Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Setema 2017

ʻO le Afioga a le Atua e Matuā Malosi’

ʻO le Afioga a le Atua e Matuā Malosi’

“O loo ola le Afioga a le Atua ma e matuā malosi foʻi.”​—EPE. 4:12.

PESE: 9694

1. Aiseā e tatou te mautinoa ai e matuā malosi le Afioga a le Atua? (Tagaʻi i le ata i luga aʻe o le matua.)

I LE avea ai ma tagata o Ieova, ua tatou mautinoa “o loo ola . . . ma e matuā malosi foʻi” afioga po o le feʻau a le Atua mo tagata. (Epe. 4:12) O le toʻatele o i tatou ua suia o tatou olaga ona o le malosi o le Tusi Paia. O nisi o o tatou uso ma tuafāfine sa avea ma ē e gāoi, pulea e fualaau faasāina, pe faia amioga lē mamā tau feusuaʻiga. O isi sa taulau manuia i lenei faiga o mea, ae sa o latou lagona e iai se mea o loo misia i le olaga. (Fai. 2:3-11) O le mea e fiafia ai, o i latou sa foliga mai e leai se faamoemoe, ua latou maua nei le ala i le ola ina ua suia e le malosi o le Tusi Paia o latou olaga. E lē taumatea na e fiafia e faitau i nisi o tala e faatatau iā i latou nei, e pei ona faamatala i le faasologa o mataupu i Le Olomatamata “Suia e le Tusi Paia Olaga.” E ui ua uma ona papatiso, ae o loo faaauau ona agaʻigaʻi i luma faaleagaga Kerisiano e ala i le fesoasoani a le Tusi Paia.

2. E faapefea ona faamaonia na matuā malosi le Afioga a le Atua i le uluaʻi senituri?

2 Pe e tatau ona faateʻia i tatou ona ua toʻatele tagata i aso nei ua faia suiga tetele i olaga, ina ua latou suʻesuʻeina le Afioga a le Atua? E leai! O nei mea na tutupu e faamanatu mai ai o tatou uso ma tuafāfine i le uluaʻi senituri, o ē na maua le faamoemoe mo le lagi. (Faitau le 1 Korinito 6:9-11.) Ina ua uma ona lisi mai e le aposetolo o Paulo ituaiga tagata e lē fai mo latou tofi le Malo  o le Atua, ona ia faapea atili mai lea: “Sa faapena foʻi nisi o outou.” Peitaʻi, na suia i latou ona o le fesoasoani a le Tusi Paia ma le agaga paia o le Atua. E ui lava foʻi na latou talia le upu moni, ae o nisi o i latou sa tatau ona foʻia faafitauli matuiā faaleagaga. O loo taʻua i le Tusi Paia se tasi o Kerisiano faauuina i le uluaʻi senituri sa tatau ona faateʻaina, ma na mulimuli ane toe faaaʻe. (1 Kori. 5:1-5; 2 Kori. 2:5-8) Pe e lē faalaeiauina ai i tatou i le iloiloina o faafitauli eseese na manumalo ai o tatou uso ma tuafāfine, ona o le fesoasoani a le Afioga a le Atua?

3. O le ā o le a tatou talanoaina i lenei mataupu?

3 Talu ai o le Afioga a le Atua o se meafaigaluega e sili ona malosi ua tatou mauaina, e mautinoa la e tatou te mananaʻo ia faaaogā lelei. (2 Timo. 2:15) O le a tatou talanoaina i lenei mataupu auala e tatou te faataga ai le malosi o loo i le Afioga a le Atua ina ia galue (1) i o tatou olaga, (2) pe a tatou auai i le faiva, ma (3) pe a tatou aʻoaʻo mai i le pulelaa. O lenei mataupu o le a fesoasoani iā i tatou ina ia faaalia ai le alofa ma le lotofaafetai i lo tatou Tamā alofa i le lagi, o lē o loo aʻoaʻoina i tatou i mea e aogā iā i tatou.​—Isa. 48:17.

