Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) IULAI 2016

Folafola Atu le Tala Lelei o le Agalelei Faifua

Folafola Atu le Tala Lelei o le Agalelei Faifua

ʻIa molimau māeʻaeʻa i le tala lelei o le agalelei faifua o le Atua.’—GALU. 20:24.

PESE: 101, 84

1, 2. Na faapefea ona faaalia e le aposetolo o Paulo lona lotofaafetai mo le agalelei faifua o le Atua?

NA FAAPEA mai ma le faamaoni le aposetolo o Paulo: ʻE leʻi maʻimau le agalelei faifua o le Atua iā te aʻu.’ (Faitau le 1 Korinito 15:9, 10.) Na iloa lelei e Paulo sa lē tatau ona ia mauaina le alofa mutimutivale o le Atua, talu ai sa ia sauāina Kerisiano.

2 A o lata i lona maliu, na tusi atu Paulo i lona uso o Timoteo: “Ou te faafetai iā Keriso Iesu lo tatou Alii, o lē na tuuina mai iā te aʻu le mana, auā ua ia manatu ua ou faamaoni, e ala i lona tofiaina o aʻu i lenei faiva.” (1 Timo. 1:12-14) O le ā lenā faiva? Na taʻu atu e Paulo i toeaina o le faapotopotoga i Efeso le mea e aofia ai: “Ua ou manatu e lē tāua loʻu ola iā te aʻu, ae tau lava ina ia ou faauma laʻu tamoʻega, ma le faiva na ou maua mai i le Alii o Iesu, ina ia ou molimau māeʻaeʻa i le tala lelei o le agalelei faifua o le Atua.”Galu. 20:24.

3. O le ā le faiva faapitoa na avatu iā Paulo? (Tagaʻi i le ata i luga aʻe o le matua.)

 3 O le ā “le tala lelei” na talaʻia e Paulo lea e faamatilatila ai le agalelei faifua o Ieova? Na ia faapea atu i Kerisiano i Efeso: “Ua outou faalogo, ua tuuina mai iā te aʻu le tofi o le auauna pule i le agalelei faifua o le Atua mo lo outou lelei.” (Efe. 3:1, 2) Na tofia Paulo e folafola atu le tala lelei i ē e lē o ni Iutaia, na mafai foʻi ona aofia i latou i ē ua valaauina e faatasi ma Keriso i le pulega o le Malo faa-Mesia. (Faitau le Efeso 3:5-8.) O le maelega o Paulo i lana faiva, sa ia faataatia ai se faaaʻoaʻoga e sili ona lelei mo Kerisiano i aso nei, ma faaalia ai “e leʻi maʻimau” le agalelei faifua o le Atua iā te ia.

PO UA UUNAʻIA OE E LE AGALELEI FAIFUA O LE ATUA?

4, 5. Aiseā e tatou te faapea atu ai e tutusa le “tala lelei o le malo,” ma le “tala lelei o le agalelei faifua o le Atua”?

4 I lenei taimi o le iʻuga, ua faatonuina ai tagata o Ieova ina ia talaʻi “lenei tala lelei o le malo i le lalolagi atoa e fai ma molimau i atunuu uma.” (Mata. 24:14) O le feʻau o loo tatou folafola atu o le “tala lelei o le agalelei faifua o le Atua,” talu ai o le agalelei faifua o Ieova, o le a tatou maua ai faamanuiaga uma i le pulega o le Malo e ala iā Keriso. (Efe. 1:3) Po o tatou faaaʻoaʻo iā Paulo i le faaalia o le lotofaafetai i le agalelei faifua o Ieova e ala i le maelega i le faiva?—Faitau le Roma 1:14-16.

5 I le mataupu ua mavae, na tatou aʻoaʻoina ai auala eseese ua maua ai e tagata agasala aogā mai i le agalelei faifua o Ieova. O lea, o lo tatou tiute tauave le faia o le mea sili e faailoa atu ai i isi le alofa o Ieova, ma le auala e latou te maua ai aogā. O ā nisi o vala o le agalelei faifua o le Atua e tatau ona tatou fesoasoani i isi ina ia latou talisapaia?

FOLAFOLA ATU LE TALA LELEI O LE TAULAGA TOGIOLA

6, 7. Ua faapefea ona tatou folafola atu le tala lelei o le agalelei faifua o le Atua, pe a tatou faamatalaina atu i tagata le togiola?

