Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata (Lomiga mo Su‘esu‘ega)  |  Ianuari 2016

“E Matou te Ō ma Outou”

“E Matou te Ō ma Outou”

“E matou te ō ma outou, auā ua matou faalogo o loo iā te outou le Atua.”—SAKA. 8:23.

PESE: 65, 122

1, 2. (a) O le ā le fetalaiga a Ieova e faatatau i le taimi o loo tatou ola ai? (e) O ā fesili o le a taliina i lenei mataupu? (Tagaʻi i le ata i luga aʻe o le matua.)

NA FETALAI Ieova e faatatau i le taimi o loo tatou ola ai: “O ia aso o le a fetagofi atu ai tagata e toʻasefulu mai i gagana uma a atunuu eseese, ioe, latou te fetagofi atu lava i le pito ofu o le tagata Iutaia, ma faapea atu: ʻE matou te ō ma outou, auā ua matou faalogo o loo iā te outou le Atua.’” (Saka. 8:23) O tagata faafaatusa e toʻasefulu o i latou e iai lo latou faamoemoe i le lalolagi, ua latou ʻfetagofi atu i le pito ofu o le tagata Iutaia.’ Ua latou fiafia e faifaimea faatasi ma le “Isaraelu a le Atua,” ma latou iloa o loo faamanuia e Ieova lenei ʻaufaauuina.—Kala. 6:16.

2 E pei o le perofeta o Sakaria, na faamatilatila e Iesu le autasi ua maua e tagata o le Atua. Na ia faamatalaina ona soo i ni vaega se lua, o “le lafu mamoe itiiti” ma “isi mamoe,” peitaʻi na ia fetalai o le a avea i latou ma “lafu e tasi” i lalo o le taʻitaʻiga a “le leoleo mamoe e toʻatasi.” (Luka 12:32; Ioa. 10:16) Peitaʻi ua lāgā ni fesili e faatatau i le faiā a nei vaega e lua: (1) Pe e manaʻomia ona iloa e isi mamoe suafa o le ʻaufaauuina  i aso nei? (2) O le ā le manatu o ē faauuina e faatatau iā i latou lava? (3) O le ā lau vaaiga pe afai ua amata ona tagofia e se tasi i lau faapotopotoga le areto ma le uaina i le Faamanatuga? (4) Pe e manaʻomia ona e popole i le faatuputeleina o le aofaʻi o i latou e tagofia le areto ma le uaina? Seʻi o tatou iloiloina tali o nei fesili.

PE E TATAU ONA ILOA SUAFA O LE ʻAUFAAUUINA I ASO NEI?

3. Aiseā e lē mafai ai ona tatou iloa po o ai e aofia i le 144,000?

3 Pe e tatau ona iloa e isi mamoe suafa o le ʻaufaauuina i aso nei? E leai. Aiseā? E tusa lava po ua mauaina e se tasi le valaaulia faalelagi, peitaʻi e leʻi faamautūina ai lona taui. O le māfuaaga lenā e faaaogā ai e Satani “perofeta pepelo . . . ina ia faasesē ai, e oo lava i ē ua filifilia pe afai e mafai.” (Mata. 24:24) E leai se tasi e na te iloaina po ua maua e se Kerisiano faauuina lona taui faalelagi, seʻiloga ua faamautinoa e Ieova i lenā tagata lona mauaina o lenā taui. E faia e Ieova lenei faamautinoaga ma tuuina atu iā te ia le faamaufaailoga faaiʻu, a lē o le taimi a o leʻi maliu lenā tagata faamaoni, pe a o leʻi gāpā le “puapuaga tele.” (Faaa. 2:10; 7:3, 14) E lē o se mea talafeagai mo se tasi ona taumafai e iloa po o ai auauna a le Atua o loo aofia i le 144,000. [1]

4. Pe afai e lē mafai ona iloa suafa uma o le ʻaufaauuina o loo i le lalolagi i aso nei, e faapefea la ona tatou “ō ma” i latou?