I O TATOU OLAGA

4. (a) O le ā e manaʻomia ona tatou faia ina ia taaʻina ai o tatou olaga e le Afioga a le Atua? (e) E faapefea ona e faatulaga se taimi e faitau ai le Tusi Paia?

4 Ina ia taaʻina o tatou olaga e le Afioga a le Atua, e manaʻomia ona tatou faitauina e lē aunoa. Ia taumafai e faitau i aso taʻitasi pe afai e mafai. (Iosua 1:8) E moni o le toʻatele o i tatou e pisi tele. Peitaʻi, e lē tatau ona avea so o se mea e aofia ai ma o tatou tiute tauave, ma pogai e faalavelavea ai la tatou faasologa o le faitauina o le Tusi Paia. (Faitau le Efeso 5:15, 16.) O le toʻatele o auauna a Ieova ua latou faatulaga le taimi e faitau ai le Tusi Paia i aso uma i taeao, i se taimi a o faagasolo le aso, po o le pō foʻi. Ua pei o latou lagona o le faisalamo o lē na tusi e faapea: “Maʻeu lava loʻu naunau i lau tulafono! Ou te mafaufau i ai i le aso atoa.”​—Sala. 119:97.

5, 6. (a) Aiseā e tāua ai le manatunatu loloto? (e) E faapefea ona tatou maua aogā mai i le manatunatu loloto? (i) O ā ni aogā patino ua e maua mai i le faitau o le Afioga a le Atua ma manatunatu loloto i ai?

5 E lē gata e faitau le Tusi Paia, ae e tāua foʻi ona tatou manatunatu loloto i mea ua tatou faitauina. (Sala. 1:1-3) O le faia faapea o le a faatoʻā mafai ai ona faatatauina i o tatou olaga le atamai aogā o loo i le Tusi Paia. E tusa pe e tatou te faitauina le Afioga a le Atua i se kopi ua lomia pe i se masini faaonapōnei, ae o lo tatou sini ia pāʻia ai o tatou loto.

6 E faapefea ona tatou maua aogā mai i le manatunatu loloto? Pe a uma ona faitau se vaega o le Tusi Paia, ia taofi ma mafaufau  i fesili nei: ʻO le ā ua taʻu mai e nei mau e faatatau iā Ieova? O ā auala ua ou faatatauina ai i loʻu olaga mataupu silisili o loo faamatilatila mai i nei mau? O ā ni vala e mafai ona ou faaleleia atili?’ A o tatou manatunatu loloto faatasi ma le tatalo i le Afioga a le Atua, o le a tatou matuā naunau e faatatau fautuaga o loo iai. O le iʻuga, o le a tatou faataga le malosi o loo i le Afioga a le Atua ina ia galue i o tatou olaga.​—2 Kori. 10:4, 5.

I LE FAIVA

7. E faapefea ona tatou faaaogā lelei le Afioga a le Atua i la tatou faiva?

7 O le ā e fesoasoani iā i tatou ina ia faaaogā lelei ai le Afioga a le Atua i la tatou faiva? O le laasaga muamua, o le faaaogā lea i taimi uma o le Tusi Paia pe a tatou talaʻi ma aʻoaʻo atu. Na faapea mai se tasi uso: “Pe afai e te lua talaʻi faatasi ma Ieova mai i lea fale i lea fale, po o le a e faia uma tala pe e te tuu atu se avanoa iā Ieova e fai ai sana faamatalaga?” O le uiga o le faamatalaga a le uso, pe a tatou faitau saʻo atu mai i le Afioga a le Atua a o auai i le faiva, o lenā ua tatou tuu le avanoa iā Ieova e talanoa atu ai i le tagata o le aiga. O le a sili atu ona malosi aafiaga o se mau ua filifilia lelei nai lo o se tala e tatou te fai atu. (1 Tesa. 2:13) Ia fesili ifo iā te oe lava, ʻPo ou te saʻili so o se avanoa e faitau atu ai se mau mai i le Afioga a le Atua, iā i latou o loo oʻu taʻu atu i ai le tala lelei?’

