“Ia oofu outou i le tagata fou.”​—KOLO. 3:10.

PESE: 126, 28

1, 2. (a) Aiseā e mafai ai ona tatou oofu i le tagata fou? (e) O ā vala o le tagata fou o loo taʻua i le Kolose 3:10-14?

O LE faaupuga “tagata fou,” e faalua ona taʻua i le uluaʻi gagana o le Tusi Paia. (Efe. 4:24; Kolo. 3:10) E faasino atu lenei faaupuga i uiga o se tagata ua “foafoaina e tusa ma le finagalo o le Atua.” E mafai ona tatou oofu i lenā tagata fou. Aiseā? Talu ai na faia e Ieova le tagata i lona faatusa, o lea ua mafai ai ona tatou faaaʻoaʻo i ona uiga matagofie.​—Kene. 1:26, 27; Efe. 5:1.

2 E moni o i tatou uma lava e aafia i tuʻinanauga sesē ona o lo tatou tulaga lē lelei atoatoa na tuufaasolo mai i o tatou uluaʻi mātua. Atonu foʻi e matuā taaʻina i tatou i le siʻomaga na tatou ola aʻe ai. Peitaʻi, o le fesoasoani ma le alofa a Ieova e mafai ai ona avea i tatou ma ituaiga tagata o loo ia finagalo i ai. Ina ia fesoasoani iā i tatou ia maumauaʻi e faia faapea, o le a tatou iloiloina nisi o vala o le tagata fou lea na taʻua e le aposetolo o Paulo. (Faitau le Kolose 3:10-14.) O le a tatou talanoaina foʻi auala e mafai ona tatou faaalia atu ai nei vala i la tatou faiva.

 “UA TASI OUTOU”

3. O le ā se tasi o vala o le tagata fou?

3 Ina ua uma ona apoapoaʻi mai Paulo ia tatou oofu i le tagata fou, ona ia faamatala lea e faapea o le lē faailoga tagata o se tasi o vala matilatila o le tagata fou. Na faapea mai o ia: “E lē o iai se Iutaia po o se Eleni, o sē e peritomeina po o sē e lē peritomeina, o se tagata ese, po o se Sekutia, se pologa po o sē e saʻoloto.” * Aiseā e lē tatau ai ona faia ni faaeseesega i le faapotopotoga ona o ituaiga, atunuu, po o tulaga aloaʻia? Talu ai o soo moni o Keriso ʻua tasi i latou.’​—Kolo. 3:11; Kala. 3:28.

4. (a) O le ā le auala e ao ona feutagaʻi ai auauna a Ieova ma isi? (e) O le ā le tulaga e mafai ona avea ma luʻi i le autasi o Kerisiano?

4 O i latou ua oofu i le tagata fou, e latou te faaaloalo i tagata uma e tusa lava po o ā tulaga tau tamaoaiga po o aganuu a na tagata. (Roma 2:11) O se luʻi lenei tulaga i nisi vaega o le lalolagi. O se faaaʻoaʻoga, o le toʻatele o Molimau i Aferika i Saute o loo nonofo i aai ua vaevae e le malo e fua i o latou ituaiga. Ua iai aai mo tagata maumea, tagata uli, po o aai e nonofo ai tagata o ituaiga eseese. Peitaʻi, ina ia faalaeiau o tatou uso ia “faalautele atu” o latou loto, na talia ai e le Vaega Pule iā Oketopa 2013 se fuafuaga faapitoa ina ia fesoasoani i uso ia faamasani le tasi i le isi. (2 Kori. 6:13) O le ā na aofia ai i lenā fuafuaga?

5, 6. (a) O ā fuafuaga na faia i se tasi atunuu ina ia faamalosia ai le autasi o tagata o le Atua? (Tagaʻi i le ata i luga aʻe o le matua.) (e) O ā iʻuga ua iʻu i ai?

