Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA NU. 4 2016

E te Silafia?

E te Silafia?

Na faapefea ona ese le auala na feutagaʻi ai Iesu ma lepela?

Na fefefe tagata Iutaia anamua i le ituaiga lepela na taatele i taimi o le Tusi Paia. O lenā faamaʻi pipisi e aafia ai neula o le tino, ma iʻu ai i ni aafiaga tumau ma suia ai foliga o le tino. Na leai se fofō mo le lepela. Sa tuuesea i latou na maua i lea maʻi, ma e tatau ona latou faailoa atu i isi o latou tulaga.—Levitiko 13:45, 46.

Na faia e taʻitaʻi lotu Iutaia tulafono i lepela, e sili atu nai lo o mea o loo taʻua i le Tusi Paia, ma matuā faigatā ai olaga o tagata lepela. O se faataʻitaʻiga, na faasā i tulafono a taʻitaʻi lotu Iutaia ona latalata atu se tasi i lepela, i le pe ā ma le 4 kupita (pe ā ma le 6 futu pe 2 mita). Ae afai e savili le aso e tatau i tagata lepela ona faamamao ese mai i tagata i le pe ā ma le 100 kupita (pe ā ma le 150 futu pe 45 mita). Ua faauiga e nisi e atamamai i tulafono Iutaia, le faaupuga i le Tusi Paia e tatau i lepela ona nonofo “i tua o le togālauapi,” e faapea e lē tatau ona nonofo i totonu o pa o le aai. O lea ina ua vaai se taʻitaʻi lotu Iutaia i se lepela i totonu o le aai, na ia fetogia i maa ma faapea atu: “Alu i le mea e tatau ona e iai, neʻi lē mamā isi ona o oe.”

Maʻeu le ese o le auala na feutagaʻi ai Iesu ma lepela! Nai lo le tuliesea o i latou, sa ia lotomalie e paʻi atu ma faamālōlō i latou.—Mataio 8:3.

O ā māfuaaga na faataga ai e taʻitaʻi lotu Iutaia le tatala o faaipoipoga?

Pepa Faamaonia e Tatala ai Faaipoipoga mai i le 71/72 T.A.

O tatalagā faaipoipoga o se mataupu na fefinauaʻi ai taʻitaʻi lotu i le uluaʻi senituri T. A. O lea i se tasi taimi na luʻia ai e le ʻau Faresaio Iesu i le fesili lenei: “Pe e taga i le tulafono ona faateʻa e se tamāloa lana avā i so o se māfuaaga?”—Mataio 19:3.

Na faataga i le Tulafono a Mose se tamāloa e faateʻa lana avā pe a “iloa ua leaga se mea ua ia faia.” (Teuteronome 24:1) I taimi o Iesu e lua ni aʻoga na aʻoaʻo ai manatu faa-Iutaia ae na eseese le faauigaina o lenei tulafono. O le aʻoga a Shammai o se aʻoga sa maumaututū i tulafono, na latou faauigaina e pau le māfuaaga talafeagai e tatala ai se faaipoipoga, o le “lē mamā” lea e faasino atu i le mulilua. A o le aʻoga a Hillel sa latou faauiga e mafai e se tamāloa ona tatala lana faaipoipoga i so o se māfuaaga e tusa pe faatauvaa. E tusa ai ma le talitonuga a lea aʻoga, e mafai e se tamāloa ona faateʻa lana avā pe afai e lē lelei ona saunia lana meataumafa, po ua maua foʻi se isi fafine e aulelei atu i lana avā.

O le ā le tali a Iesu i le fesili a le ʻau Faresaio? Na ia tali manino atu: “Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.”—Mataio 19:6, 9.