8. Aiseā e lē lava ai le tau ina faitau atu o mau pe a tatou auai i le talaʻiga?

8 Peitaʻi, e lē lava le tau ina faitau atu o ni mau o le Tusi Paia i ē e tatou te talanoa i ai. Aiseā? Talu ai o le toʻatele o tagata e itiiti pe e matuā lē malamalama foʻi i le Tusi Paia. Sa moni lenei tulaga i le uluaʻi senituri, ma e faapena foʻi i aso nei. (Roma 10:2) O lea, aua neʻi o tatou manatu o le a malamalama le tagata i le uiga o se mau ona ua tatou faitau atu i ai. E ao ona tatou faaalu se taimi e vaevae ai vaega o se mau,  atonu e ala i le toe faitau o upu autū o le mau ma faamatala le uiga. O le faia faapea o le a fesoasoani e pāʻia ai mafaufau ma loto o la tatou ʻaufaalogologo i le feʻau o le Afioga a le Atua.​—Faitau le Luka 24:32.

9. E faapefea ona tatou faatomua mau i se auala e faatupu ai le faaaloalo o tagata i le Tusi Paia? Aumai se faaaʻoaʻoga.

9 O se mea lelei foʻi lo tatou faatomua o mau i se auala e faatupu ai le faaaloalo o tagata i le Tusi Paia. O se faaaʻoaʻoga, e te ono faapea atu: “Seʻi o ta vāai po o le ā se fetalaiga a le Atua e faatatau i lenei mataupu.” Pe afai e te talanoa i se tagata e lē o se Kerisiano, e mafai ona e faapea atu: “Seʻi mātau le mea ua taʻu mai i Tusitusiga Paia iā i tatou.” Pe afai foʻi e te talaʻi i se tagata e lē naunau i lotu, e te ono fesili atu: “Pe na e faalogo i le faaupuga anamua lenei?” Ioe, ia mātau tulaga o tagata taʻitoʻatasi ona fetuunaʻi lea i ai o a tatou taulimaga.​—1 Kori. 9:22, 23.

10. (a) Faamatala mai le mea na tupu i se tasi o uso. (e) Ua faapefea ona e faamaonia le matuā malosi o le Afioga a le Atua pe a faaaogā i lau faiva?

10 Ua iloa e le toʻatele e faapea o le faaaogā o le Afioga a le Atua i le faiva, e telē sona aafiaga i ē e tatou te talaʻi i ai. O se faaaʻoaʻoga, sa toe asia e se uso se tamā matua na tele tausaga o faitau i a tatou mekasini. Nai lo o le tau ina tuu i ai o se kopi fou o Le Olomatamata, na filifili le uso e faitau atu se mau o loo iai i lenā mekasini. Sa ia faitau i ai le 2 Korinito 1:3, 4 lea e faapea mai: ʻO le Tamā o le alofa mutimutivale, ma le Atua o faamāfanafanaga uma, e na te faamāfanafanaina i tatou i o tatou puapuaga uma.’ Na matuā pāʻia le loto o le tamā matua i na upu ma faapea mai i le uso e toe faitau atu le mau. Na taʻua e le tamā lo la matuā manaʻomia ma lana avā o ni faamāfanafanaga, ma o lea ua fiafia i le feʻau o le Tusi Paia. Pe e te lē ioe e matuā malosi le Afioga a le Atua pe a faaaogā i la tatou faiva?​—Galu. 19:20.

PE A AʻOAʻO MAI I LE PULELAA

11. O le ā le tiute tauave ua iai i uso o loo aʻoaʻo mai i le pulelaa?

11 O i tatou uma lava e fiafia e auai i a tatou sauniga faa-Kerisiano faapea fonotaga ma tauaofiaga. O le māfuaaga autū e tatou auai ai, ina ia tapuaʻi atu iā Ieova. E tatou te maua foʻi le tele o aogā mai i faatonuga faaleagaga e maua mai ai. O lea, o se matuā faaeaga mo uso le faia o lauga mai i le pulelaa i na faatasiga. Ae i le taimi e tasi, e tatau ona latou iloa ua iā i latou se tiute tauave tāua. (Iako. 3:1) E tatau ona latou faamautinoa i taimi uma o loo faavae mai i le Afioga a le Atua mea o loo latou aʻoaʻoina atu. Pe afai e tofia oe e aʻoaʻo mai i le pulelaa, e faapefea ona e faaaogā le mana o le Tusi Paia ina ia pāʻia ai loto o lau aofia?

