Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) ME 2016

 MEA ILOGA O LO TATOU TALA FAASOLOPITO

“O Ē ua Tuu i ai le Galuega”

“O Ē ua Tuu i ai le Galuega”

NA VAAIA le mata o le lā i le taeao o le Aso Gafua, Setema 1, 1919, ina ua mavae atu aso timuga ma matagi. I lenā aoauli, na potopoto ai le pe ā ma le 1,000 tagata i se fale e 2,500 nofoa mo le amataga o le tauaofiaga i Cedar Point i Ohio, i le Iunaite Setete. E oo ane i le afiafi ua taunuu ane le isi 2,000 tagata na faimalaga mai i vaa, taavale ma nofoaafi faapitoa. I le Aso Lua na matuā faatoʻateleina le aofia, ma na iʻu ai ina faia i fafo i lalo o laau tetele vaega na totoe o le tauaofiaga.

Na ati mai le malamalama o le lā i lau o laau, ma na pei ai ata lafoʻia o ni laise i luga o ofu o uso. Peitaʻi, na saviligia fulu o manu sa teu ai pulou o tuafāfine ona o le savili mai i le vaitafe o Erie. Na faapea mai se tasi uso: “Sa matuā toʻafilemu le siʻomaga i le tauaofiaga, na faaesea mai uso ma tuafāfine mai i le lalolagi ma pei ai ua latou iai i le parataiso.”

E leʻi faatusalia le matagofie o le siʻomaga i laufofoga fiafia o le ʻauusufono. Na taʻua e se tasi o nusipepa: “O i latou o ni tagata e laufofoga fiafia, ma e foliga mai e maelega uma i la latou tapuaʻiga.” Sa fiafia Tagata Aʻoga o le Tusi Paia e faatasitasi ma o latou uso, aemaise lava ina ua māeʻa atu vaitaimi o tofotofoga tetele: teteega i vaitaimi o taua, fevaevaeaʻiga i totonu o faapotopotoga, tapunia o le Peteli i Brooklyn, faafalepuipuiina o le toʻatele ona o le Malo, lea e aofia ai nisi o uso e toʻavalu sa taʻimua, lea na lauina la latou faasalaga e faafalepuipui mo le 20 tausaga. *

Na lē toe auai nisi o Tagata Aʻoga o le Tusi Paia i le galuega talaʻi, ona o le lotovaivai ma le lē mautonu. Ae o le toʻatele na tutumau e ui i faasāsāga mai i le malo. I se tasi o mea na tupu, na lipotia e sē na faia ni suʻesuʻega, e ui i lapataʻiga malolosi, ae na maumauaʻi pea Tagata Aʻoga o le Tusi Paia o le a latou “talaʻia pea le Afioga a le Atua seʻia oo i le iʻuga.”

A o faagasolo lenā vaitaimi o le tofotofoga, sa saʻili tagata aʻoga faamaoni i le taʻitaʻiga a le Alii, ma tatalo i taimi uma mo le taʻitaʻiga a le Tamā. Ae o lea ua latou toe faatasi ma le fiafia i le tauaofiaga i Cedar Point. Na faaleo mai e se tasi o tuafafine faalogona o le toʻatele, o ē na tomānatu pe faapefea ona “faateleina la latou galuega, ma toe faia le talaʻiga i se auala maopoopo.” E leai se isi mea na latou mananaʻo ai nai lo le faia o la latou galuega.

 “GA”—O SE MEA FAIGALUEGA FOU!

Sa tuufesili le ʻauusufono i le vaiaso atoa po o le ā le uiga o mataʻitusi “GA,” lea sa lolomiina i polokalame o le tauaofiaga, pepa faafeiloaʻi, ma faailoilo i le nofoaga o faia ai le tauaofiaga. I le Aso Faraile o le tauaofiaga, o le aso faamanatu foʻi lenā e taʻua o le “Co-Laborers’ Day,” na faailoa mai ai e Joseph F. Rutherford le mea lilo sa taumatemate e le 6,000 o le ʻauusufono. O le “GA” o le faapuupuu lenā o le Golden Age, o se mekasini fou mo le faiva. *

Na faapea mai le uso o Rutherford e faatatau i ona uso faauuina Kerisiano: “E ui i taimi o puapuaga, ae na mafai ona latou iloa le vaitaimi lelei (Golden Age) o le pulega mamalu a le Mesia ona o lo latou faatuatua. . . . Na latou manatu o se faaeaga ma o lo latou matafaioi autū le faalauiloa atu i le lalolagi o lenā vaitaimi lelei. O se vaega o lo latou tofiga mai i le Atua.”

