Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) IANUARI 2016

Faamalosia Ona o le “Meaalofa Foaʻifua” a le Atua

Faamalosia Ona o le “Meaalofa Foaʻifua” a le Atua

“E faafetai i le Atua mo lana meaalofa foaʻifua e lē mafaamatalaina.”—2 KORI. 9:15.

PESE: 121, 63

1, 2. (a) O le ā e aofia ai i le “meaalofa foaʻifua e lē mafaamatalaina” a le Atua? (e) O ā fesili o le a iloiloina i lenei mataupu?

NA FOAʻI mai e Ieova le meaalofa silisili ona o lona alofa, ina ua ia auina mai lona Alo pele e toʻatasi i le lalolagi. (Ioa. 3:16; 1 Ioa. 4:9, 10) Na taʻua e le aposetolo o Paulo o le “meaalofa foaʻifua e lē mafaamatalaina” a le Atua. (2 Kori. 9:15) Aiseā na ia faaaogāina ai lenā faaupuga?

2 Na mautinoa e Paulo o le a faataunuuina folafolaga matagofie uma a le Atua e ala i le taulaga lelei atoatoa a Keriso. (Faitau le 2 Korinito 1:20.) O lenei “meaalofa foaʻifua e lē mafaamatalaina” e aofia uma ai le lelei ma le alofa faamaoni o Ieova, lea ua faalautele mai iā i tatou e ala iā Iesu. O lea, o lenei meaalofa mataʻina e lē mafai ona faamatalaina atoatoa i ni upu. E faapefea la i le mauaina o lenā meaalofa ona aafia ai i tatou? E faapefea ona avea lenei meaalofa o se uunaʻiga lelei a o tatou sauniuni mo le Faamanatuga o le maliu o Keriso i le Aso Lulu o Mati 23, 2016?

 MEAALOFA FAAPITOA A LE ATUA

3, 4. (a) O ā ni ou faalogona pe a e mauaina se meaalofa? (e) O le a faapefea i se meaalofa faapitoa ona suia ai lou olaga?

3 E mautinoa e te lagona le fiafia pe a e mauaina se meaalofa. Peitaʻi, e iai nisi meaalofa e matuā tāua ma faapitoa lea e mafai ona suia ai lou olaga. O se faaaʻoaʻoga, seʻi faapea ua toeitiiti ona fasiotia lea o oe ona o se soligatulafono na e aafia ai. Ae ua faafuaseʻi ona sau se tagata e te lē masani ai, ma tauofo mai e faasalaina o ia nai lo o oe. Ua ia lotomalie e oti mo oe. O le ā se aafiaga o lenā meaalofa mataʻina iā te oe?

4 O le mauaina o se meaalofa faapitoa faapena, o le a e manatunatu ai i ni suiga e tatau ona faia i lou olaga. Atonu o le a uunaʻia ai oe e agalelei ma alofa atu i isi, ma faamagalo foʻi i ē e agaleaga mai. O le a e manaʻo e faailoa atu i lou olaga atoa lou lototalisapaia o le faataulaga na faia e lenā tagata mo oe.

5. E faapefea i le meaalofa a le Atua o le togiola ona sili mamao atu nai lo o se isi lava meaalofa?

5 O le meaalofa a le Atua o le togiola e matuā sili mamao atu ona tāua nai lo o le meaalofa na taʻua i le faaaʻoaʻoga. (1 Pete. 3:18) Aiseā? Talu ai ona o le agasala tuufaasolo, ua tatou maua ai le faasalaga oti. (Roma 5:12) Ae o le alofa o Ieova na auina mai ai Iesu i le lalolagi e “oo ai le oti iā te ia ona o tagata uma.” (Epe. 2:9) Ua faasaoina e Ieova o tatou ola i le taimi lenei, ma ua ia faataatia foʻi se faavae mo le tafiesea e faavavau o le oti. (Isa. 25:7, 8; 1 Kori. 15:22, 26) O i latou uma e faaalia le faatuatua iā Iesu, o le a mauaina le ola e faavavau i le filemu ma le fiafia o ni tagatānuu o le Malo o le Atua i le lalolagi, ae o le a avea le ʻaufaauuina ma pule faatasi ma Keriso i lenā Malo. (Roma 6:23; Faaa. 5:9, 10) O ā isi faamanuiaga e aofia ai i lenā meaalofa mai iā Ieova?

