Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Aperila 2017

O ā Mea o le a Tafiesea pe a Oo Mai le Malo o le Atua?

O ā Mea o le a Tafiesea pe a Oo Mai le Malo o le Atua?

“E mavae atu foʻi le lalolagi faapea ma ona tuʻinanauga, a o lē e faia le finagalo o le Atua e tumau e faavavau.”​—1 IOA. 2:17.

PESE: 134, 24

1, 2. (a) O le ā le itu e talitutusa ai lenei faiga o mea ma se pagota o le a faasala i le oti? (Tagaʻi i le ata i luga aʻe o le matua.) (e) O ā lagona o foafoaga uma pe a uma ona faaumatia lenei faiga o mea a le lalolagi?

A O TAʻITAʻI ese atu se pagota e sili ona mataʻutia ana solitulafono ma o loo paʻō mai faitotoʻa uʻamea o le sela na loka ai, na alalaga atu leoleo, “Alu atu le tagata oti!” Aiseā na alalaga ai faapea leoleo? O loo soifua mālōlōina le pagota ma e leai se maʻi tugā o maua ai. Peitaʻi, ua taʻitaʻi atu o ia i le nofoaga e faataunuu ai lona faasalaga oti. O lenā pagota e pei lava ua oti. *

2 I se tulaga talitutusa, ua pei lenei faiga o mea o lenā pagota o le a faasala i le oti. Ua loa ona taʻusalaina lenei lalolagi amioleaga, ma ua matuā lalata mai lona faaumatiaga. Ua faapea mai le Tusi Paia: “E mavae atu foʻi le lalolagi.” (1 Ioa. 2:17) E mautinoa o le a oo mai le iʻuga o lenei faiga o mea. Peitaʻi, e iai se vala tāua e eseese ai le iʻuga o lenei lalolagi ma le faasalaga o le pagota. A o sauni le faasalaga o le pagota, e ono tetee nisi ma fesiligia le tonu o le faasalaga, pe atonu foʻi e  faamoemoe o le a lē faataunuuina le faasalaga. Ae i le tulaga o lenei lalolagi, ua uma ona faia e le Faamasino lelei atoatoa o le aoao o mea, le faaiʻuga o le a faaumatia. (Teu. 32:4) E lē mafai ona taofia le faaumatiaga, ma e leai foʻi ni masalosaloga pe na tonu le faaiʻuga. Pe a uma ona faataunuu le faaumatiaga, o le a ioe faatasi foafoaga uma e tonu le faamasinoga a Ieova. Maʻeu se mapusaga o le a iai!

3. O ā ni vala se fā o le a tafiesea pe a oo mai le Malo o le Atua?

3 O le ā e aofia ai i “le lalolagi” lea o le a “mavae atu”? E aofia ai le tele o mea masani o lenei olaga ia e manatu tagata i aso nei e tumau. Po o se tala lenā e faanoanoa ai? E leai. O le mea moni, o se isi vala tāua lenā o le “tala lelei o le malo.” (Mata. 24:14) O lea, seʻi o tatou uaʻi atu i mea o le a tafiesea pe a oo mai le Malo o le Atua. O le a tatou talanoaina ni vala se fā: tagata amioleaga, faalapotopotoga faapiʻopiʻo, gaoioiga leaga, ma tulaga mafatia. I vala taʻitasi, o le a tatou iloiloina ai (1) pe faapefea ona tatou aafia i nei vala i aso nei, (2) o le ā o le a faia e Ieova i nei vala, ma le (3) o le a faapefea ona suia e Ieova nei vala i mea lelei?

