Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 4 2017

E tāua le vave ona talanoa ma lelei fesootaʻiga

Pe a Maʻi Tigāina Sē e Pele

Pe a Maʻi Tigāina Sē e Pele

NA FAATEʻIA Doreen ina ua aafia lana tane o Wesley e 54 ona tausaga, i se tuma o le faiʻai. * E na o ni nai masina na taʻu atu e fomaʻi o le a ia ola ai. Na taʻua e Doreen: “Ou te leʻi talitonu i mea na ou faalogo ai. Mo le tele o vaiaso na lē sagatonu loʻu mafaufau. Na ou lagona e pei o loo tupu i se isi ae lē o i maʻua. O se mea ou te leʻi faatalitalia.”

O se mea e faanoanoa ai ona o faalogona o Doreen o ni faalogona masani. O gasegase tugā e mafai ona aafia ai so o se tasi i so o se taimi. O le itu e lelei ai, e lotomalilie le toʻatele e galulue i le tausia o ē e pele ua aafia i se gasegase tugā. Peitaʻi, o le tausia o ē mamaʻi o se luʻi e faigatā tele. O le ā e mafai ona faia e sui o le aiga e faamāfanafana ma tausia ai ē e pele ua faataotolia i se gasegase tugā? E faapefea i ē e tausimaʻi ona feagai ma lagona eseese o le a aliaʻe mai i le taimi o loo maʻi ai se tasi? O le ā e faatalitalia e le tausimaʻi pe a lata ina oti le tagata maʻi? Muamua, seʻi o tatou iloilo pe aiseā o se luʻi ai i aso nei le tausia o i latou ua aafia i se gasegase tugā.

O SE TULAGA FAIGATĀ I ASO NEI

O le alualu i luma o togafitiga faafomaʻi, ua suia ai le umi e ola ai tagata. I le pe ā ma le senituri ua mavae, e leʻi umi le taimi e ola ai se tasi, e oo lava foʻi i atunuu atiaʻe. Na vave ona maliliu tagata mai i faamaʻi pipisi po o faalavelave tutupu faafuaseʻi. E leʻi faigofie ona ō atu i falemaʻi, ma o le toʻatele na tausia e o latou aiga ma maliliu ai lava i inā.

I aso nei, o le alualu i luma o togafitiga faafomaʻi ua mafai ai e fomaʻi ona togafitia maʻi tigāina, ina ia faaumiumi ai le ola. Ua mafai nei ona umi le ola o se tasi, e ui o loo maua i se faamaʻi sa ono vave ona uma ai le ola i aso ua mavae. Peitaʻi, o le umi o le ola o se tasi e lē o aveesea ai le faafitauli. E masani ona iai aafiaga tumau i tagata mamaʻi, lea e lē mafai ai e i latou ona tausia i latou lava. O le tausia o nei tagata e matuā faigatā ma e tele gaoioiga e aofia ai.

O le mea lea, ua sili atu le toʻatele o tagata e feoti i falemaʻi nai lo i o latou lava aiga. O le toʻatele i aso nei e lē masani i mea tutupu lea e iʻu atu ai i le oti, ma e toʻaitiiti tagata ua vāai i se tasi a o faasolosolo  ina uma atu lona ola. Ona o le lē mautonu i mea e tutupu, atonu la e faatalatū pe lē manaʻo ai se tagata e tausia se tasi o lona aiga o loo maʻi tigāina. O le ā e mafai ona fesoasoani i lea tulaga?

IA FUAFUA MAMAO

E pei ona faataʻitaʻia mai i le tulaga o Doreen, o le toʻatele e lagona le leai o se faamoemoe pe afai ua aafia sē e pele i se gasegase tugā. Ae e ui i popolega, fefe, ma le faanoanoa, o le ā e fesoasoani iā te oe e fesagaʻia ai lenei luʻi? Na tatalo se auauna faamaoni a le Atua e faapea: “Ia e faailoa mai iā i matou ina ia faapena ona faitauina o matou aso ina ia o matou maua ai se loto e atamai.” (Salamo 90:12) Ioe, ia tatalo faatauanau iā Ieova le Atua e faailoa mai pe faapefea ona ʻfaitauina ma le atamai o tatou aso,’ ina ia mafai ona tatou faaaogā lelei le taimi o loo totoe ma sē e pele ua maʻi tigāina.

E manaʻomia ai le fuafua lelei. Pe afai o loo mafai lava e sē e pele o loo maʻi ona talanoa ma lotomalie e talanoa e faatatau i le mataupu, atonu la e atamai ona fesili atu po o ai e na te manaʻo e faia se filifiliga pe afai ua lē toe mafai ona ia faia se mea. Ia talanoa auʻiliʻili e faatatau i ana filifiliga, pe e manaʻo e toe faateʻi o ia, taofia i le falemaʻi, pe faia foʻi isi togafitiga. O le faia faapea o le a faaitiitia ai le fenuminumiaʻi ma le iai o faalogona nofosala i tagata o le aiga, e faia filifiliga i se taimi ua lē o toe mafai e le tagata maʻi ona faia faapea. O le vave ona talanoa ma lelei fesootaʻiga, e fesoasoani i le aiga e taulaʻi atu ai i le tausiaina o le tagata maʻi. Ua taʻua i le Tusi Paia: “E faalēaogāina fuafuaga pe a lē iai ni talanoaga.”​—Faataoto 15:22.

