Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) ME 2016

‘Ia Ō e Fai Tagata o Nuu Uma Lava ma Soo’

‘Ia Ō e Fai Tagata o Nuu Uma Lava ma Soo’

“Ia outou ō atu e fai tagata o nuu uma lava ma soo, ma papatiso atu iā i latou . . . , ia aʻoaʻoina i latou ia tausi i mea uma ua ou poloaʻi atu ai iā te outou.”—MATA. 28:19, 20.

PESE: 141, 97

1, 2. O ā fesili ua lāgā ona o le fetalaiga a Iesu i le Mataio 24:14?

E TUSA lava pe ioe pe matuā tetee nisi iā i tatou, ae e toʻatele i latou e manatu ua lauiloa Molimau a Ieova i la latou galuega talaʻi. E ui lava e tetee nisi tatou te feiloaʻi ai i le galuega talaʻi i o tatou talitonuga, ae latou te faaaloalo lava i le galuega o loo tatou faia. E tatou te iloa na folafola mai e Iesu o le a talaʻiina le tala lelei o le Malo i le lalolagi atoa. (Mata. 24:14) Peitaʻi, e faapefea ona tatou iloa o le galuega o loo tatou faia ua faataunuuina ai le valoaga a Iesu? Po o le a tatou faamaualuluga ai i le iloaina o i tatou o loo faia lenei galuega?

2 E tele lotu e latou te manatu o loo latou talaʻia le tala lelei. Peitaʻi, e masani ona gata a latou taumafaiga i a latou lava molimau i luma o ʻaulotu, o sauniga faalelotu, po o polokalame i le televise po o le Initaneti. O nisi lotu e latou te faia galuega fesoasoani e ala i togafitiga faafomaʻi po o aʻoaʻoga. E faapefea i nei vala ona faatusatusa atu i le faatonuga a Iesu lea na ia poloaʻia ona soo e fai?

3. E tusa ai ma le Mataio 28:19, 20, o ā gaoioiga e fā e tatau ona faia e soo o Iesu?

 3 Pe na ona nofonofo o soo o Iesu ma faatalitali tagata e ō mai iā i latou? E leai. Ina ua toe faatūina o ia na ia faatonuina le faitau selau o ona soo: “Ia outou ō atu e fai tagata o nuu uma lava ma soo, ma papatiso atu iā i latou . . . , ia aʻoaʻoina i latou ia tausi i mea uma ua ou poloaʻi atu ai iā te outou.” (Mata. 28:19, 20) O lea, e fā gaoioiga e manaʻomia ona faia. E tatau ona tatou faia ni soo, papatiso, ma aʻoaʻo i latou. Peitaʻi, o le ā le gaoioiga muamua e tatau ona fai? Na fetalai Iesu: “Ia outou ō”! E tusa ai ma lenei faatonuga, na faapea mai se tasi o faitofā o le Tusi Paia: “O le ʻō atu,’ o le gaoioiga lenā e fai e tagata talitonu taʻitoʻatasi, ia ō atu i magāala pe asā le vasa.”—Mata. 10:7; Luka 10:3.

4. O le ā e aofia ai i le avea ma “faifaiva i tagata”?

4 Pe na fetalai Iesu e faatatau i taumafaiga a ona soo taʻitoʻatasi, pe na ia uiga atu i se tauiviga maopoopo ina ia talaʻi atu le tala lelei? Talu ai e lē mafai e se tagata e toʻatasi ona talaʻi i “nuu uma,” o lenei la galuega e manaʻomia ai ni taumafaiga maopoopo lelei a ni tagata se toʻatele. O le manatu lenā sa faamatilatila e Iesu, ina ua ia valaaulia ona soo ia fai ma “faifaiva i tagata.” (Faitau le Mataio 4:18-22.) E leʻi uiga atu Iesu i inei i se tagata faiva se toʻatasi o loo faaaogā se ofe fagota, na o le nofonofo ma faatalitali seʻia ʻai e le iʻa le maunu. Nai lo lea, e aofia i lenei faiva le faaaogā o se upega, e manaʻomia ai ni galuega mamafa ma le felagolagomaʻi a le toʻatele.—Luka 5:1-11.