5 Sa faia fuafuaga ia galulue faatasi ni faapotopotoga se lua e eseese gagana po o lanu i faaiʻuga o vaiaso. Sa galulue faatasi na uso ma tuafāfine i le talaʻiga, auai faatasi i sauniga, ma faifaimea faatasi i o latou fale. E faitau selau faapotopotoga na auai i lea fuafuaga, ma e tele lipoti mananaia na maua e le ofisa o le lālā e oo lava i tagata e lē o ni Molimau. O se faaaʻoaʻoga, na taʻua e se faifeʻau, “E lē o aʻu o se Molimau, ae ou te fai atu o le matuā maopoopo o le tou talaʻiga ma le tou autasi.” O le ā se aafiaga o lenei fuafuaga i Molimau?

6 Na matamuli Noma o se tuafafine e tautala i le gagana Xhosa, e valaaulia i lona fale uso papalagi mai i le faapotopotoga faa-Peretania. Ae ina ua uma ona talaʻi faatasi ma Molimau papalagi ma faifaimea faatasi i o latou fale, na faapea mai Noma, “E tutusa lava i matou!” O lea, ina ua oo i le taimi e talimālō ai le faapotopotoga i le gagana Xhosa i le faapotopotoga faa-Peretania, na saunia e Noma se taumafataga ma valaaulia nisi i lona fale e aofia ai ma se uso toeaina palagi. Na faapea mai Noma, “Na faateʻia aʻu ona na mafai ona nofo lenei uso i luga o se pusa.” O loo faaauau pea lenei fuafuaga, ma o le iʻuga e toʻatele uso ma tuafāfine ua maua ni a latou uō fou, ma naunau ia faaauau ona faamasani atu i isi e ese o latou lanu.

ʻALOFA MUTIMUTIVALE MA LE AGALELEI’

7. Aiseā e manaʻomia ai ona faaauau ona faaalia le alofa mutimutivale?

7 O le a faaauau ona tatou feagai ma tulaga faigatā seʻia oo ina faaumatia le lalolagi a Satani. O loo tatou aafia i le leai o ni galuega, gasegase tugā, sauāga, mala faalenatura, gaoia meatotino, po o isi tulaga faigatā. Ina ia fesoasoani le tasi i le isi i taimi faigatā, e manaʻomia ona moni lo tatou alofa mutimutivale. O le alofa mutimutivale o le a uunaʻia ai i tatou e feutagaʻi ma isi i se auala agalelei. (Efe. 4:32) O le a fesoasoani nei vala o le tagata fou ina ia tatou faaaʻoaʻo ai i le Atua ma faamāfanafana atu i isi.​—2 Kori. 1:3, 4.

8. O ā iʻuga lelei e ono iʻu i ai pe a tatou faaalia pea le alofa mutimutivale ma le agalelei i tagata uma i le faapotopotoga? Aumai se faaaʻoaʻoga.

 8 E faapefea ona tatou faaalia atili le agalelei i tagata ese po o ē e lē tagolima i a tatou faapotopotoga? E ao ona tatou faauō atu iā i latou na, ma fesoasoani i ai ia iloa e tāua i latou i le faapotopotoga. (1 Kori. 12:22, 25) Seʻi manatu i le mea na tupu iā Dannykarl, o lē na siitia mai i Filipaina i Iapani. E leʻi lelei uiga na faaalia atu iā te ia e tagata na latou faigaluega faatasi. Mulimuli ane, na auai o ia i se sauniga a Molimau a Ieova. Na faapea mai Dannykarl: “E toetoe o tagata uma na iai i le sauniga o tagata Iapani. Peitaʻi, na latou faafeiloaʻi ma le māfana aʻu e pei lava ua leva ona matou masani.” Sa faaauau ona agalelei uso iā Dannykarl, ma na fesoasoani iā te ia e agaʻigaʻi ai i luma faaleagaga. Sa papatiso o ia ma o loo auauna nei o se toeaina. O le manatu o le ʻautoeaina, o Dannykarl ma lana avā o Jennifer o se faamanuiaga i le faapotopotoga. Ua latou faapea mai, “E faigofie o la olaga o ni paeonia ma o se faaaʻoaʻoga lelei o le faamuamua o le Malo.”​—Luka 12:31.

