamaoni.” (Sala. 147:11) Talu ai e alofa faamaoni o ia, e mafai la ona tatou mautinoa o le a ia faatasi mai pea ma fesoasoani mai ina ia tatou manumalo i o tatou tuʻinanauga sesē.

14. O le ā le faamautinoaga na faamalosia ai le faisalamo?

14 Ua saunia e Ieova se faamautinoaga e tatou te talitonu ai o le a ia fesoasoani mai i ona tagata i taimi faigatā. Pe a toe manatu i le toe faafoʻisiaga o Ierusalema, na pese le faisalamo e faatatau iā Ieova: “Ua faamalosia e ia faamau faalava o ou faitotoʻa; ua faamanuia foʻi e ia lau fanau i totonu iā te oe. Ua ia tuuina le filemu i lou laueleele.” (Sala. 147:13, 14) Maʻeu se faamautinoaga mo le faisalamo e iloa ai, o le a faamalosia e le Atua faitotoʻa o le aai ina ia puipuia ai ona tagata tapuaʻi!

E faapefea ona fesoasoani mai le Afioga a le Atua pe a lofitūina i tatou i faafitauli? (Tagaʻi i le palakalafa e 15-17)

15-17. (a) O ā faalogona e ono oo iā i tatou i nisi taimi ona o o tatou faafitauli, ae e faapefea ona fesoasoani mai Ieova e ala i lana Afioga? (e) Aumai se faaaʻoaʻoga e iloa ai e “tamoʻe vave mai” le afioga a le Atua ina ia fesoasoani iā i tatou.

15 Atonu e te feagai ma ni faafitauli e faapopoleina ai oe. E mafai ona foaʻi mai e Ieova iā te oe le atamai e fesagaʻia ai na faafitauli. Na faapea mai le faisalamo e faatatau i lona Atua: “Ua auina mai e ia lana afioga i le lalolagi; ua tamoʻe vave mai lana afioga.” Sa sosoo ai ma lona faapea mai o Ieova e na te ʻtuuina mai le kiona, faataapeape le sautoʻa, ma lafo mai le aisa.’ Na fesili le faisalamo: “O ai foʻi e mafai ona tulaʻi atu i lona mālūlū?” Na ia taʻua atili o Ieova e na te “auina mai lana afioga ma ua liusuavai ai.” (Sala. 147:15-18) O le Atua e ou le atamai ma le malosi uma, o ia e na te faatonutonuina le toʻulu mai o le aisa ma le kiona. E mafai ona ia fesoasoani mai iā te oe ina ia e manumalo ai i so o se tulaga faigatā e te fesagaʻia.

16 O loo taʻitaʻia e Ieova i tatou i aso nei e ala mai i lana Afioga le Tusi Paia. Na taʻua e le faisalamo e “tamoʻe vave mai lana afioga,” o lona uiga e na te vave saunia mai le taʻitaʻiga faaleagaga e tatou te manaʻomia. Seʻi mafaufau i aogā ua e maua mai i le faitauina o le Tusi Paia, le iloiloina o lomiga mai i le “pologa faamaoni ma le faautauta,” matamata i le TV i le Initaneti a Molimau a Ieova, asiasi i le jw.org, talanoa ma toeaina, ma auaufaatasi ma uso ma tuafāfine Kerisiano. (Mata. 24:45) Po ua e faamaonia e oe lava e vave gaoioi Ieova e taʻitaʻia oe?

17 Na tofo moni Simone i le mana o le Afioga a le Atua. Sa ia matuā lagona le leai  o sona aogā, ma oo ai ina manatu e lē fiafia le Atua iā te ia. Peitaʻi, i taimi na lotovaivai ai, sa ia finafinau e tatalo ma ōle atu iā Ieova mo lana fesoasoani. Sa tinoū foʻi o ia e fai ana lava suʻesuʻega o le Tusi Paia. Ua faapea mai o ia, “E leʻi iai se taimi na ou lagona ai ua leai se malosi ma se taʻitaʻiga mai iā Ieova.” Sa fesoasoani lea iā te ia ina ia iai pea se vaaiga saʻo.

18. Aiseā e te lagona ai o loo faamanuiaina oe e le Atua, ma o ā māfuaaga e ao ai ona e ʻvivii atu iā Ioa’?

18 Sa iloa e le faisalamo le faamanuiaina o tagata anamua o le Atua. E na o i latou le nuu na tuuina atu i ai e le Atua lana “afioga” ma “ana tulafono ma iʻuga o ana faamasinoga.” (Faitau le Salamo 147:19, 20.) I aso foʻi nei, ua na o i tatou i le lalolagi ua faamanuiaina e tauave le suafa o le Atua. Ua mafai ona tatou maua se faiā māfana ma Ieova, ona ua tatou iloa o ia ma taʻitaʻia o tatou olaga i lana Afioga. I le pei o le tusitala o le Salamo 147, e tele māfuaaga e ao ai ona e ʻvivii atu iā Ioa’ ma faalaeiau isi ia faia foʻi faapea.