Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) FEPUARI 2017

O le Togiola—O se Meaalofa e “Atoatoa Ona Lelei” Mai i le Tamā

O le Togiola—O se Meaalofa e “Atoatoa Ona Lelei” Mai i le Tamā

“O meaalofa lelei uma ma mea uma e atoatoa ona lelei, e mai . . . i le Tamā.”IAKO. 1:17.

PESE: 20, 15

1. O ā faamanuiaga ua maua ona o le togiola?

E TELE faamanuiaga ua maua e ala i le taulaga togiola a Iesu Keriso. O le togiola ua tatala ai le avanoa mo le fanau uma a Atamu o ē e fiafia i le amiotonu, ina ia avea ma vaega o le aiga o le Atua i le lumanaʻi. O le togiola ua mafai ai foʻi ona tatou maua le faamoemoe o le ola fiafia e faavavau. Peitaʻi, e iai isi aogā o le togiola a Keriso e ese mai i le saunia o se lumanaʻi fiafia mo tagata usiusitaʻi. O le lotomalie o Iesu e maliu a o lagolagoina le tonu o le aiā a Ieova e pule ai, ua taliina ai mataupu e sili ona tāua.—Epe. 1:8, 9.

2. (a) O ā mataupu e sili ona tāua o loo taʻua i le tatalo a Iesu? (Tagaʻi i le ata i luga aʻe o le matua.) (e) O ā manatu o le a tatou iloiloina i lenei mataupu?

2 Pe tusa o le lua tausaga a o leʻi maliu Iesu ma saunia le taulaga togiola, sa ia aʻoaʻoina ona soo ia tatalo e faapea: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.”  (Mata. 6:9, 10) Ina ia tatou talisapaia atili le togiola, seʻi o tatou iloilo pe faapefea ona fesootaʻi le togiola i le faapaiaina o le suafa o le Atua, le pulega o le Malo o le Atua, ma le faataunuuina o le finagalo o le Atua.

“IA FAAPAIAINA LOU SUAFA”

3. O le ā e aofia ai i le suafa o Ieova, ma na faapefea ona taʻuleagaina e Satani lenā suafa paia?

3 O le talosaga muamua na taʻua e Iesu i lana tatalo faaaʻoaʻo, o le faapaiaina lea o le suafa o le Atua. O le suafa o Ieova o loo aofia ai lona silisili ese, mamalu, ma le paia. Na taʻua e Iesu i se tasi o ana tatalo o Ieova o le “Tamā paia.” (Ioa. 17:11) Talu ai e paia Ieova, o ana mataupu silisili la ma tulafono uma e paia. Peitaʻi, na faatogafiti ona fesiligia e Satani i le faatoʻaga i Etena, le aiā a le Atua e faia ai tapulaa mo tagata. Sa taʻuleagaina e Satani le suafa paia o le Atua e ala i le faia o pepelo e faatatau iā Ieova.—Kene. 3:1-5.

4. Na faapefea ona faapaia e Iesu le suafa o le Atua?

4 Peitaʻi, sa matuā tāua iā Iesu le suafa o Ieova. (Ioa. 17:25, 26) Sa faia e Iesu mea uma e na te mafaia ina ia faapaia ai le suafa o le Atua. (Faitau le Salamo 40:8-10.) O lona olaga lelei atoatoa i le lalolagi, na ia faamaonia ai e talafeagai ma ua tonu ona faataatia e Ieova tapulaa mo ana foafoaga atamamai. E ui lava na faapogaia e Satani le maliu tigā o Iesu, peitaʻi sa tumau ona faamaoni atoatoa Iesu i lona Tamā i le lagi. O le faia faapea na faamaonia ai e Iesu, e mafai e se tagata lelei atoatoa ona usiusitaʻi atoatoa i tapulaa amiotonu a le Atua.

5. E faapefea ona tatou faapaiaina le suafa o le Atua?

5 E faapefea ona faaalia e tāua iā i tatou le suafa o Ieova? E ala i a tatou amio. E finagalo Ieova ia tatou paia. (Faitau le 1 Peteru 1:15, 16.) O lona uiga, e tatou te tapuaʻi tau lava o Ieova ma usiusitaʻi iā te ia ma o tatou lotoatoa. E tusa lava foʻi pe sauāina i tatou, e tatou te taumafai malosi ia ola e tusa ai ma ana mataupu silisili ma tulafono amiotonu. E tatou te faasusulu atu lo tatou malamalama ma faamamaluina le suafa o Ieova e ala i le faia o mea tonu. (Mata. 5:14-16) I le avea ai ma ē e paia, e faamaonia atu i le auala e tatou te ola ai, e lelei tulafono a Ieova ae e sesē tuuaʻiga a Satani. E tatou te sesē uma lava. Peitaʻi pe a tatou sesē, e tatou te salamō moni ma liliu ese mai i faiga e lē faamamaluina ai Ieova.—Sala. 79:9.

