Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Aokuso 2017

Fesili Mai le ʻAufaitau

Fesili Mai le ʻAufaitau

Aiseā e eseese ai tusitusiga a Mataio ma Luka e faatatau i le soifuaga o Iesu a o laʻitiiti?

E eseese tusitusiga a Mataio ma Luka e faatatau i mea na tutupu e fesootaʻi atu i le fanau mai o Iesu, ma le taimi a o laʻitiiti o ia. Aiseā? Talu ai e eseese mea na taulaʻi atu i ai nei tusitala o Evagelia.

Na taulaʻi tusitusiga a Mataio i mea na tutupu iā Iosefa. Na faamatala e Mataio le faateʻia o Iosefa ina ua iloa le tō a Maria, le miti a Iosefa lea na faamatala atu ai e le agelu le mea ua tupu, ma le talia e Iosefa o le faamatalaga a le agelu. (Mata. 1:19-25) Na faamatala foʻi e Mataio le miti a Iosefa lea na faatonu ai e le agelu ia sosola i Aikupito, le taimi na sosola ese ai ma lona aiga, lana miti na faatonu ai e le agelu ia toe foʻi i Isaraelu, le taimi na toe foʻi ai ma lona aiga, ma lana filifiliga ina ia nonofo i Nasareta. (Mata. 2:13, 14, 19-23) I le uluaʻi gagana o le Tusi Paia, e faavalu ona taʻua le igoa o Iosefa i uluaʻi mataupu o le tusi o Mataio, ae e na o le faafā ona taʻua le igoa o Maria.

I le isi itu, na taulaʻi tusitusiga a Luka i mea na tutupu iā Maria. Na faamatala e Luka le taimi na asiasi atu ai le agelu o Kaperielu iā Maria, le taimi na asiasi ai Maria i lona tauaiga o Elisapeta, ma upu a Maria na viiviia ai Ieova. (Luka 1:26-56) Na taʻua foʻi e Luka tala a Simeona iā Maria e faatatau i mafatiaga e oo iā Iesu pe a matua. Ina ua faamatala foʻi e Luka le malaga a le aiga o Maria i le malumalu a o 12 tausaga o Iesu, na ia taʻua upu a Maria ae lē o Iosefa. Na faamatala foʻi e Luka le aafiaga o Maria i nei mea uma. (Luka 2:19, 34, 35, 48, 51) I le uluaʻi gagana o le Tusi Paia, e faasefululua ona taʻua le igoa o Maria i uluaʻi mataupu e lua o le tusi o Luka, ae e na o le faatolu ona taʻua le igoa o Iosefa. O lea la, na taulaʻi tusitusiga a Mataio i popolega ma mea na faia e Iosefa, ae na taulaʻi Luka i le matafaioi a Maria ma mea na tutupu iā te ia.

E eseese foʻi gafa na faamauina e nei tusitala e toʻalua o Evagelia. Na tusia e Mataio le tupuaga o Iosefa, ma faaalia ai o Iesu le ataliifai o Iosefa, o le suli aloaʻia i le nofoaiga a Tavita. Aiseā? Talu ai o Iosefa o se tasi na tupuga mai i le tupu o Tavita i le gafa o Solomona le atalii o Tavita. (Mata. 1:6, 16) Peitaʻi, na tusia e Luka le tupuaga o Maria ma faaalia ai o Iesu o le suli moni “i le itu faaletino” i le nofoaiga a Tavita. (Roma 1:3) Aiseā? Talu ai o Maria na tupuga mai i le tupu o Tavita i le gafa o Natano le atalii o Tavita. (Luka 3:31) Ae aiseā e leʻi taʻua ai e Luka Maria o le afafine o Heli i le gafa na ia faamauina? Talu ai e masani ona faamauina gafa e ala i tane o aiga. O lea la, ina ua taʻua e Luka Iosefa o le atalii o Heli, na malamalama tagata o Iosefa o le tane a Maria le afafine o Heli.​—Luka 3:23.

O gafa na tusia e Mataio ma Luka, ua matuā faamaonia ai o Iesu o le Mesia na folafola mai. E oo lava i Faresaio ma Satukaio, e leʻi mafai ona latou teena le moni o le gafa o Iesu ona na lausilafia e tagata uma. O loo tumau ona avea gafa na tusia e Mataio ma Luka o se vaega o le faavae o lo tatou faatuatua, ma o se faamaoniga mautinoa o folafolaga a le Atua.