Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Aokuso 2017

Alofa​—O se Uiga e Tautele

Alofa​—O se Uiga e Tautele

NA FAAGAEEINA e Ieova le aposetolo o Paulo e tusi e faatatau i uiga e iva ia e faapogaia e le agaga paia. (Kala. 5:22, 23) Na faamatala faatasi e Paulo nei uiga matagofie “o le fua o le agaga.” * O lenei fua e iloa ai le “tagata fou.” (Kolo. 3:10) E pei lava ona fua tele mai se laau pe a lelei ona tausia, o le a faapena foʻi ona faaalia e se tagata le fua o le agaga, pe a faaauau ona galue le agaga paia i lona olaga.​—Sala. 1:1-3.

O le vala muamua o le fua o le agaga na taʻua e Paulo, o le uiga tautele lea o le alofa. Aiseā e tautele ai? Na taʻua e Paulo pe a leai se alofa, ua “lē aogā” o ia. (1 Kori. 13:2) Ae o le ā le alofa, ma e faapefea ona tatou atiaʻe ma faaalia i aso uma?

E FAAPEFEA ONA FAAALIA LE ALOFA?

E ui lava e faigatā ona faamatala le uiga o le alofa, ae o loo faamatala i le Tusi Paia auala e faaalia ai. O se faaaʻoaʻoga, o le alofa e “faapalepale ma e agalelei.” E lē gata i lea, “e fiafia i le mea moni” ma “e onosaʻi i mea uma, e talitonu i mea uma, e faamoemoe i mea uma, e tumau i mea uma.” O le alofa foʻi e aofia ai faalogona faapelepele i isi, o le manatu mamafa moni faapea faalogona māfana mo i latou. Ae i le isi itu, o le tagata e lē alofa e lotoleaga, faasausili, amio matagā, manatu faapito, itagofie, ma e lē lotofaamagalo. Nai lo o le faaalia o nei uiga lē lelei, e tatou te mananaʻo ia faaalia le alofa moni i isi lea “e lē saʻili mo lona lava lelei.”​—1 Kori. 13:4-8.

FAAAʻOAʻOGA O LE ALOFA UA FAAALIA E IEOVA MA IESU

“O le Atua o le alofa lava ia.” O Ieova o le faaaʻoaʻoga silisili o le alofa. (1 Ioa. 4:8) O ana galuega ma mea uma e na te faia e faamaonia ai lona alofa. O le faamaoniga silisili o lona alofa i tagata, o le auina mai lea o Iesu ina ia puapuagatia ma maliu mo i tatou. Na faapea mai le aposetolo o Ioane: “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia. O le alofa lava lenei, e lē ona ua tatou alolofa i le Atua, ae ona ua alofa mai o ia iā i tatou ma auina mai lona Alo e fai ma taulaga o le leleiga ma le Atua mo a tatou agasala.” (1 Ioa. 4:9, 10) O le alofa o le Atua lea ua tatou maua ai le faamagaloga, faamoemoe, ma le ola.

Na faamaonia e Iesu lona alofa i tagata e ala i le lotomalie e faataunuu le finagalo o le Atua. Na tusi Paulo e faapea: “Ona fetalai mai lea o [Iesu]: ʻFaauta! ua ou sau e fai lou finagalo.’ . . . O le ʻfinagalo’ foʻi lea ua faapaiaina ai i le ofoina atu o le tino o Keriso Iesu, lea e na o le faatasi lava ona faia.” (Epe. 10:9, 10) E leai se tagata e sili atu lona alofa nai lo o le alofa na faaalia e Iesu. Na fetalai Iesu: “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.” (Ioa. 15:13) Pe e mafai e i tatou o tagata lē lelei atoatoa ona faaaʻoaʻo i le alofa ua faaalia e Ieova  ma Iesu? Ioe, e mafai! Seʻi o tatou iloilo auala e mafai ona tatou faia ai faapea.