4 Afai e lē mafai ona iloa suafa uma o le Isaraelu faaleagaga o loo i le lalolagi i aso nei, e faapefea la i isi mamoe ona “ō ma” i latou? Ia mātau le valoaga a Sakaria e faatatau i tagata faafaatusa e toʻasefulu. O le a latou ʻfetagofi atu i le pito ofu o le tagata Iutaia, ma faapea atu: “E matou te ō ma outou, auā ua matou faalogo o loo iā te outou le Atua.”’ E ui e na o le toʻatasi le tagata Iutaia o loo taʻua, ae o le suinauna “outou” e faasino atu i tagata e toʻatele. O lenei Iutaia faaleagaga e faasino atu i se vaega o tagata ae e lē o se tagata se toʻatasi. O lea, e lē manaʻomia ona tatou iloa suafa uma o le Iutaia faaleagaga ina ia ō ai ma i latou. E manaʻomia ona mātauina i latou o se vaega ma lagolagoina i latou. E lē o faalaeiauina i tatou e le Tusi Paia e mulimuli i se tagata e toʻatasi, auā o Iesu lo tatou Taʻitaʻi.—Mata. 23:10.

O LE Ā LE MANATU O Ē FAAUUINA E FAATATAU IĀ I LATOU LAVA?

5. O le ā le lapataʻiga e tatau ona nofouta ai le ʻaufaauuina, ma aiseā?

5 O i latou e tagofia le areto ma le uaina i le Faamanatuga, e tatau ona nofouta i le lapataʻiga i le 1 Korinito 11:27-29. (Faitau.) O le ā le manatu o loo faamamafa e le aposetolo o Paulo i inei? Afai e lē tausia e se Kerisiano faauuina lana faiā lelei ma Ieova, o le a ia ʻai ma inu faalētatau i le areto ma le uaina. (Epe. 6:4-6; 10:26-29) Ua fesoasoani lenā lapataʻiga i Kerisiano faauuina e manatua ai e leʻi mauaina lo latou taui. E tatau ona faaauau ona latou “tausinio i le sini, o le taui lea o le valaau faalelagi mai i le Atua, e ala iā Keriso Iesu.”—Fili. 3:13-16.

6. O le ā le manatu o ē faauuina e faatatau iā i latou lava?

6 Na taʻu atu e Paulo i Kerisiano faauuina ʻina ia savavali e tusa ma le valaau na valaauina ai i latou.’ E faapefea ona faia lenei mea? Na faaauau ona faapea mai Paulo, “ia matuā lotomaulalo ma agamalu, ia faapalepale ma onosaʻi le tasi i le  isi i le alofa, ia matuā naunau e tausia le autasi i le agaga i le fusi o le filemu.” (Efe. 4:1-3) E faaauiluma e le agaga paia o Ieova le lotomaulalo ae lē o le faamaualuga. (Kolo. 3:12) E lē manatu ē faauuina ua sili atu ona latou mauaina le agaga paia nai lo o i latou e faamoemoe e ola i le lalolagi. E latou te lē manatu foʻi e iai so latou poto faapitoa pe e latou te mauaina ni faaaliga, pe sili atu foʻi i latou i nisi o auala. E latou te lē fautuaina se tasi e ʻai ma inu i le Faamanatuga, ona e latou te manatu ua faauuina lenā tagata. Ae e latou te lotomaulalo ma iloa e na o Ieova e valaauina ē faauuina.

7, 8. O le ā le mea e lē faatalitalia e Kerisiano faauuina, ma aiseā?

