Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) FEPUARI 2017

O le a Faataunuuina le Finagalo o Ieova!

O le a Faataunuuina le Finagalo o Ieova!

“Ua ou fai atu i ai; ou te faaooina lava. Ua ou faia lea faaiʻuga, ma ou te faia lava.”ISA. 46:11.

PESE: 25, 18

1, 2. (a) O le ā ua faailoa mai e Ieova iā i tatou? (e) O le ā le faamautinoaga e tatou te maua i le Isaia 46:10, 11, ma le Isaia 55:11?

E AMATA le Tusi Paia i le faaupuga faigofie ma tāua lenei: “Na foafoaina e le Atua le lagi ma le lalolagi i le amataga.” (Kene. 1:1) E moni e itiiti lo tatou malamalamaga e faatatau i le tele o mea na faia e le Atua, e pei o le vanimonimo, malamalama, ma le kalave. E na o sina vaega foʻi o le vateatea lea o loo tatou vaaia. (Fai. 3:11) Peitaʻi, ua faailoa mai e Ieova iā i tatou lona finagalo mo le lalolagi ma tagata. Sa tatau ona avea le lalolagi ma nofoaga lelei atoatoa mo tagata na faia i le faatusa o le Atua. (Kene. 1:26) E avea i latou ma fanau a Ieova, ma e avea Ieova ma o latou Tamā.

2 O loo faamatala i le Kenese mataupu e tolu sa luʻia le finagalo o Ieova. (Kene. 3:1-7) Peitaʻi, e mafai lava ona foʻia lenā luʻi. E lē mafai e se tasi ona taofia le finagalo o Ieova. (Isa. 46:10, 11; 55:11) O lea, e tatou te mautinoa o le a faataunuuina le finagalo o Ieova na iai i le amataga, i le taimi tonu ua ia atofaina.

3. (a) O ā upu moni e tāua tele i lo tatou malamalamaga i le feʻau o loo i le Tusi Paia? (e) Aiseā ua tatou talanoaina ai na aʻoaʻoga i lenei taimi? (i) O ā fesili o le a tatou talanoaina?

3 Ua tatou masani i upu moni o le Tusi Paia e faatatau i le  finagalo o le Atua mo le lalolagi ma tagata, faapea le matafaioi autū a Iesu Keriso i le faataunuuina o le finagalo o le Atua. O nisi na o upu moni e sili ona tāua na muamua ona tatou aʻoaʻoina, ina ua amata ona tatou suʻesuʻeina le Afioga a le Atua. E tatou te mananaʻo foʻi e fesoasoani i tagata lotofaamaoni ia iloa nei aʻoaʻoga tāua. A o iloiloina lenei mataupu, o loo tatou taumafai foʻi e valaaulia le toʻatele o tagata ina ia auai i le Faamanatuga o le maliu o Keriso. (Luka 22:19, 20) E tele mea o le a aʻoaʻoina e i latou e auai i le Faamanatuga, e faatatau i le finagalo o le Atua. O lea, i ni nai aso a o lumanaʻi le Faamanatuga, o se taimi lelei lenei e mafaufau ai i ni fesili patino e tatou te faaaogā, ina ia faaosofia ai le naunau o a tatou tagata aʻoga o le Tusi Paia ma isi tagata lotofaamaoni i lenei sauniga tāua. O le a tatou talanoaina fesili nei e tolu: O le ā le finagalo o le Atua i le amataga mo le lalolagi ma tagata? Aiseā ua lē faataunuuina ai? Aiseā ua avea ai le taulaga togiola a Iesu ma vala autū i le faataunuuina o le finagalo o le Atua?

O LE Ā LE FINAGALO O LE ATUA I LE AMATAGA?

