Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) AOKUSO 2016

Auala e Taulau Manuia ai Faaipoipoga a Kerisiano

Auala e Taulau Manuia ai Faaipoipoga a Kerisiano

“Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.”—EFE. 5:33.

PESE: 87, 3

1. E ui e amata le faaipoipoga i le olioli, ae o le ā e tatau ona faatalitalia e tagata faaipoipo? (Tagaʻi i le ata i luga aʻe o le matua.)

PE A tū le tamaʻitaʻi faaipoipo lalelei i luma o le alii faaipoipo i le aso o le faaipoipoga, e lē mafai e upu ona faamatalaina lo laʻua olioli. A o faia le faigāuō, sa faasolo ina matuā alofa le tasi i le isi, ma nofosauni e tautō o le a faamaoni le tasi i le isi pe a faaipoipo. O le mea mautinoa, e manaʻomia ona fai ni fetuunaʻiga ona o le a faatasia ni tagata se toʻalua ma faavae se aiga fou. Peitaʻi, ua iai i le Afioga a le Atua fautuaga atamai mo i latou ua filifili e faaipoipo, auā e finagalo Lē na faavaeina faaipoipoga, ina ia taulau manuia ma fiafia ulugalii faaipoipo. (Faata. 18:22) Ae ua faailoa mai foʻi i le Tusi Paia, ʻe oo puapuaga i tino’ o tagata lē lelei atoatoa ua faaipoipo. (1 Kori. 7:28) E faapefea ona faaitiitia na puapuaga? E faapefea ona taulau manuia faaipoipoga a Kerisiano?

2. O ā ituaiga o alofa e tatau ona faaalia e paaga faaipoipo?

2 Ua faamatilatila i le Tusi Paia le tāua o le alofa. E manaʻomia  i le faaipoipoga le alofa faapelepele (upu Eleni, phi·liʹa). O le alofa fetosinaaʻi (eʹros) e maua ai le fiafia, ae e tāua tele le alofa i le aiga (stor·geʹ) pe a maua se fanau. Peitaʻi, o le alofa e faavae i mataupu silisili (a·gaʹpe), e mautinoa ai le taulau manuia o se faaipoipoga. Na tusi le aposetolo o Paulo e faatatau i lenei alofa: “Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.”—Efe. 5:33.

SE ILOILOGA O TIUTE TAUAVE A PAAGA FAAIPOIPO

3. O le ā le malosi e tatau ona oo i ai le alofa i le faaipoipoga?

3 Na tusi Paulo: “O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi mai lona ola mo le faapotopotoga.” (Efe. 5:25) O le mulimuli i le faaaʻoaʻoga a Iesu, e manaʻomia ai ona faaalia e ona soo le alofa o le tasi i le isi, e pei ona faaalia e Iesu le alofa iā i latou. (Faitau le Ioane 13:34, 35; 15:12, 13.) O lea, e tatau ai ona matuā malosi le alofa e faaalia e Kerisiano i a latou faaipoipoga, ma e ono lotomalie ai e maliu mo le isi paaga. Ae pe a tulaʻi mai feeseeseaʻiga matuiā, e manatu nisi e lē lava le malosi o lo latou alofa e faia ai lenā gaoioiga. E ui i lea, o le alofa e faavae i mataupu silisili (a·gaʹpe) “e onosaʻi i mea uma, e talitonu i mea uma, e faamoemoe i mea uma, e tumau i mea uma.” Ioe, “e lē uma le alofa.” (1 Kori. 13:7, 8) O le manatuaina o la laʻua tautoga e faamaoni ma alofa le tasi i le isi, o le a fesoasoani i paaga faaipoipo e matataʻu i le Atua ina ia galulue faatasi e faatatau mataupu silisili a Ieova ina ia foʻia ai faafitauli e ono tulaʻi mai.