7 E ui lava o le mauaina o le valaau faalelagi o se faaeaga matagofie, ae e lē faatalitalia e Kerisiano faauuina e faamamaluina i latou e isi. (Efe. 1:18, 19; faitau le Filipi 2:2, 3.) Na molimau le agaga o Ieova iā i latou taʻitoʻatasi ma e leʻi faailoaina atu i le lautele. O lea, e lē faateʻia ai i latou pe afai e lē talitonu nisi ua faauuina i latou i le agaga paia. Ua latou iloa ua fautua mai le Tusi Paia e lē tatau ona vave talitonu, i se tasi ua faapea mai ua ia mauaina se tofiga faapitoa mai i le Atua. (Faaa. 2:2) E latou te lē faaaogāina lo latou tulaga faauuina e faailoa atu ai i latou i isi. E latou te lē taʻutaʻu atu lo latou tulaga i isi, ina ia uaʻi mai tagata iā i latou. E latou te lē gugutu foʻi e faatatau i lo latou taui i le lumanaʻi.—1 Kori. 1:28, 29; faitau le 1 Korinito 4:6-8.

8 E lē manatu Kerisiano faauuina o i latou o se vaega faapitoa. E latou te lē saʻilia isi e tutusa o latou faamoemoe, ina ia faatasitasi ma i latou po o le faatū o se vaega faapitoa ina ia suʻesuʻeina le Tusi Paia. (Kala. 1:15-17) O na taumafaiga e faapogaia ai fevaevaeaʻiga i le faapotopotoga ma tetee ai i le agaga paia, lea o loo faaauilumaina le filemu ma le autasi.—Faitau le Roma 16:17, 18.

O LE Ā LAU TALI ATU?

9. Aiseā e ao ai ona tatou faaeteete i le auala e feutagaʻi ai ma ē e tagofia le areto ma le uaina i le Faamanatuga? (Tagaʻi i le pusa “ʻ E Lē Amio Valea’ le Alofa.”)

9 E faapefea ona e feutagaʻi ma se tasi e tagofia le areto ma le uaina i le Faamanatuga? Na fetalai Iesu i ona soo: “O le ʻauuso uma outou.” Na ia toe faapea mai: “O sē na te faaeaina o ia lava, e faamaulaloina lea, ae o sē e faamaulalo iā te ia lava, e faaeaina o ia.” (Mata. 23:8-12) O lea, o se mea sesē le faasilisilia o nisi e tusa lava po o i latou o uso faauuina o Keriso. Ua faalaeiau i tatou e le Tusi Paia ina ia faaaʻoaʻo i le faatuatua o ē taʻimua po o toeaina Kerisiano, peitaʻi e lē o faatonuina i tatou e avea se tagata ma o tatou taʻitaʻi. (Epe. 13:7) O loo taʻua i le Tusi Paia o nisi ua “tatau ona faaluaina i ai le āva.” E tatau ona faaalia le āva i nisi, e lē ona ua faauuina i latou, ae ona “o loo avea ma taʻimua lelei” ma e “galulue mamafa i le upu ma le aʻoaʻo atu.” (1 Timo. 5:17) O se mea e māsiasi ai i latou e iai le valaau faalelagi pe afai e soona uaʻi atu ma viviia i latou e isi. Ae o le a sili ai ona lē lelei pe afai e faapitoa le auala e feutagaʻi ai isi ma i latou, auā e ono faigatā ai i Kerisiano faauuina ona tumau i le lotomaulalo. (Roma 12:3) E leai se tasi e manaʻo e faia se mea e tausuai ai se uso o Keriso.—Luka 17:2.

E faapefea ona e feutagaʻi ma se tasi e tagofia le areto ma le uaina? (Tagaʻi i le palakalafa e 9-11)

