Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) IANUARI 2016

Ua Molimau le Agaga i o Matou Agaga

Ua Molimau le Agaga i o Matou Agaga

“Ua molimau le agaga lava lea faatasi ma o tatou agaga, o i tatou o fanau a le Atua.”—ROMA 8:16.

PESE: 109, 108

1-3. O ā mea na tutupu na avea ai le aso o le Penetekoso ma aso faapitoa, ma na faapefea ona faataunuuina ai valoaga a le Tusi Paia? (Tagaʻi i le ata i luga aʻe o le matua.)

O LE taeao o le Aso Sa pe tusa o le ta o le iva. O se Aso Sa faapitoa lenei mo i latou i Ierusalema. O le aso o le tausamiga, ma o le aso sapati foʻi. Ua māeʻa ona ofoina atu taulaga o le taeao i le malumalu. Ua faatumulia tagata i le fiafia a o sauni atu le ositaulaga sili e ofo atu le taulaga lūlū o falaoa faafefeteina e lua e fai mai i uluaʻi saito o le seleselega. (Levi. 23:15-20) O lenei taulaga ua faailogaina ai le amataga o le seleselega o saito. O le aso lea o le Penetekoso i le 33 T.A.

2 A o faia nei taulaga i le lotoā o le malumalu, e iai se mea e sili atu ona tāua ua toeitiiti lava tupu i se potu pito i luga i le aai. Na faapotopoto faatasi Kerisiano e toʻa 120 ma “finafinau i le tatalo.” (Galu. 1:13-15) O le mea o le a tupu iā i latou, e iai le fesootaʻiga ma gaoioiga a le ositaulaga sili i le  aso o le Penetekoso i tausaga uma. O le a faataunuuina ai foʻi le valoaga a le perofeta o Ioelu i le pe tusa ma le 800 tausaga na muamua atu. (Ioe. 2:28-32; Galu. 2:16-21) O le ā lenā mea tāua o le a tupu?

3 Faitau le Galuega 2:2-4. Na liligi ifo le agaga paia o le Atua i Kerisiano na faapotopoto faatasi i le potu pito i luga. (Galu. 1:8) Na amata ona latou molimau atu i mea matagofie na latou vāai ma faalogo i ai. Na faamatala atu e le aposetolo o Peteru i le motu o tagata na potopoto ane le tāua o le mea na tupu. Na ia faapea atu: “Inā salamō ia ma ia taʻitasi ma papatisoina outou i le suafa o Iesu Keriso mo le faamagaloina o a outou agasala, ona outou maua lea o le meaalofa foaʻifua o le agaga paia.” O lenā aso pe tusa ma le 3,000 tagata na papatiso ma latou mauaina le agaga paia.—Galu. 2:37, 38, 41.

4. (a) Aiseā e tatou te naunau ai i mea na tutupu i le aso o le Penetekoso? (e) O le ā se isi mea tāua atonu na tupu i le aso lava lenā i le tele o tausaga na muamua atu? (Tagaʻi i le faaopoopoga.)

4 Aiseā ua avea ai le aso o le Penetekoso 33 T.A. o se aso e tāua iā i tatou? E lē māfua ona o le mea sa tupu i le malumalu i Ierusalema, ae ona o le mea na faataunuuina e le Ositaulaga Sili o Iesu Keriso. [1] Na ofo atu e le ositaulaga sili iā Ieova i lenā aso falaoa e lua e iai sona faaataga. O falaoa faafefeteina ua faaata mai ai soo faauuina o ē na filifilia mai i tagata agasala ma avea ma ataliifai o le Atua. O lea, ua tatala ai le avanoa mo “uluaʻi fua” mai i tagata ina ia avea ma sui o le Malo i le lagi, lea o le a aumaia faamanuiaga i tagata usiusitaʻi. (Iako. 1:18; 1 Pete. 2:9) E tusa pe e tatou te faamoemoe e ola i le lagi faatasi ma Iesu pe e ola e faavavau i le lalolagi, ae e matuā tāua iā i tatou uma mea na tutupu i lenā aso.

