Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) AOKUSO 2016

Ia Saʻili se Mea e Sili Atu Nai lo o le Auro

Ia Saʻili se Mea e Sili Atu Nai lo o le Auro

Pe na e mauaina se fasi auro māoʻi? E toʻaitiiti lava ni tagata na latou mauaina. Peitaʻi, e faitau miliona tagata ua latou mauaina se mea e sili atu. O lenā mea o le atamai mai le Atua, lea ʻe lē mafai ona faatauina i le auro māoʻi.’—Iopu 28:12, 15.

E IAI auala ua pei ai tagata suʻesuʻe faamaoni o le Tusi Paia o ni tagata saʻili auro. E manaʻomia e na tagata suʻesuʻe ona galulue mamafa ma saʻiliʻili pea i le Tusi Paia ina ia maua lenā atamai. I le avea ai ma tagata suʻesuʻe o le Tusi Paia, o le ā e tatou te aʻoaʻoina mai i auala e tolu e saʻili ai auro?

UA E MAUA SE FASI AURO!

Seʻi faapea o loo e savali i autafa o se vaitafe, ma ua e iloa atu se tamaʻi maa ua ilaila mai ina ua sulugia e le lā. Ua e punou ifo ma le fiafia tele ona ua e maua se fasi auro. E laʻitiiti ifo nai lo o le ulu o se laau afitusi, ma e mauagatā nai lo o se taimane lelei. E mautinoa o le a e autilo solo mo nisi fasi auro.

I se tulaga talitutusa, e lē galo iā te oe le aso na asiasi atu ai Molimau a Ieova e faailoa atu le feʻau o le faamoemoe o loo i le Tusi Paia. Atonu e te manatua lelei le taimi na maua ai lau uluaʻi auro faaleagaga. Atonu o le taimi muamua lenā na e faitau ai i le Tusi Paia, o Ieova o le suafa lea o le Atua. (Sala. 83:18) E lē taumatea, na e iloaina ai foʻi e mafai ona avea oe ma uō a Ieova. (Iako. 2:23) O le taimi tonu lea ua e iloa ai ua e mauaina se mea e sili atu nai lo o le auro! Ua faaosofia ai ma lou naunau e saʻilia nisi auro faaleagaga.

UA E MAUA NISI AURO!

E iai taimi e maua ai fasi auro ninii i ālia ma vaitafe. I taimi e ʻeli ai le auro, atonu e maua ai e tagata ʻeli auro nei faaputuga o auro, lea e faitau afe tālā lo latou tau.

Ina ua amata ona e suʻesuʻe ma Molimau a Ieova, atonu e pei ou faalogona o le tagata ʻeli auro ina ua ia maua se faaputuga auro. O lou manatunatu loloto i mau o le Tusi Paia ua faateleina ai lou poto, lea ua faaʻoaina ai oe i le itu faaleagaga. A o e manatunatu loloto i na upu moni tautele o le Tusi Paia, na e aʻoaʻoina ai auala e mafai ona e mafuta vavalalata ai iā Ieova, ma faatumauina ai oe i lona alofa a o tulimataʻia le ola e faavavau.—Iako. 4:8; Iuta 20, 21.

E pei o se tagata o loo galue mamafa e saʻilia ni auro, po o e filigā e aʻoaʻoina upu moni tautele o le Tusi Paia?

E pei o se tagata ʻeli auro o loo saʻilia ni auro tautele, atonu na e filigā foʻi e saʻilia ni ʻoa tautele faaleagaga. Ina ua māeʻa ona e aʻoaʻoina aʻoaʻoga faavae o le Tusi Paia, e mautinoa na uunaʻia ai oe e  uia laasaga mo le tuuina atu ma le papatisoga.—Mata. 28:19, 20.

IA SAʻILI PEA!

Atonu e maua e se tagata ʻeli auro ni auro ninii i totonu o ni maa tetele. O nei maa o loo iai ni auro, e tatau ai ona taʻei ina ia aumai i fafo auro. I le taimi muamua, atonu e leʻi iloa atu se auro i totonu o nei maa. Aiseā? Talu ai e pe tusa e na o le 10 kalama le mamafa o ni auro ninii e maua i totonu o se maa e tasi le tone le mamafa. E ui i lea, e manatu le tagata ʻeli auro e alu aogā lona malosi.

E manaʻomia foʻi taumafaiga pe afai ua māeʻa ona aʻoaʻoina e se tasi “aʻoaʻoga muamua e uiga iā Keriso.” (Epe. 6:1, 2) E manaʻomia ona e taumafai malosi e maua ni manatu fou ma lesona aogā mai i au suʻesuʻega o le Tusi Paia. O lea, o le ā e tatau ona e faia e faamautinoa ai o loo maua pea aogā mai i au suʻesuʻega o le Tusi Paia, e ui ua tele tausaga talu ona e suʻesuʻeina le Tusi Paia?

Ia naunau pea e aʻoaʻoina ni mea. Ia uaʻi totoʻa atu i faamatalaga. O le faia pea o au taumafaiga, o le a e maua ai ni auro tautele mai i le Tusi Paia, o le atamai lea mai i le Atua ma le taʻitaʻiga. (Roma 11:33) Ia faaaogā lelei meafaigaluega mo saʻiliʻiliga o loo maua i lau gagana, ina ia faateleina ai lou poto i le Tusi Paia. Ia onosaʻi e saʻili le taʻitaʻiga o loo e manaʻomia, faapea tali o au fesili faale-Tusi Paia. Ia fesili atu i isi e faatatau i mau ma mataupu na fesoasoani ma faalaeiauina ai i latou. Ia faasoa atu foʻi ni manatu mananaia na e mauaina mai i au suʻesuʻega o le Tusi Paia.

E mautinoa o lou sini e lē na o le faateleina o le poto. Na lapataʻi mai le aposetolo o Paulo “o le poto e faafefete ai.” (1 Kori. 8:1) O lea, ia galue mamafa e faatumau lou lotomaulalo ma faamalosia lou faatuatua. O le faia e lē aunoa o le tapuaʻiga a le aiga ma au lava suʻesuʻega o le Tusi Paia, o le a fesoasoani iā te oe e ola ai e ōgatusa ma taʻiala a Ieova, ma uunaʻia ai oe e fesoasoani atu i isi. Ae e sili atu i lenā, o le a e olioli ona ua e mauaina se mea e sili atu nai lo o le auro.—Faata. 3:13, 14.

Faitau Atili

O ā Mea e Manaʻomia Ona E Faia Ina ia Malamalama ai i le Tusi Paia?

E tusa po o lē a lava lou talaaga, e mafai ona e malamalama i le feʻau a le Atua o loo i le Tusi Paia.