TAGATA AMIOLEAGA

4. E faapefea ona tatou aafia i tagata amioleaga i aso nei?

4 E faapefea ona tatou aafia i tagata amioleaga i aso nei? Ina ua uma ona valoia e le aposetolo o Paulo o nei aso o “aso e sili ona faigatā,” sa faagaeeina o ia e tusi e faapea: “O tagata amioleaga ma ē taufaasesē, e faateteleina pea lo latou leaga.” (2 Timo. 3:1-5, 13) Po ua e vaaia ua faataunuuina lenā valoaga? O le toʻatele o i tatou ua faileagaina e tagata amioleaga e pei o ē sauā e fia malolosi, o ē e faailogalanu, ma ē e faia solitulafono mataʻutia. O nisi o i latou e matilatila a latou amioga leaga, ae o isi e taufaasesē, e nanā mea o loo latou faia e ala i le faafoliga mai e amiotonu. E tusa pe e tatou te lē o aafia tuusaʻo ai, ae o loo tatou aafia pea i na tagata amioleaga. E tatou te ʻinoʻino pe a faalogo i a latou gaoioiga e sili ona matagā. E matuā faateʻia i tatou i le auala e latou te sauāina ai tamaiti, tagata matutua, ma isi e lē o mafai ona puipuia i latou lava. E faaalia e tagata amioleaga ni uiga faamanu ma uiga faatemoni. (Iako. 3:15) Ae o le mea e fiafia ai, ua folafola mai e le Afioga a le Atua se tala lelei.

5. (a) O le ā le avanoa o loo tuu atu pea i tagata amioleaga? (e) O le ā le iʻuga o le a oo i tagata amioleaga pe afai e mumusu e faia ni suiga?

5 O le ā o le a faia e Ieova i tagata amioleaga? I le taimi lenei, o loo tuu e Ieova i tagata amioleaga le avanoa e sui ai. (Isa. 55:7) Ua uma ona faia le faamasinoga faaiʻu o lenei faiga o mea lea o le a faaumatia, ae e leʻi oo i le taimi e faia ai le faamasinoga faaiʻu o tagata taʻitoʻatasi. E faapefea la tagata o loo mumusu e faia ni suiga, o loo faaauau ona lagolagoina lenei faiga o mea seʻia oo lava i le puapuaga tele? Ua folafola mai e Ieova o le a tafiesea tagata amioleaga uma mai i le lalolagi. (Faitau le Salamo 37:10.) E ono manatu tagata amioleaga o le a sao mai i lenā faaumatiaga. Ua iloa e le toʻatele nanā mea o loo latou faia, ma e masani ona latou sao mai i iʻuga o faamasinoga a lenei lalolagi. (Iopu 21:7, 9) Peitaʻi, ua faamanatu mai i le Tusi Paia: “O loo silasila ona [le Atua] fofoga i ala o le tagata, e silafia foʻi e ia ona ala uma. E leai se pogisa po o se pōuliuli tele mo i latou e faia mea e tigā ai ina ia lilo ai i latou i inā.” (Iopu 34:21, 22) E leai se mea e mafai ona natia mai iā Ieova le Atua. E leai se tagata taufaasesē e mafai  ona faavaleaina le Atua, auā e ati lana silafaga i so o se mea, e oo lava i mea e pogisa ma pōuliuli. Pe a mavae Amaketo, e te ono mafaufau i le mea sa iai le tagata amioleaga, a ua leai lava. O le a tafiesea i latou e faavavau.​—Sala. 37:12-15.

6. O ai o le a ola pea pe a tafiesea tagata amioleaga, ma aiseā ua avea ai o se tala lelei?

6 O ai o le a ola pea pe a tafiesea tagata amioleaga? Ua aumaia e Ieova le folafolaga faamāfanafanaloto lenei: “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.” Mulimuli ane, na taʻua i lenā lava salamo: “E fai lava le lalolagi mo ē e amiotonu, e nonofo ai pea i latou e oo i le faavavau.” (Sala. 37:11, 29) O ai “ē e agamalu” ma “ē e amiotonu”? O ē agamalu, o i latou ia e talia ma le lotomaulalo aʻoaʻoga ma le taʻitaʻiga a Ieova, ae o ē e amiotonu, o i latou ia e fiafia e fai mea e tonu i le silafaga a Ieova le Atua. I le lalolagi i aso nei, ua sili atu ona toʻatele tagata amioleaga nai lo o tagata amiotonu. Ae i le lalolagi fou, e na o tagata agamalu ma amiotonu o le a ola ai. Ioe, o le a avea moni lava le lalolagi ma parataiso!

