Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 2 2017

 MATAUPU AUTŪ | PO O LE A E TALIAINA LE MEAALOFA SILISILI A LE ATUA?

Se Meaalofa e Lē Mafaatusalia

Se Meaalofa e Lē Mafaatusalia

E FOLIGA mai e faatauvaa le mea vili peni e pei o se vaa o loo uuina e Jordan. Peitaʻi, o se tasi lea o mea e sili ona tāua iā te ia. Ua faapea mai Jordan: “Na aumai e Russell o se tamā matua ma o se faauō lelei a lo matou aiga lenā meaalofa iā te aʻu a o oʻu laʻitiiti.” Ina ua uma le maliu o Russell, na iloa ai e Jordan e telē se fesoasoani a Russell sa iai i olaga o ona mātua faapea le tamā o lona tinā, lea na faamāfanafanaina ai i latou i taimi faigatā. Ua faapea mai Jordan: “Talu ai ua tele mea ua ou iloa e uiga iā Russell, ua sili atu la ona tāua lenei meaalofa laʻitiiti iā te aʻu nai lo o le taimi muamua.”

E pei ona faaalia i le mea na tupu iā Jordan, atonu e itiiti pe leai foʻi se tāua o se meaalofa i le vaaiga a isi. Ae i le tagata lototalisapaia lea e talia le meaalofa, e ono vaai i ai o se mea tāua pe taugatā foʻi. Ua faamatala i le Tusi Paia se meaalofa e lē mafaatusalia i upu taʻutaʻua nei: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”Ioane 3:16.

O lenā meaalofa e maua ai e lē e taliaina le ola e faavavau. Pe e iai se meaalofa e sili atu nai lo o lenā meaalofa? E ui e lē iloa e nisi le tāua o lenā meaalofa, ae e vaai i ai Kerisiano moni e “tāua.” (Salamo 49:8; 1 Peteru 1:18, 19) Aiseā la na foaʻi mai ai e le Atua le ola o lona Alo o se meaalofa mo le lalolagi?

Ua faamatala e le aposetolo o Paulo le māfuaaga i upu nei: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma.” (Roma 5:12) Na agasala le uluaʻi tagata o Atamu ina ua lē usitaʻi ma le loto i ai i le Atua, ma faasalaina ai i le oti. Talu ai ua agasala Atamu, ua tuufaasolo mai ai le oti i ē uma na tupuga mai iā te ia, po o tagata uma o le lalolagi.

“O le totogi o le agasala o le oti lea, a o le  meaalofa a le Atua o le ola e faavavau lea, e ala iā Keriso Iesu lo tatou Alii.” (Roma 6:23) Ina ia faasaʻoloto tagata mai i le faasalaga o le oti, na auina mai e le Atua lona Alo o Iesu Keriso i le lalolagi, ina ia faataulaga lona ola lelei atoatoa mo tagata. E ala i lenā taulaga lea e taʻua o “le togiola,” o ē uma e faaalia le faatuatua iā Iesu o le a maua le ola e faavavau.Roma 3:24.

E tusa ai o faamanuiaga uma ua faasafua mai e le Atua i ona tagata tapuaʻi e ala mai iā Iesu Keriso, ua faapea mai Paulo: “E faafetai i le Atua mo lana meaalofa foaʻifua e lē mafaamatalaina.” (2 Korinito 9:15) E lē lava a tatou upu e faamatala ai le matagofie tele o le togiola. Ae aiseā ua sili ai ona mataʻina le togiola mai i isi meaalofa lelei uma a le Atua i tagata? Ua faapefea ona ese le togiola mai i isi meaalofa a le Atua? * O le ā le auala e tatau ona tatou tali atu ai i lenā meaalofa? E matou te faalaeiau oe e faitau i tali o na fesili o loo i le Tusi Paia, i mataupu e lua o loo sosoo mai.

^ pala. 8 Na lotomalie Iesu e ʻfoaʻi mai lona ola mo i tatou.’ (1 Ioane 3:16) Peitaʻi, talu ai o lenā taulaga sa avea o se vaega o le finagalo o le Atua, o le a taulaʻi la lenei faasologa o mataupu i le matafaioi a le Atua, o Lē na saunia le togiola.