9, 10. Faamatala mai ni faaaʻoaʻoga o iʻuga lelei o le faaalia o le alofa mutimutivale a o auai i le faiva.

9 Pe a tatou talaʻi atu le feʻau o le Malo i isi, o se avanoa lelei lenā e ʻfaia ai mea lelei i tagata uma.’ (Kala. 6:10) E toʻatele Molimau ua taumafai e aʻoaʻo se gagana fou ona o le alolofa mutimutivale i tagata mai i isi atunuu. (1 Kori. 9:23) E tele faamanuiaga ua latou tofo i ai. O se faaaʻoaʻoga, na aʻoaʻoina e se tuafafine paeonia i Ausetalia e igoa iā Tiffany le gagana Swahili, ina ia fesoasoani ai i se faapotopotoga Swahili i le aai o Brisbane. E ui lava e matuā faigatā iā Tiffany le aʻoaʻoina o le gagana, ae ua faamanuiaina lona olaga. Ua faapea mai o ia: “Pe a e manaʻo e te olioli i lau faiva, e manaia pe a e galue i se faapotopotoga e ese le gagana. E tai pei o loo e faimalaga ae e lē o tuua lou atunuu. O le a e tofo ai i le māfana ma le autasi o lo tatou ʻauuso i le lalolagi aoao.”

O le ā e uunaʻia ai faifeʻau Kerisiano ina ia fesoasoani i tagata mai i isi atunuu? (Tagaʻi i le palakalafa e 10)

10 Seʻi manatu foʻi i le faaaʻoaʻoga a se aiga i Iapani. Ua faapea mai Sakiko, o le tama teine a le ulugalii: “I vaitausaga o le 1990, sa masani ona matou feiloaʻi i tagata Pasili i le talaʻiga. Ina ua matou faitau atu i ai mau mai i le Tusi Paia faa-Potukali, e pei o le Faaaliga 21:3, 4 po o le Salamo 37:10, 11, 29, sa latou uaʻi totoʻa mai ma o nisi taimi na fetagisi.” Ae e leʻi muta ai i inā le alolofa mutimutivale o lenei aiga. Ua taʻua e Sakiko: “Ina ua matou mātauina lo latou galala faaleagaga, sa amata loa ona matou aʻoaʻoina faatasi o se aiga le gagana Potukali.” Mulimuli ane, na  fesoasoani lenei aiga i le amataina o se faapotopotoga i le gagana Potukali. A o faagasolo tausaga, e toʻatele tagata mai i isi atunuu na fesoasoani i ai lenei aiga ina ia auauna iā Ieova. Ua faapea atili mai Sakiko: “E tele taumafaiga na faia ina ia aʻoaʻoina le gagana Potukali. Peitaʻi, e sili mamao atu faamanuiaga na matou mauaina. E matou te matuā lotofaafetai iā Ieova.”​—Faitau le Galuega 10:34, 35.

ʻIA OOFU OUTOU I LE LOTOMAULALO’

11, 12. (a) Aiseā e tāua tele ai ona saʻo le uunaʻiga e oofu ai i le tagata fou? (e) O le ā o le a fesoasoani iā i tatou ina ia faaauau ai ona lotomaulalo?

11 E tatau ona avea le faamamaluina o Ieova ma uunaʻiga e tatou te oofu ai i le tagata fou, ae e lē ona o viiga mai i tagata. Ia manatua, e oo lava i se agelu na lelei atoatoa sa agasala ona o lona faamaualuga. (Faatusatusa i le Esekielu 28:17.) E matuā sili atu la ona faigatā iā i tatou o tagata agasala ona teena le faamaualuga ma le faasausili. E ui i lea, e mafai lava ona tatou oofu i le lotomaulalo. O le ā e fesoasoani iā i tatou ina ia faia ai faapea?

