Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 2 2017

Na asiasi atu Iesu i le tinā o le avā a Peteru ma faamālōlōina o ia.—Mataio 8:14, 15; Mareko 1:29-31

Po o se Mea e Tatau i Faifeʻau Kerisiano Ona Lē Faaipoipo?

Po o se Mea e Tatau i Faifeʻau Kerisiano Ona Lē Faaipoipo?

E FAAMALOSIA e lotu i le lalolagi atoa e pei o le Lotu Katoliko Roma, lotu eseese o le Orthodox, lotu Puta ma isi lotu le lē faaipoipo o a latou taʻitaʻi lotu ma faifeʻau. Ae e manatu le toʻatele, o lenei faiga o le pogai lea o mea na tutupu ia na aafia ai faifeʻau o lotu eseese i faiga taufeusuaʻiga.

O lea ua tulaʻi mai ai se fesili, Po o se faatonuga mai i le Tusi Paia le lē faaipoipo o faifeʻau Kerisiano? Ina ia tali lenā fesili, seʻi o tatou iloilo le amataga ma le faasologa mai o lenā faiga, faapea le silafaga a le Atua.

TALAFAASOLOPITO O LE LĒ FAAIPOIPO

I se lauga sa faia i le 2006 e le Pope Benedict XVI i le pulega a le Lotu e taʻua o le Roman Curia, na ia faafesootaʻi ai le lē faaipoipo “i se tū masani sa faia ina ua mavae le vaitaimi o le ʻAuaposetolo.”

Peitaʻi, e leʻi faia e Kerisiano i le uluaʻi senituri lenā faiga. Na lapataʻi e le aposetolo o Paulo o sē na soifua i le uluaʻi senituri uso talitonu, e faatatau i tagata e faia “upu taufaasesē” ma latou faasā isi ona faaipoipo.1 Timoteo 4:1-3.

A o faagasolo le senituri lona lua, na aliaʻe mai ai lea faiga o le lē faaipoipo i lotu “Kerisiano” lea na mulimuli ane faia aʻe ai le Lotu Katoliko Roma. Ua faamatalaina i le tusi Celibacy and Religious Traditions, “ua ōgatusa lea ma se faiga na aliaʻe mai i le Emepaea o Roma o le lē faia lea o feusuaʻiga.”

I senituri mulimuli ane, na faaauiluma ai e fono a le lotu ma Faatamā o le Lotu le lē faaipoipo o faifeʻau. Na latou vaai i feusuaʻiga o se mea  e lē mamā ma e lē talafeagai mo se tasi e iai ni ona tofiga i totonu o le lotu. E ui i lea, na taʻua i le Encyclopædia Britannica, “e oo ane lava i le senituri lona 10 sa iai pea avā a le toʻatele o patele ma nisi o epikopō.”

Na faamalosia le lē faaipoipo o ē e mautofiga i le lotu i le fonotaga e taʻua o le Lateran Councils i le tausaga e 1123 ma le 1139 lea na faia i Roma, ma o le tulaga lava lenā o le Lotu Katoliko Roma e oo mai lava i aso nei. O lenei faiga, na tumau ai pea le malosi o le lotu ma faasao ai le tele o tupe, ona o patele ua faaipoipo na latou uili meatotino a le lotu i a latou fanau.

LE SILAFAGA A LE ATUA I LE LĒ FAAIPOIPO

O loo faaalia manino mai le silafaga a le Atua e faatatau i le lē faaipoipo o ē mautofiga i lotu, i lana Afioga le Tusi Paia. O loo iai fetalaiga a Iesu e faatatau iā i latou na nofofua e pei o ia, “ona o le malo o le lagi.” (Mataio 19:12) E tusa ai ma lenā manatu na taʻua foʻi e le aposetolo o Paulo ia Kerisiano o ē na filifili e faaaʻoaʻo iā te ia i le nofofua, “ona o le tala lelei.”1 Korinito 7:37, 38; 9:23.

Peitaʻi, e leʻi faatonuina e Iesu po o Paulo ia faifeʻau e aua le faaipoipo. Na fetalai Iesu o le nofofua o se “meaalofa” e lē laumaua e ona soo uma. E ui lava na faapea mai Paulo e lelei le nofofua, ae na ia taʻutino mai: “Ou te leʻi maua se poloaʻiga mai i le Alii . . . ae ou te faailoa atu loʻu manatu.”Mataio 19:11, fpl; 1 Korinito 7:25.

Na taʻua foʻi i le Tusi Paia o le toʻatele o faifeʻau Kerisiano i le uluaʻi senituri e aofia ai le aposetolo o Peteru, o ni tane faaipoipo. (Mataio 8:14; Mareko 1:29-31; 1 Korinito 9:5) O le mea moni, ona o le taatele o faiga lē mamā taufeusuaʻiga i Roma i na aso, na tusi ai Paulo, afai e faaipoipo se ovasia Kerisiano e tatau ona avea o ia o “se tane e toʻatasi lana avā” ma e ʻgauaʻi lana fanau.’1 Timoteo 3:2, 4.

O nei faaipoipoga e lē o ni faaipoipoga e aunoa ma ni feusuaʻiga, auā na taʻua manino mai i le Tusi Paia e “avatu e le tane i le avā le mea e tatau ai” ma e lē tatau i ulugalii faaipoipo ona “faafiti le tasi i le isi” i feusuaʻiga. (1 Korinito 7:3-5) E manino mai, o le lē faaipoipo e lē o se faatulagaga a le Atua, po o se mea e tatau ona faia e faifeʻau Kerisiano uma.

ONA O LE TALA LELEI

Afai o le lē faaipoipo o se tulaga e lē faamalosia mo tagata mautofi i lotu, aiseā la na faalaeiau ai e Iesu ma Paulo le nofofua? Talu ai o le nofofua e tele ai avanoa e maua e se tasi e faailoa atu ai le tala lelei i isi. O ē nofofua e tele atu mea e mafai ona latou faia, ona e latou te lē o feagai ma popolega o loo fesagaʻia e tagata faaipoipo.1 Korinito 7:32-35.

Seʻi manatu i le faaaʻoaʻoga a Tavita o lē na filifili e tuua lana galuega e lelei le totogi i le Aai o Mekisikō, ina ia siitia atu i se vaega maotua i Costa Rica e aʻoaʻo isi i le Tusi Paia. Pe na manatu Tavita o lona nofofua ua fesoasoani iā te ia e faia ai faapea? Ua ia faapea mai: “Ioe. O se luʻi le faamasani i se aganuu fou ma ese le auala e ola ai, ae ona e na o aʻu na faigofie ai ona ou faamasani i le suiga fou ua iai.”

O Claudia o se Kerisiano nofofua, na siitia atu e auauna i se oganuu e manaʻomia ai tagata talaʻi. Ua ia faapea mai: “Ua ou matuā olioli i laʻu auaunaga i le Atua. Ua faamalosia loʻu faatuatua ma laʻu faiā ma le Atua, pe a ou vaai i le auala ua ia tausia ai aʻu.”

“E tusa lava pe e te faaipoipo pe e te nofofua, o le a e fiafia pe afai e te avatu le mea sili iā Ieova le Atua.”Claudia

E lē tatau ona avea le nofofua o se avega mamafa. Ua faapea atili mai Claudia: “E tusa lava pe e te faaipoipo pe e te nofofua, o le a e fiafia pe afai e te avatu le mea sili iā Ieova le Atua.”Salamo 119:1, 2.