6. Aiseā e mafai ai ona silasila Ieova iā i tatou o ni ē e amiotonu, e ui lava e tatou te lē lelei atoatoa?

6 E faavae i le taulaga a Keriso, ua faamagalo ai e Ieova agasala a ē e faaalia le faatuatua. Ua ia talia o ni ona tagata tapuaʻi i latou ua tuuina atu iā te ia. Ua taʻuamiotonuina e Ieova Kerisiano faauuina o ni ona atalii, ma e silasila i “isi mamoe” o ē e amiotonu o ni ana uō. (Ioa. 10:16; Roma 5:1, 2; Iako. 2:21-25) O lea, e oo lava i le taimi lenei ua mafai ona tatou maua se tulaga amiotonu i luma o lo tatou Tamā, ma faapaiaina lona suafa ona o le togiola.

“IA OO MAI LOU MALO”

7. O ā faamanuiaga o le a maua i le pulega o le Malo ona o le togiola?

7 I le tatalo faaaʻoaʻo a Iesu, na sosoo ai ma lona talosaga atu i le Atua: “Ia oo mai lou malo.” O le ā le fesootaʻiga o le togiola ma le Malo o le Atua? O le togiola ua mafai ai ona aoaoina le 144,000 ina ia auauna o ni tupu ma ositaulaga faatasi ma Keriso i le lagi. (Faaa. 5:9, 10; 14:1) O le a faaoo mai e Iesu ma ē o le a pule faatasi ma ia, o ē ua faia aʻe ai le Malo o le Atua, aogā o le togiola i tagata usiusitaʻi a o faagasolo le afe tausaga. O le a liua le lalolagi e avea ma  parataiso, o le a avea tagata faamaoni uma ma ē e lelei atoatoa, ma autasia atoatoa ai le vaega faalelagi ma le vaega faalelalolagi o le aiga o le Atua. (Faaa. 5:13; 20:6) O le a tuʻimomomoina e Iesu le ulu o le gata, ma aveesea faafitauli uma na pogai mai i le fouvalega a Satani.—Kene. 3:15.

8. (a) Na faapefea ona fesoasoani Iesu i ona soo ia iloa le tāua o le Malo o le Atua? (e) E faapefea ona faaalia e tatou te lagolagoina le Malo i aso nei?

8 A o iai Iesu i le lalolagi, sa fesoasoani i ona soo ina ia iloa le tāua o le Malo o le Atua. Ina ua faatoʻā uma lona papatisoga, na folafola atu e Iesu “le tala lelei o le malo o le Atua” i so o se mea na iai. (Luka 4:43) I ana fetalaiga faaiʻu i ona soo a o leʻi toe afio atu i le lagi, na faatonu ai e Iesu i latou ia molimau atu i “tuluʻiga uma o le lalolagi e faatatau iā te ia.” (Galu. 1:6-8) E ala i le galuega talaʻi o le Malo, ua maua ai e tagata i le lalolagi aoao le avanoa e aʻoaʻoina ai e faatatau i le togiola, ma avea o ni tagatānuu o le Malo o le Atua. I aso nei, e faaalia lo tatou lagolagoina o le Malo e ala i le fesoasoani i uso o Keriso i le lalolagi, ina ia faataunuu le poloaʻiga e talaʻi atu le tala lelei o le Malo i le lalolagi aoao.—Mata. 24:14; 25:40.

“IA FAIA LOU FINAGALO”

9. Aiseā e tatou te mautinoa ai o le a faataunuu e Ieova lona finagalo mo le fanau a tagata?

9 O le ā na uiga i ai Iesu i le isi ana talosaga na sosoo ai e faapea: “Ia faia lou finagalo”? O Ieova o Lē na foafoaina mea. Afai e fetalai o ia o le a tupu se mea, e mautinoa lava o le a faataunuuina. (Isa. 55:11) E na te lē faatagaina le fouvalega a Satani ina ia taofia ai Lona finagalo mo le fanau a tagata. I le amataga, na finagalo Ieova ia faatumulia le lalolagi i fanau lelei atoatoa a Atamu ma Eva. (Kene. 1:28) Pe ana faapea e feoti Atamu ma Eva ae leai se la fanau, o lona uiga o le a lē faataunuuina le finagalo o le Atua ia tumu le lalolagi i a la fanau. O lea, ina ua agasala Atamu ma Eva, na faataga pea e Ieova i laʻua ia maua ni a la fanau. E ala i le togiola, ua aumaia ai e le Atua i tagata faatuatua uma le avanoa e ausia ai le tulaga lelei atoatoa ma ola e faavavau. E alofa Ieova i tagata ma e finagalo ia maua e tagata usiusitaʻi le olaga na finagalo i ai mo i latou.