4. Ua faapefea ona faalauiloa mai e le foafoaga le mamalu o Ieova?

4 O Ieova o Lē e ofoofogia na foafoaina mea. O mea uma e na te faia e matuā lelei lava. (Kene. 1:31; Iere. 10:12) O le ā e tatou te aʻoaʻoina mai i le matagofie ma le maopoopo o foafoaga? Pe a mātauina le foafoaga, e tatou te maofa i foafoaga uma a Ieova, o foafoaga ninii ma tetelē e tofu ma o latou aogā. O ai e lē maofa i le aulelei ma le muʻamuʻa o le tino o se pepe faatoʻā fanau, o se vaaiga matagofie o se lāgoto, po o le lavelave o sela o le tino o le tagata? E tatou te maofa i nei foafoaga ona na tatou fananau mai ma faalogona e talisapaia ai mea matagofie.—Faitau le Salamo 19:1; 104:24.

5. Ua faapefea ona faamautinoa e Ieova ua sologa lelei mea uma i lana foafoaga?

5 E pei ona faamaonia mai i le foafoaga, ua faataatitia ma le faaeteete e Ieova ni tapulaa. Na ia faia tulafono o le natura ma tulafono i amioga tatau, ina ia faamautinoa ai e sologa lelei mea uma. (Sala. 19:7-9) O lea, o mea uma i le vateatea e iai o latou fuafuaga maʻoti ma matafaioi e tusa ai ma le faatulagaga a le Atua. Ua faataatia e Ieova tulafono i le auala e tatau ona galulue faatasi ai ana foafoaga. O se faataʻitaʻiga, o le tulafono o le kalave ua taofiofia ai le ʻea lea e siʻomia ai le lalolagi, pulea ai tai ma vasa, ma saosaolaumea i le faagasologa o mea ina ia faatumauina ai le ola i le lalolagi. O foafoaga uma lava e aofia ai ma tagata, o loo ola ma gaoioi e tusa ai ma na tulafono. E manino mai, o le maopoopo o le foafoaga ua faamaonia ai e iai le finagalo o le Atua mo le lalolagi ma tagata. A o tatou talaʻi, pe mafai ona tatou faauaʻi atu tagata i Lē ua māfua ai lenei tulaga maopoopo?Faaa. 4:11.

6, 7. O ā nisi o meaalofa na tuu atu e Ieova iā Atamu ma Eva?

6 O le finagalo o Ieova i le amataga ia ola e faavavau tagata i le lalolagi. (Kene. 1:28; Sala. 37:29) Sa ia foaʻi atu ma le agalelei iā Atamu ma Eva le tele o meaalofa matagofie ina ia la olioli ai i le olaga. (Faitau le Iakopo 1:17.) Na tuu atu e Ieova iā i laʻua le saʻolotoga e filifili ai ma le tomai e mafaufau lelei ai. Na mafai foʻi ona la faaalia atu le alofa ma olioli i ni faauōga. Na fetalai atu Ieova iā Atamu ma faatonu o ia i le auala e faaalia ai lona usiusitaʻi. Sa aʻoaʻoina foʻi Atamu i auala e tausia ai ona manaʻoga ma tausia ai meaola ma le laueleele. (Kene. 2:15-17, 19, 20) Sa tuu e Ieova iā Atamu ma  Eva lagona o le tofo, paʻi, vaai, faalogo, ma le sogisogi. O lea, sa mafai ona la matuā olioli i le matagofie ma le anoanoaʻi o mea i le Parataiso. Sa tele avanoa e la te faataunuuina ai galuega faamalieloto ma aʻoaʻoina ai le tele o mea fou.

7 O le ā se isi vala o le finagalo o le Atua? Na faia e Ieova Atamu ma Eva ia mafai ona la fanauina ni fanau lelei atoatoa. Sa finagalo foʻi le Atua ia fanafanau a la fanau seʻia oo ina faatumulia ai le lalolagi atoa i tagata. Na finagalo Ieova iā Atamu ma Eva ma mātua uma, ia alolofa i a latou fanau e pei foʻi ona Ia alofa i lana uluaʻi fanau i le lalolagi. Sa tatau ona avea le lalolagi ma mea uma o iai e fai ma o latou aiga tumau.Sala. 115:16.

AISEĀ UA LĒ FAATAUNUUINA AI?

