Skip to content

Skip to secondary menu

Skip to table of contents

Molimau a Ieova

Faa-Samoa

Le Olomatamata  |  Nu. 2 2017

O Aogā o le Foaʻi Atu

O Aogā o le Foaʻi Atu

“ALU le pasi ae nofo le Saina.” O le tala lenā na faalogo atu i ai Alexandra a o i luga o le pasi, e faatali le taimi e aumai ai se faatagaga e sopoʻia ai le tuaoi o ni atunuu se lua i Amerika i Saute. Na oso o ia i lalo e vaai po o le ā le mea o tupu, ma iloa ai se alii talavou mai i Saina o loo taumafai e faamatala atu lona tulaga i le gagana Sepania, i se tasi o alii o loo leoleoina le tuaoi o atunuu. Talu ai o Alexandra e auai i se faapotopotoga a Molimau a Ieova i le gagana Saina, o lea na ia ofo atu ai e fesoasoani o sē e faaliliu.

Na faapea mai le alii Saina, o ia o se tagatānuu ae ua gaoia ana tupe ma ana pepa tāua. I le taimi muamua e leʻi taliaina e le alii leoleo lana faamatalaga, ma na iʻu foʻi ina masalomia e le leoleo e iai se vaega a Alexandra i le faatauina atu faasolitulafono o tagata. Mulimuli ane, na ia taliaina le faamatalaga a le alii Saina. Peitaʻi, na tatau ona totogi e le alii Saina le sala ona e lē saʻo ana pepa malaga. Talu ai e leai sana tupe, o lea na avatu ai e Alexandra iā te ia le $20. Na matuā lotofaafetai o ia ma faamautinoa ane o le a ia totogi atu le silia i le $20 iā Alexandra. Na faamatala atu e Alexandra e lē manaʻo i se taui, ma e fiafia e fesoasoani atu ona e na te lagona o le mea saʻo lea e tatau ona fai. Na ia avatu i le alii Saina ni lomiga faale-Tusi Paia, ma faalaeiau o ia e suʻesuʻe le Tusi Paia ma Molimau a Ieova.

E faafiafiaina o tatou loto pe a faalogo o faaalia le agalelei i tagata ese, ma e mautinoa o loo faia faapea e tagata o lotu uma ma i latou e lē ō i ni lotu. Pe e te lotomalie e fesoasoani atu mo le lelei o se isi tagata? E faatupu manatu lenā fesili auā na fetalai Iesu: “E sili le fiafia e maua i le foaʻi atu i lo o le talia mai.”(Galuega 20:35) Na taʻua foʻi i suʻesuʻega faasaienisi, o le foaʻi atu e lelei mo oe. Seʻi o tatou tilofaʻia la po o ā auala e lelei ai.

O LĒ “FOAʻI MA LE LOTOFIAFIA”

Ua faaalia i mea e tutupu, e iai le fesootaʻiga o le foaʻi atu ma le fiafia. Na tusi le aposetolo o Paulo, “e alofa le Atua i lē e foaʻi ma le lotofiafia.” Na faatatau atu le faamatalaga a Paulo i Kerisiano na foaʻi ma le agalelei, e fesoasoani ai i le tulaga faigatā na fesagaʻia e o latou uso tapuaʻi. (2 Korinito 8:4; 9:7) E leʻi faapea atu Paulo ua māfua ona latou foaʻi atu ona sa fiafia. Peitaʻi, na latou maua le fiafia ona o lo latou limafoaʻi.

E tusa ai ma se tasi o suʻesuʻega, o le foaʻi atu e “gaoioi ai vaega o le faiʻai lea e fesootaʻi atu i le fiafia, vafeagai ma isi, ma le maufaatuatuaina, ma o na vala e lagona ai le faamalieina.” I se isi suʻesuʻega na faia i se vaega o tagata, na iloa ai e sili atu lo latou fiafia pe a latou foaʻi atu se tupe i isi, nai lo o le faaaluina iā i latou lava.