10. E faapefea ona aogā le togiola i tagata ua maliliu?

10 Ae faapefea le faitau piliona o tagata ua maliliu ae e leʻi aʻoaʻoina e faatatau iā Ieova ma auauna iā te ia? O le togiola o le a mafai ai ona toe faatutūina mai ē ua maliliu. O le a toe faatutūina mai i latou e lo tatou Tamā alofa i le lagi, ma aʻoaʻoina e faatatau i lona finagalo ma ia maua le ola e faavavau. (Galu. 24:15) E finagalo Ieova ia ola tagata ae lē ia feoti. Talu ai o ia o le Puna o le ola, ua avea ai o ia ma Tamā o i latou uma e toe faatutūina mai. (Sala. 36:9) O lea, maʻeu le talafeagai o le aʻoaʻoina o i tatou e Iesu ia tatalo: “Lo matou Tamā e o i le lagi.” (Mata. 6:9) Ua tuuina atu e Ieova iā Iesu le matafaioi tāua o le toe faatutūina mai o ē ua maliliu. (Ioa. 6:40, 44) O le a faataunuu e Iesu i le Parataiso lana matafaioi o le avea ma “toetū ma le ola.”—Ioa. 11:25.

11. O le ā le finagalo o le Atua mo le “motu o tagata e toʻatele”?

11 E lē na o ni nai tagata faapitoa e agalelei i ai Ieova, auā na fetalai Iesu: “O e faia le finagalo o le Atua, o ia lenā o loʻu uso, o loʻu tuafafine, ma o loʻu tinā.” (Mare. 3:35) E finagalo le Atua ia avea ma ona tagata tapuaʻi le “motu o tagata e toʻatele” e lē mafaitaulia mai i atunuu, ituaiga, ma gagana uma. O i latou e faatuatua i le togiola a Keriso ma faia le finagalo o le  Atua, e mafai ona aufaatasi ma i latou o ē alalaga e faapea: “O lo tatou faaolataga e mai le Atua o lē o loo afio i le nofoālii, ma le Tamaʻi Mamoe.”—Faaa. 7:9, 10.

12. Ua faapefea i le tatalo faaaʻoaʻo ona atagia mai ai le finagalo o Ieova mo tagata usiusitaʻi?

12 O loo atagia mai le finagalo o Ieova mo tagata usiusitaʻi i upu o le tatalo faaaʻoaʻo a Iesu. Ina ia ōgatusa ma lenei tatalo, e tatou te mananaʻo e fai le mea sili ina ia faapaiaina ai le suafa o Ieova. (Isa. 8:13) O le uiga o le suafa o Iesu “O Ieova o le Faaolataga,” ma o lo tatou faaolataga lea e ala mai i le togiola, ua faamamaluina ma faapaiaina ai le suafa o Ieova. O le a faaaogā le Malo o le Atua ina ia aumaia ai aogā o le togiola i tagata usiusitaʻi. O lea, ua faamautinoa mai i le tatalo faaaʻoaʻo, e leai se mea e mafai ona taofia ai le faataunuuina o le finagalo o le Atua.—Sala. 135:6; Isa. 46:9, 10.

IA FAAALIA LOU LOTOFAAFETAI MO LE TOGIOLA

13. O le ā ua faaalia e ala i lo tatou papatisoga?

13 O se tasi o auala tāua e faaalia ai lo tatou lotofaafetai mo le togiola, o le tuuina atu lea o i tatou lava iā Ieova e faavae i le faatuatua i le togiola, ma papatisoina. O lo tatou papatisoga ua faaalia ai “o i tatou lava o auauna a Ieova.” (Roma 14:8) Ua faaalia ai o loo tatou talosaga atu iā Ieova mo se lotofuatiaifo lelei. (1 Pete. 3:21) E tali mai Ieova i lenā talosaga, e ala i le faatatauina iā i tatou o aogā o le toto o le taulaga a Keriso lea e faamamāina ai. E tatou te mautinoa atoatoa o le a ia aumaia iā i tatou mea uma ua ia folafola mai.—Roma 8:32.

