Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) ME 2016

Mauaina Atoatoa Aogā Mai i Sauniuniga a Ieova

Mauaina Atoatoa Aogā Mai i Sauniuniga a Ieova

“O aʻu o Ieova, lou Atua, o Lē o loo aʻoaʻo oe i mea e aogā iā te oe.”—ISA. 48:17.

PESE: 117, 114

1, 2. (a) O le ā le manatu o Molimau a Ieova e faatatau i le Tusi Paia? (e) O le ā le vaega o le Tusi Paia e te fiafia i ai?

E MATUĀ faatāuaina e Molimau a Ieova le Tusi Paia. Ua saunia ai faatonuga maufaatuatuaina ma fesoasoani iā i tatou e maua ai faamāfanafanaga ma le faamoemoe. (Roma 15:4) E tatou te lē mafaufau i le Tusi Paia o ni manatu o tagata, “a o le mea moni, o le afioga a le Atua.”—1 Tesa. 2:13.

2 O le mea moni, o i tatou uma lava e iai vaega o le Tusi Paia e tatou te fiafia i ai. O nisi e fiafia i tusi a Evagelia ia o loo taʻua ai uiga matagofie o Ieova, lea na faaatagia mai e lona Alo. (Ioa. 14:9) O nisi e fiafia i tusi e fesootaʻi atu i valoaga, atonu o le tusi o Faaaliga lea o loo faamatala ai “mea ua toeitiiti ona tutupu.” (Faaa. 1:1) O ai se tasi e na te leʻi mauaina se faamāfanafanaga mai i tusi o Salamo, pe maua foʻi lesona aogā mai i le tusi o Faataoto? O le Tusi Paia o se tusi e mo tagata uma.

3, 4. (a) O le ā so tatou manatu e faatatau i a tatou lomiga? (e) O ā lomiga ua tatou maua mo vaega patino o tagata?

3 Talu ai e tatou te matuā faatāuaina le Tusi Paia, e tāua foʻi la iā i tatou a tatou lomiga faale-Tusi Paia. O se faaaʻoaʻoga, e tatou te talisapaia taumafa faaleagaga o loo maua i tusi,  polosiua, mekasini ma isi lomiga. Ua tatou iloa o nei sauniuniga mai iā Ieova ua tausia lelei ai i tatou ma mataala ai i le itu faaleagaga, ma ʻmalolosi ai i le faatuatua.’—Tito 2:2.

4 E lē gata i lomiga mo Molimau a Ieova, ae ua tatou maua foʻi lomiga mo ni vaega patino o tagata. O nisi mataupu ua saunia faapitoa mo talavou, ae o nisi mataupu e fesoasoani i o latou mātua. O le tele o mataupu ua lomia po ua maua i la tatou upega tafaʻilagi, ua saunia mo tagata e lē o ni Molimau a Ieova. O le tele o na taumafa faaleagaga, ua faamanatu mai ai le tausisi pea o Ieova i lana folafolaga e ʻsaunia mo tagata uma se faigaʻai o mea taumafa e sili ona lelei.’—Isa. 25:6.

5. O le ā ua tatou mautinoa e talisapaia e Ieova?

5 O le toʻatele o i tatou e mananaʻo e faaalu le tele o le taimi e faitau ai le Tusi Paia ma lomiga faale-Tusi Paia. E tatou te mautinoa e talisapaia e Ieova a tatou taumafaiga ina ia “faaaogā tatau le taimi” e ala i le faitauina e lē aunoa o le Tusi Paia, ma faia a tatou lava suʻesuʻega. (Efe. 5:15, 16) O le mea moni, e lē mafai ona tatou uaʻi atu atoatoa i taumafa faaleagaga uma ua tatou mauaina. Ae i le taimi e tasi, e tatau ona tatou mataala i se lamatiaga e iloagatā. O le ā lenā lamatiaga?