“IA SAVAVALI I LE ALOFA”

Ua faalaeiau mai Paulo e faapea: “Ia faaaʻoaʻo i le Atua e faapei o le fanau pele, ma ia savavali i le alofa e pei foʻi ona alofa o le Keriso iā te outou.” (Efe. 5:1, 2) E tatou te “savavali i le alofa” pe a tatou faaalia lenei uiga i vala uma o o tatou olaga. E tatou te faaalia lenā alofa e ala i gaoioiga ae e lē na o upu. Na tusi Ioane: “Le fanau e, aua neʻi o tatou alolofa tau o le upu ma le gutu, ae e ala foʻi i gaoioiga ma le faamaoni.” (1 Ioa. 3:18) O se faaaʻoaʻoga, pe a tatou savavali i le alofa i le Atua ma tuaoi, o le a tatou talaʻi atu la le “tala lelei o le malo” iā i latou. (Mata. 24:14; Luka 10:27) E tatou te savavali foʻi i le alofa pe afai e tatou te onosaʻi, agalelei, ma faamagalo atu. Ua fautua mai le Tusi Paia: “E pei ona finagalo malie Ieova e faamagalo iā te outou, ia faapea foʻi ona outou faia.”​—Kolo. 3:13.

O le alofa moni e lē uiga atu i le alofa faavalea. O se faaaʻoaʻoga, ina ia faanā se tamaitiiti o loo tagi, o le matua e alofa faavalea e taumafai e fai mea uma lava o loo manaʻo ai le tamaitiiti. Peitaʻi, o le matua e alofa moni o le a maumauaʻi e fai le mea e tatau ona fai. I se tulaga talitutusa, o le Atua o le alofa lava ia, ae e na te ʻaʻoaʻia o lē e alofa i ai.’ (Epe. 12:6) Pe afai e tatou te savavali i le alofa, o le a tatou avatu aʻoaʻiga talafeagai pe a manaʻomia. (Faata. 3:11, 12) Ae ia manatua, e tatou te agasala ma e iai taimi e tatou te lē taulau ai. O lea, o i tatou uma lava e iai vala e manaʻomia ona faaleleia i le auala e tatou te faaalia ai le alofa. E faapefea ona tatou faia faapea? Seʻi o tatou iloilo auala e tolu.

E FAAPEFEA ONA TATOU ATIAʻE LE ALOFA?

Muamua, ia ōle atu i le Atua mo lona agaga lea e faatupuina le alofa. Na fetalai Iesu e foaʻi mai e Ieova le “agaga paia iā i latou o ē e ōle atu iā te ia.” (Luka 11:13) Pe a tatou tatalo mo le agaga paia ma maumauaʻi ia “savavali pea i la le agaga,” o le a atili ai ona tatou faaalia le alofa. (Kala. 5:16) O se faaaʻoaʻoga, pe afai o oe o se toeaina i le faapotopotoga, e mafai ona e ōle atu mo le agaga paia ina ia fesoasoani iā te oe e avatu i se auala alofa ni fautuaga faale-Tusi Paia. Pe afai foʻi o oe o se matua, e mafai ona e tatalo mo le agaga o le Atua ina ia fesoasoani iā te oe e aʻoaʻi ma le alofa lau fanau, ae e lē i se auala sauā.

Lua, ia mafaufau i auala na faaalia ai e Iesu le alofa e oo lava i taimi na faileagaina ai o ia. (1 Pete. 2:21, 23) Atonu o taimi e sili ona manaʻomia ai ona mafaufau i le faaaʻoaʻoga a Keriso, o taimi e faatigā mai ai se tasi iā i tatou pe feagai ai ma se faiga lē tonu. O le fesili lelei e tatou te fesili ifo ai i taimi faapena, ʻO le ā o le a faia e Iesu?’ Na iloa e se tuafafine e igoa iā Leigh, o le fesili ifo i lenei fesili na fesoasoani iā te ia e mafaufau muamua ai a o leʻi faia se gaoioiga. Ua faapea mai o ia: “I se tasi aso, na lafo atu ai e se mafine e ma te faigaluega faatasi se imeli i le matou ʻaufaigaluega e faaleaga ai aʻu ma aʻu galuega. Sa matuā tigā loʻu loto. Peitaʻi, na ou fesili ifo, ʻE faapefea ona ou faaaʻoaʻo iā Iesu i le auala e ma te feutagaʻi ai ma lenei tagata?’ Ina ua uma ona ou manatunatu i le mea e faia e Iesu, sa ou filifili loa e faagalo lenā mataupu ma aua le toe popole i ai. Na ou iloa mulimuli ane o si mafine lea e iai sona maʻi tugā ma na feagai o ia ma lagona mafatia. Na ou faapea ifo atonu e leai se matuiā o ana faamatalaga na fai. O le mafaufau i le faaaʻoaʻoga a Iesu i le faaalia o le alofa e oo lava i taimi na faileagaina ai o ia, na fesoasoani ou te faaalia ai foʻi le alofa i lenā mafine.” Ioe, o le a tatou gaoioi ma le alofa i taimi uma pe afai e tatou te faaaʻoaʻo iā Iesu.

