Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 4 2017

Na manatu le taʻitaʻiʻau o Gordon ua ia maua le faatoʻaga o Etena i le 1881 ina ua asiasi atu i Praslin, i Seychelles

Parataiso i le Lalolagi​—Se Moomooga po o se Mea Moni?

Parataiso i le Lalolagi​—Se Moomooga po o se Mea Moni?

Parataiso. O polosiua felanulanuaʻi mo faigāmalaga, e faaosofia ai le naunau e malaga atu i se “parataiso” mamao e mālōlō ma faagalo ai popolega uma ma faafitauli. Ae ua tatou iloa lelei, pe a toe foʻi mai, e leai lava se suiga o le olaga ma e toe foʻi i le mea sa masani ai.

E ui i lea, e lē mafai ona taofia lo tatou manatunatu i le parataiso. E tatou te ono tomānatu: ʻPo o le “parataiso” ua na o se moomooga faivavale? Pe afai o lea, aiseā la e manatunatu fua i ai? Ae pe e mafai ona avea o se mea moni?’

MANATU ESEESE E UIGA I LE PARATAISO

Mo le tele o senituri, e toʻatele sa fia iloa pe na iai moni lava se parataiso. Na faaosofia lenei naunau ona o mea o loo taʻua i le Tusi Paia e faatatau i le “faatoʻaga i Etena i le itu i sasaʻe.” Aiseā sa mataʻina ai lenā faatoʻaga? Ua faapea mai le tala: “Ua faatutupuina e Ieova le Atua mai i le eleele o ituaiga eseese o laau, e matagofie i le vaai ma lelei i le ʻai.” E ese le matagofie o lenā faatoʻaga ma o se nofoaga lelei. Ae o le mea e pito sili ona mataʻina ai, sa iai “foʻi ma le laau o le ola i le ogatotonu o le faatoʻaga.”​—Kenese 2:8, 9.

E lē gata i lea, o loo taʻua i le tusi o Kenese vaitafe e fā o loo tafe mai i le faatoʻaga. E lua vaitafe o loo tafe pea e oo mai i aso nei, o le Tikarise (po o Hitekelu) ma le Eufirate. (Kenese 2:10-14) O nei vaitafe e lua e tafe atu i le Fagaloa o Peresia lea ua taʻua i aso nei o Iraq, ma sa avea o se vaega o Peresia anamua.

O le mea lea, ua avea ai le parataiso i le lalolagi o se vaega o le tofi faaleaganuu o Peresia. I le Philadelphia Museum of Art, i Pennsylvania, i Amerika, o loo iai se kapeta mai Peresia i le senituri lona 16, ua faaalia ai se ata o se faatoʻaga e fai puipui lea e lalagaina ai le mamanu o laau ma fugālaau. O le upu “parataiso” e mai i le upu Peresia anamua e uiga atu i se “faatoʻaga e fai puipui,” ma o le vaaiga i lenei kapeta e tutusa ma faamatalaga a le Tusi Paia i le matagofie ma le lauolaola o le faatoʻaga i Etena.

O le mea moni, ua faamatalaina le tala e faatatau i le parataiso i le tele o gagana ma aganuu i le lalolagi aoao. Ina ua siitia atu tagata i isi itu o le lalolagi, na latou faamatalaina tala eseese e uiga i le parataiso. I senituri mulimuli ane, na fefiloi faatasi nei tala ma talitonuga ma talafatu o vaipanoa eseese. E oo lava i aso nei, e taʻua e le toʻatele o tagata nofoaga faalenatura e sili ona matagofie, o se parataiso.

LE SAʻILIA O LE PARATAISO

Ua manatu nisi tagata suʻesuʻe ua latou maua le parataiso lea na leiloa. Mo se faaaʻoaʻoga, na asiasi atu Charles Gordon o se taʻitaʻi i le ʻautau a Peretania i Seychelles i le 1881. O lona maofa i le matagofie o le Vallée de Mai lea ua vaavaaia nei e le World Heritage, na ia manatu ai o le faatoʻaga lenei o Etena. I le 1492, na taunuu ai le tagata folau Italia o Christopher Columbus i le motu o Hispaniola, lea ua iloa nei o le Dominican Republic ma Haiti, ma na manatu o ia ua latalata ona ia mauaina le mea sa iai le faatoʻaga o Etena.

