Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) IULAI 2016

Fesili Mai le ʻAufaitau

Fesili Mai le ʻAufaitau

O le ā le uiga o le tuufaatasia o laau e lua o loo faamatalaina i le Esekielu mataupu e 37?

Na avatu e Ieova iā Esekielu se feʻau o le faamoemoe, na folafola atu ai le toe autasia o le nuu o Isaraelu, pe a toe faafoʻisia i le Nuu Folafolaina. O loo valoia foʻi i lenā feʻau le toe autasia o tagata o le Atua lea na amata a o faagasolo aso e gata ai.

Na fetalai atu Ieova i lana perofeta o Esekielu ina ia tusia faaupuga ia i luga o ni laau se lua. Ia tusia i le isi laau le faaupuga, “Mo Iuta ma le fanauga o Isaraelu o ana uō ia,” ae tusia i le isi laau, “Mo Iosefa, o le laau a Efaraima atoa ma le aiga uma o Isaraelu o ana uō ia.” O nei laau e lua o le a avea ma ʻlaau e tasi’ i le lima o Esekielu.—Eseki. 37:15-17.

 O le ā ua faaataina mai e “Efaraima”? O Ierepoamo le tupu muamua o le malo o ituaiga e sefulu i le itu i mātū, e mai i le ituaiga o Efaraima lea na avea ma ituaiga malosi. (Teu. 33:13, 17; 1 Tu. 11:26) O lenei ituaiga na tupuga mai i le atalii o Iosefa o Efaraima. (Nu. 1:32, 33) Na maua e Iosefa se faamanuiaga faapitoa mai i lona tamā o Iakopo. O lea, e talafeagai ai ona taʻua o le “laau a Efaraima” le laau lea na faaataina mai e le malo o ituaiga e sefulu i le itu i mātū. I le taimi na faamauina ai e Esekielu le valoaga e faatatau i laau e lua, ua leva ona ave faaaunuua e Asuria le malo i le itu i mātū o Isaraelu i le 740 T.L.M. (2 Tu. 17:6) E oo ane i lenā taimi, ua taapeape solo le toʻatele o tagata Isaraelu i le emepaea o Papelonia, lea na faatoʻilaloina le emepaea o Asuria.

I le 607 T.L.M., na ave faaaunuua ai i Papelonia le malo o ituaiga e lua i le itu i saute, ma nisi atonu na totoe mai i le malo i le itu i mātū. Na pulea e tupu na tupuga mai i le gafa o Iuta nei ituaiga e lua, ma na iai foʻi i inā le faiva faaositaulaga, auā na auauna ositaulaga i le malumalu i Ierusalema. (2 No. 11:13, 14; 34:30) O lea, na talafeagai ai i le laau “mo Iuta” ona faaata mai ai le malo o ituaiga e lua.

O anafea na tuufaatasia ai nei laau faafaatusa e lua? Na tuufaatasia ina ua toe foʻi Isaraelu i Ierusalema e toe fausia le malumalu i le 537 T.L.M. Na toe foʻi faatasi mai i le faaaunuua nisi mai i le malo o ituaiga e lua ma le malo o ituaiga e sefulu. Ua lē toe vaeluaina le nuu o Isaraelu. (Eseki. 37:21, 22) Ua toe tapuaʻi ma le autasi iā Ieova tagata Isaraelu. Na valoia foʻi e perofeta o Isaia ma Ieremia lenei toe faaleleiga.—Isa. 11:12, 13; Iere. 31:1, 6, 31.

O le ā le upu moni tāua e faatatau i le tapuaʻiga mamā o loo faamatilatila mai i lenei valoaga? O le a faapogaia e Ieova ona tagata tapuaʻi ina ia autasi. (Eseki. 37:18, 19) Pe na faataunuuina moni lenei folafolaga mo le autasi i o tatou taimi? Ioe. I le taimi muamua, na faataunuuina i le 1919 ina ua faasolosolo ona toe faamaopoopoina tagata o le Atua, ma toe autasia i latou. Na lē taulau taumafaiga a Satani ina ia latou fevaevaeaʻi.

I lenā taimi, o le toʻatele o i latou na toe autasia na iai le faamoemoe o le avea ma tupu ma ositaulaga ma Iesu i le lagi. (Faaa. 20:6) I se uiga faafaatusa, ua pei i latou o le laau mo Iuta. Peitaʻi, a o faagasolo taimi na faatupulaʻia i latou e faamoemoe e ola i le lalolagi, na amata ona latou faatasi atu i tagata Iutaia faaleagaga. (Saka. 8:23) Na pei i latou o le laau mo Iosefa, ma e leai so latou faamoemoe e pule faatasi ma Keriso.

Ua auauna nei ma le autasi na vaega e lua o ni tagata o Ieova i le taʻitaʻiga a le Tupu e toʻatasi o Iesu Keriso, lea e faasino i ai le faamatalaga faavaloaga o “Tavita laʻu auauna.” (Eseki. 37:24, 25) Na tatalo Iesu ina ia autasi ona soo ʻe pei o oe le Tamā e autasi ma ia, o ia foʻi e autasi ma le Tamā.’ * (Ioa. 17:20, 21) Na valoia foʻi e Iesu lana lafu mamoe itiiti o soo faauuina o le a ʻavea ma lafu e tasi’ faatasi ma “isi mamoe.” O i latou uma o le a i lalo o le taʻitaʻiga a le “leoleo mamoe e toʻatasi.” (Ioa. 10:16) Maʻeu le talafeagai o fetalaiga a Iesu e faamatalaina ai le autasi faaleagaga o tagata o Ieova i aso nei, e ui lava e eseese o latou faamoemoe mo le lumanaʻi!

^ pala. 6 O se mea lelei le mātauina o le faasologa o mea e tutupu na taʻua e Iesu ina ua fetalai i talafaatusa lea e avea ma faailoga o lona faatasi mai. Muamua, na ia faasino atu i le “pologa faamaoni ma le faautauta,” o se vaega toʻaitiiti o uso faauuina o le a taʻimua. (Mata. 24:45-47) Ona ia faamatala lea o talafaatusa e faaautū atu iā i latou e faamoemoe e ola i le lagi. (Mata. 25:1-30) Ae na faaiʻu lana fetalaiga iā i latou e faamoemoe e ola i le lalolagi, o ē o le a lagolagoina uso o Keriso. (Mata. 25:31-46) I se tulaga talitutusa, o le faataunuuga faaonapōnei o le valoaga a Esekielu e faasino muamua atu iā i latou e faamoemoe e ola i le lagi. E moni e lē masani ona faaata e le malo o ituaiga e sefulu i latou e faamoemoe e ola i le lalolagi. Peitaʻi, o le autasi o loo faamatalaina i lenei valoaga, ua faamanatu mai ai iā i tatou le autasi o ē e faamoemoe e ola i le lalolagi ma ē e iai le faamoemoe faalelagi.