6. (a) O ā faamanuiaga o le meaalofa a Ieova o loo e tulimataʻia? (e) O ā mea e tolu o le a uunaʻia i tatou e fai ona o le meaalofa a le Atua?

6 O le meaalofa a Ieova e aofia ai le faamālōlōina o maʻi uma, liua o lenei lalolagi e avea ma parataiso, ma le faatutūina o ē ua maliliu. (Isa. 33:24; 35:5, 6; Ioa. 5:28, 29) E mautinoa lo tatou alolofa iā Ieova ma lona Alo pele o Iesu mo le foaʻiina mai o lenei “meaalofa foaʻifua e lē mafaamatalaina.” Peitaʻi o loo tumau pea le fesili, O le ā o le a uunaʻia e le alofa o le Atua i tatou e fai? O le a uunaʻia i tatou e (1) mulimulituʻi i tulaga aao o Iesu Keriso, (2) faailoa atu le alofa i o tatou uso, ma le (3) faamagalo isi mai i o tatou loto.

ʻFAAMALOSIA ONA O LE ALOFA O KERISO’

7, 8. O ā ni o tatou faalogona i le alofa o Keriso, ma o le ā e tatau ona uunaʻia ai i tatou e fai?

7 Muamua, e tatau ona faamalosia i tatou e ola mo Keriso Iesu. Na faapea mai le aposetolo o Paulo: “Ua faamalosia i matou ona o le alofa o le Keriso.” (Faitau le 2 Korinito 5:14, 15.) Na iloa e Paulo e lē mafai ona tatou taliaina le alofa silisili o Keriso pe a lē faamalosia pe uunaʻia i tatou e ola mo Keriso. Pe a tatou malamalama lelei i le mea na faia e Ieova ma pāʻia ai o tatou loto i lona alofa, o le a tatou naunau ai e ola atoatoa mo Keriso Iesu. E faapefea ona tatou faailoa atu lenā faanaunauga?

8 E faamalosia i latou e alolofa iā Ieova ina ia faaaʻoaʻo iā Keriso, ma mulimulituʻi i ona tulaga aao. (1 Pete. 2:21; 1 Ioa. 2:6) O lo tatou usiusitaʻi, e faamaonia ai lo tatou alolofa mo le Atua ma Keriso. Na  fetalai Iesu: “O lē ua iai aʻu poloaʻiga ma tausi i ai, o ia lea e alofa mai iā te aʻu. O lē e alofa mai iā te aʻu, e alofa foʻi loʻu Tamā iā te ia. Ou te alofa iā te ia ma ou te faailoa manino atu foʻi aʻu iā te ia.”—Ioa. 14:21; 1 Ioa. 5:3.

9. O ā luʻi o loo tatou fesagaʻia?

9 A o faagasolo le vaitaimi o le Faamanatuga, e tāua ona tatou manatunatu i o tatou olaga. Ia fesili ifo: ʻO ā vala o loo oʻu faaaʻoaʻo ai iā Iesu? O ā ni vala e manaʻomia ona ou faaleleia?’ E tāua tele lenei iloiloga a o tatou feagai pea ma le luʻi ina ia mulimuli i lenei lalolagi. (Roma 12:2) Pe a tatou lē faaeteete, o le a tatou mulimuli ai i tagata atamamai o lenei lalolagi, po o tagata lauiloa ma tagata taʻutaʻua i taaloga. (Kolo. 2:8; 1 Ioa. 2:15-17) E faapefea ona tatou teena na luʻi?