6. O le ā atonu e tatou te lē maua ai aogā mai i nisi o sauniuniga a Ieova?

6 O se lamatiaga pe a tatou manatu e iai ni meaʻai faaleagaga e lē faatatauina iā i tatou. O se faaaʻoaʻoga, e faapefea pe a foliga mai e lē faatatauina se vaega o le Tusi Paia i o tatou tulaga? E faapefea pe afai e lē o i tatou na tusia faapitoa ai se lomiga? Pe e faatopelau ona tatou faitau ai, po o le lē faitauina foʻi? Pe afai o lea, o le a tatou misia ai le tele o aogā mai i na mataupu. E faapefea ona tatou ʻalofia lenā mailei? E tatau ona tatou manatua, o le Atua le puna o a tatou meaʻai faaleagaga uma. Na ia fetalai mai e ala i le perofeta o Isaia: “O aʻu o Ieova, lou Atua, o Lē o loo aʻoaʻo oe i mea e aogā iā te oe.” (Isa. 48:17) I lenei mataupu, o le a iloiloina ai ni auala se tolu e tatou te mauaina ai aogā mai sauniuniga a Ieova.

FAUTUAGA AOGĀ MO LE FAITAUINA O LE TUSI PAIA

7. Aiseā e manaʻomia ai ona tatou faitauina le Tusi Paia ma se mafaufau e fetālaʻi?

7 Faitau ma se mafaufau e fetālaʻi. Ua taʻua manino i le Tusi Paia, “o Tusitusiga Paia uma e mai i le agaga o le Atua.” (2 Timo. 3:16) O nisi vaega o le Tusi Paia na faatatau muamua atu i se tagata e toʻatasi po o se vaega. O le māfuaaga lea e manaʻomia ai ona tatou faitauina le Tusi Paia ma se mafaufau e fetālaʻi. Ua faapea mai se uso: “Pe a ou faitauina le Tusi Paia, ou te taumafai e manatua atonu e tele ni lesona e mafai ona ou aʻoaʻoina mai i se mau.” Ua ia toe faaopoopo mai: “O le manatuaina o lenei mea, e uunaʻi a ai aʻu e mātau ni lesona e lē iloagofie.” A o leʻi faitauina le Tusi Paia, ia tatou tatalo mo se mafaufau e fetālaʻi ma le atamai, ina ia malamalama ai i lesona e finagalo Ieova e tatou te aʻoaʻoina.—Esera 7:10; faitau le Iakopo 1:5.

Po o e mauaina le tele o aogā mai i lau faitauga Tusi Paia? (Tagaʻi i le palakalafa e 7)

8, 9. (a) O ā fesili e mafai ona tatou manatunatu ai a o faitauina le Tusi Paia? (e) O le ā ua faailoa mai e agavaa mo toeaina Kerisiano e faatatau iā Ieova?

8 Faaaogā fesili. A o e faitauina le Tusi Paia, ia faaalu se taimi e manatunatu ai i fesili nei: ʻO le ā ua faailoa mai e lenei faamatalaga e faatatau iā Ieova? E faapefea ona ou faatatauina i loʻu olaga? E faapefea ona ou faaaogāina e fesoasoani ai i isi?’ Pe  a tatou manatunatu loloto i na fesili, e mautinoa o le a tele ni aogā o le a tatou mauaina mai ai. O se faataʻitaʻiga, seʻi mafaufau i agavaa faale-Tusi Paia mo toeaina Kerisiano. (Faitau le 1 Timoteo 3:2-7.) Talu ai o le toʻatele o i tatou e lē o ni toeaina, atonu e muamua lava tatou mafaufau, e itiiti se aogā o nei mau i o tatou olaga. Peitaʻi, pe a tatou manatunatu i tali o fesili o loo mulimuli mai, o le a tatou malamalama ai e aogā iā i tatou uma lava nei agavaa.