6 I lenei lalolagi ua tumu i amioga tuufau, o se meanoa le faia o le agasala, ma ua toʻatele ai tagata e latou te lē iloa le manaʻomia o se togiola. Ae i le taimi e tasi, ua iloa e le toʻatele o se olaga tuufau e lē maua ai le fiafia moni. O le toʻatele o tagata e faatoʻā malamalama i le uiga o le agasala, o ona aafiaga, ma le auala e laveaʻia ai mai le faapologaina i le agasala ina ua talanoa i Molimau a Ieova. Ua fiafia ē lotofaamaoni e latou te iloa, o le alofa tele ma le agalelei faifua o Ieova, na ia auina mai ai lona Alo i le lalolagi e togiola i tatou mai i le agasala ma le oti.—1 Ioa. 4:9, 10.

7 Na tusi Paulo e faatatau i le Alo pele o Ieova: “Ua ia [Iesu] faasaʻolotoina i tatou i le togiola e ala i lona toto, ioe, o le faamagaloina o a tatou agasala e tusa ma le matuā tele o lona [Ieova] agalelei faifua.” (Efe. 1:7) O le taulaga togiola a Keriso, o le faamaoniga silisili lea o le alofa o le Atua iā i tatou, ma ua faaalia ai le matuā tele o Lona agalelei faifua. Maʻeu se mapusaga o le iloaina pe afai tatou te faatuatua i le toto maligi o Iesu, o le a faamagaloina i tatou ma faamamāina o tatou lotofuatiaifo! (Epe. 9:14) O se tala lelei lea e tatou te faasoa atu i isi!

 FESOASOANI I TAGATA E ATIAʻE SE FAIĀ MA LE ATUA

8. Aiseā e manaʻomia ai e tagata agasala ona toe faia se leleiga ma le Atua?

8 O la tatou tiute tauave le faailoa atu i tagata e mafai ona maua sa latou faiā māfana ma Lē na foafoaina i latou. A o leʻi faaalia e tagata le faatuatua i le taulaga a Iesu, na silasila le Atua iā i latou o ni ona fili. Na tusi le aposetolo o Ioane: “O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola, ae tumau pea le toʻasā o le Atua iā te ia.” (Ioa. 3:36) O se mea e fiafia ai, ua mafai ona toe faia se leleiga ma le Atua e ala i le taulaga a Keriso. Na faailoa mai e Paulo: “O ē na vavaeese muamua, ma avea outou ma fili talu ai sa outou mafaufau i galuega leaga, a o lenei ua ia toe faaleleia e ala i le tino faaletino o lea tagata ina ua maliu o ia.”—Kolo. 1:21, 22.

9, 10. (a) O le ā le tiute tauave na tuuina mai e Keriso i ona uso faauuina? (e) Ua faapefea ona fesoasoani “isi mamoe” i o latou uso faauuina?

9 Na tuuina mai e Keriso i ona uso faauuina i le lalolagi le mea ua taʻua e Paulo o “le faiva o le leleiga.” Na faamatala e Paulo lea mea ina ua ia tusi atu i Kerisiano faauuina i le uluaʻi senituri: “E mai le Atua mea uma lava, o lē na faia i matou ina ia toe lelei ma ia e ala iā Keriso, ma ua ia tuuina mai iā i matou le faiva o le leleiga, o lona uiga, ua toe faaleleia e le Atua [le] lalolagi iā te ia e ala iā Keriso, ua lē taʻua iā i latou a latou agasala, a ua tuuina mai le upu o le leleiga iā i matou. O lea la, o i matou o sāvali o sui o Keriso, e peiseaʻī o loo ʻaiʻoi mai le Atua e ala iā i matou. O i matou o ē ua fai ma sui o Keriso, ua matou ōle atu: ʻIa outou toe lelei ma le Atua.’”—2 Kori. 5:18-20.

10 E manatu “isi mamoe” o se faaeaga le fesoasoani i o latou uso faauuina i lenei faiva. (Ioa. 10:16) O lo latou auauna o ni avefeʻau a Keriso, ua matuā telē ai so latou sao i le aʻoaʻoina o tagata i upu moni faaleagaga, ma fesoasoani iā i latou e atiaʻe sa latou faiā lelei ma Ieova. O se vaega tāua lea o le galuega o le molimau māeʻaeʻa i le tala lelei o le agalelei faifua o le Atua.

