Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Aperila 2017

Tau Ina ia Viia Ieova i Lou Agaga Tauofo!

Tau Ina ia Viia Ieova i Lou Agaga Tauofo!

“Auā ua tauofo mai tagata, inā vivii atu ia iā Ieova.” ​—FAAMA. 5:2.

PESE: 150, 10

1, 2. (a) O le ā na taʻua e Elifasa ma Pilitati e faatatau i le silasila a Ieova i la tatou auaunaga? (e) Na faapefea ona faailoa mai e Ieova ona faalogona e faatatau i lenei mataupu?

“PE E aogā ea le tagata i le Atua, e pei ona aogā iā te ia o lē ua iai le tofā mamao? Pe e fiafia ea Lē e ona le malosi uma lava ina ua e amiotonu, pe e aogā foʻi iā te ia pe a lē taʻuleagaina lou ala?” (Iopu 22:1-3) Pe na iai se taimi na e taumānatu ai i tali o nei fesili? Ina ua fai atu e Elifasa le Timanu nei fesili iā Iopu, e mautinoa na talitonu Elifasa o le tali i ai o le leai. Na finau mai foʻi le uō a Elifasa o Pilitati le Sua e faapea, e lē mafai ona amiotonu tagata i luma o le Atua.​—Faitau le Iopu 25:4.

2 Na faapea mai nei ʻaufaamāfanafana pepelo e lē tāua iā Ieova a tatou taumafaiga ina ia auauna faamaoni iā te ia, ma i lana silafaga e tutusa lo tatou faatauvaa ma se lelefua, ilo, po o se anufe. (Iopu 4:19; 25:6) I le taimi muamua e tatou te faitau ai i nei mau, e tatou te ono manatu na faaalia e Elifasa ma Pilitati se uiga lotomaulalo. (Iopu 22:29) Auā foʻi pe a tatou tutū i le tumutumu o se mauga pe autilo mai i le faamalama o se vaalele, atonu e faigatā ona tatou iloa mai gaoioiga a tagata. Peitaʻi, po o le silasila lenā a Ieova i lo tatou sao o loo faia i le galuega o le  Malo, a o silasila mai i lona afioaga mamalu i lo tatou lalolagi? Na faailoa mai e Ieova ona faalogona ina ua ia aʻoaʻia Elifasa, Pilitati, ma Sofara, ona o a latou faamatalaga lē saʻo, ae na fiafia iā Iopu ma taʻua o ia o lana “auauna.” (Iopu 42:7, 8) O lea, e mafai ona ʻaogā le tagata i le Atua.’

“O LE Ā SE MEA E TE AVATU IĀ TE IA?”

3. O le ā na taʻua e Eliu e faatatau i a tatou taumafaiga ina ia auauna iā Ieova, ma o le ā na uiga i ai o ia?

3 E leʻi faasaʻoina e Ieova Eliu i lana fesili e faapea: “Afai e saʻo lava oe, o le ā se mea e te avatu iā te ia [le Atua], po o le ā foʻi se mea e maua e ia mai i lou lima?” (Iopu 35:7) Po o le uiga o le faamatalaga a Eliu e lē tāua a tatou taumafaiga i le auaunaga i le Atua? E leai. Na faapea mai o ia e lē faalagolago Ieova i la tatou tapuaʻiga, auā o Ieova e atoatoa. E lē mafai ona tatou faia se mea ina ia faateleina atili ai lona tamaoaiga po o le malosi. Peitaʻi, o so o se uiga lelei, taleni, po o le malosi ua tatou maua, e mai i le Atua, ma e na te mātauina le auala o loo tatou faaaogā ai na mea.

