Skip to content

Skip to secondary menu

Skip to table of contents

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) IULAI 2016

Eric ma Amy

Ua Lotomalilie e Ofo Atu i Latou Lava—I Kana

Ua Lotomalilie e Ofo Atu i Latou Lava—I Kana

PE E te silafia se uso po o se tuafafine ua siitia atu i se isi atunuu o loo telē ai le manaʻoga mo tagata talaʻi o le Malo? Pe na iai se taimi na e taumānatu ai: ʻO le ā na uunaʻia i latou e auauna i lenā atunuu? Na faapefea ona sauniunia i latou? Pe e mafai ona faia ai soʻu sao?’ O le auala lelei e tali ai na fesili, o le talanoa lea i na uso ma tuafāfine. O le mea lenā o le a tatou faia.

O LE Ā NA UUNAʻIA I LATOU?

O le ā na uunaʻia oe e amata ona mafaufau e auauna i se isi atunuu o loo telē ai le manaʻoga? O Amy e silia i le 30 ona tausaga, e sau mai i le Iunaite Setete. Ua ia faapea mai: “O le tele o tausaga, sa ou mafaufau ou te auauna i se isi atunuu, peitaʻi na foliga mai e lē mafai ona ausia loʻu sini.” O le ā na suia ai lona mafaufau? “I le 2004 na valaaulia aʻu e se ulugalii na auauna i Belize ina ia ou asiasi atu ma auauna ma i laʻua o ni paeonia mo se masina. Sa ou alu ma na matuā ou fiafia ai. Ina ua mavae le tausaga, na ou siitia atu i Kana ma auauna ai o se paeonia.”

Aaron ma Stephanie

Ua toeitiiti nei atoa le 30 tausaga o Stephanie, mai i le Iunaite Setete, ae i nai tausaga ua mavae sa ia iloiloina ai lona tulaga ma taumānatu ai: ʻO lea ou te malosi ma e leai ni oʻu tiute tauave faaleaiga. O le mea moni e tele atu mea e mafai ona ou faia mo Ieova nai lo o le taimi lenei.’ O lenā iloiloga faamaoni na uunaʻia ai o ia e siitia atu i Kana e faalautele lana faiva. O Filip ma Ida o se ulugalii paeonia ua silia teisi ma le taʻi 60 tausaga mai i Tenemaka, ua leva ona la faanaunau e siitia atu i se oganuu o loo telē ai le manaʻoga. Sa saʻilia auala e faataunuu ai lo laʻua sini. Ua faapea mai Filip: “Ina ua maua le avanoa, e tai pei ua fetalai mai Ieova, ʻŌ loa.’” I le 2008, na la siitia atu i Kana ma auauna ai i inā mo le silia i le tolu tausaga.

Brook ma Hans

 O Hans ma Brook o se ulugalii paeonia ua silia i le taʻi 30 o la tausaga, o loo auauna nei i le Iunaite Setete. I le 2005 sa la galulue ai i galuega fesoasoani ina ua māeʻa le afā o Katrina. Mulimuli ane, sa laʻua talosaga e fesoasoani i polokalame mo faugāfale faavaomalo, peitaʻi e leʻi valaauliaina i laʻua. Ua faapea mai Hans: “Sa ma faalogo i se lauga i se tauaofiaga, lea na taʻua ai na taliaina e le tupu o Tavita e leʻi faatagaina o ia e fausia le malumalu, o lea na suia ai lona sini. O lenā manatu na fesoasoani iā i maʻua e iloa ai e mafai ona suia sini faaleagaga o se tagata.” (1 No. 17:1-4, 11, 12; 22:5-11) Ua faapea mai Brook: “Na finagalo Ieova e faatū se isi sini.”

Na uunaʻia Hans ma Brook e taumafai e paeonia i se isi atunuu, ina ua faalogo i tala fiafia mai i a laʻua uō na auauna i isi atunuu. I le 2012 sa laʻua malaga i Kana ma auauna ai mo le fā masina e fesoasoani ai i se faapotopotoga e faaaogā ai le gagana fai taga. E ui sa tatau ona la toe foʻi i le Iunaite Setete, ae o le auauna i Kana, na faalolotoina ai lo laʻua naunau e faamuamua manaʻoga o le Malo i o laʻua olaga. Talu mai lenā taimi, na la fesoasoani i se galuega faufale a le lālā i Maikoronesia.