10. O ā fesili e tatau ona tatou manatunatu i ai i le vaitaimi o le Faamanatuga, ma o le ā e ono uunaʻia ai i tatou e fai? (Tagaʻi i le ata i luga aʻe o le matua.)

10 O le vaitaimi o le Faamanatuga o se vaitaimi lelei e iloilo ai foʻi o tatou ofu, o ata e matamata ai, musika, e oo foʻi i mea o loo teuina i a tatou komepiuta, telefoni, ma masini faaonapōnei. Ia fesili ifo: ʻPe a ou alu i se nofoaga o loo iai Iesu, pe e lelei oʻu faalogona pe a ou ofuina le ofu lenei?’ (Faitau le 1 Timoteo 2:9, 10.) ʻPe a ou ofuina lenei ofu, pe e mātaulia ai o aʻu o se soo o Keriso?’ E mafai foʻi ona tatou fesili ifo faapena i ata ma musika e tatou te filifilia. ʻPo o le a fiafia Iesu e matamata i lenei ata ma faalogologo i nei musika? Pe a ia faaaogāina laʻu telefoni po o laʻu masini faaonapōnei, po ou te lagona le mā ona o mea o le a ia vaaia?’ Pe a iloilo a tatou taaloga vitiō, ia fesili ifo: ʻPe e faigatā ona faamatala atu iā Iesu le māfuaaga ou te fiafia ai i lenei taaloga?’ O lo tatou alolofa mo Ieova o le a faamalosia ai i tatou e aveesea so o se mea e lē talafeagai ona iai i se soo o Keriso, e tusa lava pe taugatā. (Galu. 19:19, 20) I le taimi na faia ai la tatou tuuina atu, na tatou folafola ai o le a tatou lē toe ola mo i tatou lava, ae o le a tatou ola mo Keriso. O lea, e lē tatau ona iai iā i tatou so o se mea e faafaigatā ai ona tatou mulimulituʻi i tulaga aao o Keriso.—Mata. 5:29, 30; Fili. 4:8.

11. (a) E faapefea i lo tatou alolofa iā Ieova ma Iesu ona uunaʻia ai i tatou i le galuega talaʻi? (e) E faapefea i le alofa ona uunaʻia ai i tatou e fesoasoani i isi i le faapotopotoga?

11 O lo tatou alolofa mo Iesu o le a uunaʻia ai i tatou e faia so tatou sao atoatoa i le talaʻiga ma le faia o isi ma soo. (Mata. 28:19, 20; Luka 4:43) A o faagasolo le vaitaimi o le Faamanatuga, o le a tatou maua le avanoa e paeonia lagolago ai mo le 30 po o le 50 itula. Pe e mafai ona fetuunaʻi lau faasologa ina ia mafai ona paeonia lagolago ai? Na manatu se uso ua maliu lana avā ma e 84 ona tausaga, e lē mafai ona ia paeonia lagolago ona ua matua ma faalētonu lona soifua mālōlōina. E ui i lea, na fesoasoani paeonia i lona vaipanoa iā te ia. Sa latou saunia auala o femalagaaʻiga ma se oganuu talafeagai, ina ia ausia ai lona sini o le 30 itula. Pe e mafai ona e fesoasoani i se tasi i lau faapotopotoga ina ia mafai ona ia paeonia lagolago i le vaitaimi o le Faamanatuga? E moni e lē mafai ona tatou paeonia lagolago uma. Peitaʻi, e mafai ona tatou faaaogā so o se taimi ma le malosi ina ia faateleina ai a tatou taulaga o viiga iā Ieova. O le faia faapea o le a pei ai i tatou o Paulo, i le faailoa atu o loo uunaʻia i tatou i le alofa o Iesu. O ā isi mea o le a uunaʻia i tatou e le alofa o le Atua e fai?