Pe na e taumānatu ona o lou tulaga e lē tele ai ni mea e mafai ona e foaʻi atu? O le mea moni, e mafai lava e so o se tasi ona maua le olioli pe a “foaʻi ma le lotofiafia.” Pe a saʻo le uunaʻiga e foaʻi atu ai, e lē afāina la po o le a le telē o lau foaʻi. Na avatu e se tasi o Molimau a Ieova se foaʻi i ē na lomia lenei mekasini faatasi ma sana tusi e faapea: “Mai i le tele o tausaga e laʻitiiti lava se  tupe na mafai ona ou foaʻi atu i le Maota mo Sauniga.” Peitaʻi na ia faapea atili mai: “E tele atu mea ua foaʻi mai e Ieova nai lo o mea na ou foaʻi atu. . . . Faafetai lava o lea ua mafai ona ou faia lenei foaʻi mo le galuega a Ieova.”

O lea, e lē na o tupe e mafai ona e foaʻi atu. E tele foʻi isi auala e faia ai faapea.

E LELEI MO LOU SOIFUA MĀLŌLŌINA

O le foaʻi atu e lelei mo oe ma isi

Ua faapea mai le Tusi Paia: “O le tamāloa e alofa faamaoni ua agalelei o ia iā te ia lava, a o le tagata sauā ua ia aumaia faafitauli i lona lava tino.” (Faataoto 11:17) O tagata alolofa e agalelei, lotomalilie e foaʻi atu lo latou taimi, malosi, ma isi mea, ma faaalia le manatu mamafa. O le faia faapea, e latou te maua ai aogā i auala eseese, ma e lelei foʻi mo lo latou soifua mālōlōina.

Ua faaalia i suʻesuʻega e faapea, o i latou e tauofo e fesoasoani i isi, e itiiti mea e mafatia ma tigā ai ma e faaitiitia lo latou lotomafatia. E latou te maua le soifua mālōlōina lelei. O le foaʻi atu ma le agalelei e mafai foʻi ona faaleleia ai le soifua mālōlōina o se tasi e mafatia i se maʻi tumau, e pei o le multiple sclerosis po o le HIV. Ua faaalia foʻi i suʻesuʻega o ē ua faaleleia lo latou faafitauli i le inu ʻava malosi, ua faaitiitia lo latou lotomafatia ma lē toe tagofia le ʻava malosi ona o lo latou limafoaʻi.

Ua māfua ia tulaga, ona ua iloa e faapea “o faalogona agaalofa ma le agalelei e faaitiitia ai faalogona lē lelei.” O le foaʻi atu e foliga mai e faaitiitia ai foʻi le lotomafatia ma le toto maualuga. E vave ona tuuitiitia le lotomafatia o ē ua maliliu a latou paaga, pe afai e ofo atu e fesoasoani i isi.

O lea, e mautinoa o le foaʻi atu e lelei mo oe.

E IAI LE AAFIAGA LELEI I ISI

Na uunaʻia e Iesu ona soo: “Ia outou foaʻi atu pea, ona foaʻi mai lea o tagata iā te outou. Latou te sasaa ifo i o outou ʻie pulupulu ni fua lelei, ua lolomi, ma lūlūina, ma ua tumu. Auā o le fua tou te fuaina atu, e toe fuaina mai iā te outou.” (Luka 6:38) Pe a e foaʻi atu, e talia ma le lotofaafetai e tagata lou agalelei, ma o le a avea ai i latou o ni ē limafoaʻi. E maua le lagolagosua ma faamalosia faauōga pe a faaalia le limafoaʻi.

O le foaʻi atu e maua ai le lagolagosua ma faamalosia ai faauōga

Ua iloa e tagata e suʻesuʻeina faiā faaletagata, “o tagata e faaauau ona manatu mamafa mo le lelei o isi, e faalaeiau ai foʻi isi e faia faapea.” O le mea moni, “o le faitau i tala mataʻina o ni gaoioiga agalelei, e uunaʻia ai isi e faaalia le agalelei.” E tusa ai ma se tasi o suʻesuʻega, ʻe mafai e tagata taʻitoʻatasi i se faalapotopotoga na faia se gaoioiga lelei, ona iai se aafiaga i ni tagata po o le faitau selau o tagata e tusa lava pe e lē masani pe e leʻi feiloaʻi muamua foʻi i ai.’ Pe a faafaigofie le manatu, o se gaoioiga agalelei e mafai ona aafia ai isi ma uunaʻia ai i latou e faia foʻi faapea. Pe e te lē fia soifua ea i se siʻomaga faapena? Ioe, e tele aogā e maua pe a faaalia e le toʻatele le limafoaʻi.