4. O le ā ua faatusa i ai e Ieova a tatou gaoioiga agalelei e faia i isi?

4 E silasila Ieova i gaoioiga o le alofa faamaoni e faaalia atu i ana auauna, e pei lava o loo faia atu iā te ia. Ua taʻua i le Faataoto 19:17: “O lē e faaalia le agalelei i lē e lē taualoa, ua nonō atu iā Ieova, ma o le a toe tauia o ia e Ia e tusa ma ana gaoioiga.” Po o le uiga o lenei mau e mātau e Ieova gaoioiga agalelei taʻitasi uma e faia i ē e lē taualoa? Pe e mafai ona tatou faapea atu e silasila Lē na foafoaina mea uma, o loo aitalafu o ia i tagata o loo faia gaoioiga o le alofa mutimutivale, ma e silasila i na gaoioiga o ni aitalafu e ao ona ia toe totogiina mai i faamanuiaga? Ioe. Na lagolagoina e le Alo e toʻatasi o le Atua lenei manatu.​—Faitau le Luka 14:13, 14.

5. O ā fesili o le a tatou iloiloina?

5 Na valaaulia e Ieova le perofeta o Isaia ina ia fai ma Ona sui, e faailoa atu Lona fiafia i le iai o ni tagata faamaoni o loo faia se sao i le faataunuuina o Lona finagalo. (Isa. 6:8-10) Na talia ma le lotomalie e Isaia lenā valaaulia. E faitau afe foʻi i latou i aso nei o loo faaalia lenā agaga “O aʻu lenei! Inā auina atu ia aʻu!” e ala i le talia o tofiga faigatā i le auaunaga iā Ieova. Peitaʻi, e ono fesili ifo se tasi: ʻOu te talisapaia le avanoa e tauofo ai i le auaunaga iā Ieova, ae pe e tāua moni lava aʻu taumafaiga? E tusa lava pe faia ai soʻu sao pe leai, ae po o le a lē faamautinoa e Ieova ua faataunuu lana galuega?’ Seʻi o tatou iloilo pe faapefea i mea na tutupu i taimi o Tepora ma Parako ona tali ai nei fesili.

SUIA E LE ATUA LE FEFE I LE LOTOTELE

6. O le ā le eseesega o tagata Isaraelu ma le ʻautau a Iapino?

6 E 20 tausaga na “matuā faasauā” ai Iapino le tupu o Kanana, i tagata Isaraelu. Sa fefefe tagata Isaraelu e oo lava i le ō ese mai i o latou fale. E tusa ai ma le latou vaegaau, e leʻi sauniunia i latou mo le taua auā e leʻi lelei ni a latou auupega ma ni ofutau e puipuia ai i latou. Peitaʻi, o o latou fili e 900 a latou kariota o le taua na iai uʻamea maamaʻai.​—Faama. 4:1-3, 13; 5:6-8. *

7, 8. (a) O ā uluaʻi faatonuga na avatu e Ieova iā Parako? (e) Na faapefea ona faatoʻilalo e Isaraelu le ʻautau a Iapino? (Tagaʻi i le ata i luga aʻe o le matua.)

7 E ui i lea, na avatu e Ieova iā Parako le faatonuga manino lenei e ala atu i le perofeta fafine o Tepora: “Inā alu atu ia e faatalitali i le Mauga o Tapora, faatasi ma tane  e toʻasefulu afe mai i le fanauga a Nafatali ma le fanauga a Sepulona. Ou te tosina atu iā te oe i le ālia o Kisona o Sesera le taʻitaʻi o le ʻautau a Iapino, ma ana kariota o le taua ma ē uma o iā te ia, ma ou te tuuina atu o ia i lou lima.”​—Faama. 4:4-7.