8. O le ā le fuafuaga o le tulafono o loo i le Kenese 2:16, 17?

8 E leʻi faataunuuina i le taimi lava lenā le finagalo o le Atua. Aiseā? Na tuu atu e Ieova iā Atamu ma Eva se tulafono faigofie ina ia la iloa ai e tapulaa lo la saʻolotoga. Na fetalai atu Ieova: “E mafai ona e ʻai i laau uma o le faatoʻaga ma e maʻona ai. A o le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.” (Kene. 2:16, 17) E leʻi faigatā iā Atamu ma Eva ona malamalama i lenei tulafono. E leʻi faigatā foʻi ona la usitaʻia auā sa anoanoaʻi meaʻai na mafai ona la aai ai.

9, 10. (a) O le ā le tuuaʻiga na faia e Satani e faatatau iā Ieova? (e) O le ā na filifili Atamu ma Eva e fai? (Tagaʻi i le ata i luga aʻe o le matua.)

9 Na faaaogā e Satani le Tiapolo se gata e faasesē ai Eva ina ia lē usiusitaʻi i lona Tamā o Ieova. (Faitau le Kenese 3:1-5; Faaa. 12:9) Sa fesiligia e Satani pe moni e leʻi faatagaina e le Atua lana fanau ina ia aai “mai i fua o laau uma o le faatoʻaga.” E peiseaʻī na ia faapea atu: ʻO lona uiga e lē mafai ona e faia le mea e te manaʻo i ai?’ Ina ua uma, na ia fai atu se pepelo tuusaʻo: “E te lua lē oti lava.” Sa sosoo ai ma lona taumafai e faatalitonu Eva e lē manaʻomia ona ia faalogo i le Atua, e ala i le faapea atu: “Ua silafia e le Atua, o le aso lava lua te aai ai e pupula ai o oulua mata.” O le uiga o le tala a Satani, e leʻi manaʻo Ieova e aai Atamu ma Eva i le fua o le laau, ona o le a la maua ai le malamalama. Sa faia foʻi e Satani le isi folafolaga pepelo e faapea: “Ona pei ai lea o oulua o le Atua, e iloa le lelei ma le leaga.”

10 Ua tatau nei ona filifili Atamu ma Eva po o le ā le mea e fai. Po o le a la usiusitaʻi iā Ieova, pe faalogo i le gata? Na la filifili e lē usiusitaʻi iā Ieova. O le faia faapea ua latou aufaatasi ai ma Satani i lana fouvalega. Na la teena lo laʻua Tamā o Ieova, ma faaesea i laʻua lava mai i lana pulega e malupuipuia ai.Kene. 3:6-13.

11. Aiseā na lē mafai ai ona lē amanaʻia e Ieova le fouvalega?

11 Na melea e Atamu ma Eva lo la tulaga lelei atoatoa ina ua fouvale iā Ieova. O lo la fouvale foʻi ua faaesea ai mai iā Ieova auā ʻe matuā mamā ona fofoga, ma e lē fia silasila i mea leaga; e lē mafai foʻi ona ia silasila i mea faalētonu.’ (Sapa. 1:13) Pe ana faapea na lē amanaʻia e Ieova le fouvalega, o le a lamatia la ana foafoaga uma i le lagi ma le lalolagi. Ae sili atu i lenā, pe ana faapea e lē faia e Ieova se mea e faatatau i le agasala i Etena, o le a fesiligia la le maufaatuatuaina o ia. Peitaʻi, e faamaoni Ieova i ana tapulaa ma e lē taitai ona ia solia. (Sala. 119:142) O lea, e leʻi avea le mauaina e Atamu ma Eva o le saʻolotoga e filifili ai, ma pogai e la te solia ai le tulafono a le Atua. O lo la fouvale iā Ieova na iʻu ai ina feoti ma toe foʻi atu i le efuefu na faia mai ai i laʻua.Kene. 3:19.

