Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Setema 2017

“O le Afioga a lo Tatou Atua e Tumau Lea e Faavavau”

“O le Afioga a lo Tatou Atua e Tumau Lea e Faavavau”

“Ua mago le mutia muʻamuʻa, ua mamae le fuga o le laau; ae o le afioga a lo tatou Atua e tumau lea e faavavau.”​—ISA. 40:8.

PESE: 9597

1, 2. (a) E faapeʻī le olaga pe ana faapea e leai se Tusi Paia? (e) O le ā e fesoasoani ina ia matuā aogā ai iā i tatou le Afioga a le Atua?

E FAAPEʻĪ lou olaga pe ana faapea e te lē mauaina le Tusi Paia? E te lē mauaina ni fautuaga aogā e taʻitaʻia ai lou olaga i aso taʻitasi. E te lē mauaina foʻi ni tali faamalieloto i fesili e faatatau i le Atua, le olaga, ma le lumanaʻi. E lē gata i lea, o le a e lē malamalama foʻi i le auala na feutagaʻi ai Ieova ma tagata i taimi ua teʻa.

2 E tatou te lotofaafetai ona e tatou te lē o iai i lenā tulaga faanoanoa. Ua saunia mai e Ieova mo i tatou lana Afioga le Tusi Paia, ma ua ia faamautinoa mai o le a tumau e faavavau le feʻau o loo i lana Afioga. Na sii mai e le aposetolo o Peteru le Isaia 40:8. E lē o faasino patino atu lenā fuaiupu i le Tusi Paia atoa, ae o loo faasino atu i le feʻau o loo iai i le Tusi Paia. (Faitau le 1 Peteru 1:24, 25.) O le mea moni, e mafai ona matuā aogā iā i tatou le Tusi Paia pe afai e maua i le gagana e tatou te malamalama lelei i ai. Ua leva ona iloa e i latou e naunau i le Tusi Paia lenei mea moni. Ua faitau senituri o finafinau ē lotofaamaoni ina ia faaliliu ma tufatufa atu le Tusi Paia, e ui lava i teteega ogaoga. Ua talafeagai lo latou faanaunauga ma le finagalo o le Atua “ia faaolaina ituaiga uma o tagata, ma ia maua le poto saʻo i le upu moni.”​—1 Timo. 2:3, 4.

3. O le ā o le a tatou talanoaina i lenei mataupu? (Tagaʻi i le ata i luga aʻe o le matua.)

 3 O le a tatou talanoaina i lenei mataupu faaaʻoaʻoga o le tumau o le Afioga a le Atua e ui i (1) suiga i gagana, (2) suiga i pulega a faigāmalo, ma (3) teteega i le faaliliuina o le Tusi Paia. O le a faapefea ona aogā iā i tatou lenei mataupu? O le a faamalosia atili ai lo tatou talisapaia o le Afioga a le Atua. O le a faaloloto ai foʻi lo tatou alofa i le Atua o Lē e ana le Tusi Paia, lea na ia saunia mai ina ia tatou maua ai aogā.​—Mika 4:2; Roma 15:4.

SUIGA I GAGANA

4. (a) E faapefea ona suia se gagana a o faagasolo taimi? (e) O le ā e faaalia ai e lē faaituʻau lo tatou Atua i se gagana patino, ma o ā ni ou faalogona e tusa ai o lenei tulaga?

4 A o faagasolo taimi, e masani ona suia se gagana. E ono matuā suia le uiga o se upu po o se faaupuga mai i le uiga sa iai muamua. Atonu e mafai ona e mafaufau i ni faaaʻoaʻoga i ni suiga i le gagana o loo e tautala ai. E faapena foʻi le gagana Eperu ma le Eleni ia sa tele ina tusia ai le Tusi Paia. E telē le eseesega o le gagana Eperu ma le Eleni i le taimi lenei, mai i le faa-Eperu ma le faa-Eleni sa tusia ai le Tusi Paia. O le toʻatele la o tagata e fia malamalama i le Afioga a le Atua, e oo lava i ē e iloa le faa-Eperu po o le faa-Eleni faaonapōnei, e latou te faitauina se faaliliuga o le Tusi Paia. E manatu nisi e tatau ona latou aʻoaʻoina le faa-Eperu ma le faa-Eleni anamua, ina ia malamalama lelei ai i le Tusi Paia. Peitaʻi, e leai se aogā o lo latou faia faapea. * E tatou te faafetai ona e lata i le 3,000 gagana ua faaliliuina ai nei le Tusi Paia atoa po o ona vaega. E manino mai e finagalo Ieova ia maua e tagata o “nuu uma, ma ituaiga uma, ma gagana uma” aogā mai i lana Afioga. (Faitau le Faaaliga 14:6.) Pe e lē avea lenā ma itu e atili ai ona e vavalalata atu i lo tatou Atua alofa ma lē faailoga tagata?​—Galu. 10:34.