9 “O le ā ua faailoa mai e lenei faamatalaga e faatatau iā Ieova”? O le aumaia e Ieova o lenei lisi o agavaa, ua ia faailoa mai ai e maualuluga ana tapulaa mo se tasi e auauna o se uso tofia. E faatalitalia e Ieova i latou e fai ma faaaʻoaʻoga lelei, ma e latou te tali atu iā te ia i le auala e latou te tausia ai le faapotopotoga, “lea ua ia faatauina mai i le toto o lona lava Alo.” (Galu. 20:28) E finagalo Ieova e tatou te lagona le malupuipuia i le tausiga a leoleo mamoe lagolago ua tofiaina. (Isa. 32:1, 2) O lea la, o agavaa faale-Tusi Paia mo toeaina Kerisiano, ua faamanatu mai ai le loloto o le alofa o Ieova mo i tatou.

10, 11. (a) Pe a faitau i agavaa mo toeaina, e faapefea ona tatou faatatauina na faamatalaga i o tatou olaga? (e) E faapefea ona tatou faaaogāina na faamatalaga e fesoasoani ai i isi?

10 “E faapefea ona ou faatatauina i loʻu olaga”? E tatau i toeaina ona iloilo i latou lava mai i lea taimi i lea taimi e tusa ai ma nei agavaa faaleagaga, ina ia iloa ni vala e mafai ona faaleleia. Pe afai e “fia aapa atu se tasi i le tofi o se ovasia,” e manaʻomia ona uaʻi totoʻa atu i nei agavaa ina ia taumafai e fai le mea sili e ausia ai. (1 Timo. 3:1) E mafai ona aʻoaʻoina e Kerisiano uma ni lesona mai nei agavaa, auā o loo aofia ai le tele o mea o loo faafinagaloina e Ieova mai i Kerisiano uma. O se faaaʻoaʻoga, e tatau iā i tatou uma ona magafagafa ma mafaufau lelei. (Fili. 4:5; 1 Pete. 4:7) Pe a avea toeaina ma “faaaʻoaʻoga lelei i le lafu mamoe,” e mafai ona tatou aʻoaʻoina mai ai ni lesona ma “faaaʻoaʻo i lo latou faatuatua.”—1 Pete. 5:3; Epe. 13:7.

11 “E faapefea ona ou faaaogāina e fesoasoani ai i isi”? E mafai ona tatou faaaogāina le lisi o agavaa mo ovasia Kerisiano, e fesoasoani ai i tagata fiafia po o tagata suʻesuʻe, e iloa ai le eseesega o toeaina  Molimau a Ieova ma taʻitaʻi lotu. E lē gata i lea, pe a tatou faitau i nei agavaa, e tatou te manatua ai taumafaiga malolosi a toeaina o a tatou faapotopotoga e fesoasoani ai iā i tatou. O le manatunatu i a latou galuega fitā, e atili ai ona tatou “manatu mamafa i ē o loo galulue fitā” mo i tatou. (1 Tesa. 5:12) O le tele e tatou te faaalia ai le faaaloalo loloto mo nei ovasia galulue mamafa, o le tele foʻi lenā o lo latou olioli.—Epe. 13:17.

12, 13. (a) O ā ni saʻiliʻiliga e mafai ona tatou faia e faaaogā ai meafaigaluega ua tatou mauaina? (e) Aumai se faaaʻoaʻoga o le auala e faaaogā ai faamatalaga auʻiliʻili, e aʻoaʻoina ai ni lesona e lē faigofie ona iloa.

12 Ia faia ni saʻiliʻiliga. Ia faaaogā meafaigaluega ua maua, e saʻili ai i tali o fesili o loo mulimuli mai:

  • O ai na tusia lenei vaega o le Tusi Paia?

  • O fea ma o anafea na tusia ai?

  • O ā mea iloga na tutupu ina ua tusia lenei tusi o le Tusi Paia?

O nei faamatalaga auʻiliʻili o le a tatou aʻoaʻoina ai ni lesona e lē faigofie ona iloa.