10. E faapefea ona tatou faaalia le faaaloalo i Kerisiano faauuina?

10 E faapefea ona tatou faaalia le faaaloalo iā i latou ua faauuina e Ieova? E tatou  te lē fesiligia i latou e faatatau i lo latou faauuina. E tatou te ʻalofia le isuisu i mea e fitoitonu i isi. (1 Tesa. 4:11; 2 Tesa. 3:11) E lē tatau foʻi ona tatou manatu e faauuina foʻi mātua, paaga faaipoipo, po o tauaiga o ē ua faauuina. E lē tuufaasolo lenei faamoemoe i lona aiga. (1 Tesa. 2:12) E lē tatau foʻi ona tatou fesiligia paaga faaipoipo a le ʻaufaauuina e faatatau i o latou faalogona, i le iloaina o le a latou ola i le parataiso e aunoa ma a latou paaga. O le lāgā o fesili faapena e faapogaia ai faalogona tigā. Ua tatou mautinoa atoatoa o le a faamafola e Ieova lona aao ma “faamalie le manaʻo o mea ola uma lava.”—Sala. 145:16.

11. E faapefea ona puipuia i tatou pe a ʻalofia le “faaviivii atu i tagata”?

11 Pe afai e tatou te lē soona faamamaluina le ʻaufaauuina, o le a puipuia ai foʻi i tatou. Ua taʻu mai e le Tusi Paia e ono ō mai faananā “uso pepelo” i le faapotopotoga. (Kala. 2:4, 5; 1 Ioa. 2:19) E ono faapea mai foʻi nei tagata taufaasesē ua faauuina i latou. Atonu e paʻuʻū nisi o Kerisiano faauuina mai i le faatuatua. (Mata. 25:10-12; 2 Pete. 2:20, 21) Pe afai e tatou te ʻalofia le “faaviivii atu i tagata,” o le a tatou lē paʻuʻū ese mai i le upu moni ona o na tagata. O le a lē faavaatuʻia ai lo tatou faatuatua pe taofia ai la tatou auaunaga iā Ieova, pe a lē faamaoni se Kerisiano ua leva ona auauna iā Ieova.—Iuta 16.

PE E TATAU ONA FAAPOPOLEINA I TATOU I LE FAITAU AOFAʻI?

12, 13. Aiseā e lē tatau ai ona tatou soona popole i le faitau aofaʻi o ē tagofia le areto ma le uaina i le Faamanatuga?

12 I le tele o tausaga, e masani ona faaitiitia le faitau aofaʻi o i latou e tagofia le areto ma le uaina i le Faamanatuga. Ae i tausaga talu ai nei, ua faatuputeleina lenā faitau aofaʻi. Pe e tatau ona faapopoleina i tatou i lenā faatelega? E leai. Seʻi o tatou iloiloina nisi o māfuaaga.

13 “Ua silafia e Ieova ona lava tagata.” (2 Timo. 2:19) E lē mafai ona iloa e i latou e faitauina ē e tagofia le areto ma le uaina i le Faamanatuga, po o ai moni o i latou e faauuina. O loo aofia ai foʻi ma i latou ua latou manatu ua faauuina, peitaʻi e lē faauuina. O nisi sa tagofia muamua le areto ma le uaina ua lē toe faia faapea. A o nisi atonu o ni faafitauli tau le mafaufau po o  faalogona lea ua talitonu ai o le a latou pule faatasi ma Keriso i le lagi. O lea, e tatou te lē iloa la le aofaʻiga moni o ē faauuina o loo totoe i le lalolagi.

14. O le ā ua taʻua i le Tusi Paia e faatatau i le aofaʻi o le ʻaufaauuina o le a totoe i le lalolagi i le amataga o le puapuaga tele?

14 Pe a afio mai Iesu e aoaoina atu le ʻaufaauuina i le lagi, o le a iai i latou i le tele o vaega o le lalolagi. Ua faapea mai le Tusi Paia e faatatau iā Iesu: “O le a aauina atu e ia o ana agelu faatasi ma le leotele o le pū, ma o le a latou aoaoina ē ua filifilia mai i matāmatagi e fā, e amata mai i le tasi tuluʻiga o le lagi e oo atu i le isi tuluʻiga.” (Mata. 24:31) Ua taʻua i le Tusi Paia o le a iai nisi o le ʻaufaauuina o le a totoe i le lalolagi a o faagasolo aso e gata ai. (Faaa. 12:17) Peitaʻi e lē o taʻua i le Tusi Paia le aofaʻi o i latou o le a totoe pe a amata le puapuaga tele.