 E faamaonia le moni o lenā manatu i se mea na tupu i Florida i le Iunaite Setete. Na tauofo se vaega o Molimau a Ieova e faia galuega fesoasoani, ina ua māeʻa se afā fulifaō i lenā vaipanoa. A o latou faatalitali mo mea e faaaogā mo la latou galuega i le fale o se tasi o aiga, na latou mātauina ai le pa a se aiga tuaoi ua faaleagaina, ma na latou ofo atu e faaleleia. Na mulimuli ane tusi lenā tuaoi i le ofisa ulu o Molimau a Ieova e faapea: “E matuā lagona loʻu lotofaafetai. O nisi ia o tagata e sili ona lelei ua ou feiloaʻi i ai.” O lona lotofaafetai, na uunaʻia ai o ia e foaʻi se meaalofa e faaaogā i le vaega na ia taʻua o galuega lelei a Molimau a Ieova.

FAAAʻOAʻO I LE FAAAʻOAʻOGA SILISILI O LE FOAʻI ATU

O se tasi o mea mataʻina na iloa mai i suʻesuʻega a saienitisi, “e iai i le tagata le faanaunauga e fesoasoani i isi.” Na taʻua i lea suʻesuʻega e faatatau i tamaiti, “a o leʻi iloa e tamaiti tautatala e iai iā i latou le uiga e fia fesoasoani mo le lelei o isi.” Aiseā? Ua taʻua i le Tusi Paia na foafoaina tagata i le “faatusa o le Atua,” o lona uiga e latou te faaalia uiga o le Atua.Kenese 1:27.

O le limafoaʻi e aofia ai i uiga matagofie o Lē na foafoaina mea, o Ieova le Atua. Ua ia foaʻi mai le ola ma mea uma e tatou te manaʻomia ina ia maua ai le fiafia. (Galuega 14:17; 17:26-28) E mafai ona tatou iloa lelei lo tatou Tamā i le lagi ma ana fuafuaga alofa mo i tatou, e ala i le suʻesuʻeina o lana Afioga le Tusi Paia. O loo faailoa mai ai ana sauniuniga mo lo tatou lumanaʻi fiafia. * (1 Ioane 4:9, 10) Talu ai o Ieova le Atua o le puna o le agalelei ma na faia oe i lona faatusa, e lē faateʻia ai la pe a e faaaʻoaʻo iā te ia i lona uiga limafoaʻi, lea e lelei mo oe ma e te maua ai lona finagalo malie.Eperu 13:16.

Po o e manatua Alexandra lea na taʻua i le amataga o lenei mataupu? O le ā le iʻuga o lona limafoaʻi? E ui lava na faapea atu se tasi na la malaga faatasi i le pasi ua maʻimau lana tupe, ae na faafesootaʻi e le alii Saina ana uō i se taulaga na taunuu i ai le pasi ma toe totogi ane lana $20. E lē gata i lea, na utagia e le alii Saina le tala a Alexandra ma amata ai loa lana suʻesuʻega faale-Tusi Paia. Na matuā fiafia Alexandra ina ua la toe feiloaʻi ma le alii Saina i se tauaofiaga a Molimau a Ieova na faia i le gagana Saina i Peru, i le tolu masina mulimuli ane. O le lotofaafetai tele o le alii Saina i mea uma na faia e Alexandra mo ia, na ia valaaulia ai Alexandra ma ē na latou ō atu faatasi i le tauaofiaga i lona faleʻaiga.

O le foaʻi atu ma le fesoasoani i isi e matuā olioli ai. Ae sili atu ona e olioli, pe afai o loo e fesoasoani i tagata ina ia latou iloa lelei le Puna o meaalofa lelei uma, o Ieova le Atua. (Iakopo 1:17) Po o e maua aogā mai i lenā ituaiga o foaʻi?

^ pala. 21 Mo nisi faamatalaga, tagaʻi i le tusi O ā Aʻoaʻoga Moni a le Tusi Paia? lomia e Molimau a Ieova ma e maua foʻi i le www.jw.org/sm. Tagaʻi i LOMIGA > TUSI MA POLOSIUA.

Faitau Atili

AVEA OE MA UŌ A IEOVA

Ia Limafoaʻi

O ā mea lelei ua tutupu ona o le limafoaʻi o tagata o Ieova?