5. Aiseā e mataʻina ai le faaliliuga o le King James Version?

5 E faapena foʻi gagana na faaliliuina ai le Tusi Paia, na suia a o faagasolo taimi. Atonu na faigofie ona malamalama i se faaliliuga o le Tusi Paia i le taimi na faatoʻā maua ai, ae mulimuli ane faigatā ona malamalama i ai. O se faaaʻoaʻoga, o le King James Version, o le faaliliuga faa-Peretania o le Tusi Paia na maua i le 1611. O se tasi lenei o Tusi Paia faa-Peretania sa sili ona lauiloa, ma na telē sona aafiaga i le gagana Peretania. * E lē tele ni mau i le King James Version na taʻua ai le suafa o le Atua. E na o ni nai mau na faaaogā ai “Ieova,” ae o isi mau i Tusitusiga Paia Eperu sa muaʻi tusia ai le suafa o le Atua, na faaaogā ai le taʻu “ALII” i mataʻitusi lapopoʻa. Na faaaogā foʻi i kopi na lomia mulimuli ane le upu “ALII” i mataʻitusi lapopoʻa i nisi o mau i le Tusitusiga Paia Eleni. O lea, na amanaʻia e le faaliliuga o le King James Version mau e tatau ona tuu i ai le suafa o le Atua i le Feagaiga Fou.

6. Aiseā e tatou te lotofaafetai ai mo le Faaliliuga a le Lalolagi Fou?

6 A o faagasolo taimi, na faasolo ina maotua ma tuai le gagana na faaaogā i le King James Version. E faapena foʻi uluaʻi faaliliuga o le Tusi Paia i isi gagana. Pe e tatou te lē lotofaafetai ai ona ua maua le Faaliliuga a le Lalolagi Fou i gagana faaonapōnei? E silia i le 150 gagana ua  maua ai lenei faaliliuga i le Tusi Paia atoa pe i vaega, ma o le toʻatele o tagata i le lalolagi ua mafai ona faitau i ai i a latou lava gagana. Ua faigofie ona pāʻia loto o tagata i le feʻau o loo i le Afioga a le Atua ona o le manino o upu o loo faaaogā ai. (Sala. 119:97) Ae o le itu e sili ona tāua ai le Faaliliuga a le Lalolagi Fou, ona ua toe tuuina i ai le suafa o le Atua i mau na muaʻi tusia ai.

SUIGA I PULEGA A FAIGĀMALO

7, 8. (a) Aiseā na lē malamalama ai le toʻatele o tagata Iutaia i le senituri lona tolu T.L.M. i Tusitusiga Paia Eperu? (e) O le ā e faasino i ai le Septuagint faa-Eleni?

7 O nisi taimi e suia ai gagana e tautatala ai tagata ona o suiga i pulega a faigāmalo. Ua faapefea ona faamautinoa e le Atua e lē avea na suiga ma pogai e lē malamalama ai tagata i lana Afioga? E fesoasoani mai se faaaʻoaʻoga i le taimi ua teʻa ina ia tali ai lenei fesili. O uluaʻi tusi e 39 o le Tusi Paia na tusia e tagata Isaraelu po o tagata Iutaia. O i latou na sa muaʻi ʻtuuina atu i ai le afioga paia a le Atua.’ (Roma 3:1, 2) Peitaʻi, e oo ane i le senituri lona tolu T.L.M. ua lē malamalama le toʻatele o tagata Iutaia i le gagana Eperu. Aiseā? Talu ai na faalautele atu e Alesana le Sili le pulega a le Emepaea o Eleni i atunuu na ia faatoʻilaloina. (Tani. 8:5-7, 20, 21) O le iʻuga, na avea le gagana Eleni ma gagana taatele na tautatala ai tagata, e aofia ai ma tagata Iutaia na nonofo solo i vaipanoa mamao na pulea e Eleni. O lea, o le toʻatele o tagata Iutaia na tautatala i le gagana Eleni, na matuā faigatā ona malamalama i Tusitusiga Paia Eperu. O le ā le auala na foʻia ai lenei faafitauli?