13 O se faaaʻoaʻoga, seʻi o tatou iloiloina le Esekielu 14:13, 14: “Afai e agasala mai se atunuu iā te aʻu i le lē faamaoni, ona ou faaloaloa atu lea o loʻu lima faasaga i ai ma gausia tootoo e tautau ai ana falaoa lapotopoto, ou te auina atu foʻi i ai le oge ma faaumatia tagata atoa ma manu lalata. ʻPe ana iai nei tamāloloa e toʻatolu, o Noa, o Tanielu ma Iopu, semanū e laveaʻiina na o o latou lava ola i la latou amiotonu,’ ua fetalai mai ai le Alii Pule Silisili Ese o Ieova.” O le faia o ni saʻiliʻiliga, e tatou te iloaina ai, na tusia lenei vaega o le tusi o Esekielu i le pe tusa o le 612 T.L.M. E oo ane i lenā taimi, ua leva ona maliliu Noa ma Iopu ae o loo manatua pea e Ieova lo laʻua faamaoni. Peitaʻi, o loo soifua Tanielu i lenā taimi. Atonu ua latalata po ua silia teisi ma le 20 ona tausaga, ina ua fetalai Ieova ua pei lona amiotonu o le amiotonu o Noa ma Iopu. O le ā le lesona? E silafia ma faatāuaina e Ieova le amiotonu o ana auauna faamaoni uma, e aofia ai ma talavou.—Sala. 148:12-14.

MAUAINA O AOGĀ MAI LOMIGA ESEESE

14. E faapefea ona fesoasoani i talavou mataupu ua lolomia mo i latou, ma ua faapefea ona aogā foʻi i isi? (Tagaʻi i le ata i luga aʻe o le matua.)

14 E pei ona tatou mauaina aogā mai i le suʻesuʻeina o vaega uma o le Tusi Paia, e mafai foʻi ona tatou mauaina aogā mai meaʻai faaleagaga uma ua maua mai a tatou lomiga. Seʻi manatu i nisi o faaaʻoaʻoga. Mataupu mo talavou. I tausaga talu ai nei, na saunia ai le tele o a tatou lomiga mo talavou. [1] Ua saunia nisi o nei mataupu e fesoasoani iā i latou e taulima ai omiga i le aʻoga, po o luʻi o le tuputupu aʻe e avea ma tagata matua. O le ā le aogā iā i tatou uma o le faitauina o na mataupu? E faamanatu mai ai iā i tatou luʻi o loo fesagaʻia e a tatou talavou faamaoni. O le iʻuga, e mafai ai ona tatou fesoasoani ma faalaeiauina i latou.

15. Aiseā e tatau ai i Kerisiano matutua ona naunau i mataupu mo talavou?

15 O le tele o faafitauli o loo talanoaina i mataupu mo talavou, e lē na o talavou e aafia ai. O i tatou uma lava e manaʻomia ona puipuia lo tatou faatuatua, pulea o tatou faalogona, teena omiga leaga mai uō, ma ʻalofia aumea ma faafiafiaga lē lelei. O nei luʻi o loo iloiloina i mataupu ua saunia mo talavou. Pe e tatau ona manatu Kerisiano matutua e leai se aogā o lo latou faitau i mataupu e patino i talavou? E leai!  E ui lava na tusia mataupu i se auala e faaoso naunau i talavou, ae o loo faavae faamatalaga i mataupu silisili o le Tusi Paia, ma e mafai e i tatou uma ona maua aogā mai i nei sauniuniga faaleagaga.