Tolu, ia atiaʻe le uiga o le alofa faataulaga lea e mātaulia ai Kerisiano moni. (Ioa. 13:34, 35) O le mea lea ua faalaeiau ai i tatou i le Tusi Paia ia atiaʻe “le mafaufau” lea sa iā Iesu. E ala i le tuua o le lagi, ʻna tuua ai e Iesu o mea uma  lava’ mo i tatou ma ʻoo ai lava i le oti.’ (Fili. 2:5-8) A o tatou faaaʻoaʻo i le alofa faataulaga o Iesu, o le a atili ai ona pei o Keriso o tatou manatu ma faalogona. O le a uunaʻia ai foʻi i tatou ia faamuamua manaʻoga o isi nai lo o i tatou lava. O ā nisi o aogā o le faaalia o le alofa?

O AOGĀ O LE FAAALIA O LE ALOFA

E tele aogā e maua pe a tatou faaalia le alofa. Seʻi o tatou iloilo ni faaaʻoaʻoga se lua:

O ā aogā e tatou maua mai i le faaalia o le alofa?

  • SE ʻAUUSO I LE LALOLAGI AOAO: O lo tatou alofa o le tasi i le isi, ua tatou iloa ai po o fea lava le faapotopotoga e tatou te asiasi i ai i le lalolagi aoao, o le a talia ma le māfana i tatou e uso ma tuafāfine. Maʻeu se faamanuiaga o le alofagia e ʻlo tatou ʻauuso atoa i le lalolagi!’ (1 Pete. 5:9) E na o tagata lava o le Atua e maua ai lenei ituaiga alofa.

  • FILEMU: O le ʻonosaʻi o le tasi i le isi i le alofa’ ua mafai ai ona tatou ʻautasi i le fusi o le filemu.’ (Efe. 4:2, 3) O lenei filemu e tatou te maua i sauniga a le faapotopotoga, fonotaga, ma tauaofiaga. Pe e te lē ioe e matuā tutasi i tatou i lenei lalolagi fevaevaeaʻi ona o le iai o lenā filemu? (Sala. 119:165; Isa. 54:13) Pe a tatou faatupu le filemu i le va ma isi, ua faaalia atu ai le loloto o lo tatou alofa mo i latou, ma o le a faafiafiaina ai le finagalo o lo tatou Tamā i le lagi.​—Sala. 133:1-3; Mata. 5:9.

“O LE ALOFA E ATIAʻE AI”

Na tusi Paulo e faapea: “O le alofa e atiaʻe ai.” (1 Kori. 8:1) O le ā le uiga o lenei manatu? I le 1 Korinito mataupu e 13, lea e taʻua e nisi o le “Pese o le Alofa,” o loo faamatala ai e le aposetolo auala e atiaʻe ai i tatou e le alofa. O se tasi o auala, o le alofa e saʻili mo le lelei ma manaʻoga o isi. (1 Kori. 10:24; 13:5) E lē gata i lea, talu ai o le alofa e manatu mamafa i isi, e onosaʻi ma agalelei, e mafai ai la ona atiaʻe ni aiga e māfana ma faapotopotoga autasi.​—Kolo. 3:14.

Peitaʻi, o le alofa e sili ona tāua ma atiaʻe ai, o lo tatou alolofa lea i le Atua. O le alofa lenā e autasia ai tagata o atunuu, lanu, ma gagana uma i le fiafia e auauna atu ma le “soosootauʻau” iā Ieova. (Sefa. 3:9) Tau ina ia tatou maumauaʻi e faaalia i aso uma lenei vala tautele o le fua o le agaga paia o le Atua.

^ pala. 2 O le mataupu muamua lenei o le faasologa o mataupu e iva ia o le a talanoaina ai uiga po o vala taʻitasi o le fua o le agaga.