15, 16. O le ā e tatau ona tatou malamalama ai e faatatau i le 144,000 ua filifilia e Ieova?

15 E filifili e Ieova le taimi e filifilia ai le ʻaufaauuina. (Roma 8:28-30) Na amata ona filifilia e Ieova le ʻaufaauuina ina ua mavae le maliu ma le toetū o Iesu, ma e foliga mai i le uluaʻi senituri, na faauuina uma Kerisiano i le faapotopotoga. Na amata mai i le uluaʻi senituri seʻia oo mai i le amataga o aso e gata ai, o le toʻatele o i latou na faapea mai o loo mulimuli iā Keriso, o Kerisiano faatagāfai. Na faatusa e Iesu i latou i “vao leaga.” E ui i lea na faaauau ona faauuina e Ieova nisi na faamaoni i lenā taimi, ma avea ai i latou e pei o ni “saito” e tusa ai ma le fetalaiga a Iesu. (Mata. 13:24-30) A o faagasolo aso e gata ai, ua faaauau pea ona filifilia e Ieova i latou e faia aʻe ai le 144,000. [2] Afai e faatuai ona filifilia e Ieova nisi mo lenā faaeaga, o ai la i tatou e fesiligia ai lona atamai? (Isa. 45:9; Tani. 4:35; faitau le Roma 9:11, 16.) [3] Aua neʻi pei i tatou o le ʻaufaigaluega o ē na faitio i le auala na feutagaʻi ai lo latou matai ma ē na galulue mai i le itula e 11.—Faitau le Mataio 20:8-15.

16 E lē o i latou uma e maua le faamoemoe faalelagi e avea ma vaega o le “pologa faamaoni ma le faautauta.” (Mata. 24:45-47) E pei o le uluaʻi senituri, ua fafagaina e Ieova ma Iesu le toʻatele e ala i se vaega toʻaitiiti. E na o ni nai Kerisiano faauuina i le uluaʻi senituri na faaaogā e tusia Tusitusiga Paia Eleni. E faapena foʻi la i aso nei, e na o ni nai Kerisiano faauuina ua tofia e saunia “meaʻai i le taimi tatau.”

17. O le ā ua tatou aʻoaʻoina mai i lenei mataupu?

17 O le ā ua tatou aʻoaʻoina mai i la tatou talanoaga? Ua filifili Ieova e tuuina atu taui eseese e lua, o le ola i le lagi mo le Iutaia faaleagaga ma le ola i le lalolagi mo tagata e toʻasefulu faafaatusa. E tutusa tulaga e faatalitalia e Ieova mai iā i latou e ola i le lagi ma le lalolagi, o lo latou faamaoni lea. E tatau i vaega uma e lua ona tumau i le lotomaulalo ma ia autasi. E tatau foʻi ona latou faatupuina le filemu i le faapotopotoga. A o lata atu i le siʻui o aso e gata ai, ia tatou maumauaʻi e auauna o se lafu e tasi i lalo o le taʻitaʻiga a Keriso.

^ [1] (palakalafa e 3) E tusa ai ma le Salamo 87:5, 6, e foliga mai i le lumanaʻi o le a faailoa mai suafa o i latou uma ua faatutūina e pule faatasi ma Iesu i le lagi.—Roma 8:19.

^ [2] (palakalafa e 15) E ui lava ua faaalia mai i le Galuega 2:33 e iai le vaega a Iesu i le faia o le filifiliga, ae o Ieova lava ia e faia le valaaulia.

^ [3] (palakalafa e 15) Mo nisi faamatalaga, tagaʻi i le “Fesili Mai i le ʻAufaitau” i Le Olomatamata o Me 1, 2007, itu. 30-31.