16. O ā isi vala ua fesoasoani ai a tatou lomiga i talavou?

16 E lē gata ua fesoasoani a tatou lomiga i talavou e taulima o latou faafitauli, ae ua fesoasoani foʻi iā i latou e tuputupu aʻe faaleagaga ma māfana atu iā Ieova. (Faitau le Failauga 12:1, 13.) E mafai foʻi ona aogā i Kerisiano matutua. O se faaaʻoaʻoga, o loo iai i le Ala Mai! o Iulai-Setema 2009 le mataupu, “Ua Fesili Mai Talavou . . . E Faapefea Ona Faatupu Loʻu Fiafia i le Faitauina o le Tusi Paia?” Ua saunia i le mataupu ni fautuaga ma se pusa e mafai ona ʻoti ese ma tuu i le Tusi Paia. Pe na maua e tagata matutua ni aogā mai lenei mataupu? Na tusi se tinā ma o se avā e 24 tausaga: “Sa faigatā iā te aʻu le faitauina o le Tusi Paia. Na ou faatatauina fautuaga mai i lenei mataupu, ma faaaogā lelei le pusa sa ou ʻotiina. O lea, ua ou tulimataʻia aʻu faitauga Tusi Paia. Ua ou vaai i le fesootaʻi lelei o tusi o le Tusi Paia, e pei o se ʻie ua lalagaina ai se ata matagofie. E leʻi faapea loʻu fiafia muamua i le faitauina o le Tusi Paia.”

17, 18. E faapefea ona aogā iā i tatou le faitauina o lomiga mo le lautele? Aumai se faaaʻoaʻoga.

17 Lomiga mo le lautele. Talu mai le 2008, ua tatou olioli i lomiga mo suʻesuʻega o Le Olomatamata, lea ua saunia faapitoa mo Molimau a Ieova. Ae faapefea a tatou mekasini mo le lautele? Pe e mafai ona tatou maua aogā mai i le faitauina o na lomiga? Seʻi manatu i se faaaʻoaʻoga. Seʻi faapea i se tasi aso a o leʻi amataina le lauga lautele, na sau ai i le sauniga se tasi na e valaauliaina. E lē taumatea lou fiafia. A o faia le lauga, atonu o loo e mafaufau i lau tagata valaaulia. Ua e tuu oe i lona tulaga i le auala ua e faalogologo ai i le lauga. O le iʻuga, ua e matuā talisapaia le lauga.

18 E mafai ona tupu se mea faapena pe a tatou faitau i se lomiga mo le lautele. O se faaaʻoaʻoga, ua faamatalaina i lomiga mo le lautele o Le Olomatamata mataupu faale-Tusi Paia, i se gagana e malamalama ai tagata e lē o ni Molimau a Ieova. E faapena foʻi le tele o mataupu ua maua i le jw.org, e pei o le vaega “Fesili e Masani Ona Lāgā.” Pe a tatou faitauina nei faamatalaga, e faalolotoina ai lo tatou talisapaia o upu moni ua tatou masani ai. E lē gata i lea, e tatou te ono aʻoaʻoina ni auala fou e faamatala ai o tatou talitonuga pe a tatou auai i le faiva. I se tulaga talitutusa, e faamalosia e le Ala Mai! lo tatou talitonuga o loo soifua le Atua moni, ma fesoasoani foʻi iā i tatou e puipuia o tatou talitonuga.—Faitau le 1 Peteru 3:15.

19. E faapefea ona faaalia lo tatou lotofaafetai iā Ieova mo ana sauniuniga?

19 E mautinoa ua aumaia e Ieova iā i tatou le tele o sauniuniga e faamalie ai o tatou “manaʻoga faaleagaga.” (Mata. 5:3, fpl) Seʻi faaauau ona tatou faaaogā sauniuniga uma faaleagaga ua tatou maua. E faailoa atu ai lo tatou lotofaafetai i Lē o loo aʻoaʻoina i tatou i mea e aogā.—Isa. 48:17.

^ [1] (palakalafa e 14) O na lomiga e aofia ai tusi Fesili ua Fesili Mai ai Talavou—Tali e Aogā, Tusi 1 ma le 2 i le faa-Peretania, ma faasologa o mataupu faa-Peretania “Ua Fesili Mai Talavou,” lea e na o le upega tafaʻilagi ua maua ai.