 E TATAU ONA TATOU ALOLOFA I ISI

12. O le ā e uunaʻia i tatou e le alofa o le Atua e fai?

12 Lona lua, o le alofa o le Atua e faamalosia ai i tatou e faaalia lo tatou alolofa mo o tatou uso. Na tusi le aposetolo o Ioane: “Le ʻaupele e, afai ua faapea ona alofa mai o le Atua iā i tatou, ua tatau ai la ona tatou alolofa o le tasi i le isi.” (1 Ioa. 4:7-11) E lē mafai ona alofa mai le Atua iā i tatou, pe a tatou lē alolofa i o tatou uso. (1 Ioa. 3:16) E faapefea ona faailoa atu lo tatou alolofa iā i latou?

13. Na faapefea ona faaalia e Iesu le alofa i isi?

13 Seʻi mafaufau i le faaaʻoaʻoga a Iesu. A o faagasolo lana faiva i le lalolagi, sa ia uaʻi atu i ē faatauvaa. Sa ia faamālōlōina ē pipili, tauaso, logonoa ma ē gūgū. (Mata. 11:4, 5) Sa aʻoaʻoina e Iesu i latou na galala faaleagaga, ia na vaai i ai taʻitaʻi lotu Iutaia o tagata ua “faamalaiaina.” (Ioa. 7:49) Sa alofa o ia i ē faatauvaa ma fesoasoani atu iā i latou.—Mata. 20:28.

Pe e mafai ona e fesoasoani i se uso po o se tuafafine matua i le faapotopotoga? (Tagaʻi i le palakalafa e 14)

14. E faapefea ona e faaalia le alofa i ou uso?

14 O le vaitaimi o le Faamanatuga o se avanoa lelei e faaaʻoaʻo ai iā Iesu e ala i le faaalu o se taimi e mafaufau ai i uso ma tuafāfine i la tatou faapotopotoga. O le faia faapea, o le a e iloa ai nisi e mafai ona e faaalia i ai le alofa. Atonu e iai ni uso ma tuafāfine matutua o loo manaʻomia le fesoasoani. Pe e mafai ona asiasi atu i na auauna peleina? Pe e mafai ona e avatu se taumafataga iā i latou, fesoasoani i a latou feʻau, momoli i le sauniga, pe valaaulia foʻi i latou i le faiva? (Faitau le Luka 14:12-14.) O le alofa o le Atua e tatau ona uunaʻia ai i tatou e faaalia le alofa i o tatou uso.

IA ALOFA MUTIMUTIVALE I USO MA TUAFĀFINE

15. O le ā e tatau ona tatou iloaina?

15 Lona tolu, o le alofa o Ieova e faamalosia ai i tatou e faamagalo o tatou uso ma tuafāfine. O i tatou o fanau a le uluaʻi tagata o Atamu, ma ua tatou aafia uma i le agasala tuufaasolo ma le faasalaga o le oti. E leai se tasi o i tatou e mafai ona faapea mai: “Ou te lē manaʻomia le togiola.” E oo lava i se auauna e sili ona faamaoni a le Atua, e faalagolago o ia i le agalelei faifua o le Atua e ala mai  i le Keriso. E tatau iā i tatou uma ona iloa ua faamagaloina sa tatou aitalafu e matuā telē lava. Aiseā e tāua ai lenā vala? E maua le tali i se tasi o talafaatusa a Iesu.

16, 17. (a) O le ā e tatou te aʻoaʻoina mai i le talafaatusa a Iesu i le tupu ma pologa? (e) Pe a māeʻa ona manatunatu loloto i le talafaatusa a Iesu, o le ā ua tatou maumauaʻi e fai?