FAALAPOTOPOTOGA FAAPIʻOPIʻO

7. E faapefea ona tatou aafia i faalapotopotoga faapiʻopiʻo i aso nei?

7 E faapefea ona tatou aafia i faalapotopotoga faapiʻopiʻo i aso nei? O le tele o mea leaga o loo tutupu i lenei lalolagi, e māfua mai i faalapotopotoga ae e lē o tagata taʻitoʻatasi. O se faataʻitaʻiga, seʻi mafaufau i faalapotopotoga faalelotu o loo faasesēina le faitau miliona o tagata e faatatau i le tulaga o le Atua, le maufaatuatuaina o le Tusi Paia, le lumanaʻi o le lalolagi ma tagata, ma le tele o isi mataupu. Ae faapefea faigāmalo o loo faaauilumaina taua ma sauāga i le va o ituaiga, ia ua soonafai ai tagata matitiva ma ē e lē o mafai ona puipuia i latou lava? O na malo o loo taulau ona o faiga faatogafalea ma le faailoga tagata. Ae faapefea pisinisi matapeʻapeʻa o loo faapolusioneina le siʻosiʻomaga, faaleagaina punaʻoa faalenatura, ma faatosina atu tagata faatau ina ia atili mauʻoa ai na o ni nai tagata maumea, ae matuā matitiva ai le faitau miliona o tagata? E mautinoa lava, ua faapogaia e faalapotopotoga faapiʻopiʻo le tele o puapuaga i aso nei.

8. O le ā ua taʻua i le Tusi Paia o le a tupu i faalapotopotoga ia e manatu tagata i aso nei e mautū?

8 O le ā o le a faia e Ieova i faalapotopotoga faapiʻopiʻo? O le a amata le puapuaga tele pe a osofaʻia e malo faapolotiki faalapotopotoga o lotu sesē uma, lea o loo faaata mai e le fafine talitane ua taʻua o Papelonia le Aai Tele. (Faaa. 17:1, 2, 16; 18:1-4) O le a faaumatia aʻiaʻi na faalapotopotoga faalelotu. Ae faapefea isi faalapotopotoga faapiʻopiʻo uma? O loo faaaogā i le Tusi Paia mauga ma motu, e faaata mai ai le tele o faalapotopotoga ma sosaiete ia e manatu tagata i aso nei e mautū. (Faitau le Faaaliga 6:14.) Ua valoia i le Afioga a le Atua, o faigāmalo ma faalapotopotoga uma o loo faalagolago i faigāmalo, o le a lūlūina mai i o latou faavae. O le a faaiʻuina le puapuaga tele i le faaumatiaga o faigāmalo uma o lenei lalolagi tuai, ma i latou uma o loo lagolagoina na malo e tetee i le Malo o le Atua. (Iere. 25:31-33) O le a lē toe iai lava ni faalapotopotoga faapiʻopiʻo!

9. E faapefea ona tatou mautinoa o le a maopoopo le lalolagi fou?

9 O le ā o le a suia ai faalapotopotoga faapiʻopiʻo? Po o le a iai se faalapotopotoga i le lalolagi pe a mavae Amaketo? Ua taʻua i le 2 Peteru 3:13: “E tatou te  faatalitali i le lagi fou ma le lalolagi fou, e tusa ma lana folafolaga, e mau ai le amiotonu.” O le a tafiesea le lagi ma le lalolagi tuai, o faigāmalo faapiʻopiʻo ma sosaiete o tagata o loo latou pulea. O le ā o le a suia ai? O le faaupuga “lagi fou ma le lalolagi fou,” o lona uiga o le a iai se faigāmalo fou ma se sosaiete fou o tagata e pulea e lenā faigāmalo. O le a faaatagia atoatoa mai e lenā Malo i lalo o le pulega a Iesu Keriso, uiga o Ieova le Atua maopoopo. (1 Kori. 14:33) O lea, o le a maopoopo le “lalolagi fou,” ma o le a iai ni tane lelei e vaavaaia le tulaga o mea. (Sala. 45:16) O le a taʻitaʻia i latou e Keriso ma le 144,000 o ē e pule faatasi ma ia. Seʻi faaata le taimi o le a lē toe iai ni faalapotopotoga faapiʻopiʻo, ae o le a suia e se faalapotopotoga e autasi e lē aafia i ni faiga faapiʻopiʻo!