8 Pe tusa o le ogatotonu o le senituri lona tolu T.L.M., na faaliliuina ai uluaʻi tusi e lima o le Tusi Paia mai i le faa-Eperu i le faa-Eleni. Na māeʻa ona faaliliuina isi tusi uma o Tusitusiga Paia Eperu i le senituri lona lua T.L.M. O lenei faaliliuga sa taʻua o le Septuagint faa-Eleni, ma e foliga mai o le uluaʻi faaliliuga lea o Tusitusiga Paia Eperu atoa.

9. (a) O le ā le aafiaga o le Septuagint ma isi uluaʻi faaliliuga i tagata faitau o le Afioga a le Atua? (e) O ā mau o Tusitusiga Paia Eperu e te fiafia i ai?

9 O le Septuagint na faigofie ai ona faitau le Tusi Paia e tagata Iutaia ma isi e tautatala i le gagana Eleni. Seʻi mafaufau i lo latou fiafia ina ua faalogo pe faitau i le Afioga a le Atua i le gagana e latou te malamalama i ai! Mulimuli ane, na faaliliuina ni vaega o le Tusi Paia i isi gagana taatele e pei o le gagana Syriac, Gothic, ma le faa-Latina. Ina ua suʻesuʻe e tagata Tusitusiga Paia i se gagana e latou te malamalama i ai, e lē taumatea o le toʻatele na iai ni mau patino na fiafia i ai, e pei foʻi o i tatou i aso nei. (Faitau le Salamo 119:162-165.) Ioe, o loo tumau le Afioga a le Atua e ui lava i suiga i gagana taatele.

TETEEGA I LE FAALILIUINA O LE TUSI PAIA

10. Aiseā na lē mafai ai ona faitau le toʻatele o tagata i le Tusi Paia i vaitaimi o Ioane Uikilifi?

10 A o faagasolo tausaga, sa taumafai taʻitaʻi iloga ina ia taofi tagata lautele mai i le mauaina o le Tusi Paia. Peitaʻi, e leʻi taofia ai ē lotofaamaoni mai i le taumafai e faaoo atu le Tusi Paia i tagata uma. O se faaaʻoaʻoga, o Ioane Uikilifi, o se faitofā i mataupu faalotu i le senituri lona 14. Sa matuā talitonu o ia e tatau ona maua e tagata uma aogā mai i le Afioga a le Atua. Ae i ona taimi, e leʻi mafai ona faitau le toʻatele o tagata Egelani i le Tusi Paia. O se tasi o māfuaaga, ona o le toʻatele o tagata e leʻi gafatia  le tau o se Tusi Paia, auā sa tusilima ma na matuā taugatā le gaosiga. O le toʻatele foʻi o tagata e leʻi iloa faitau. Sa latou faalogo o faitau ni mau o le Tusi Paia pe a ō i le lotu, ae atonu e leʻi malamalama e faatatau i na mau. Aiseā? Talu ai o le Vulgate, o le Tusi Paia autū lea a le lotu, sa tusia i le gagana Latina ma e leʻi malamalama tagata lautele i lenā gagana. Sa faapefea la ona latou malamalama i ʻoa tautele o loo i le Tusi Paia?​—Faata. 2:1-5.

Sa maumauaʻi Uikilifi ma isi ia maua e tagata uma le Afioga a le Atua. Po o e maumauaʻi foʻi faapena? (Tagaʻi i le palakalafa e 11)

11. O le ā se aafiaga o le Tusi Paia a Uikilifi?

11 O le 1382 na faia ai le faaliliuga faa-Peretania lea na lauiloa mulimuli ane o le Tusi Paia a Uikilifi. Sa vave ona salalau atu lenei faaliliuga i ē na lagolagoina Uikilifi. O le naunau ina ia pāʻia loto o tagata lautele i le Afioga a le Atua, na savavali ai mai i lea nuu i lea nuu o Egelani tagata talaʻi ia sa taʻua o le ʻau Lolati, o ē na mulimuli iā Uikilifi. Sa faitau e le ʻau Lolati ni vaega o le Tusi Paia a Uikilifi i tagata na latou feiloaʻi i ai, ma tuu i ai ni kopi na tusilima. O a latou taumafaiga na toe faatupu ai le naunau o tagata i le Afioga a le Atua.

