E lē o aʻoaʻoina i le Tusi Paia e tofu le tagata ma le agelu e leoleoina o ia. E moni e faatasi ona faapea mai Iesu: “Vaai lelei ia aua neʻi o outou ʻinoʻino i se tasi o i latou nei e faatauvaa [soo o Keriso], auā ou te fai atu iā te outou o loo vaavaai atu pea a latou agelu i le lagi, i fofoga o loʻu Tamā o i le lagi.” (Mataio 18:10) Nai lo o le faapea mai o Iesu e tofu tagata taʻitoʻatasi ma se agelu e leoleoina o ia, ae na ia faasino atu e naunau mai agelu i ona soo taʻitoʻatasi. O lea, e lē faia ai e tagata tapuaʻi moni ni gaoioiga lē atamai pe lamatia ai foʻi le ola, ma le manatu o le a puipuia i latou e agelu a le Atua.

Po o lona uiga la e lē fesoasoani agelu i tagata? E leai. (Salamo 91:11) O nisi e mautinoa e saunia e le Atua le puipuiga ma le taʻitaʻiga mo i latou e ala mai i agelu. E faapena le manatu o Kenneth lea na taʻua i le mataupu muamua. Atonu e saʻo o ia. E iai faamaoniga ua iloa e Molimau a Ieova o le fesoasoani mai o agelu, a o latou galulue ai i le galuega talaʻi. Peitaʻi ona e tatou te lē vaaia agelu, e lē mafai la ona tatou iloa le tele o loo faaaogā ai e le Atua agelu, e fesoasoani mai iā i tatou taʻitoʻatasi i vala eseese o le olaga. E ui i lea, e tatou te faafetaia pea Lē e ona le malosi uma lava, i so o se auala e na te saunia mai ai le fesoasoani.​—Kolose 3:15; Iakopo 1:17, 18.