GAOIOIGA LEAGA

10. O ā gaoioiga leaga o loo taatele i lou vaipanoa, ma e faapefea ona aafia ai oe ma lou aiga?

10 E faapefea i gaoioiga leaga ona aafia ai i tatou i aso nei? O loo tatou ola i se lalolagi ua tumu i gaoioiga leaga. Ua sasao faaafi amioga lē mamā, le lē faamaoni, ma faiga sauā mataʻutia. O loo taumafai malosi mātua e puipuia a latou fanau mai i aafiaga o na gaoioiga leaga. Ua matuā atamamai tagata fai ata tifaga ma ē faafiafia, e faaata mai nei gaoioiga leaga e pei o ni mea lelei, ma ulagia ai tapulaa a Ieova i le mea e lelei ma le mea e leaga. (Isa. 5:20) E taumafai malosi Kerisiano moni e teena na aafiaga leaga. E latou te tauivi e puipuia lo latou faamaoni i lenei lalolagi ua matuā leai se faaaloalo i tapulaa a Ieova.

11. O le ā e tatou te aʻoaʻoina mai i le faaumatiaga o Sotoma ma Komoro?

11 O le ā o le a faia e Ieova i gaoioiga leaga? Seʻi manatu i le mea na ia faia i amioga leaga na taatele i Sotoma ma Komoro. (Faitau le 2 Peteru 2:6-8.) Na matuā mafatia le tagata amiotonu o Lota i amioga leaga na siʻomia ai o ia ma lona aiga. Ina ua faaoo mai e Ieova le faaumatiaga i lenā vaipanoa atoa, e leʻi tau ina ia tafiesea amioga leaga na iai i inā. Na ia faia faapea ina ia “fai ma faaaʻoaʻoga i mea o le a oo mai i tagata faalēmataʻu.” E pei lava ona faamutaina e Ieova gaoioiga lē mamā uma na iai i lenā taimi, o le a ia faamutaina foʻi gaoioiga faapena i aso nei pe a ia faaumatia lenei faiga o mea.

12. O ā gaoioiga o loo e tulimataʻia pe a tafiesea lenei faiga tuai o mea?

12 O le ā o le a suia ai gaoioiga leaga? O le a faatumulia le Parataiso i le lalolagi i gaoioiga e faafiafiaina ai. Seʻi manatu i le galuega faamalieloto o le suia o le lalolagi e avea ma parataiso, po o le fausiaina o fale mo i tatou ma ē e pele iā i tatou. Seʻi mafaufau i le taimi o le a tatou toe faafeiloaʻi ai le faitau miliona o ē o le a toetutū mai, ma fesoasoani e aʻoaʻo i latou i ala o Ieova ma ana feutagaʻiga uma ma tagata. (Isa. 65:21, 22; Galu. 24:15) O le a tatou pisi i galuega e faafiafiaina ai i tatou ma viia ai Ieova!

TULAGA MAFATIA

13. O ā tulaga mafatia ua oo mai i le lalolagi i aso nei ona o le fouvalega a Satani, Atamu, ma Eva?

13 E faapefea ona tatou aafia i tulaga mafatia i aso nei? Ua oo mai tulaga mafatia i le lalolagi ona o tagata amioleaga, faalapotopotoga faapiʻopiʻo, ma gaoioiga leaga. O ai o i tatou e lē o aafia i taua, le mativa, po o le faailogalanu? Ae faapefea maʻi ma le oti? O loo tatou aafia uma i na tulaga mafatia. O āuga na o le fouvalega a Satani, Atamu, ma Eva, iā Ieova. E leai se tasi o i tatou e mafai ona sao mai i āuga leaga o lenā fouvalega.

