Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA NU. 5 2016

 SUIA E LE TUSI PAIA OLAGA

Sa Avea Aʻu o Sē Loto Ita ma Sauā

Sa Avea Aʻu o Sē Loto Ita ma Sauā
  • TAUSAGA FANAU: 1974

  • ATUNUU: MEKISIKŌ

  • TALAAGA: O SE TALAVOU E SAUĀ MA FAAMISA I NOFOAGA FAITELE

OLAGA SA IAI:

Na ou fanau i Ciudad Mante, o se vaipanoa matagofie i le setete o Tamaulipas i Mekisikō. O le tulaga masani, o tagata e nonofo i lenei aai e limafoaʻi ma agalelei. Ae e faanoanoa, ona o le tele o vaega o tagata solitulafono, ua lē toe saogalemu ai lea vaipanoa.

O aʻu e lona lua i se fanauga e toʻafā tama. Na ave aʻu e oʻu mātua i le lotu Katoliko ma ou papatiso ai, ma mulimuli ane oʻu iai i le ʻaufaipese a le ʻaulotu. Na ou taumafai e faafiafia le Atua, ona na ou fefe ina neʻi faamasinoina aʻu ma susunu i le afi i seoli.

O le lima o oʻu tausaga na tuua ai i matou e lo matou tamā. Na ou matuā mafatia ai ma lagona ai le lē toe iai o se aogā. Ou te leʻi malamalama pe aiseā na ia tuua ai i matou, ae na matou alolofa tele iā te ia. O lea, na faigaluega ovataimi ai loʻu tinā ina ia tausia i matou e toʻafā.

Na ou faaaogāina lenā avanoa ma ou lē alu ai i le aʻoga ae faifaimea faatasi ma tamaiti matutua. Na latou aʻoaʻo aʻu e palauvale, ulaula, gaoi, ma fusu. Talu ai na iai oʻu uiga fia pule i isi, o lea na aʻo ai laʻu fusu, pii, ma le karate, faapea foʻi le faaaogāina o auupega. Na avea aʻu o se talavou sauā. Na ou aafia foʻi i taugāfana, ma e tele taimi na lavatoto ai loʻu tino ma tuua ai aʻu i le auala faapea ua ou oti. Pagā le mafatia o loʻu tinā ina ua ia maua aʻu ma ave faanatinati i le falemaʻi!

Ina ua 16 oʻu tausaga, na asiasi mai ai laʻu uō e igoa iā Jorge i lo matou fale. Na ia faamatala mai iā i matou o ia o se Molimau a Ieova, ma e manaʻo e faailoa mai se feʻau tāua mai i le Tusi Paia. Na amata ona ia faamatala mai ona talitonuga, e ala i le faaaogā o le Tusi Paia. Ou te leʻi faitau lava i le Tusi Paia, ma na ou matuā olioli e aʻoaʻo e faatatau i le suafa o le Atua ma ana fuafuaga. Na faapea mai Jorge e mafai ona matou suʻesuʻeina faatasi le Tusi Paia, ma na matou taliaina fiafia.

SUIA E LE TUSI PAIA OLAGA:

Na ou matuā lagona le fiafia ina ua ou iloa le upu moni e faatatau i seoli, e lē o se aʻoaʻoga a le Tusi Paia. (Salamo 146:4; Failauga 9:5) Ina ua ou iloa lenā mea, na ou lē toe lagona ai le fefe i le Atua. Nai lo o lea, na amata ai  ona ou vaai iā te ia o se Tamā alofa, o lē e finagalo e faia le mea e sili mo lana fanau.

A o agaʻigaʻi i luma laʻu suʻesuʻega faale-Tusi Paia, na ou iloa ai e manaʻomia ona suia oʻu uiga. Na tatau ona ou atiaʻe le lotomaulalo ma taumafai e taofia uiga sauā. Na fesoasoani iā te aʻu le fautuaga o loo i le 1 Korinito 15:33, o loo faapea mai o uō leaga e “faaleagaina ai mea lelei.” Na ou iloa ai e manaʻomia ona suia nisi oʻu uiga, ma ʻalofia le faifaimea faatasi ma tagata e iai aafiaga leaga iā te aʻu. Na ou lē toe alu i aʻu uō muamua, ae faauō atu i sui o le faapotopotoga moni Kerisiano, o ē e foʻia o latou faafitauli e ala i le faatatauina o mataupu silisili o le Tusi Paia, ae lē o le fusu po o se isi ituaiga o faiga sauā.