4, 5. (a) O le ā le vaaiga a le avā i le tulaga ulu? (e) O le ā le tiute tauave a le tane i le avea ai ma ulu o le aiga? (i) O ā fetuunaʻiga na manaʻomia ona faia e se ulugalii faaipoipo?

4 Na tusi Paulo e faatatau i tiute tauave a paaga taʻitasi: “O avā, ia gauaʻi atu i a latou lava tane e pei ona gauaʻi atu i le Alii, auā o le tane o le ulu lea o le avā, e pei foʻi o Keriso o le ulu ia o le faapotopotoga.” (Efe. 5:22, 23) O lenei faatulagaga e lē faapea ai e faatauvaa le avā nai lo o le tane. Peitaʻi, e fesoasoani ai i se avā e faatino lana matafaioi na tuuina mai e le Atua: “E lē lelei mo le tagata [Atamu] ona ola na o ia. Ou te faia se fesoasoani mo ia, o sē e talafeagai lelei mo ia.” (Kene. 2:18) E pei ona faaalia e Keriso ʻle ulu o le faapotopotoga’ le alofa, e tatau foʻi i se tane Kerisiano ona faatino i se auala alofa lona tulaga ulu. Pe a ia faia faapea, o le a lagona e lana avā le malupuipuia ma le faamalieina a o ia faaalia le faaaloalo, lagolagosua, ma le gauaʻi.

5 O le faaipoipoga e manaʻomia ai ni fetuunaʻiga, na taʻutino mai e Cathy: [1] “A o oʻu nofofua, sa fai aʻu lava fuafuaga ma tausia aʻu lava. Ae ina ua ou faaipoipo na tatau ona faia ni fetuunaʻiga, ona ua manaʻomia ona ou faalagolago i laʻu tane. E leʻi faigofie i taimi uma, ae ua matuā māfana la maʻua faiā ona o le faia o mea i auala a Ieova.” Ua faapea mai lana tane o Fred: “E leʻi faigofie iā te aʻu le faia o faaiʻuga. Ae ua atili ai ona faigatā ona o lea ua toʻalua i maʻua. Peitaʻi, na faasolo ina faigofie i aso taʻitasi ona o le saʻili i le taʻitaʻiga a le Atua i le tatalo ma faalogologo lelei i manatu o laʻu avā. Ua ou lagona lo ma autasi!”

6. E faapefea ona avea le alofa o se ʻfusi e atoatoa ona autasi ai,’ pe a tulaʻi mai faafitauli i le faaipoipoga?

6 O se faaipoipoga malosi e faia aʻe i tagata e toʻalua e faapalepale le tasi i vaivaiga o le isi. E ʻfaaauau ona onosaʻi le tasi i le isi,  ma fefaamagaloaʻi ma le lotoatoa.’ Ioe, e faia e paaga uma e toʻalua mea sesē. Pe a tupu lenā mea, o avanoa na e aʻoaʻo ai lesona mai i mea sesē, faamagalo atu, ma avea ai le alofa o se ʻfusi e atoatoa ona autasi ai.’ (Kolo. 3:13, 14) E lē gata i lea, “e faapalepale ma e agalelei le alofa. . . . E lē faitauina mea leaga e fai atu iā te ia.” (1 Kori. 13:4, 5) E tatau ona taulima ni vala e lē femalamalamaaʻi ai i le vave e mafai ai. O lea, e tatau i se ulugalii Kerisiano ona taumafai e foʻia so o se faafitauli a o leʻi uma le aso. (Efe. 4:26, 27) E manaʻomia le lotomaulalo ma le lototele e faapea atu ai ma le faamaoni, “Ou te faamalie atu ona o loʻu faatigā iā te oe.” O le faia faapea, e telē le aogā i le foʻiaina o faafitauli ma atili ai ona māfana ulugalii faaipoipo.

E MATUĀ MANAʻOMIA LE FAAPELEPELE

7, 8. (a) O ā fautuaga ua aumaia e le Tusi Paia e faatatau i feusuaʻiga i le faaipoipoga? (e) Aiseā e tatau ai i ulugalii faaipoipo ona faaalia le faapelepele i taimi o feusuaʻiga?