12. O le ā na tupu i le fanau a Atamu?

 12 Ina ua ʻaina e Atamu ma Eva le fua o le laau, e leʻi toe taliaina i laʻua i le aiga o le Atua i le aoao o mea. Na tutuli ese i laʻua e le Atua mai i Etena, ma e leʻi iai so la faamoemoe e toe foʻi atu i ai. (Kene. 3:23, 24) O le faia faapea na faamautinoa ai ma le tonu e Ieova ua selesele e Atamu ma Eva āuga o la laʻua filifiliga. (Faitau le Teuteronome 32:4, 5.) Talu ai ua lē toe lelei atoatoa, ua lē mafai ai ona la faaalia atoatoa atu uiga o le Atua. E lē gata ua melea e Atamu le lumanaʻi matagofie mo ia lava, ae ua ia tuufaasolo mai foʻi i lana fanau le lē lelei atoatoa, agasala, ma le oti. (Roma 5:12) Ua ia taofia mai i lana fanau le faamoemoe o le ola e faavavau. Na lē mafai foʻi ona fanauina e Atamu ma Eva ma a la fanau ni fanau lelei atoatoa. O loo faaauau ona faasesē e Satani le Tiapolo tagata talu mai le fouvalega a Atamu ma Eva i le Atua.Ioa. 8:44.

TOE MAUA SE LELEIGA ONA O LE TOGIOLA

13. O le ā le finagalo o Ieova mo tagata?

13 Peitaʻi, o loo tumau pea le alofa o le Atua i tagata. E ui i le fouvale o Atamu ma Eva, ae e finagalo Ieova ia maua e tagata se faiā lelei ma ia. E lē finagalo o ia e oti se tagata. (2 Pete. 3:9) O lea, ina ua mavae le fouvalega, na faia loa e le Atua ni sauniuniga ina ia toe maua ai e tagata se faauōga ma ia, a o le taimi e tasi e tausisi pea o ia i ana tapulaa amiotonu. Na faapefea ona faia e Ieova lenei mea?

14. (a) E tusa ai o le Ioane 3:16, o le ā le sauniuniga na faia e le Atua ina ia laveaʻi ai tagata mai i le agasala ma le oti? (e) O le ā le fesili e mafai ona tatou talanoaina ma tagata fiafia?

14 Faitau le Ioane 3:16. O le toʻatele o tagata e tatou te valaaulia i le Faamanatuga ua latou iloa lenei mau. Ae o le fesili, E faapefea i le taulaga a Iesu ona maua ai le ola e faavavau? O le tauiviga o le Faamanatuga, o le Faamanatuga, ma le toe asia o ē na auai i le Faamanatuga, atonu e tatou te maua ai le avanoa e fesoasoani ai i ē o loo saʻili ma le faamaoni i le upu moni, ina ia malamalama i le tali o lenei fesili tāua. E ono maofa i latou a o amata ona malamalama lelei i le auala ua faaali mai ai le alofa ma le atamai o Ieova, e ala i le togiola. O ā ni manatu e faatatau i le togiola e mafai ona tatou faamatilatila?

15. Na faapefea ona ese Iesu mai iā Atamu?

15 Na auina mai e Ieova se tagata lelei atoatoa e mafai ona togiolaina tagata. O lenā tagata lelei atoatoa na manaʻomia ona faamaoni iā Ieova, ma lotomalie e ofo atu lona ola e sui ai le fanau a tagata ua taʻusalaina. (Roma 5:17-19) Na faaliliuina e Ieova le ola o lana uluaʻi foafoaga mai i le lagi i le lalolagi. (Ioa. 1:14) O lea na avea ai Iesu ma tagata lelei atoatoa, e pei lava o Atamu. Peitaʻi, na ese Iesu mai iā Atamu, ona na ola Iesu e tusa ai ma tapulaa na faatalitalia e Ieova mai i se tagata lelei atoatoa. E ui lava i tofotofoga e sili ona faigatā na feagai ma Iesu, ae e leʻi agasala ai o ia pe solia se tulafono a le Atua.

