Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 5 2017

 MATAUPU AUTŪ | PE E IAI MONI NI AGELU?

Auala e Mafai Ona Fesoasoani ai Agelu iā te Oe

Auala e Mafai Ona Fesoasoani ai Agelu iā te Oe

E naunau moni agelu faamaoni i tagata, ma o loo faia so latou sao i le faataunuuina o le finagalo o Ieova. Ina ua foafoaina e Ieova le lalolagi, na ʻalalaga faatasi ma le olioli, ma alalaga i viiga atalii uma o le Atua.’ (Iopu 38:4, 7) I le faagasologa o le talafaasolopito, e naunau tele agelu “e vaavaai” i fetalaiga faavaloaga e faatatau i mea o le a tutupu i le lalolagi.​—1 Peteru 1:11, 12.

Ua faailoa mai i le Tusi Paia ina ia faataunuuina le finagalo o le Atua, e iai taimi na saunia mai ai e agelu se puipuiga mo tagata tapuaʻi faamaoni. (Salamo 34:7) O ni faaaʻoaʻoga:

  • Ina ua faaoo mai e Ieova le faaumatiaga i aai amioleaga o Sotoma ma Komoro, na fesoasoani agelu iā Lota le tagata amiotonu ma lona aiga, ina ia sosola ese.​—Kenese 19:1, 15-26.

  • Ina ua faasalaina talavou Eperu e toʻatolu i Papelonia anamua e susunu i se ogaumu aasa, na ʻauina mai e le Atua lana agelu e laveaʻi i ana auauna.’​—Tanielu 3:19-28.

  • Ina ua mavae le pō talu ona lafoina le tagata faamaoni o Tanielu i le lua o leona feʻai, na ia faamatala mai na faasaoina lona ola ona ʻna auina mai e le Atua lana agelu e punitia gutu o leona.’​—Tanielu 6:16, 22.

Ua leva ona fesoasoani agelu i tagata faamaoni

NA LAGOLAGOINA E AGELU LE ULUAʻI FAAPOTOPOTOGA KERISIANO

E iai taimi na fesoasoani ai agelu avefeʻau i galuega a le uluaʻi faapotopotoga Kerisiano, pe afai na manaʻomia ina ia faataunuuina ai fuafuaga a Ieova. O ni faaaʻoaʻoga:

  • Na tatala e se agelu faitotoʻa o se falepuipui ma faatonuina aposetolo na faafalepuipui ai i inā, ina ia faaauau ona talaʻi atu i le malumalu.​—Galuega 5:17-21.

  • Na faatonuina e se agelu le faievagelia o Filipo e alu atu i le auala i le toafa lea e amata mai i Ierusalema seʻia oo i Kasa, ma talaʻi atu i se tagata Aitiope na alu ane i Ierusalema e tapuaʻi ai.​—Galuega 8:26-33.

  • Ina ua oo i le taimi atofaina a le Atua e avea ai tagata e lē o ni Iutaia ma Kerisiano, na faaali ane se agelu e ala i se faaaliga i le taʻitaʻiʻau o vaegaau a Roma o Konelio, ma faatonuina o ia e aami le aposetolo o Peteru i lona fale.​—Galuega 10:3-5.

  • A o faafalepuipuiina le aposetolo o Peteru, na faaali ane se agelu iā te ia ma taʻitaʻi ese o ia mai i le falepuipui.​—Galuega 12:1-11.

 AUALA E MAFAI ONA FESOASOANI AI AGELU IĀ TE OE

E leai ni faamaoniga e iloa ai o loo faaaogā e le Atua agelu e fesoasoani faavavega mai i tagata i aso nei, e pei o auala o loo faamatalaina i le Tusi Paia. Peitaʻi e tusa ai ma o tatou aso, na faapea mai Iesu: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mataio 24:14) Pe e te silafia o loo faia e soo o Keriso lenei galuega i lalo o le vaavaaiga a agelu?

O loo fesoasoani agelu i le faalauiloa atu o le tala lelei i le lalolagi atoa

O loo faaalia i le tusi o Faaaliga agelu o loo galulue mamafa e fesoasoani i tagata i le lalolagi aoao, e aʻoaʻoina e faatatau iā Ieova le Atua ma lona finagalo mo tagata. Na tusi le aposetolo o Ioane: “Ona ou iloa lea o le isi agelu o loo lele i le taulotoaʻiga o le lagi, ua iā te ia le tala lelei e faavavau e folafola atu, o se tala fiafia i ē o loo nonofo i le lalolagi, ma nuu uma, ma ituaiga uma, ma gagana uma, ma tagata uma, ua faapea atu ma le leotele: ʻIa matataʻu i le Atua ma ia faamamaluina o ia, auā ua oo mai le itula o lana faamasinoga, ma ia tapuaʻi i Lē na faia le lagi, ma le lalolagi, ma le sami, ma vaipuna.’” (Faaaliga 14:6, 7) O le tele o mea o loo tutupu i aso nei, o se faamaoniga lea o loo lagolagoina e agelu le galuega talaʻi o le Malo i le lalolagi aoao. E oo lava foʻi i se tagata agasala e toʻatasi e salamō ma liliu atu iā Ieova, ʻe olioli ai agelu a le Atua.’—Luka 15:10.

O le ā e tupu pe a māeʻa le galuega talaʻi? O le a lagolagoina e “ʻautau o le lagi” lea e faia aʻe i agelu, ia Iesu Keriso le Tupu o tupu, e tau iā Amaketo “le taua o le aso tele o le Atua o Lē e ona le malosi uma lava.” (Faaaliga 16:14-16; 19:14-16) O le a aumaia e agelu malolosi sala faafaamasinoga, a o faaoo mai e Iesu “le tauimasui i . . . ē e lē usiusitaʻi i le tala lelei a lo tatou Alii o Iesu.”​—2 Tesalonia 1:7, 8.

Ae ia mautinoa o loo naunau moni mai agelu iā te oe. E manatu mamafa mai foʻi mo le lelei o i latou e naunau e auauna i le Atua, ma o loo faaauau pea ona faaaogā i latou e Ieova, ina ia faamalosia ma puipuia ana auauna faamaoni i le lalolagi.​—Eperu 1:14.

O i tatou uma lava e iai se filifiliga tāua e tatau ona fai. Po o le a tatou faalogo atu ma usitaʻia le tala lelei o loo folafola i le lalolagi atoa? E fiafia Molimau a Ieova i lou vaipanoa e fesoasoani atu iā te oe, ina ia e maua aogā mai i le auala alofa ua fesoasoani mai ai agelu malolosi a le Atua.