LE AUALA E FAAUUINA AI SE TASI

5. E faapefea ona tatou iloa e eseese auala na faauuina ai tagata?

5 E lē mafai ona galo iā te oe lenā aso pe anafai o oe o se tasi o soo na iai le laulaufaiva e pei o se afi i luga o lou ulu. E te lē masalosalo ua faauuina oe i le agaga paia, aemaise lava pe afai na faavavega ona e maua le meaalofa o le tautala i se gagana ese. (Galu. 2:6-12) Pe na tutusa auala na faauuina ai tagata i le agaga paia ma soo e toʻa 120? E leai. O isi na iai i Ierusalema i lenā aso na faauuina ina ua papatisoina. (Galu. 2:38) E leʻi iai ni laulaufaiva e pei o ni afi i luga o o latou ulu. Ae e lē o Kerisiano uma na faauuina ina ua papatisoina. Na faauuina tagata Samaria i le agaga paia ina ua mavae lo latou papatisoga. (Galu. 8:14-17) I se tulaga e lē masani ai, na faauuina Konelio ma lona aiga i le agaga paia a o leʻi papatisoina i latou.—Galu. 10:44-48.

6. O le ā e maua e i latou uma e faauuina, ma e faapefea ona aafia ai i latou?

6 E lē tutusa auala e faauuina ai tagata. O nisi e vave ona iloa ua faauuina i latou, a o isi e faasolosolo ona latou iloa. Po o le ā lava le auala e faauuina ai, ae ua faamatala mai e Paulo le mea o le a tupu iā i latou: “Ina ua outou talitonu, ona faamaufaailogaina ai lea o outou e ala iā te ia i le agaga paia lea na folafolaina mai, o le faamaoniga lea na tuuina mai muamua o lo tatou tofi.” (Efe. 1:13, 14) O lenei auala faapitoa e gaoioi ai le agaga paia, ua avea o se faamautinoaga o le soifuaga o le a latou maua i le lumanaʻi.  Ua mautinoa atoatoa ai e se Kerisiano faauuina lona tofi faalelagi ona o lona mauaina o lenā faamaoniga.—Faitau le 2 Korinito 1:21, 22; 5:5.

7. O le ā e tatau ona faia e se Kerisiano faauuina ina ia maua ai lona tofi i le lagi?

7 Pe a faauuina se Kerisiano, po o lona uiga ua mautinoa ai le mauaina o lona tofi i le lagi? E leai. Ua mautinoa e lenā tagata ua valaaulia o ia, ae o le mauaina o lona tofi faalelagi e faalagolago i lona tumau faamaoni. Na faamatala mai e Peteru: “O le mea lea le ʻauuso e, ia outou saga finafinau ai ina ia faamautinoa le valaauina ma le filifilia o outou; auā a faaauau ona outou faia o nei mea, e tou te lē paʻuʻū lava. O le mea moni, o le a faataga outou e ulufale atu ma le mamalu i le malo e faavavau o lo tatou Alii ma le Faaola o Iesu Keriso.” (2 Pete. 1:10, 11) E tatau i Kerisiano faauuina ona tauivi e tumau ma le faamaoni, neʻi faalēaogāina lona tofi po o lona valaauliaina.—Epe. 3:1; Faaa. 2:10.

E FAAPEFEA ONA ILOA E SE TASI?

8, 9. (a) Aiseā e faigatā ai ona malamalama le toʻatele i le mea e tupu pe a faauuina se tasi? (e) E faapefea ona iloa e se tasi ua ia maua le valaaulia i le lagi?

8 O le toʻatele o auauna a le Atua i aso nei atonu e faigatā ona latou malamalama i le auala e faauuina ai se tasi. Aiseā? Talu ai e lē o se mea na tupu iā i latou. O le uluaʻi fuafuaga a le Atua mo tagata ia ola e faavavau i le lalolagi. (Kene. 1:28; Sala. 37:29) O le filifilia la o nisi e ō i le lagi e pule o ni tupu ma ositaulaga e lē o se mea e masani ai. O lenei valaauina faalelagi e matuā suia ai le mafaufau, vaaiga ma le faamoemoe o se tasi pe a faauuina.—Faitau le Efeso 1:18.