5. O ā fesili e fā e manaʻomia ona taliina, ma aiseā?

5 Ina ia iloa po o ai moni o loo talaʻia le tala lelei i aso nei, lea e faataunuuina ai le valoaga a Iesu, e manaʻomia ona taliina fesili nei e fā:

  • O le ā le feʻau e tatau ona talaʻia?

  • O le ā le uunaʻiga e tatau ona iā i tatou e faia ai lenei galuega?

  • O ā metotia e tatau ona faaaogā?

  • O le ā le tele ma le umi e tatau ona faia ai le talaʻiga?

O tali i nei fesili e lē gata o le a tatou iloa ai po o ai o loo faia lenei galuega faasaoola, ae o le a fesoasoani foʻi ina ia tatou tutumau ma faamaoni i lenei galuega.—1 Timo. 4:16.

LE FEʻAU

6. Aiseā e tatou te mautinoa ai e saʻo le feʻau o loo talaʻia e Molimau a Ieova?

6 Faitau le Luka 4:43. Na talaʻia e Iesu “le tala lelei o le malo” ma e na te faatalitalia ona soo e faia faapea. O ai o loo talaʻia lenā feʻau i “nuu uma”? E manino le tali, e na o Molimau a Ieova lava. E oo foʻi i ē tetee e ioe i le moni o lenā manatu. O se faataʻitaʻiga, sa faapea atu se patele misionare e galue i le tele o atunuu i se Molimau, sa ia fesiligia ni Molimau i na atunuu po o le ā le feʻau o loo latou talaʻia. O le ā le tali na ia maua? Na faapea mai le patele: “E iloa lo latou vālea i le tutusa lelei o a latou tali: ʻLe tala lelei o le Malo.’” Peitaʻi, e lē vālea Molimau a Ieova auā o le tali lenā e tatau ona tali mai ai Kerisiano moni e autasi. (1 Kori. 1:10) O loo latou faailoa atu lenā feʻau i Le Olomatamata Faasilasilaina le Malo o Ieova. O lenei mekasini e maua i gagana e 254, ma e pe tusa ma le 59 miliona kopi o lomiga taʻitasi e lolomia, ma ua avea ma lomiga sili ona tufatufaina atu i le lalolagi aoao.

7. E faapefea ona tatou iloa e lē o saʻo le feʻau o loo talaʻia e faifeʻau o lotu ua faapea mai o Kerisiano?

 7 E lē o talaʻia e faifeʻau o lotu ua faapea mai o Kerisiano le Malo o le Atua. Pe a latou talanoa e faatatau i le Malo e latou te faapea mai o se faalogona po o se mea i loto o se Kerisiano. (Luka 17:21) E latou te lē o fesoasoani i tagata ina ia malamalama o le Malo o le Atua o se pulega i le lagi, lea ua avea ai Iesu ma Pule, ma o le vaifofō o faafitauli o tagata, ma ua toe o se aga ona ia aveesea lea o le amioleaga mai le lalolagi. (Faaa. 19:11-21) Nai lo lea, e latou te mananaʻo e manatua Iesu e ala i le faamanatuina o le Kerisimasi ma le Eseta. E foliga mai e latou te lē o malamalama i mea o le a faataunuuina e Iesu, i le avea ai o ia ma Tupu fou o le lalolagi. Talu ai latou te lē o malamalama i le feʻau lea e tatau ona talaʻia, pe e lē faateʻia ai la i tatou i le sesē foʻi o le uunaʻiga e latou te faia ai lenei galuega?