16 Na faamatalaina e Iesu le talafaatusa i se tupu na ia faamagaloina le aitalafu telē a se pologa e 10,000 taleni pe 60,000,000 tenari. Peitaʻi, e leʻi lotomalie lenei pologa e faamagalo le aitalafu laʻitiiti a se isi ona uso a pologa, lea e 100 tenari. Na matuā ita le tupu ina ua ia iloaina lea mea ona ia faapea atu lea: “O oe lenā le pologa leaga, na ou faamagaloina lau aitalafu ina ua e ʻaiʻoi mai iā te aʻu. Pe e lē tatau ea la ona e alofa mutimutivale i lou uso a pologa, e pei foʻi ona ou alofa mutimutivale iā te oe?” (Mata. 18:23-35, fpl.) O le alofa mutimutivale o le tupu sa tatau ona faamalosia ai lea pologa e faamagalo atu i lona uso a pologa. I se tulaga talitutusa, o le ā e tatau ona uunaʻia e le alofa mutimutivale o Ieova i tatou e fai?

17 I le vaitaimi o le Faamanatuga, o se avanoa lelei lea e iloilo ai i tatou po o tatou teuloto le ita i nisi o o tatou uso po o tuafāfine. O se avanoa lelei lea e tatou te faaaʻoaʻo ai iā Ieova o lē e “nofosauni e faamagalo.” (Nee. 9:17; Sala. 86:5) Pe a tatou talisapaia le auala ua faamagalo ai e Ieova la tatou aitalafu telē, o le a tatou mananaʻo ai e faamagalo i isi mai i o tatou loto. E lē mafai ona tatou maua le alofa ma le faamagaloga a Ieova pe a tatou lē alolofa ma faamagalo atu i isi. (Mata. 6:14, 15) E moni e lē mafai e le faamagalo atu ona suia ai se mea na tupu, peitaʻi o le a mafai ona suia ai o tatou lumanaʻi i se tulaga lelei.

18. Na faapefea i le alofa o le Atua ona uunaʻia ai se tasi tuafafine e faaalia le onosaʻi?

18 O le toʻatele o i tatou, atonu o se luʻi le faaalia o le “onosaʻi” i o tatou uso ma tuafāfine i aso taʻitasi. (Faitau le Kolose 3:13, 14; Efeso 4:32.) O se faaaʻoaʻoga, o Lily o se tuafafine nofofua sa lotomalie e fesoasoani iā Carol, o se tuafafine ua maliu lana tane. [1] Sa fesoasoani Lily e feaveaʻi o ia, fai ana feʻau, ma faaalia le agalelei i le tele o auala. E ui i lea, sa faitio pea Carol ma faigatā ai iā Lily ona feutagaʻi ma ia. Ae sa uaʻi pea Lily i uiga lelei o Carol. Sa faaauau pea ona ia fesoasoani iā Carol seʻia oo ina maʻi tigāina ma maliu ai o ia. Na faapea mai Lily: “Ou te tulimataʻia le taimi e toetū ai Carol. Ou te fia feiloaʻi iā te ia pe a lelei atoatoa.” O lea, o le alofa o le Atua e tatau ona faamalosia ai i tatou e onosaʻi i uso ma tuafāfine, ma tulimataʻia le taimi o le a tatou lelei atoatoa ai e faavavau.

19. E faapefea i le “meaalofa foaʻifua e lē mafaamatalaina” ona faamalosia ai i tatou?

19 Ua tatou mauaina se “meaalofa foaʻifua e lē mafaamatalaina” mai i le Atua. Ia tatou faatāuaina lenā meaalofa. Ia tatou manatunatu loloto i mea ua faia e Ieova ma Iesu mo i tatou, aemaise lava i le vaitaimi o le Faamanatuga. Tau ina ia fesoasoani lo laʻua alolofa iā i tatou e faamalosia ai i tatou e mulimulituʻi iā Iesu, ia alolofa i o tatou uso, ma faamagalo atu iā i latou mai i o tatou loto.

^ [1] (palakalafa e 18) Ua suia nisi igoa i lenei mataupu.