9 E faapefea ona iloaina e se tasi ua valaaulia o ia e ola i le lagi? E manino le tali i upu a Paulo i uso faauuina i Roma “o ē ua valaauina e avea ma le ʻaupaia.” Na ia faapea atu iā i latou: “Tou te leʻi maua le agaga o pologa e toe fefefe ai, ae ua outou maua le agaga o ataliifai, o le agaga foʻi lea ua tatou alalaga atu ai: ʻAva, le Tamā e!’ Ua molimau le agaga lava lea faatasi ma o tatou agaga, o i tatou o fanau a le Atua.” (Roma 1:7; 8:15, 16) E ala i lona agaga paia ua faamautinoa atu ai e le Atua i lenā tagata, ua valaaulia o ia e avea ma suli o le Malo i le lumanaʻi.—1 Tesa. 2:12.

10. O le ā le uiga o le manatu i le 1 Ioane 2:27 e lē manaʻomia e se Kerisiano faauuina se tasi e aʻoaʻoina o ia?

10 O i latou ua mauaina lenei valaaulia faapitoa mai i le Atua, e latou te lē manaʻomia se isi molimau. E latou te lē manaʻomia foʻi se isi e faamautinoa mai le mea ua tupu iā i latou. E faamautinoa atu e Ieova i o latou loto ma mafaufau. Na faapea atu le aposetolo o Ioane i Kerisiano faauuina: “Ua faauuina foʻi outou e lē e paia; ma ua iloa e outou uma.” Na ia toe faapea atu: “A o outou, ua faauuina outou e le Atua i lona agaga ma ua tumau ia te outou lenā agaga, e tou te lē o toe manaʻomia ai se tasi e aʻoaʻo atu iā te outou; a o le faauuina o outou e ia o loo aʻoaʻoina outou i mea uma, e moni e lē pepelo lava, ma e pei ona aʻoaʻoina outou, ia tumau ai ona outou autasi ma ia.” (1 Ioa. 2:20, 27) E manaʻomia e i latou nei faatonuga faaleagaga e pei foʻi o isi. Peitaʻi e latou te lē manaʻomia se tasi e faamautinoa mai lo latou faauuina, auā ua uma ona faamautinoa mai e le mana e silisili ona malosi, o le agaga paia lea.

 UA “FANAUFOUINA”

11, 12. O le ā e ono taumānatu i ai se Kerisiano faauuina, ae o le ā le mea e na te lē fesiligia?

11 Pe a faauuina se tasi i le agaga paia, e matuā telē le suiga e oo iā te ia. Na faasino atu e Iesu lenei tulaga i le “toe fanau mai,” o le fanaufouina po o le fanau mai lugā. [2] (Ioa. 3:3, 5) Na ia faamatala atili mai: “Aua e te ofo i loʻu fai atu, E tatau ona toe fanau mai outou. E agi le matagi i le itulagi e manaʻo i ai, e te faalogo o agi, ae e te lē iloa le itulagi e sau ai ma agaʻi atu i ai. E faapena foʻi i latou uma o ē e fananau i le agaga.” (Ioa. 3:7, 8) Ua manino mai la e lē mafai ona faamatalaina atoatoa atu le valaaulia faalelagi i se tasi e leʻi faauuina.