LO TATOU UUNAʻIGA

8. O le ā le uunaʻiga sesē e faia ai le galuega talaʻi?

8 O le ā le uunaʻiga e tatau ona faia ai le galuega talaʻi? E lē ina ia aoina ai tupe ma fausia ai ni fale tetele. Na fetalai Iesu i ona soo: “Ia outou avatu fua, auā ua outou maua fua.” (Mata. 10:8) E lē tatau ona faaaogā le Afioga a le Atua e suʻe ai tupe. (2 Kori. 2:17) O i latou e talaʻia le feʻau, e lē tatau ona suʻe ni a latou mea i le galuega o loo latou faia. (Faitau le Galuega 20:33-35.) E ui lava i nei taʻiala manino, ae o le tele o lotu o loo tosina atu i le saʻilia pea o tupe, ma fai taumafaiga e faatumau ai lo latou tulaga tautupe. O loo latou lagolagoina le totogiina o faifeʻau, faapea ma isi tagata faigaluega i totonu o lotu. I le tele o tulaga, ua matuā tamaoaiga ai taʻitaʻi o lotu ua faapea mai o Kerisiano.—Faaa. 17:4, 5.

9. E faapefea ona faaalia e Molimau a Ieova o loo latou faia le galuega talaʻi ma le uunaʻiga saʻo?

9 O le ā le tulaga o Molimau a Ieova i le aoina o peleti? O la latou galuega, e lagolagoina e foaʻi tauofo. (2 Kori. 9:7) E leai ni peleti e aoina i a latou Maota mo Sauniga po o tauaofiaga. Peitaʻi, i le tausaga ua mavae, na faaaluina ai e Molimau a Ieova le 1.93 piliona itula i le talaʻia o le tala lelei, ma le faia o suʻesuʻega faale-Tusi Paia e silia i le iva miliona i masina taʻitasi e aunoa ma se totogi. E mataʻina lenei tulaga, ona e lē gata e lē totogiina la latou galuega, ae e faatupe lava e i latou. E tusa ai ma le galuega talaʻi a Molimau a Ieova, na faapea mai se tagata e faia saʻiliʻiliga: “O le sini autū ia talaʻi ma aʻoaʻo. . . . E leai ni faifeʻau e totogia, ma e faaitiitia ai tupe faaalu.” O lea, o le ā le uunaʻiga e tatou te faia ai lenei galuega? E tatou te faia ma le lotomalie ona o le alolofa iā Ieova ma tuaoi. O lenei agaga faataulaga ma le lotomalie, ua faataunuu ai le valoaga o loo taʻua i le Salamo 110:3. (Faitau.)

O METOTIA

E tatou te talaʻi i so o se mea lava e maua ai tagata (Tagaʻi i le palakalafa e 10)

10. O ā metotia na faaaogā e Iesu ma ona soo e talaʻi ai?

10 O ā metotia na faaaogā e Iesu ma ona soo e talaʻi ai le tala lelei? Na latou ō atu i so o se nofoaga e maua ai tagata—i nofoaga faitele ma o latou fale. O le galuega talaʻi na aofia ai le saʻilia mai i lea fale i lea fale, o ē na tatau i ai le feʻau. (Mata. 10:11; Luka 8:1; Galu. 5:42; 20:20) O lenei auala maopoopo, na faaalia ai le lē faailoga tagata.

11, 12. E faapefea ona faatusatusa atu taumafaiga a lotu i tagata o Ieova i le talaʻia o le tala lelei?