12. E faapefea i se failauga ona faamautinoa o loo avea le Tusi Paia ma faavae autū o lana lauga?

12 Ia faamautinoa o loo avea le Tusi Paia ma faavae autū o lau lauga. (Ioa. 7:16) O le ā e aofia ai? Ia faaeteete i le soona faamatilatila o vala e pei o tala o mea na tutupu, faataʻitaʻiga, talafaatusa, po o le auala foʻi e fai ai lau lauga, nai lo o le matuā faamatilatila o mau o le Tusi Paia. Ia manatua foʻi, e ese le faitau atu o mau, ese le aʻoaʻo atu mai i le Tusi Paia. Pe afai e tele ni mau e te faitauina, e ono iʻu ina leai ma se mau e manatua e lau ʻaufaalogologo. O lea, ia filifili lelei au mau autū, ia faaalu se taimi e faitau ai, faamatala, faataʻitaʻi, ma faatatau. (Nee. 8:8) Pe afai o loo faavae le lauga i se auivi mai i le faalapotopotoga, ia suʻesuʻe lelei le auivi ma mau o loo iai. Taumafai ia malamalama i le fesootaʻiga o faamatalaga o loo i le auivi ma mau o loo sii mai ai. Pe a uma, ona faaaogā lea o mau ua e  filifilia ina ia aʻoaʻo atu ai manatu o loo i le auivi. (E te maua fautuaga aogā i le suʻesuʻega 21 e oo i le 23 i le tusi Mauaina o Aogā Mai i le Aʻoga o le Faiva Faatiokarate.) A o le mea e sili ona tāua, ia ōle atu mo le fesoasoani a Ieova ina ia mafai ona e faailoa atu manatu tāua o loo iai i lana Afioga.​—Faitau le Esera 7:10; Faataoto 3:13, 14.

13. (a) O le ā le aafiaga i se tasi tuafafine ona o le faaaogāina o mau i se sauniga faa-Kerisiano? (e) O ā ni aogā ua e maua ona o le faaaogā o le Tusi Paia i a tatou sauniga?

13 Na telē se aafiaga i se tuafafine i Ausetalia ona o le faaaogāina o mau i se sauniga faa-Kerisiano. E ui lava i mea leaga na tutupu iā te ia a o tuputupu aʻe, ae na ia talia le feʻau o le Tusi Paia ma tuuina atu lona ola iā Ieova. Peitaʻi, sa faigatā ona ia talia e alofa Ieova iā te ia. Mulimuli ane, na talitonu o ia e alofa le Atua iā te ia. Aiseā? Na suia lona manatu ina ua manatunatu loloto i se mau na faaaogā i se tasi o sauniga, ma na ia faafesootaʻi atu i isi mau o le Tusi Paia. * Pe na iai se taimi na iai se aafiaga faapena iā te oe ona o le faaaogā o le Afioga a le Atua i sauniga, fonotaga, ma tauaofiaga?​—Nee. 8:12.

14. E faapefea ona faaalia lo tatou talisapaia o le Afioga a Ieova?

14 Pe e tatou te lē lotofaafetai iā Ieova mo lana Afioga, le Tusi Paia? E lē gata ua ia saunia mai ma le alofa mo tagata, ae ua ia faataunuuina foʻi lana folafolaga e faapea o le a tumau lana Afioga. (1 Pete. 1:24, 25) E mautinoa la o se mea lelei lo tatou faitauina e lē aunoa o le Afioga a le Atua, faatatau i o tatou olaga, ma faaaogā ina ia fesoasoani atu ai i isi. O le faia faapea e faaalia atu ai lo tatou naunau ma le talisapaia o lenei ʻoa tautele. A o le vala sili, e faaalia atu ai lo tatou alolofa ma le lotofaafetai iā Ieova le Atua o Lē e ana le Tusi Paia.

^ pala. 13 Tagaʻi i le pusa “ Suia Loʻu Manatu.”