O loo iai i le tusi Mapping Paradise, o se tusi o talafaasolopito i aso nei, ni faafanua anamua e sili atu ma le 190 ma o le tele o loo faaalia ai Atamu ma Eva i Etena. O se tasi o nei faafanua o se kopi o le manusikulipi a Beatus mai Liébana, ma e pe ā ma le 800 tausaga talu ona iai. I le pito i luga o lenei faafanua e iai se tamaʻi pusa faatafafā ae o loo iai le parataiso i le ogatotonu. I tulimanu e fā, o loo faailoga ai vaitafe e fā o loo tatafe o le “Tigris,” “Eufrates,” “Pison,” ma le “Geon,” lea e faaāta mai ai le salalau atu o le faa-Kerisiano  i tulimanu e fā o le lalolagi. O lenei mea e faaalia ai, e ui lava e leʻi iloa le vaipanoa na iai le parataiso sa iai i le amataga, ae o loo naunau pea i ai tagata.

O John Milton o se fatusolo mai Peretania na fanau i le silia ma le 400 tausaga ua mavae. Na lauiloa o ia i lana solo Paradise Lost, lea sa faavae i le tusi o Kenese e faatatau i le agasala a Atamu ma le tuliesea o ia mai i Etena. I lenā solo na ia faatāua ai le folafolaga o le toe faafoʻisia o le ola e faavavau mo tagata i le lalolagi, ina ua ia faapea mai: “O le a avea le lalolagi ma Parataiso.” Mulimuli ane na toe fatuina e Milton se isi solo e faamatuaina Paradise Regained.

SUIA LE MANATU E FAATATAU I LE PARATAISO

E manino mai i le talafaasolopito o tagata, sa matuā faatāuaina le manatu o le Parataiso na leiloa. O lea la, aiseā e lē o toe faatāua ai lenā manatu? Talu ai ua taʻua i le Mapping Paradise, ʻua matuā iso le ʻaufaitofā i le manatu po o fea tonu lava e tū ai le parataiso.’

Ua aʻoaʻoina e le toʻatele o tagata lolotu le manatu e ō uma tagata i le lagi, ae e lē o le ola i se lalolagi parataiso. Peitaʻi ua taʻua e le Tusi Paia i le Salamo 37:29: “E fai lava le lalolagi mo ē e amiotonu, e nonofo ai pea i latou e oo i le faavavau.” Ua matuā mamao lo tatou lalolagi ma le tulaga parataiso, ae pe faamata o le a faataunuuina lenei folafolaga? *

E MONI LE FAAMOEMOE O LE PARATAISO I LE LALOLAGI

Na folafola mai e Ieova le Atua, o lē na foafoaina le uluaʻi Parataiso, le toe faafoʻisia mai o le parataiso na leiloa. E faapefea? Na aʻoaʻo e Iesu i tatou e tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O lenā Malo o se pulega i le lalolagi aoao lea e pulea e Iesu Keriso, ma o le a suia pulega faaletagata. (Tanielu 2:44) I lalo o le pulega o lenā Malo, o le a “faia” ai le finagalo o le Atua ma avea ai le lalolagi ma parataiso.

Na faagaeeina le perofeta o Isaia e faamatala le tulaga o le a iai le Parataiso lea na folafola mai, o le a lē toe iai feteenaʻiga ma faafitauli o loo aafia ai tagata i aso nei. (Isaia 11:6-9; 35:5-7; 65:21-23) E matou te faalaeiau oe ina ia faitau nei mau i lau lava Tusi Paia. O le faia faapea o le a e mautinoa ai i mea ua saunia e le Atua mo tagata usiusitaʻi. O i latou na o le a olioli i le parataiso faapea le mauaina o le finagalo malie o le Atua, o mea ia na leiloa iā Atamu.​—Faaaliga 21:3.

Aiseā e tatou te mautinoa ai o le faamoemoe o le Parataiso i le lalolagi e lē o se moomooga, ae o se mea moni? Talu ai ua faapea mai le Tusi Paia: “O le lagi, o le lagi lava, e iā Ieova lea, a ua tuuina mai e ia le lalolagi i le fanau a tagata.” O le faamoemoe o le Parataiso i le lalolagi sa “folafola mai i aso anamua e le Atua, e lē mafai ona tala pepelo.” (Salamo 115:16; Tito 1:2) Maʻeu le matagofie o le faamoemoe ua ofo mai e le Tusi Paia, o le Parataiso e faavavau!

^ pala. 15 O se isi manatu, ua faapea mai le Koran, fuaiupu 105 o le sura 21, Al-Anbiya’ [O Perofeta]: “O ē e amiotonu mai i Aʻu auauna o le a fai mo i latou le lalolagi.”

Faitau Atili

O Ā AʻOAʻOGA MONI A LE TUSI PAIA

O le ā le Finagalo o le Atua mo le Lalolagi?

Po o le a faataunuuina le finagalo o le Atua mo se lalolagi parataiso? Pe afai o le a faataunuuina, o afea?