O le isi mau na telē le aafiaga iā te aʻu o le Roma 12:17-19. O loo faapea mai: “Aua le taui atu le leaga i le leaga i se tasi. . . . Afai e mafai iā te outou, ia nonofo filemu ma tagata uma. . . . Aua tou te tauimasui, ae ia tuu atu i le toʻasā; auā ua tusia: ʻO aʻu e faia le tauimasui; ou te taui atu lava, ua fetalai mai ai Ieova.’” Na ou talitonu ai o le a taulima e Ieova le lē faamasinotonu i lana auala i lana taimi talafeagai. Na faasolosolo mālie ona suia loʻu olaga sauā.

E lē galo se mea na tupu i se tasi o afiafi a o oʻu toe foʻi i lo matou aiga. Na osofaʻia aʻu e ni talavou mai i se kegi leaga sa masani ona matou vevesi, ma na tuʻi mai aʻu i tua e lē na taʻitaʻia le vaega, ma ʻeʻē mai, “Se fusu!” Na ou tatalo puupuu iā Ieova i lenā taimi e fesoasoani mai ina ia ou onosaʻia faiga sauā. E ui na ou lagona le fia tauimasui atu, ae na mafai lava ona ou alu ese. I le aso na sosoo ai, na ma fetaui ai ma le taʻitaʻi o le kegi. Na amata ona oso aʻe loʻu ita ma manaʻo e tauimasui atu, ae na ou talosaga lē leoa iā Ieova e fesoasoani mai e pulea loʻu ita. Na faateʻia aʻu ina ua faalatalata mai le talavou ma faapea mai: “Faamagalo mai aʻu i le mea na tupu anapō, o le mea moni ua ou fia pei lava o oe, ua ou manaʻo e suʻesuʻe le Tusi Paia.” Na ou matuā fiafia ona na mafai ona ou pulea loʻu ita. Ou te faafetai ona o le mea na tupu, na amata ai loa ona ia suʻesuʻeina le Tusi Paia.

E faanoanoa ona e leʻi faaauau ona suʻesuʻeina e lo matou aiga le Tusi Paia i lenā taimi. Peitaʻi, na ou maumauaʻi e faaauau laʻu suʻesuʻega, ma lē faatagaina so o se tasi po o so o se mea e taofia ai. Na ou iloa o le faifaimea faatasi e lē aunoa ma tagata o le Atua, e mafai ona faaleleia ai oʻu faalogona tigā, ma maua ai le ituaiga aiga o loo oʻu manaʻomia. Na faaauau ona ou agaʻigaʻi i luma, ma i le 1991 na ou papatiso ai ma avea o se Molimau a Ieova.

AOGĀ IĀ TE AʻU:

Sa avea aʻu o sē loto ita, fia pule i isi ma sauā. Ae na suia atoatoa e le Afioga a le Atua loʻu olaga. O lea, ua ou faailoa atu le feʻau o le filemu mai le Tusi Paia i so o se tasi lava e fia faalogo mai. Ua 23 nei tausaga talu ona ou maua le faaeaga o le galue o se tagata talaʻi faataimi atoa.

E iai se taimi na ou galue ai o sē tauofo i le ofisa o le lālā o Molimau a Ieova i Mekisikō. O i inā na ma fetaui ai ma Claudia, o se tuafafine Kerisiano talavou e tiotio, ma na ma faaipoipo i le 1999. Ou te lotofaafetai iā Ieova ona o le faamanuiaina o aʻu i lenei paaga faamaoni!

Na ma galulue faatasi i se faapotopotoga e faaaogā ai le Gagana Fai Taga Faa-Mekisikō, e fesoasoani e aʻoaʻoina ē logonoa e faatatau iā Ieova. Mulimuli ane, na valaaulia i maʻua e siitia atu i Belize e aʻoaʻo atu le Tusi Paia i tagata o lenā atunuu. E ui lava ua sili atu ona faafaigofie o ma olaga i inei, ae o loo maua mea uma e ma te manaʻomia ina ia fiafia ai. E leai se mea e mafai ona faatusa i ai le olaga ua ma iai nei.

Na toe faaauau le suʻesuʻega faale-Tusi Paia a loʻu tinā ma papatiso ai. Ua avea nei loʻu uso matua ma lana avā ma le la fanau o ni Molimau a Ieova. Ua auauna foʻi iā Ieova nisi o aʻu uō sa iai muamua, lea na ou faailoa i ai le feʻau o le Malo.

E faanoanoa, talu ai na maliliu nisi o loʻu aiga ona e leʻi suia o latou uiga sauā. Pe ana faaauau ona ou faaalia ia uiga, atonu o loʻu iʻuga foʻi lenā. Ou te lotofaafetai iā Ieova ona o lona tosina mai o aʻu iā te ia ma ona tagata tapuaʻi, o ē na onosaʻi ma agalelei i le aʻoaʻoina o aʻu e faatatau mataupu silisili o le Tusi Paia i loʻu olaga.