12 Atonu e taumānatu le ʻaufaauuina: ʻAiseā ua filifilia ai aʻu? Aiseā ua lē filifilia ai se isi tagata?’ Atonu e latou te taumānatu po ua latou agavaa moni mo lenā faaeaga. Peitaʻi e latou te lē fesiligia le mea moni ua valaauliaina i latou. Ua tumu o latou loto i le olioli ma le talisapaia. E latou te manatu e pei o Peteru lea na faapea mai: “Ia viia le Atua le Tamā o lo tatou Alii o Iesu Keriso, auā e tusa ma lona alofa mutimutivale tele, ua ia fanaufouina ai i tatou i se faamoemoe ola e ala i le toe faatūina o Iesu Keriso mai i le oti, i se tofi e lē pala, e lē faaleagaina, ma e lē mavae. Ua taofia mo outou i le lagi.” (1 Pete. 1:3, 4) Pe a faitau le ʻaufaauuina i nei upu, e latou te mautinoa atoatoa o loo fetalai mai lo latou Tamā o i le lagi iā i latou.

13. O ā mea na tulimataʻia e se tagata a o leʻi faauuina, ma aiseā ua suia ai ona mafaufauga?

13 A o leʻi mauaina lenei molimau mai i le agaga o le Atua, na fiafia nei Kerisiano i le faamoemoe faalelalolagi. Na latou moomoo i le taimi e faamamā ai e Ieova lenei lalolagi, ma mananaʻo e maua faamanuiaga i le lumanaʻi. Atonu na faaata i o latou mafaufau le toe faafeiloaʻia o ē e pele iā i latou pe a toetutū mai. Na latou tulimataʻia le nonofo i fale e latou te fausia ma aai i fua o a latou faatoʻaga. (Isa. 65:21-23) Aiseā na suia ai o latou mafaufau? E leʻi suia o latou mafaufau ona o faalogona mafatia po ua lē fiafia foʻi i lenā faamoemoe. E leʻi fiu i latou i lenei lalolagi, ma latou manatu ai o le ola e faavavau i le lalolagi o se mea e lē fiafia ai, po ua latou fia iloa foʻi pe faapeʻī le olaga i le lagi. Na māfua ona suia o latou mafaufau ona o le agaga paia o le Atua lea na valaauliaina i latou, ma suia ai lo latou faamoemoe ma manatu.

14. O le ā le vaaiga a ē faauuina i o latou olaga i le taimi lenei i le lalolagi?

14 Po o lona uiga la ua fia feoti ē ua faauuina? Na tali mai Paulo: “O i tatou o loo i lenei faleʻie, ua feoi ma mafatia; auā tatou te lē fia toesea lenei ofu ae oofu i le isi, ina ia suia ai le tino e mafai ona oti i le ola.” (2 Kori. 5:4) E leʻi mou atu lo latou fiafia i lenei olaga ma mananaʻo ai e vave ona maliliu. Ae o loo naunau i latou e faaaogā aso uma i le auaunaga iā Ieova faatasi ma uō ma aiga. E tusa lava po o ā mea o loo latou faia, ae latou te manatua pea le faamoemoe ofoofogia i le lumanaʻi.—1 Kori. 15:53; 2 Pete. 1:4; 1 Ioa. 3:2, 3; Faaa. 20:6.

PO UA VALAAULIA OE?

15. O ā vala e lē faamaonia ai ua faauuina se tasi i le agaga paia?

15 Atonu e te taumānatu po ua e mauaina lenei valaaulia matagofie. Pe afai o  lea, ia manatunatu i nisi o fesili tāua nei. Po ua sili atu loʻu maelega i le galuega talaʻi? Po o aʻu o se tagata aʻoga o le Afioga a le Atua e naunau e matuā saʻiliʻili i “mea loloto a le Atua”? (1 Kori. 2:10) Po ua ou vaaia faamanuiaga faapitoa a Ieova i laʻu faiva? Po o oʻu matuā naunau e faia le finagalo o Ieova? Po o oʻu manatu o laʻu tiute tauave le fesoasoani faaleagaga i isi? Po ua iai ni faamaoniga o le fesoasoani a Ieova i loʻu olaga? Pe afai o lau tali i nei fesili o le ioe, po o lona uiga la ua e mauaina le valaau faalelagi? E leai. Aiseā? Talu ai e lē na o i latou e mauaina le valaau faalelagi e oo iai na faalogona. E faapena foʻi ona galue le agaga o Ieova iā i latou e iai le faamoemoe e ola e faavavau i le lalolagi. O lea, pe afai o e taumānatu po ua e mauaina le valaau faalelagi, o lona uiga la e leʻi valaauliaina oe. O i latou ua valaauina e Ieova e lē taumānatu po ua valaauliaina i latou pe leai. E latou te iloa ma le mautinoa.