8 Na salalau le tala. Na faapotopoto ē na tauofo i le mauga o Tapora. E leʻi toe faamaʻimauina e Parako se taimi ae na mulimuli loa i faatonuga a Ieova. (Faitau le Faamasino 4:14-16.) A o tau le taua i Tanaka, na faafuaseʻi ona mamafa timuga i le mea na tau ai le taua ma matuā mafiafia ai le palapala. Sa tuliloa e Parako le ʻautau a Sesera seʻia oo atu i Haroseta, i le mamao e 15 maila (24 km). A o sosola le ʻautau, na mamau le kariota a Sesera i le palapala, ona ia lafoaʻi loa lea ae sola atu i Saanaima, atonu e latalata i Ketesa. Sa sola atu o ia i le faleʻie o Iaeli le avā a Kaveru le tagata Keni, ma na talileleia o ia e Iaeli. Na matuā vaivai Sesera mai i le taua ma iʻu ai ina moe. A o moe o ia, sa faia e Iaeli se gaoioiga lototele ma fasiotia ai o ia. (Faama. 4:17-21) Na matuā faatoʻilaloina fili o Isaraelu! *

UIGA ESEESE NA FAAALIA I LE AUAUNAGA TAUOFO

9. O ā faamatalaga o loo taʻua i le Faamasino 5:20, 21 e faatatau i le taua faasaga iā Sesera?

9 E tatau ona suʻesuʻe faatasi le Faamasino mataupu e 4 ma le 5, auā e iai faamatalaga o loo taʻua i le isi mataupu ae e lē o taʻua i le isi mataupu. O se faataʻitaʻiga, ua faapea mai le Faamasino 5:20, 21: “Na tau fetu mai i le lagi, na latou tau foʻi ma Sesera mai i o latou ala. Na tafefea i latou i le ālia o Kisona.” Po o lona uiga na fesoasoani agelu, pe toʻulu faapitoa mai foʻi se timu po o nisi mea mai i le lagi? E lē o faamatalaina mai i le tala. Peitaʻi, e foliga mai e talafeagai ona manatu e faapea na laveaʻi e Ieova ona tagata, e ala i le faatotō ane o timuga mamafa i le nofoaga tonu ma le taimi tonu lava lenā, ina ia mamau ai kariota e 900. E faatolu ona taʻua i le Faamasino 4:14, 15, o Ieova na māfua ai lenā manumalo. E leai se tasi o le toʻa 10,000 o Isaraelu na tauofo e mafai ona viiviia i lenei manumalo.

10, 11. O le ā atonu e faasino i ai “Merosa,” ma aiseā na malaia ai?

10 Peitaʻi, seʻi o tatou iloilo se mea e uiga ese. I le ogatotonu o le pese o le manumalo a Tepora ma Parako, lea na viiviia ai Ieova mo le manumalo faavavega, na la pepese ai e faapea: “Ua fai mai le agelu a Ieova, ʻIa malaia Merosa,’ ʻIa malaia pea o ē e nonofo ai, auā na latou lē ō mai e fesoasoani iā Ieova, e fesoasoani iā Ieova e tau ma ē e malolosi.’”​—Faama. 5:23.

11 E foliga mai na taunuu le malaia na oo iā Merosa, auā e lē o iloa tonu po o le ā lea nofoaga. Po o se aai e leʻi tali atu ona tagata i le valaaulia mo ni tagata tauofo? Pe afai o se aai na tū i le ala na ui atu ai Sesera a o sola, pe na maua e ona tagata le avanoa e puʻe ai Sesera ae e latou te leʻi faia faapea? Na faapefea ona latou leʻi faalogo i le valaaulia a Ieova mo ni tagata tauofo? E toʻa 10,000 tagata mai i lo latou vaipanoa na faapotopoto mo lenei osofaʻiga. Seʻi faapea na vāai tagata o Merosa o sola atu le toa sauā o Sesera e ui atu i lo latou aai ma ua matuā fefe. Atonu o le avanoa lenā mo i latou e lagolagoina ai le finagalo o Ieova ma latou maua ai ana faamanuiaga. Peitaʻi, ina ua latou maua le avanoa e faia ai se gaoioiga mo Ieova, e latou te leʻi faia faapea. E foliga mai na matuā ese tagata o Merosa mai iā Iaeli, o lē na gaoioi ma le lototele.​—Faama. 5:24-27.