O ā auala e faaalia ai lo tatou lotofaafetai mo le togiola? (Tagaʻi i le palakalafa e 13, 14)

14. Aiseā ua poloaʻia ai i tatou ia alolofa i o tatou tuaoi?

14 O le ā se isi auala e faaalia ai lo tatou  lotofaafetai mo le togiola? Talu ai o mea uma e faia e Ieova e pogai mai i le alofa, o lea e finagalo ai i ona tagata tapuaʻi uma ia avea le alofa ma o latou uiga autū. (1 Ioa. 4:8-11) E faamaonia lo tatou faanaunauga ia avea ma “atalii o lo [tatou] Tamā o i le lagi,” e ala i le alolofa i o tatou tuaoi. (Mata. 5:43-48) O le poloaʻiga ia alolofa i o tatou tuaoi, e lona lua i le poloaʻiga ia alolofa iā Ieova. (Mata. 22:37-40) O se tasi o auala tāua e faaalia ai lo tatou alolofa i tuaoi, e ala lea i le usitaʻia o le poloaʻiga ia talaʻi atu le tala lelei o le Malo o le Atua. A o tatou faaalia le alofa i tagata, ua tatou faaatagia atu le mamalu o le Atua. Ioe, pe a tatou usitaʻia le poloaʻiga ia alolofa i isi, aemaise lava i o tatou uso, ua “atoatoa ai foʻi ona tatou faaalia” le alofa i le Atua.—1 Ioa. 4:12, 20.

O LE TOGIOLA UA AUMAIA AI FAAMANUIAGA MAI IĀ IEOVA

15. (a) O ā faamanuiaga ua tatou maua i le taimi lenei mai iā Ieova? (e) O ā faamanuiaga o le a tatou maua i le lumanaʻi?

15 E mafai ona faamagaloina atoatoa a tatou agasala, pe afai e tatou te faatuatua i le togiola. Ua faamautinoa mai i le Afioga a le Atua e mafai ona “soloiesea” a tatou agasala. (Faitau le Galuega 3:19-21.) E pei ona tatou talanoaina muamua atu, o le togiola ua mafai ai ona vaetamaina e Ieova ana auauna faauuina e avea ma ana fanau. (Roma 8:15-17) Ae mo i tatou ua avea ma vaega o “isi mamoe,” e peiseaʻī ua tusia e Ieova se pepa faamaonia e vaetama ai i tatou, ma o loo tusia ai o tatou igoa. Pe a tatou ausia le tulaga lelei atoatoa ma faamaoni i le tofotofoga faaiʻu, o le a vaetama e Ieova i tatou e avea ma ana fanau pele i le lalolagi, e peiseaʻī ua fiafia o ia e sainia le pepa faamaonia e vaetama ai i tatou. (Roma 8:20, 21; Faaa. 20:7-9) E faavavau le alofa o Ieova mo lana fanau pele, ma e faavavau foʻi aogā o le togiola. (Epe. 9:12) O le a lē faaitiitia le tāua o lenei meaalofa, ma e leai se tasi e mafai ona ia aveesea mai iā i tatou.

16. Ua faapefea i le togiola ona tuusaʻoloto ai i tatou?

16 E leai se mea e mafai ona faia e le Tiapolo e taofia ai i latou uma e salamō ma le faamaoni, mai i le avea ma vaega o le aiga o Ieova i le lumanaʻi. Na afio mai Iesu i le lalolagi ma e na o le “faatasi” ona maliu o ia. O lea la, ua uma ona totogi le togiola. (Epe. 9:24-26) O le togiola ua laveaʻiina ai i tatou mai i le tulaga taʻusalaina na tuufaasolo mai iā Atamu. E tatou te lotofaafetai i le taulaga a Keriso ona ua tuusaʻoloto ai i tatou mai i le faapologaina i lenei lalolagi o loo pulea e Satani, ma ua tatou lē toe fefefe ai i le oti.—Epe. 2:14, 15.

17. O ā ni ou faalogona e faatatau i le alofa o Ieova?

17 E mautinoa e taunuu i taimi uma folafolaga a le Atua. E pei lava ona taulau i taimi uma ana tulafono o le foafoaga, e faapena foʻi ona faamaoni Ieova iā i tatou. E lē liliu Ieova. (Mala. 3:6) E lē gata ua tuuina mai e Ieova le meaalofa o le ola, ae ua ia faaalia mai foʻi iā i tatou lona alofa. “O i tatou foʻi, ua tatou iloa ma talitonu i le alofa o le Atua iā i tatou. O le Atua o le alofa lava ia.” (1 Ioa. 4:16) O le a avea le lalolagi atoa ma parataiso e matuā faafiafiaina ai, ma o le a faaatagia atu e tagata uma i le lalolagi le alofa o le Atua. Seʻi tuufaatasi o tatou leo ma foafoaga faamaoni a le Atua i le lagi ma faapea atu: “Ia i lo tatou Atua le manuia, le mamalu, le atamai, le faafetai, le viiga, le mana, ma le malosi e faavavau, faavavau lava. Amene.”—Faaa. 7:12.