16. E faapefea ona tatou iloa e lē o i latou uma na mauaina le agaga paia e valaaulia e ō i le lagi?

16 Ua tatou vāai i le Tusi Paia i le tele o faaaʻoaʻoga o tane faamaoni o ē na mauaina le agaga paia, ae latou te leʻi faamoemoe e ola i le lagi. O se tasi o i latou o Ioane le Papatiso. Na matuā viiviia o ia e Iesu, ae leʻi aofia ai Ioane i le Malo i le lagi. (Mata. 11:10, 11) Na taʻitaʻia foʻi Tavita e le agaga paia. (1 Samu. 16:13) Sa loloto lona malamalamaga faaleagaga ma sa faagaeeina o ia e tusia ni vaega o le Tusi Paia. (Mare. 12:36) Peitaʻi i le aso o le Penetekoso, na faapea mai Peteru e faatatau iā Tavita ʻe leʻi alu aʻe o ia i le lagi.’ (Galu. 2:34) Na avatu e Ieova lona agaga paia iā i latou ina ia faia ai mea ofoofogia, ae e leʻi filifilia i latou e ola i le lagi. E lē faapea ai ua latou lē faamaoni po ua lē agavaa. Peitaʻi, o le a toe faatutūina i latou e Ieova i le lalolagi parataiso.—Ioa. 5:28, 29; Galu. 24:15.

17, 18. (a) O le ā le faamoemoe o loo tulimataʻia e le toʻatele o auauna a le Atua i aso nei? (e) O ā fesili o le a taliina i le mataupu o loo sosoo mai?

17 O le toʻatele o auauna a le Atua i aso nei e lē mauaina lenei valaau faalelagi. E tutusa o latou faamoemoe ma Tavita, Ioane le Papatiso, ma tane ma fafine faamaoni anamua. E pei o Aperaamo, ua latou tepa taulaʻi e ola o ni tagatānuu i lalo o le pulega o le Malo. (Epe. 11:10) E na o se vaega toʻaitiiti o i latou ua filifilia e ola i le lagi, o loo totoe i le lalolagi i lenei taimi o le iʻuga. (Faaa. 12:17) O lona uiga o le toʻatele o le 144,000 ua maliliu ma le faamaoni.

18 O le ā le vaaiga a i latou e faamoemoe e ola i le lalolagi i se tasi e faapea mai e iai lona faamoemoe faalelagi? Pe afai e amata ona tagofia e se tasi i la outou faapotopotoga le areto ma le uaina i le Talisuaga Afiafi a le Alii, o le ā lau vaai i lenā tagata? Po o le a e popole ea i le faateleina o le aofaʻi o i latou e faapea mai ua latou maua le valaau faalelagi? O le a taliina nei fesili i le mataupu o loo sosoo mai.

^ [1] (palakalafa e 4) E foliga mai e tutusa le taimi o le tausaga e faamanatu ai le Penetekoso ma le taimi na tuuina mai ai le Tulafono i Sinai. (Eso. 19:1) O lea, e pei ona aumaia e Mose le nuu o Isaraelu i totonu o le feagaiga o le Tulafono i lenā aso, na faapena foʻi ona aumaia e Iesu Keriso i lenā lava aso se nuu fou, po o le Isaraelu faaleagaga i totonu o le feagaiga fou.

^ [2] (palakalafa e 11) Mo nisi faamatalaga atili o le uiga o le fanaufouina, tagaʻi i Le Olomatamata o Aperila 1, 2009, itu. 3-11.