16. Aiseā e avea ai le togiola o se meaalofa e tāua tele?

16 I le avea ai o Iesu ma tagata lelei atoatoa, ua mafai ona ia laveaʻiina tagata mai i le agasala ma le oti, e ala i le maliu mo i latou. Na fetaui lelei le tulaga o Iesu ma le tulaga na tatau ona iai Atamu, o se tagata e lelei atoatoa, e faamaoni ma usiusitaʻi atoatoa i le Atua. (1 Timo. 2:6) Na avea Iesu ma taulaga togiola e tatala ai le avanoa i le ola e faavavau mo “tagata e toʻatele,” o tane, fafine, ma tamaiti. (Mata. 20:28) O lea, o le togiola o le vala autū lea i le faataunuuina  o le finagalo o le Atua i le amataga. (2 Kori. 1:19, 20) O le togiola ua maua ai e tagata faatuatua uma le faamoemoe o le ola e faavavau.

UA TATALA E IEOVA LE AVANOA MO I TATOU E TOE FOʻI ATU AI

17. O ā faamanuiaga ua mafai ona maua ona o le togiola?

17 Na saunia e Ieova le togiola e ui lava sa matuā faigatā iā te ia. (1 Pete. 1:19) E matuā tāua tagata iā te ia, ma na lotomalie e auina mai lona Alo pele e toʻatasi ina ia maliu mo i tatou. (1 Ioa. 4:9, 10) E peiseaʻī ua avea Iesu ma o tatou tamā nai lo o Atamu. (1 Kori. 15:45) O lea, e lē gata ua toe faafoʻisia mai e Iesu le ola e faavavau, ae ua ia aumaia foʻi iā i tatou le avanoa e toe avea ai ma vaega o le aiga o le Atua i le lumanaʻi. E ala i le taulaga a Iesu, ua mafai ai ona toe talia e Ieova tagata i lona aiga e aunoa ma le solia ai o ana tapulaa amiotonu. Pe e lē o se faamāfanafanaga pe a mafaufau i le taimi o le a toe lelei atoatoa ai tagata faamaoni uma? O le a autasi atoatoa le vaega faalelagi ma le vaega faalelalolagi o lona aiga. O le iʻuga, o le a avea i tatou uma ma fanau a le Atua.Roma 8:21.

18. O afea o le a “pule aoao” ai Ieova “i le aoao o mea”?

18 E leʻi avea le fouvalega a Satani ma itu na taofia ai Ieova mai i le faaalia o lona alofa i tagata, pe taofia ai foʻi tagata lē lelei atoatoa mai i le faamaoni atu iā Ieova. E ala i le togiola, o le a fesoasoani ai Ieova i lana fanau uma ina ia amiotonu i se tulaga atoatoa. Seʻi faaata le ituaiga olaga o le a iai pe a maua e “i latou uma e iloa le Atalii ma faatuatua” le ola e faavavau. (Ioa. 6:40) O le a faataunuu e lo tatou Tamā alofa ma atamai o Ieova lona finagalo i le amataga, ma fesoasoani i tagata uma ina ia lelei atoatoa. O le taimi lenā o le a “pule aoao” ai Ieova lo tatou Tamā “i le aoao o mea.”1 Kori. 15:28.

19. (a) O le ā e uunaʻia i tatou e fai ona o le lotofaafetai mo le togiola? (Tagaʻi i le pusa “ Ia Saʻili Pea Ē ua Tatau i ai le Feʻau.”) (e) O le ā le vala o le togiola o le a tatou talanoaina i le mataupu o sosoo mai?

19 O le lotofaafetai mo le togiola e tatau ona uunaʻia ai i tatou ia faia mea uma e tatou te mafaia, ina ia taʻu atu i isi e mafai foʻi ona aogā iā i latou lenei meaalofa tautele. E manaʻomia ona iloa e tagata ua saunia ma le alofa e Ieova le togiola ina ia maua ai e tagata uma le ola e faavavau. Peitaʻi, e tele isi mea ua faataunuuina e ala i le togiola. O le a talanoaina i le mataupu o sosoo mai pe e faapefea i le taulaga a Iesu, ona foʻia ai finauga na lāgā e Satani i le faatoʻaga i Etena.