7 Ua aumaia e le Tusi Paia fautuaga aogā e maua ai e ulugalii le vaaiga paleni i feusuaʻiga. (Faitau le 1 Korinito 7:3-5.) E tāua le manatu mamafa i faalogona ma manaʻoga o le isi paaga. Pe a lē feutagaʻi ma le avā i se auala faapelepele, o le a faigatā ona ia fiafia i lea vala o le faaipoipoga. Ua fautuaina tane ina ia feutagaʻi ma a latou avā e “tusa ma le poto.” (1 Pete. 3:7) E lē tatau ona faamalosia pe tauanauina le faia o feusuaʻiga, peitaʻi ia faia ma le lotomalie. E masani ona malolosi atu faalogona o le tane nai lo o le avā, ae e tatau ona faia feusuaʻiga i se taimi e talafeagai uma ma o la faalogona.

8 E lē o taʻua i le Tusi Paia ni tulafono patino e faatatau i ituaiga ma mea e gata mai ai le faia o feusuaʻiga e pei ona masani ai, peitaʻi o loo taʻua ai nisi o faailoaga o le alofa. (Pese 1:2; 2:6) E tatau i ulugalii Kerisiano ona feutagaʻi i se auala faapelepele.

9. O le ā e fesoasoani iā i tatou e lē faatagaina ai so o se mea e aafia ai a tatou faaipoipoga?

9 O le malosi o lo tatou alofa mo le Atua ma o tatou tuaoi, o le a tatou lē faatagaina ai so o se mea e aafia ai a tatou faaipoipoga. Ua lamatia po ua faalētonu nisi faaipoipoga ona o le naunau o isi paaga i ata matagā tau feusuaʻiga. E tatau ona matuā teena so o se faanaunauga i nei ata po o le tuʻinanau foʻi i so o se ituaiga o feusuaʻiga i fafo atu o le liʻo o le faaipoipoga. O se faiga lē alofa foʻi ma e tatau ona ʻalofia le faatafai atu i se isi tagata e ese mai i lau paaga faaipoipo. O le manatuaina e silafia e le Atua o tatou mafaufauga ma gaoioiga, e faamalosia ai lo tatou faanaunauga e faafiafia o ia ma tumau ai ona mamā.—Faitau le Mataio 5:27, 28; Eperu 4:13.

PE A TULAʻI MAI FAAFITAULI MATUIĀ I LE FAAIPOIPOGA

10, 11. (a) O le ā le taatele o tatalaga faaipoipoga? (e) O le ā le faamatalaga a le Tusi Paia e faatatau i le nonofo eseese? (i) O le ā e fesoasoani i se ulugalii e ʻalofia ai le vave faia o se faaiʻuga ina ia nonofo eseese?

10 O le iai pea o faafitauli matuiā i le faaipoipoga, e ono manatu ai se paaga po o paaga uma foʻi e nonofo eseese pe tatala le faaipoipoga. I nisi atunuu, o le silia i le ʻafa o faaipoipoga ua tatalaina. E lē taatele lenei faafitauli i faapotopotoga Kerisiano, ae o le faatupulaʻia o faafitauli i faaipoipoga a tagata o le Atua, ua tulaʻi ai se popolega.