UIA LAASAGA E AUSIA AI O LATOU SINI

Na faapefea ona e sauniuni e auauna i vaipanoa o loo telē ai le manaʻoga? Ua faapea mai Stephanie: “Sa ou faia saʻiliʻiliga i mataupu i Le Olomatamata e faatatau i le auauna i vaipanoa o loo telē ai le manaʻoga.” * “Sa ou talanoa foʻi i toeaina o le faapotopotoga faapea le ovasia o le matagaluega ma lana avā e faatatau i loʻu faanaunauga e auauna i se isi atunuu. Ae sili atu i lenā, sa masani ona ou tatalo iā Ieova e faatatau i loʻu sini.” Ae i le taimi e tasi, na faaauau ona faafaigofie e Stephanie lona olaga, lea na mafai ai ona faaputu ana tupe e fesoasoani iā te ia pe a auauna i se isi atunuu.

Ua faamatala e Hans: “Na ma tatalo iā Ieova mo le taʻitaʻiga ona sa ma  mananaʻo e siitia atu i le vaipanoa e na te faasino mai. Sa ma faaaofia foʻi i a ma tatalo le aso tonu e faataunuu ai la ma fuafuaga.” Sa lafoina atu e le ulugalii ni tusi i lālā e fā. Na māeʻa loa ona la mauaina se tali lelei mai i le lālā i Kana, ona la malaga atu loa lea i inā ma le faanaunauga e auauna ai mo le lua masina. Ua faapea mai Hans: “O lo ma fiafia tele e galulue faatasi ma le faapotopotoga, na toe faaopoopo ai o ma aso i inā.”

Adria ma George

O George ma Adria, o se ulugalii mai i Kanata ua toeitiiti atoa le taʻi 40 tausaga. Sa la manatua pea e faamanuia e Ieova filifiliga lelei ae lē na o faanaunauga lelei. O lea na la uia laasaga e ausia ai lo laʻua sini. Sa la faafesootaʻia se tuafafine e auauna i se vaipanoa i Kana o loo telē ai le manaʻoga ma fesili i ai. Sa laʻua tusi atu foʻi i le lālā i Kanata ma le lālā i Kana. Ua faapea mai foʻi Adria: “Sa ma saʻilia foʻi nisi o auala e faafaigofie atili ai o ma olaga.” O na filifiliga na mafai ai ona la siitia atu i Kana i le 2004.

TAULIMAINA O LUʻI

O ā luʻi na e fesagaʻia ina ua e siitia atu, ma o le ā na fesoasoani iā te oe? O le luʻi muamua na fesagaʻia e Amy, o le misia o aiga ma uō. “Sa matuā suia tulaga o mea mai i mea sa ou masani ai.” O le ā na fesoasoani iā te ia? “O le vili mai o loʻu aiga ma faailoa mai lo latou talisapaia o laʻu auaunaga, na fesoasoani iā te aʻu e manatua ai pea le māfuaaga na ou siitia ai. Mulimuli ane, na mafai ona ou vaai atu i oʻu aiga pe a talanoa e ala i le Initaneti. E pei e lē o mamao ese loʻu aiga ona ua mafai ona matou fevaaiaʻi.” Ua faamatala e Amy, o le faauō atu i se tuafafine i lenā vaipanoa, ua mafai ai ona ou  malamalama i agaifanua eseese. “O laʻu uō lea na fesoasoani iā te aʻu i le tele o taimi ina ia malamalama i māfuaaga o gaoioiga a tagata. O lana fesoasoani na ou iloa a le mea e tatau ona fai ma ʻalofia, lea na fesoasoani i le mauaina o le olioli i laʻu faiva.”

Na faamatala e George ma Adria, i le taimi muamua na la siitia ai i Kana, e tai pei ua toe foʻi i tua le olaga. Ua faapea mai Adria: “Nai lo o le faaaogāina o se masini tamea, na faaaogā paelo. Ua sili atu ona tele le taimi e saunia ai meaʻai nai lo le taimi muamua. Ae ina ua mavae sina taimi, na avea nei tulaga faigatā e pei o ni mea fou ua ma tofo i ai.” Ae ua faapea mai Brook: “E ui i luʻi o loo fesagaʻia o ni paeonia, ae o loo maua pea le faamalieina. E lē mafai ona galo iā i maʻua le tele o mea mananaia na tutupu i la ma auaunaga.”

O SE FAIVA E TAUIA

Aiseā e te faalaeiauina ai isi e auai i lenei vala o le auaunaga o le Malo? Ua faapea mai Stephanie: “O se fiafiaga le talaʻi i se oganuu e toʻatele tagata e fia iloaina le upu moni ma mananaʻo e tou te suʻesuʻeina le Tusi Paia i aso taʻitasi. O se tasi o filifiliga sili na ou faia, o le siitia mai lea i se vaipanoa o loo telē ai le manaʻoga.” I le 2014 na faaipoipo ai Stephanie ma Aaron, ma o loo auauna nei i le lālā i Kana.