 11 O le ā le tulaga o lotu ua faapea mai o Kerisiano i lenei vala? I le tele o taimi, e manatu tagata lotu e na o faifeʻau totogi e latou te faia le talaʻiga. Peitaʻi, nai lo o le avea o i latou ma “faifaiva i tagata,” e foliga mai ua soona popole faifeʻau o lotu i le taofiofia o tagata i a latou lotu. E iai taimi na taumafai nisi taʻitaʻi lotu e toe faaolaola le faiva faaevagelia. O se faataʻitaʻiga i le amataga o le 2001, na tusi ai Pope Ioane Paulo II: “I le tele o tausaga, e masani ona ou taʻua le manaʻomia ona auai i le faiva faaevagelia fou. E faapena foʻi la le taimi lenei . . . E tatau ona tatou toe maua le uiga aasa lea sa iā Paulo, o lē sa faapea mai: ʻOi talofa iā te aʻu pe a ou lē folafolaina atu le tala lelei!’” Na faapea mai le Pope, o lenei galuega “e lē na o se ʻvaega faapitoa’ e faia, ae o le tiute tauave a tagata uma o le Atua.” Ae e toʻafia na tali atu i lenei talosaga?

12 O le ā le tulaga o Molimau a Ieova i lenei vala? E na o i latou lava o loo talaʻia na avea Iesu ma Tupu i le 1914. E tusa ai ma le faatonuga a Iesu, ua sili ona latou faatāua le galuega talaʻi. (Mare. 13:10) Na taʻua i le tusi Pillars of Faith—American Congregations and Their Partners: “O le manatu o Molimau a Ieova, e sili atu le tāua o le galuega talaʻi nai lo o se isi lava mea.” E tusa ai ma le faamatalaga a se Molimau, na faapea atili mai le tusitala: “E taumafai Molimau a Ieova e fesoasoani i ē e fia aai, ua tuua toʻatasi, ma mamaʻi, . . . ae e lē galo ai la latou galuega autū, o le faaoo atu lea o se feʻau faaleagaga e faatatau i le lata mai o le iʻuga o le lalolagi ma le tāua o le faaolataga.” O loo faaauau pea ona talaʻia e Molimau a Ieova lenā feʻau, e faaaogā ai metotia lea foʻi na faaaogā e Iesu ma ona soo.

LE TELE MA LE UMI

13. O le ā le tele e tatau ona oo i ai le galuega talaʻi?

13 Na faamatala e Iesu le tele e oo i ai le talaʻiga, ina ua ia faapea mai o le a talaʻia le tala lelei “i le lalolagi atoa.” (Mata. 24:14) E tatau ona faia “tagata o nuu uma” ma soo. (Mata. 28:19, 20) O lona uiga, o se galuega e faia i le lalolagi aoao.

14, 15. O ā vala o loo faamaonia ai o loo faataunuuina e Molimau a Ieova le valoaga a Iesu, e tusa ai ma le tele e faia ai le talaʻiga? (Tagaʻi i le ata i luga aʻe o le matua.)

14 Ina ia tatou malamalama i le auala o loo faataunuu ai e Molimau a Ieova le valoaga a Iesu i le tele e oo i ai le galuega talaʻi, seʻi o tatou iloiloina faamatalaga nei. I le Iunaite Setete, e pe ā ma le 600,000 faifeʻau mai i lotu eseese, peitaʻi e pe ā ma le 1,200,000 Molimau a Ieova. I le lalolagi aoao, e sili laʻitiiti atu ma le 400,000 patele a le Lotu Katoliko Roma. Seʻi manatu i le aofaʻiga o Molimau o loo faia so latou sao i le galuega faale-Tusi Paia o le talaʻia o le tala lelei o le Malo. I le  lalolagi aoao, e pe tusa o le valu miliona faifeʻau tauofo o loo galulue i atunuu e 240. E mataʻina le galuega ua latou faataunuuina, lea e viia ma faamamaluina ai Ieova.—Sala. 34:1; 51:15.