12 Ina ia faaauau ona tatou lotomaulalo, e ao ona faatulaga se taimi e manatunatu loloto ai e lē aunoa i mea ua tatou faitau ai i le Afioga a le Atua. (Teu. 17:18-20) E tāua tele ona tatou manatunatu i aʻoaʻoga a Iesu ma lana faaaʻoaʻoga matagofie o le lotomaulalo. (Mata. 20:28) O lona lotomaulalo na ia mulumulu ai vae o ona aposetolo. (Ioa. 13:12-17) E manaʻomia foʻi ona tatou tatalo e lē aunoa mo le agaga o le Atua, e fesoasoani iā i tatou e faatoʻilalo so o se manatu e faapea e sili atu i tatou nai lo o isi.​—Kala. 6:3, 4; Fili. 2:3.

13. O ā faamanuiaga o le faaalia o le lotomaulalo?

13 Faitau le Faataoto 22:4. O tagata tapuaʻi moni uma e manaʻomia ona lotomaulalo ma maua ai le tele o faamanuiaga. O le lotomaulalo o le a fesoasoani iā i tatou ina ia faatupu ai le filemu ma le autasi i le faapotopotoga. O le atiaʻe ma le faamalosia o le lotomaulalo o le a tatou maua ai foʻi le agalelei faifua o le Atua. Na faapea mai le aposetolo o Peteru: “Ia fusia foʻi outou uma i le lotomaulalo o le tasi i le isi, auā e tetee le Atua i ē e faamaualuluga, ae e foaʻi mai e ia le agalelei faifua i ē e lotomaulalo.”​—1 Pete. 5:5.

ʻIA OOFU OUTOU I LE AGAMALU MA LE FAAPALEPALE’

14. O ai le faaaʻoaʻoga silisili o le agamalu ma le faapalepale?

14 I le lalolagi i aso nei, e masani ona manatu i tagata e agamalu ma faapalepale o ni tagata e lotovaivai. Ae e matuā sesē lenā manatu! O nei uiga matagofie e pogai mai i Lē e ona le malosi uma lava. O Ieova le Atua o ia o le faaaʻoaʻoga silisili o le agamalu ma le faapalepale. (2 Pete. 3:9) Seʻi mafaufau i le auala na tali mai ai Ieova e ala mai i ana agelu ina ua tuufesili atu Aperaamo ma Lota iā te ia. (Kene. 18:22-33; 19:18-21) E lē gata i lea, e silia i le 1,500 tausaga o onosaʻi pea Ieova i le nuu lē usiusitaʻi o Isaraelu.​—Eseki. 33:11.

15. O le ā le faaaʻoaʻoga na faataatia e Iesu i le faaalia o le agamalu ma le faapalepale?

15 Sa “agamalu” Iesu. (Mata. 11:29) Sa matuā faapalepale o ia i vaivaiga o ona soo. I lana faiva i le lalolagi, sa ia onosaia tuuaʻiga lē tonu a taʻitaʻi lotu. Peitaʻi, sa agamalu ma faapalepale e oo lava i le taimi na faasalaina ai ma le lē tonu o ia. A o onosaia e Iesu tigā matuitui i luga o le laau e faapuapuagatia ai, sa tatalo atu i lona Tamā ia faamagalo i ē na faasalaina o ia auā “ua latou lē iloa le mea ua latou faia.” (Luka 23:34) Maʻeu se faaaʻoaʻoga mataʻina o le agamalu ma le faapalepale a  o feagai ma tulaga faigatā ma ogaoga!​—Faitau le 1 Peteru 2:21-23.

16. O le ā se auala lelei e tatou te faaalia ai le agamalu ma le faapalepale?

16 E faapefea ona tatou faaalia le agamalu ma le faapalepale? Na taʻua e Paulo se tasi o auala ina ua tusi atu i uso Kerisiano e faapea: “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.” (Kolo. 3:13) Ioe, e tatou te manaʻomia le agamalu ma le faapalepale ina ia usitaʻia ai lenei poloaʻiga. Pe afai e tatou te faamagalo atu, ua tatou faatupu la ma faatumauina le autasi i le faapotopotoga.