LE AUALA E FESOASOANI AI

O le matafaioi autū a le tausimaʻi o le avatu lea o le faamāfanafanaga. O le tagata ua toeitiiti ona maliu e manaʻomia ona ia iloa o loo alofagia o ia ae lē o tuua toʻatasi. E faapefea ona faia lenei mea? Faitau pe pese atu i le tagata maʻi, filifili lomiga ma pese e atiaʻe ma faafiafiaina ai o ia. O le toʻatele e faamāfanafanaina pe afai e uu e se tasi o le aiga lona lima ma tautala lemū atu iā i latou.

E fesoasoani le faailoa i le tagata maʻi ē o loo asiasi atu. Na taʻua e se tasi lipoti: “O le faalogo o le lagona mulimuli lea e mou ese atu mai i le tagata. E mafai lava ona lagona e [tagata maʻi] tala o loo fai e ui e foliga mai o loo moe, o lea aua neʻi e faia se tala e lē mafai ona e faia a o ala le tagata maʻi.”

Pe afai e mafai, ia tatalo faatasi. O loo faamauina i le Tusi Paia se mea na tupu i le aposetolo o Paulo ma ana aumea, ina ua matuā mafatia ma lē mautonu. O  le ā le fesoasoani na latou saʻilia? Na ʻaiʻoi atu Paulo i ana uō: “E mafai foʻi ona outou fesoasoani mai e ala i a outou tatalo faatauanau mo i matou.” (2 Korinito 1:8-11) E matuā tāua le tatalo mai i le loto i taimi e matuā mafatia ai ma fesagaʻia se gasegase tugā.

IA TALIA LE TULAGA O LE A OO I AI

O le manatu o le a maliu sē e pele e masani ona faapopoleina ai, talu ai o le oti e lē o se tulaga e masani ai. E leʻi foafoaina i tatou e talia le oti o se vala masani o le olaga. (Roma 5:12) Ua faamatalaina e le Tusi Paia le oti o se “fili.” (1 Korinito 15:26) O lea, o se tulaga masani le lē manaʻo e mafaufau i le taimi e maliu ai sē e pele.

E ui i lea, o le nofosauni mo mea e ono tutupu e mafai ona fesoasoani i sui o le aiga e faaitiitia ai le popole, ae taulaʻi atu i le tausia o le tagata maʻi. O nisi o na mea o loo lisiina i le pusa “ O Vaiaso o Loo Totoe a le Tagata Maʻi.” O le mea moni, e lē o vala uma nei e tutupu i tagata mamaʻi, pe tutupu foʻi i le faasologa o loo lisi atu i le pusa. E ui i lea, o le toʻatele o tagata mamaʻi ua tofo i nisi o nei vala.

Pe a maliu sē e pele, atonu o se faiga atamai le faafesootaʻi o sau uō vavalalata lea na lotomalie e fesoasoani atu. E lē gata i lea, e tatau ona faamautinoa atu i tausimaʻi faatasi ai ma aiga o lē sa maʻi, ua lē o toe tigā ma mafatia lē na pele iā i latou. Ua faamautinoa mai ma le alofa e Lē na foafoaina tagata “o ē ua oti, latou te lē iloa se mea.”​—Failauga 9:5.

LE TAUSIMAʻI SILI

E mafai ona tatou aʻoaʻoina e lē tatau ona tatou teena le fesoasoani mai i isi

E tāua le faalagolago i le Atua e lē gata i le taimi o loo maʻi tigāina ai se tasi o le aiga, ae faapea foʻi le taimi e oo mai ai faanoanoaga pe a maliu o ia. E na te fesoasoani mai e ala i upu faalaeiau ma gaoioiga e faia e isi. Na taʻua e Doreen: “Na ou aʻoaʻoina e lē tatau ona ou teena le fesoasoani mai i isi. O le mea moni, o le tele o le fesoasoani na ma maua na faalaeiauina ai i maʻua. Na ma mautinoa ma laʻu tane o le fesoasoani lenei a Ieova. E pei o loo fetalai mai Ieova iā i maʻua e faapea, ʻOu te iai faatasi ma oulua e fesoasoani atu e fesagaʻia lenei tulaga.’ E lē mafai ona galo lenā mea iā te aʻu.”

O le mea moni, o Ieova le Atua o le Tausimaʻi sili. Ona o ia o Lē na foafoaina i tatou, e malamalama la i o tatou tigā ma faanoanoaga. E lotomalie ma naunau e saunia mai le fesoasoani talafeagai ma faalaeiauga, ina ia tatou taulimaina ai nei tulaga faigatā. Ae sili atu i lenā, ua ia folafola mai e lē o toe umi ona ia soloiesea lea o le oti ma faatutūina mai le faitau piliona o tagata o loo ia manatua. (Ioane 5:28, 29; Faaaliga 21:3, 4) Ona mafai lea ona tatou fai atu upu a le aposetolo o Paulo: “Le oti e, o fea o iai lou manumalo? Le oti e, o fea o iai lou tui?”​—1 Korinito 15:55.

^ pala. 2 Ua suia igoa.