FAASOA ATU LE TALA LELEI, E FAAFOFOGAINA E LE ATUA TATALO

11, 12. Aiseā o se tala lelei ai mo tagata le iloaina e mafai ona latou tatalo iā Ieova?

11 E toʻatele tagata e tatalo ona e faaleleia ai o latou faalogona, peitaʻi e latou te lē talitonu e faafofogaina e le Atua a latou tatalo. E manaʻomia ona latou iloa o Ieova o le “Faafofoga tatalo.” Na tusi le faisalamo o Tavita: “Le Faafofoga tatalo e, e ō atu iā te oe tagata uma lava. Ua sili atu ona malosi o mea sesē nai lo o aʻu. Ae e te ufiufia lava a matou solitulafono.”—Sala. 65:2, 3.

12 Na fetalai Iesu i ona soo: “Afai tou te talosaga atu i se mea i loʻu igoa, ou te faia lava.” (Ioa. 14:14) O le faaupuga “se mea” o lona uiga o so o se mea e talafeagai ma le finagalo o Ieova. Na faamautinoa mai e Ioane iā i tatou: “O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.” (1 Ioa. 5:14) Maʻeu le lelei o le aʻoaʻoina o isi, o le tatalo e lē na o se mea e faaleleia ai faalogona, ae o se auala matagofie lea e faalatalata atu ai i le “nofoālii o le agalelei faifua” o Ieova! (Epe. 4:16) O le aʻoaʻoina o isi e tatalo i le auala saʻo, ia saʻo Lē e tatalo i ai, ma saʻo mea e talosaga ai, e mafai ona tatou fesoasoani ai iā i latou e vavalalata iā Ieova, ma maua faamāfanafanaga  i taimi o puapuaga.—Sala. 4:1; 145:18.

AGALELEI FAIFUA I LE FAIGA FOU O MEA

13, 14. (a) O ā faaeaga matagofie o le a maua e le ʻaufaauuina i le lumanaʻi? (e) O le ā le galuega ofoofogia o le a faia e le ʻaufaauuina mo tagata?

13 O le a faaauau ona faaalia e Ieova lona agalelei faifua e tusa pe e faaumatia lenei faiga amioleaga o mea. Na tusi Paulo e faatatau i le faaeaga matagofie ua tuuina atu e le Atua i le 144,000 o ē ua valaauina e pule ma Keriso i le Malo i le lagi: “O le Atua o lē e tele le alofa mutimutivale, e ala i lona alofa tele lea ua ia alofa mai ai iā i tatou, ua ia faaola faatasi ai i tatou ma le Keriso e ui ina oti i tatou ona o a tatou mea sesē, ae o lona agalelei faifua ua ia faaola ai outou, ma na ia faaeaina i tatou ma faanonofo faatasi i tatou i mea o i le lagi e autasi ma Keriso Iesu, ina ia faaalia ai i le faiga o mea a lenei lalolagi o loo fotuaʻi mai le matuā tele o lona agalelei faifua, i lona agalelei tele mai iā i tatou o ē ua autasi ma Keriso Iesu.”—Efe. 2:4-7.

14 E faigatā ona faaāta i o tatou mafaufau mea ofoofogia ua saunia e Ieova mo Kerisiano faauuina, pe a latou nonofo i nofoālii e pule faatasi ma Keriso i le lagi. (Luka 22:28-30; Fili. 3:20, 21; 1 Ioa. 3:2) O le a faaalia e Ieova iā i latou le “matuā tele o lona agalelei faifua.” O le a faia aʻe iā i latou le “Ierusalema fou,” o le faletua lea o Keriso. (Faaa. 3:12; 17:14; 21:2, 9, 10) O le a latou galulue faatasi ma Iesu i le ʻfaamālōlōina o nuu,’ e taʻitaʻia tagata usiusitaʻi i sauniuniga ina ia saʻoloto mai i le pologa i le agasala ma le oti, ma fesoasoani iā i latou ina ia lelei atoatoa.—Faitau le Faaaliga 22:1, 2, 17.

15, 16. O le a faapefea ona faaalia e Ieova lona agalelei faifua mo “isi mamoe” i le lumanaʻi?