17. Aiseā e tāua ai le agamalu ma le faapalepale?

17 O le oofu i le agamalu ma le faapalepale, o se mea e tatau ona faia e se Kerisiano. E tāua tele nei uiga ina ia faasaoina ai o tatou ola. (Mata. 5:5; Iako. 1:21) O le itu e sili ona tāua, o le faaalia o nei uiga e tatou te faamamaluina ai Ieova ma fesoasoani i isi ia usitaʻia lenei fautuaga a le Tusi Paia.​—Kala. 6:1; 2 Timo. 2:24, 25.

“IA OOFU OUTOU I LE ALOFA”

18. O le ā le fesootaʻiga o le alofa ma le lē faailoga tagata?

18 O uiga ia na tatou talanoaina, e fesootaʻi uma atu i le alofa. O se faaaʻoaʻoga, na aʻoaʻia e le soo o Iakopo ona uso ona ua latou faasilisilia tagata mauʻoa i ē matitiva. Na ia faamatala atu o lenā faiga ua solia ai le tulafono a le Atua: “Ia e alofa atu i lou tuaoi e pei o oe lava iā te oe.” Na ia toe faapea atu: “Afai e faaauau ona outou faailoga tagata, ua outou faia la le agasala.” (Iako. 2:8, 9) O le alofa o le a uunaʻia ai i tatou ia ʻalofia le faaituʻau i isi ona o o latou tulaga tau aʻoaʻoga, lanu, po o tulaga aloaʻia. E lē tatau ona faafoliga atu e tatou te lē faailoga tagata, ae ia avea ma vala moni o o tatou uiga.

19. Aiseā e tāua ai ona tatou oofu i le alofa?

19 O le alofa foʻi e “faapalepale ma e agalelei” ma “e lē faafefeteina.” (1 Kori. 13:4) E matuā manaʻomia le faapalepale, agalelei, ma le lotomaulalo ina ia faaauau ai ona faailoa atu le feʻau o le Malo i o tatou tuaoi. (Mata. 28:19) O uiga foʻi nei e faigofie ai ona lelei a tatou faiā ma o tatou uso ma tuafāfine uma i le faapotopotoga. O le ā le taui o le faaalia o lenā alofa? E maua ai le autasi i faapotopotoga lea o le a faamamaluina ai Ieova ma tosina mai ai tagata fou i le faapotopotoga. Ua talafeagai ai la le faamatalaga faaiʻu lenei a le Tusi Paia e faatatau i le tagata fou: “E iai foʻi se isi mea e manaʻomia, ia oofu outou i le alofa, auā o le fusi lea e atoatoa ona autasi ai.”​—Kolo. 3:14.

IA FAAAUAU ONA “FAAFOUINA”

20. (a) O ā fesili e ao ona tatou fesili ifo ai, ma aiseā? (e) O le ā le taimi o loo tatou tulimataʻia?

20 E ao ona taʻitoʻatasi i tatou ma fesili ifo, ʻO ā nisi mea e manaʻomia ona ou faia ina ia toese ai ma faaauau ona lafoaʻi le tagata tuai?’ E ao ona tatou tatalo faatauanau mo le fesoasoani a le Atua, ma taumafai malosi ia teena so o se uiga po o se masaniga e taofia ai i tatou mai i le ulu atu i le Malo o le Atua. (Kala. 5:19-21) E ao foʻi ona tatou fesili ifo, ʻPo o faaauau ona ou faafouina le malosi e pulea ai loʻu mafaufau?’ (Efe. 4:23, 24) O le oofu i le tagata fou ma faaauau ona faia faapea, o se gaoioiga faifai pea mo Kerisiano uma seʻia oo ina tatou lelei atoatoa. Seʻi faaata le matagofie o le olaga pe a oofu tagata uma i le tagata fou i se tulaga lelei atoatoa!

^ pala. 3 I taimi o le Tusi Paia, o tagata Sekutia sa vaai maulalo i ai tagata lautele ona o a latou amioga faanuupō.