“E ese le mataʻina o lenei mea,” o le faamatalaga lea a Christine, o se paeonia mai i Siamani ua silia teisi i le 30 ona tausaga. Sa auauna muamua Christine i Polivia a o leʻi siitia atu i Kana. Ua ia faapea mai: “O loʻu mamao ese mai i loʻu aiga, ou te liliu atu ai iā Ieova i le tele o taimi mo le fesoasoani. Ua sili atu ai ona moni Ieova iā te aʻu i le taimi lenei. Ua ou tofo foʻi i le autasi lea e maua i tagata o Ieova. O lenei faiva ua faaʻoaina ai loʻu olaga.” Talu ai nei na faaipoipo ai Christine iā Gideon ma o loo la auauna faatasi i Kana.

Christine ma Gideon

Ua faailoa mai e Filip ma Ida le mea na la faia e fesoasoani ai i tagata suʻesuʻe o le Tusi Paia ina ia agaʻigaʻi i luma. “O le taimi muamua sa masani ona 15 pe sili atu a ma suʻesuʻega faale-Tusi Paia, ae o le taimi lenei ua faaitiitia i le 10 suʻesuʻega, ina ia faia ai ma le māeʻaeʻa.” Pe na iai se aogā i tagata suʻesuʻe? Ua faamatala mai e Filip: “Sa ou suʻesuʻe ma se tama talavou e igoa iā Michael. Na mafai ona fai lana suʻesuʻega i aso taʻitasi ma sauniuni lelei, o lea na māeʻa ai ona ma suʻesuʻeina le tusi o le Aʻoaʻoga Moni i totonu o le masina. Mulimuli ane, na avea Michael ma tagata talaʻi e leʻi papatiso. I le aso muamua na ia auai ai i le talaʻiga, na ia talosaga mai: ʻPe e mafai ona e fesoasoani mai i aʻu suʻesuʻega faale-Tusi Paia?’ Sa ou matuā ofo lava. Na faamatala mai e Michael, e tolu ana suʻesuʻega ua amata ma o loo ia manaʻomia le fesoasoani i le auala e faia ai.” Seʻi mafaufau la i le telē o le manaʻoga mo ni faiaʻoga, auā e oo lava i tagata suʻesuʻe o le Tusi Paia, ua avea ma faiaʻoga o le Tusi Paia.

Ida ma Filip

Ua faamatala e Amy le vave ona ia iloa o le telē o le manaʻoga: “E leʻi leva ona ma taunuu i Kana ae amata loa ona talaʻi i se nuu laʻitiiti ma saʻilia tagata logonoa. E toʻavalu tagata logonoa na ma mauaina i lenā nuu.” I le taimi lenei, ua faaipoipo Amy iā Eric, ma o loo galulue o ni paeonia faapito. O loo la fesoasoani i se faapotopotoga e faaaogā ai le gagana fai taga, ina ia fesoasoani i le silia i le 300 tagata talaʻi logonoa, ma tagata fiafia i le atunuu. O le galulue o George ma Adria i Kana, na mafai ai ona la tofo i le olaga o misionare. Maʻeu lo laʻua fiafia ina ua valaaulia i laʻua e auai i le vasega lona 126 o le Aʻoga o Kiliata! I aso nei o loo la auauna o ni misionare i Mozambique.

UUNAʻIA E LE ALOFA

Maʻeu le faamāfanafana loto o le vaaia o le toʻatele mai i isi atunuu o loo galulue mamafa ma uso ma tuafāfine i vaipanoa taʻitasi i le galuega o le seleselega! (Ioa. 4:35) I se fua faatatau, e 120 tagata e papatiso i Kana i vaiaso taʻitasi. E pei o le toʻa 17 ua siitia atu i vaipanoa o loo telē ai le manaʻoga i Kana, e faitau afe foʻi tagata talaʻi i le lalolagi aoao ua uunaʻia i le alofa iā Ieova, e ʻofo atu ma le lotomalie i latou lava.’ O loo latou auauna i vaipanoa o loo manaʻomia ai nisi tagata talaʻi o le Malo. Maʻeu le faafiafiaina o le finagalo o Ieova i le vaaia o nei tagata faigaluega lotomalilie!—Sala. 110:3; Faata. 27:11.

^ pala. 9 O se faaaʻoaʻoga tagaʻi i mataupu “Pe Mafai Ona E Siitia Atu i Oganuu e Manaʻomia Tele ai Tagata Talaʻi?” ma “Pe Mafai Ona E Sau i Maketonia?”—Le Olomatamata, Aperila 15 ma Tesema 15, 2009.