11 Ua aumaia i le Tusi Paia faatonuga nei: “E lē tatau i se avā ona tuua lana tane; ae afai e tuua e ia lana tane, ia nofofua pea o ia pe toe faalelei ma lana tane, ma e lē tatau i le tane ona tuua lana avā.” (1 Kori. 7:10, 11) E lē tatau ona manatu māmā pe a nofo ese se tasi mai i lana paaga faaipoipo. E ui e foliga mai o le nonofo eseese o le tali lea pe a tulaʻi mai faafitauli matuiā, peitaʻi  e masani ona tulaʻi mai ai isi faafitauli. Ina ua māeʻa ona toe taʻua e Iesu le faamatalaga a le Atua e faatatau i le tuua e le tamāloa o lona tamā ma lona tinā ae nonofo faatasi ma lana avā, ona ia fetalai lea: “O ē ua faatasia e le Atua, aua neʻi tuueseeseina e se tagata.” (Mata. 19:3-6; Kene. 2:24) O lona uiga e oo lava i le tane ma le avā e lē tatau ona la tuueseeseina i laʻua, auā “ua faatasia e le Atua.” E silasila Ieova i le faaipoipoga o se mafutaga mo le olaga atoa. (1 Kori. 7:39) O le manatuaina e tatou te tali atu uma i le Atua, e uunaʻia ai paaga faaipoipo e faia taumafaiga uma e vave foʻia ai faafitauli a o leʻi faateteleina.

12. O le ā atonu e māfua ai ona mafaufau se ulugalii e nonofo eseese?

12 O faamoemoega e lē taunuu, atonu o le aa lea o faafitauli i le faaipoipoga. Pe a lē taunuu moomooga o se tasi mo se faaipoipoga fiafia, atonu e lagona ai le lē faamalieina, faasesēina, faapea le ita. Atonu e tulaʻi mai faafitauli ona o le eseese o faalogona ma le auala na ola aʻe ai, po o le feeseeseaʻi foʻi i tupe, o aiga, ma le tausia o fanau. Peitaʻi, o se mea e faafetai ai ona o le toʻatele o ulugalii Kerisiano e latou te saʻilia vaifofō o na faafitauli, ona o lo latou faatagaina o le Atua e taʻitaʻia i latou.

13. O ā māfuaaga e talafeagai ai ona nonofo eseese?

13 E iai taimi e talafeagai ai ona nonofo eseese. O le matuā lē manaʻo e tausia le aiga, matuā sauāina, matuā lamatia le tulaga faaleagaga o se tasi, o tulaga matuiā na ua filifili nisi e nonofo eseese ai. E tatau i ulugalii Kerisiano o loo fesagaʻia faafitauli matuiā i a latou faaipoipoga, ona saʻili atu i toeaina mo le fesoasoani. E mafai ona fesoasoani nei uso ua iai le poto masani i ulugalii, ina ia faatatau fautuaga mai le Afioga a le Atua. A o taumafai e foʻia faafitauli i le faaipoipoga, e tatau ona tatou tatalo atu i le agaga paia o Ieova ma lana fesoasoani e faatatau mataupu silisili o le Tusi Paia, ma faaalia vala o le fua o le agaga.—Kala. 5:22, 23. [2]

14. O le ā le faamatalaga a le Tusi Paia e faatatau i Kerisiano e lē tapuaʻi iā Ieova a latou paaga?

14 I nisi tulaga, e faaipoipo atu ai se Kerisiano i se tasi e lē auauna iā Ieova. Ua aumaia e le Tusi Paia māfuaaga lelei e tatau ai ona nonofo faatasi pea i laʻua. (Faitau le 1 Korinito 7:12-14.) E tusa pe e iloa pe e lē iloa e le paaga lē talitonu, ae ua “faapaiaina” o ia ona ua faaipoipo atu i sē talitonu. E “paia” foʻi a la fanau ma ua mafai ona latou maua le puipuiga faaleagaga. Na faapea mai Paulo: “O oe le avā, e te lē iloa ea e mafai ona faaolaina lau tane ona o oe? O oe le tane, e te lē iloa ea e mafai ona faaolaina lau avā ona o oe?” (1 Kori. 7:16) E toetoe o faapotopotoga uma a Molimau a Ieova, e iai ulugalii ua mafai ona “faaolaina” le isi paaga ona o le Kerisiano.