14. O le ā o le a faia e Ieova i tulaga mafatia o loo iai? Aumai se faataʻitaʻiga.

 14 O le ā o le a faia e Ieova i tulaga mafatia? Seʻi manatu i taua. Ua folafola mai e Ieova o le a ia faaiʻuina taua. (Faitau le Salamo 46:8, 9.) Ae ā maʻi? O le a ia tafiesea maʻi. (Isa. 33:24) Ae faapefea le oti? O le a faaumatia e Ieova le oti e faavavau! (Isa. 25:8) O le a ia faaiʻuina le tulaga mativa. (Sala. 72:12-16) O le mea foʻi lenā o le a ia faia i isi tulaga uma o loo tatou mafatia ai i aso nei. O le a ia aveesea foʻi le “ʻea” leaga o lenei faiga tuai o mea, auā o le a tafiesea taaʻiga leaga a Satani ma ana temoni.​—Efe. 2:2.

Ia faaata se lalolagi e aunoa ma ni taua, maʻi, po o le oti! (Tagaʻi i le palakalafa e 15)

15. O ā nisi o mea o le a tafiesea e faavavau pe a mavae Amaketo?

15 Pe mafai ona e faaata le taimi o le a lē toe iai ni taua, maʻi, po o le oti? Seʻi mafaufau i le lē toe iai o ni vaegaʻau, vaatau, ma vaaleletau! O le a lē toe iai ni meatau ma ni maa faamanatu mo fitafita ua maliliu i taua. O le a lē toe iai foʻi ni falemaʻi, fomaʻi, tama ma teine tausimaʻi, inisiua o le soifua mālōlōina, falemaliu, fale e fai ai sauniga o maliu, ma fanuatanu! Talu ai o le a tafiesea solitulafono, o le a lē toe iai la ni kamupani sekulatī, faailoilo lapataʻi mo le saogalemu, leoleo, ma atonu o le a lē toe iai foʻi ni loka ma ni ki! Seʻi mafaufau i le taimi o le a lē toe iai nei tulaga leaga e faapopoleina ai o tatou mafaufau ma loto.

16, 17. (a) O le ā le mapusaga o le a maua e i latou o le a faasaoina iā Amaketo? Aumai se faataʻitaʻiga. (e) E faapefea ona tatou faamautinoa o le a tatou ola pea pe a mavae atu lenei lalolagi tuai?

16 O le a faapeʻī le olaga pe a uma ona tafiesea tulaga leaga? E faigatā ona faaata i o tatou mafaufau lenā tulaga. O le umi ona tatou ola ai i lenei lalolagi tuai, atonu ua tatou lē mātauina ai lo tatou popole i tulaga leaga o loo tutupu. O se faataʻitaʻiga, o tagata e nonofo latalata i se nofoaga e tutū ai nofoaafi, atonu ua latou lē toe popole i le paʻō o nofoaafi. E faapena foʻi nisi e nonofo latalata i se nofoaga e tiaʻi ai lapisi, atonu ua lē toe popole i le manogi o lea nofoaga. Peitaʻi, e maʻeu se mapusaga o le a iai pe a aveesea tulaga leaga o lenei lalolagi!

17 O le ā o le a suia ai o tatou popolega o loo iai i aso nei? Ua tali le Salamo 37:11: “E matuā faafiafiaina foʻi i latou ona o le tele o le filemu.” Pe e lē pāʻia ai lou loto i na upu? O le mea lenā o loo finagalo Ieova e te mauaina. O lea la, ia e finafinau malosi e faalatalata atu pea iā Ieova ma lana faalapotopotoga, a o faagasolo nei aso e gata ai e sili ona faigatā! Ia faatāua lou faamoemoe, ia manatunatu loloto i ai, ia moni i lou mafaufau ma lou loto, ma ia maelega e faasoa atu i isi! (1 Timo. 4:15, 16; 1 Pete. 3:15) O lou faia faapea, e mautinoa ai o le a e lē mavae atu pe a faaumatia lenei lalolagi tuai. Nai lo o lea, o le a e ola pea e faavavau i se olaga e sili ona fiafia!

^ pala. 1 O loo faamatala i le palakalafa se faiga masani na faia i falepuipui i tausaga ua teʻa, i nisi o vaipanoa o le Iunaite Setete.