Na tusia i le pito i luma o le Golden Age le faaupuga “Se Lomiga o Mea Moni, Faamoemoe ma le Mautinoa.” O se meafaigaluega o le a faaaogā e amata ai se auala fou e faalauiloa atu ai le upu moni, o le tauiviga lea e ofo atu ai tusiga mai lea fale i lea fale. Ina ua fesiligia po o ai e fia auai i lea galuega, na tutū uma i luga le ʻauusufono. “O le tiotio ma le maelega e iloa ai i latou e mulimuli i tulaga aao o Iesu.” Na latou pepese: “Le Alii e, ia faasusulu atu le malamalama ma le upu moni.” Na faapea mai J. M. Norris: “E lē mafai ona galo iā te aʻu lo latou pepese leotetele na pei e lūlūina ai laau.”

Na māeʻa loa le polokalame ona tutū lea o le ʻauusufono i laina uumi, ina ia maua a latou tusiga mo mekasini. E tutusa faalogona o le toʻatele ma Mabel Philbrick lea na faapea mai: “Maʻeu le fiafia i le iloaina o loo iai se galuega e manaʻomia ona toe faaauau.”

“O Ē UA TUU I AI LE GALUEGA”

E pe ā ma le 7,000 Tagata Aʻoga o le Tusi Paia ua sauni mo le galuega. O le pepa Organization Method ma le tamaʻitusi To Whom the Work Is Entrusted na aumaia ai faamatalaga nei: O le matagaluega fou o le auaunaga i le ofisa ulu o le a saunia taʻiala mo le galuega. E tatau ona faavaeina le Komiti o le Auaunaga i le faapotopotoga, ma tofia se faatonu e faaoo maia faatonuga. Ua vaevaeina oganuu i poloka e taʻi 150 i le 200 fale e iai. E faia le Sauniga o le Auaunaga i pō o Aso Tofi, ina ia faamatala ai e uso mea na tutupu, ma faamautū ai lipoti o le auaunaga.

Na taʻua e Herman Philbrick: “Ina ua matou toe foʻi i aiga, na matou pisi i le tauiviga e ofoina atu tusiga.” Na latou maua le tele o tagata fiafia. Na faapea mai Beulah Covey: “E foliga mai ina ua māeʻa le taua ma mafatiaga, na fia faalogo tagata i tala fiafia e faatatau i se vaitaimi lelei.” Na tusi Arthur Claus: “Na matuā faateʻia le faapotopotoga ona o le tele o tusiga na aoina mai.” I totonu o le lua masina talu ona maua le uluaʻi lomiga o le Golden Age, e toetoe ʻafa miliona mekasini na tufaina ma tusiga e 50,0000.

Na taʻua e A. H. Macmillan, o le mataupu o le “Tala Lelei o le Malo,” i le Watch Tower o Iulai 1, 1920, o le uluaʻi taimi lea na faalaeiauina ai e le faalapotopotoga uso ma tuafāfine uma, e talaʻi le tala lelei o le Malo i le lalolagi aoao. O lenā mataupu na uunaʻia ai Kerisiano faauuina uma ina ia “molimau atu i le lalolagi, ua latalata mai le malo i le lagi.” I aso nei ua aufaatasi atu le faitau miliona i uso o Keriso “o ē ua tuu i ai le galuega,” a o latou talaʻia ma le maelega le upu, ma faatalitali i le vaitaimi lelei o le pulega a le Mesia.

^ pala. 5 Tagaʻi i le tusi Ua Pule le Malo o le Atua!, itulau e 22 i lalo o le tamaʻi ulutala, “Le Taimi o le Tofotofoga.”

^ pala. 9 O le Golden Age na faaigoa mulimuli ane o le Consolation i le 1937, ma le Awake! i le 1946.