15 I le avea ai o i tatou ma Molimau a Ieova, e tatou te naunau e faaoo atu le tala lelei i le tele e mafai ai, a o leʻi oo mai le iʻuga. O lea, ua tutasi ai Molimau a Ieova i le faaliliuina ma le faasalalauina atu o lomiga faale-Tusi Paia. E faitau miliona tusi, mekasini, sāvali, ma valaaulia o tauaofiaga ma Faamanatuga ua tufatufaina atu e aunoa ma se totogi. E tele lomiga eseese faale-Tusi Paia ua tatou saunia i le silia ma le 700 gagana. E sili atu i le 200 miliona kopi o le Tusi PaiaO le Faaliliuga a le Lalolagi Fou, ua faasalalauina i gagana e sili atu i le 130. I le tausaga ua mavae, na tatou lomia ai pe tusa ma le 4.5 piliona lomiga faale-Tusi Paia. Ua maua i la tatou upega tafaʻilagi aloaʻia ia faamatalaga i gagana e silia ma le 750. Pe e iai se isi tapuaʻiga o loo latou faia se galuega faapenei?

16. E faapefea ona tatou iloa o loo iai i Molimau a Ieova le agaga o le Atua?

16 O le ā le umi na valoia mai e tatau ona fai ai le galuega talaʻi? Na fetalai Iesu e tatau ona faia lenei galuega i le lalolagi aoao seʻia oo i aso e gata ai, “ona oo mai ai lea o le iʻuga.” Pe e iai nisi lotu o loo faaauau pea ona latou talaʻia lenei tala lelei a o faagasolo nei taimi mataʻina o aso e gata ai? Ua faapea mai nisi e tatou te feiloaʻi i le talaʻiga: “O loo iā i matou le agaga paia, ae o outou o loo faia le galuega.” Ae pe e lē faamaonia ai i lo tatou tumau i le galuega talaʻi, o loo iā i tatou le agaga o le Atua? (Galu. 1:8; 1 Pete. 4:14) E tele lotu e latou te taumafai mai lea taimi i lea taimi e faia le galuega o loo faia pea e Molimau a Ieova, peitaʻi e masani lava ona lē taulau. O nisi e auai i galuega faamisionare mo sina taimi, ona toe foʻi lava lea i o latou olaga masani. E iai foʻi nisi o loo taumafai e talaʻi mai lea fale i lea fale, ae o le ā le feʻau o loo latou talaʻia? O le tali i lenā fesili, ua manino mai ai e latou te lē o faia le galuega lea na amataina e Keriso.

O AI MONI O LOO TALAʻIA LE TALA LELEI I ASO NEI?

17, 18. (a) Aiseā e tatou te mautinoa ai o loo talaʻia e Molimau a Ieova le tala lelei o le Malo o le Atua i aso nei? (e) E faapefea ona tatou faataunuuina pea lenei galuega?

17 O ai moni i aso nei o loo talaʻia le tala lelei o le Malo? E tatou te faapea atu ma le mautinoa atoatoa, o “Molimau a Ieova!” Aiseā ua tatou mautinoa ai? Talu ai o loo tatou talaʻia le feʻau saʻo, o le tala lelei o le Malo. O loo tatou faaaogā le metotia saʻo, o le ō atu i tagata. O la tatou galuega talaʻi o loo faia i se uunaʻiga saʻo, o le alofa ae e lē o le mauaina o tupe. Ua oo atu la tatou galuega i le lalolagi aoao i tagata o atunuu ma gagana uma. E faaauau pea ona tatou faia lenei galuega e aunoa ma le taofia seʻia oo mai le iʻuga.

18 E tatou te maofa i mea ua mafai ona faataunuuina e tagata o le Atua i nei taimi iloga o loo tatou ola ai. Ae ua faapefea ona faataunuuina lenei galuega? Na tali le aposetolo o Paulo i lana tusi i uso i Filipi: “O le Atua, o lē o loo galue i totonu iā te outou, e tusa ma lona finagalo malie, ina ia outou lotomalilie ma galulue i ai.” (Fili. 2:13) Tau ina ia faamalosia pea i tatou e lo tatou Tamā alofa, a o tatou faia le mea sili e faataunuuina ai la tatou faiva.—2 Timo. 4:5.