15, 16. (a) O le ā le fautuaga a le Tusi Paia e faatatau i avā e lē auauna a latou tane i le Atua? (e) O le ā le tulaga o se Kerisiano pe “afai e alu ese lē e lē talitonu”?

15 Na fautua mai le aposetolo o Peteru e tatau i avā Kerisiano ona gauaʻi i a latou tane, “afai e lē usiusitaʻi nisi i le upu, e mafai ona maua i latou i le amiolelei a a latou avā e aunoa ma se upu, auā ua latou vāaitino i a outou amioga mamā ma le matuā faaaloalo.” O le faaalia “o le agaga agamalu ma le filemu, o le mea tautele lava lea i le silafaga a le Atua,” o le gaoioiga sili lea e faia e le avā e faaliliu ai lana tane i le tapuaʻiga moni, nai lo o le taumafai e talanoa atu i taimi uma e faatatau i ona talitonuga faa-Kerisiano.—1 Pete. 3:1-4.

16 Ae faapefea pe a filifili le paaga lē talitonu e nonofo eseese? Ua faapea mai le Tusi Paia: “Afai e alu ese lē e lē talitonu, ia alu ese pea o ia, e lē faapologaina se uso po  o se tuafafine i tulaga faapena, a ua valaauina outou e le Atua ina ia filemu.” (1 Kori. 7:15) E lē uiga ai ua mafai ona saʻoloto faale-Tusi Paia le paaga talitonu e toe faaipoipo, ma e lē tatau foʻi ona faamalosia le paaga lē talitonu ina ia nonofo pea. O le nonofo eseese e ono maua ai le filemu. Ae e faamoemoe le paaga talitonu o le a toe foʻi mai lana paaga e toe faaleleia la laʻua faaipoipoga, ma oo ina avea o ia ma tagata talitonu.

FAAIPOIPOGA MA MEA E FAAMUAMUA

O le faamuamua o mea faaleagaga e atili ai ona fiafia lau faaipoipoga (Tagaʻi i le palakalafa e 17)

17. O le ā e tatau ona faamuamua e ulugalii Kerisiano?

17 Ua tatou iai i le taufaaiʻuiʻuga o “aso e gata ai,” o lea ua tatou ola ai i “aso e sili ona faigatā.” (2 Timo. 3:1-5) O le tumau ona tatou malolosi faaleagaga, o le a mafai ai ona tatou teena taaʻiga leaga a le lalolagi. Na tusi Paulo: “Ua itiiti le taimi o totoe.” O lea, ʻo i latou o ē ua iai avā, ia peiseaʻī e leai ni a latou avā, ma o i latou o faaaogā mea a le lalolagi, ia peiseaʻī e lē o faaaogāina atoatoa.’ (1 Kori. 7:29-31) E leʻi faapea mai Paulo e tatau i ulugalii faaipoipo ona lafoaʻia o latou tiute tauave. Peitaʻi ona ua itiiti le taimi ua totoe, e manaʻomia ai ona latou faamuamuaina mea faaleagaga.—Mata. 6:33.

18. Aiseā e mafai ai ona fiafia ma taulau manuia faaipoipoga a Kerisiano?

18 E ui ua tatou ola i taimi e sili ona faigatā ma ua tatou vaaia le tele o faaipoipoga ua lē taulau, ae e mafai lava ona fiafia ma taulau manuia a tatou faaipoipoga. O lea, o ulugalii e auaufaatasi ma tagata o Ieova, faatatau fautuaga a le Tusi Paia, ma talia le taʻitaʻiga a le agaga paia, e mafai ona latou faatumauina le mea na “faatasia e le Atua.”—Mare. 10:9.

^ [1] (palakalafa e 5) Ua suia nisi igoa.

^ [2] (palakalafa e 13) Tagaʻi i le tusi ʻIa Faatumau iā te Outou i le Alofa o le Atua,’ faaopoopoga, “O le Aʻoaʻoga a le Tusi Paia i le Teteʻa ma le Nonofo Eseese”.