12. O le ā le eseesega o uiga o tagata o loo taʻua i le Faamasino 5:9, 10, ma e tatau faapefea ona aafia ai i tatou i aso nei?

 12 I le Faamasino 5:9, 10, e tatou te iloa ai le eseese o uiga na faaalia e i latou na savavali ma Parako, ma uiga o i latou e leʻi tauofo. Na faamālō atu Tepora ma Parako i “taʻitaʻiʻau o Isaraelu, o ē na tauofo o le nuu.” Na matuā ese i latou ia mai i ē na “tiʻetiʻe i asini fafine e samasama mūmū,” o ē na manatu e tāua tele i latou e lē talafeagai i ai se auaunaga tauofo, ma ē na “nonofo i kapeta lelei,” o ē na fiafia i se olaga tamaoaiga. O ē na “savavali i le ala,” na matuā eseese ma ē na tauofo e ō ma Parako i le taua i laufanua maupuʻepuʻe o Tapora, ma le vanu o Kisona na mafiafia ai le palapala. O i latou uma na mananaʻo i se olaga faigofie, na uunaʻia e faapea: “Inā manatunatu ia!” Ioe, na manaʻomia ona latou manatunatu i le avanoa ua latou misia e fesoasoani ai i le galuega a Ieova. E tatau foʻi ona faia faapea e so o se tasi o loo faatalatū e auauna ma le lotoatoa i le Atua i aso nei.

13. Na faapefea ona ese uiga o ituaiga o Reupena, Tanu, ma Asera, mai i uiga o ituaiga o Sepulona ma Nafatali?

13 Na maua e i latou na tauofo le avanoa e molimauina ai le auala na faaeaina ai e Ieova lana pule silisili ese. Na latou mauaina se mea lelei e talanoa e faatatau i ai, a o ʻlatou manatua gaoioiga amiotonu a Ieova.’ (Faama. 5:11) I le isi itu, ua taʻua i le Faamasino 5:15-17, sa uaʻi atu ituaiga o Reupena, Tanu, ma Asera i a latou meafaitino e pei o lafu mamoe, vaa, ma mea e taula ai vaa, nai lo o le faia o le galuega a Ieova. I se faaeseesega, o ituaiga o Sepulona ma Nafatali “na lamatia o latou ola e oo i le oti” ina ia lagolagoina Tepora ma Parako. (Faama. 5:18) E iai se lesona tāua e tatou te aʻoaʻoina mai i nei uiga eseese na faaalia i le faia o le auaunaga tauofo.

“INĀ VIVII ATU IA IĀ IEOVA”

14. E faapefea ona faaalia o loo tatou lagolagoina le pule silisili ese a Ieova i aso nei?

14 I aso nei, e lē o talosagaina i tatou e auai i se taua faaletino. Peitaʻi, ua iā i tatou  le faaeaga e faaalia ai le lototele e ala i le maelega i le galuega talaʻi. Ua matuā sili atu ona manaʻomia i aso nei ni tagata tauofo i le faalapotopotoga a Ieova. E faitau miliona uso, tuafāfine, ma talavou ua ofo atu i latou lava e galulue i vala eseese o le auaunaga faataimi atoa, e pei o le paeonia, Peteli, fausiaina o Maota mo Sauniga, ma tauofo i fonotaga ma tauaofiaga. Ia mafaufau foʻi i toeaina o loo galulue mamafa i Komiti o Mataupu Tau Falemaʻi, faapea le faamaopoopoina o tauaofiaga. Ia e mautinoa e matuā talisapaia ma e lē faagaloina e Ieova lou agaga faataulaga.​—Epe. 6:10.