15 I le Efeso 2:7, e tatou te faitau ai o le a faaalia e le Atua lona agalelei faifua i le ʻfaiga o mea o loo fotuaʻi mai.’ E mautinoa o le a molimauina i le faiga fou o mea a Ieova i le lalolagi “le matuā tele o lona agalelei faifua.” (Luka 18:29, 30) O se tasi o faaaliga silisili o le agalelei tele o Ieova mo le lalolagi, o le toe faatutūina lea o tagata mai i “le Tuugamau.” (Iopu 14:13-15; Ioa. 5:28, 29) O tane ma fafine faamaoni anamua o ē na maliliu a o leʻi faia le taulaga togiola a Keriso, faapea foʻi “isi mamoe” na maliliu faamaoni i aso e gata ai, o le a toe faatutūina i latou e faaauau ona auauna iā Ieova.

16 O le a toe faatutūina foʻi le faitau miliona o tagata na maliliu a o leʻi iloa le Atua. O le a tuuina atu le avanoa iā i latou e gauaʻi ai i le pule silisili ese a Ieova. Na tusi Ioane: “Ona ou iloa lea o ē na oti, o ē e sili ma ē e faatauvaa, o loo tutū i luma o le nofoālii, ona tatala lea o tusi tāʻai. Ae ua tatala foʻi se isi tusi tāʻai; o le tusi tāʻai lea o le ola. Ona faamasinoina lea o ē ua oti i mea na tusia i tusi tāʻai, e tusa ma a latou galuega. Ua ave aʻe e le sami i latou na oti o iai, ua ave aʻe foʻi e le oti ma Tuugamau i latou na oti o iai, ma ua faamasinoina i latou taʻitoʻatasi e tusa ma a latou galuega.” (Faaa. 20:12, 13) O i latou o le a toe faatutūina e manaʻomia ona latou aʻoaʻoina le auala e faatatau ai mataupu silisili a le Atua o loo i le Tusi Paia. E lē gata i lea, e tatau ona latou mulimuli i faatonuga fou ia o le a faaalia mai i “tusi tāʻai,” o loo faatulaga mai ai tapulaa a Ieova mo le olaga i le faiga fou o mea. O le faaalia mai o mea o loo tusia i nei tusi tāʻai, o se isi faaaliga lenā o le agalelei faifua o Ieova.

 FOLAFOLA ATU PEA LE TALA LELEI

17. O le ā e tatau ona tatou manatua pe a molimau atu i tagata?

17 E sili atu ona tāua i le taimi lenei, ona faataunuu lo tatou tofiga o le talaʻia lea o le tala lelei o le Malo ona ua lata mai le iʻuga. (Mare. 13:10) E mautinoa ua faamatilatila e le tala lelei le agalelei faifua o Ieova. E tatau ona tatou manatua lenā mea, a o molimau atu i isi. O lo tatou sini pe a talaʻi, o le faamamaluina lea o Ieova. E mafai ona tatou faia faapea, e ala i le faailoa atu i tagata o folafolaga uma o faamanuiaga i le lalolagi fou, o faaaliga ia o le agalelei tele o Ieova.

Ia maelega o ni “auauna pule lelei o le agalelei faifua o le Atua.”—1 Pete. 4:10 (Tagaʻi i le palakalafa e 17-19)

18, 19. E faapefea ona tatou viiviia le agalelei faifua o Ieova?

18 A o tatou molimau atu i isi, e mafai ona faamatala atu i lalo o le pulega o le Malo o Keriso, o le a mauaina e tagata aogā atoatoa mai i le taulaga togiola ma faasolo atu ina lelei atoatoa. Ua taʻua i le Tusi Paia: “Ia saʻoloto ai le foafoaga mai i le faapologaina i mea leaga, ma maua ai le saʻolotoga mamalu o le fanau a le Atua.” (Roma 8:21) E faatoʻā mafai ona faataunuu nei tulaga ona o le agalelei tele o Ieova.

19 Ua tatou maua le faaeaga o le faasoa atu iā i latou o le a faalogo mai le folafolaga matagofie o loo i le Faaaliga 21:4, 5: “E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” Ua fetalai mai Ieova o Lē o loo afio i le nofoālii: “Faauta! Ou te faia ia fou mea uma lava.” Ua ia toe fetalai mai foʻi: “Ia tusi, auā o upu nei e faamaoni ma moni.” Pe a tatou maelega e talaʻi lenei tala lelei i isi, o le a tatou viiviia ai le agalelei faifua o Ieova.