12. O le ā le tali mai a taʻitaʻi lotu iā Uikilifi ma lana galuega?

12 O le ā le tali mai a taʻitaʻi lotu? Sa latou feita iā Uikilifi, o lana Tusi Paia, ma ē na lagolagoina o ia, ma na latou sauāina le ʻau Lolati. Na latou saʻili ma faatamaʻia so o se kopi o le Tusi Paia a Uikilifi na latou mauaina. E ui lava foʻi ua maliu Uikilifi, ae na faasilasila aloaʻia e taʻitaʻi lotu o ia o sē e tetee. Talu ai e leʻi mafai ona toe faasala se tagata ua maliu, o lea na toe ʻeli ai e taʻitaʻi lotu ponaivi o Uikilifi ma susunu, ona sasaa lea o lefulefu i le vaitafe. Peitaʻi, e leʻi mafai e le Lotu ona taofia le oo atu o le Afioga a le Atua i ē na naunau ia faitau ma malamalama i ai. Na lagolagoina e le toʻatele o tagata i Europa ma isi vaega o le lalolagi i senituri mulimuli ane, le faaliliuina ma le tufatufaina atu o le Tusi Paia ina ia aogā i tagata lautele.

“O LĒ O LOO AʻOAʻO OE I MEA E AOGĀ IĀ TE OE”

13. O le ā ua tatou mautinoa i ai, ma e faapefea ona faamalosia ai lo tatou faatuatua?

13 E lē tatau ona manatu Kerisiano i aso nei e faapea sa faagaeeina e le Atua le faaliliuina o le Septuagint, le Tusi Paia  a Uikilifi, le King James Version, po o se isi lava faaliliuga. Peitaʻi, pe a tatou iloiloina le talafaasolopito o nei faaliliuga ma le tele o isi faaliliuga, e manino mai ai le mea moni e faapea, e tumau le Afioga a Ieova e pei ona ia folafolaina mai. Pe e lē faamalosia ai lou faatuatua o le a taunuu moni lava isi folafolaga uma a Ieova?​—Iosua 23:14.

14. E faapefea i le Afioga a le Atua ona faalolotoina ai lo tatou alofa mo ia?

14 O le iloaina o auala na faatumauina ai e Ieova lana Afioga, e lē gata e faamalosia ai lo tatou faatuatua ae e faalolotoina ai foʻi lo tatou alofa mo Ieova. * Aiseā na saunia ai e Ieova lana Afioga? Aiseā na ia faamautinoa ai o le a tumau lana Afioga? Talu ai e alofa o ia iā i tatou, ma e finagalo ia aʻoaʻo i tatou i mea e aogā iā i tatou. (Faitau le Isaia 48:17, 18.) O lea la, ua talafeagai ai ona tatou talisapaia le alofa o Ieova e ala i le alolofa iā te ia ma usiusitaʻi i ana poloaʻiga.​—1 Ioa. 4:19; 5:3.

15. O ā fesili o le a tatou talanoaina i le mataupu o loo sosoo mai?

15 Talu ai e tatou te talisapaia le Afioga a le Atua, o le a tatou mananaʻo la ia maua atoatoa aogā mai i lana Afioga. E faapefea ona tatou maua le tele o aogā mai i a tatou lava faitauga Tusi Paia? O le ā e fesoasoani iā i tatou ina ia faauaʻi atu ai tagata i le Tusi Paia a o tatou iai i le faiva? E faapefea i uso o loo aʻoaʻo mai i le pulelaa ona faamautinoa o loo faavae a latou aʻoaʻoga mai i le Tusi Paia? O le a taliina nei fesili i le mataupu o loo sosoo mai.

^ pala. 4 Tagaʻi i le mataupu “Pe Manaʻomia Ona E Aʻoaʻoina le Gagana Eperu ma le Eleni?” i Le Olomatamata o Novema 1, 2009.

^ pala. 5 O le tele o faaupuga lauiloa faa-Peretania na maua mai i le King James Version.

^ pala. 14 Tagaʻi i le pusa “ Afio Mai e Maimoa i Ai!