A o leʻi faia se filifiliga, ia mafaufau i aafiaga o le a iai i lou aiga ma le faapotopotoga (Tagaʻi i le palakalafa e 15)

15. E faapefea ona tatou faamautinoa e lē o mou ese atu lo tatou maelega mo le galuega a Ieova?

15 E ao iā i tatou taʻitoʻatasi ona fesili ifo: ʻPo o oʻu tuu atu i isi e latou te faia le tele o galuega? Po o oʻu faamuamua le saʻilia o meafaitino ma ua faalavelavea ai loʻu agaga tauofo? I le pei o Parako, Tepora, Iaeli, ma tagata tauofo e 10,000, po o oʻu faatuatua ma lototele e faaaogā so o se mea ua ou mauaina, ina ia faataunuu ai le faatonuga manino a Ieova? Pe afai o loo ou mafaufau e siitia atu i se isi vaipanoa po o se isi atunuu ona o le faaleleia o loʻu tulaga tau tamaoaiga, po o ou iloilo faatasi ma le tatalo po o ā aafiaga o le a iai i loʻu aiga ma le faapotopotoga?’ *

16. O le ā se mea e mafai ona tatou avatu iā Ieova?

16 Ua faamamaluina e Ieova i tatou e ala i le talia o i tatou ina ia lagolagoina lana pule silisili ese. Talu ai na muamua ona faasesē e le Tiapolo tagata ina ia lagolagoina lana pulega, e manino la le feʻau o le a taʻu atu iā Satani pe afai e te lagolagoina le pule a Ieova. O loo faafiafiaina le finagalo o Ieova i lou agaga tauofo, lea na uunaʻia i lou faatuatua ma le faamaoni. (Faata. 23:15, 16) O lo tatou lagolagoina o lana pule ua ia maua ai se tali e fai atu i faifaiga a Satani. (Faata. 27:11) O lea, pe afai e tatou te usiusitaʻi ma le faamaoni, o lenā la ua tatou avatu iā Ieova se mea e tāua tele iā te ia, ma e matuā faafiafiaina ai lona finagalo.

17. O le ā ua taʻua i le Faamasino 5:31 o le a tupu i le lumanaʻi?

17 Ua lē o toe umi ona faatumulia lea o le lalolagi i tagata e lagolagoina na o le pule silisili ese a Ieova. E tatou te tulimataʻia lenā aso! E tatou te pepese faatasi ma Tepora ma Parako: “Ieova e, ia faapea ona fano ou fili uma, ia avea foʻi ē e alolofa iā te oe e pei o le malosi o le susulu o le lā.” (Faama. 5:31) O le a tali lenei talosaga pe a aumaia e Ieova le iʻuga o le lalolagi amioleaga a Satani! Pe a amata le taua iā Amaketo, o le a lē toe manaʻomia ni tagata tauofo e tau faasaga i le fili. O le taimi lenā e tatou te ʻtutumau ai, ma vāai atu i le faaolataga a Ieova.’ (2 No. 20:17) Ae i le taimi lenei, o loo tele avanoa e tatou te lagolagoina ai ma le lototele ma le maelega le pule a Ieova.

18. O le ā le aafiaga i isi ona o lou agaga tauofo?

18 “Auā ua tauofo mai tagata, inā vivii atu ia iā Ieova.” Ioe, na amata le pese o le manumalo a Tepora ma Parako i le viiviia o Lē e silisili ese, ae lē o tagata. (Faama. 5:1, 2) I se tulaga talitutusa, tau ina ia avea lou agaga tauofo ma pogai e uunaʻia ai isi ina ia ʻvivii atu iā Ieova!’

^ pala. 6 O nei uʻamea maamaʻai e uumi, ma o nisi taimi e faaofuofu. Atonu na lālā mai i fafo mai i uili o a latou kariota. O ai le toa e fia faalatalata i se kariota tau mataʻutia faapenei?

^ pala. 8 O loo maua isi faamatalaga e faatatau i lenei tala mataʻina, i Le Olomatamata o Aokuso, 1, 2015, itu. 12-15.

^ pala. 15 Tagaʻi i Le Olomatamata o Iulai 1, 2015, i le mataupu “Popole e Faatatau i Tupe.