Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

LE OLOMATAMATA (LOMIGA MO SU‘ESU‘EGA) APERILA 2016

 TALAAGA O LE SOIFUAGA

Se ʻAuso Faaleagaga sa Taupousa

Se ʻAuso Faaleagaga sa Taupousa

I LE tele o tausaga ua tuanaʻi, na ʻeʻē mai ai loʻu uso e laʻitiiti ifo iā te aʻu o Araceli ma faapea mai: “Aua e te toe fai mai. Ou te lē fia faalogo atu i se tala e faatatau i lau lotu. E tigā ai loʻu ulu. Matuā ou ʻinoʻino a iā oe.” Na matuā tigā oʻu faalogona i na faamatalaga. O loo oʻu manatua pea na upu e ui ua 91 nei oʻu tausaga. Peitaʻi, e pei ona taʻua i le Failauga 7:8: “E sili ona lelei le faaiʻuga o se mataupu nai lo o lona amataga.”—Felisa.

Felisa: Na ou ola aʻe i se aiga e lē tagolima i Sepania. E Katoliko uma lo matou aiga ma o se aiga mapolotu. E toʻa 13 sui o lo matou aiga, sa avea o ni patele pe na galulue mo le lotu. O le tausoga o loʻu tinā na avea o se patele ma o se faiaʻoga i se aʻoga Katoliko. Ina ua mavae lona maliu, na faamamaluina o ia e Pope Ioane Paulo II e ala i le taʻua aloaʻia o ia o se tagata paia. Sa galue loʻu tamā o se fai uʻamea, a o loʻu tinā sa galue i le faatoʻaga. O aʻu e ulumatua i la matou fanauga e toʻavalu.

O le 12 o oʻu tausaga, na amata fevātauaʻi ai tagata i Sepania. Ina ua uma le taua, na faafalepuipuiina ai loʻu tamā, ona e leʻi fiafia le malo i ona manatu faapolotiki. Sa matuā faigatā ai i loʻu tinā, ona saunia ni meaʻai mo i matou. O lea, na ia ave ai oʻu uso lāiti e toʻatolu o Araceli, Lauri, ma Ramoni, e nonofo i le lotoā o taupousa i le aai o Bilbao. Na lava meaʻai na maua e oʻu uso i lenā nofoaga.

Araceli: Ua 14 oʻu tausaga i le taimi lenā, e 12 Lauri ae 10 tausaga o Ramoni. Na matou matuā misia lava si o matou aiga. O la matou galuega i le lotoā o taupousa, o le faamamāina o le fale. I le lua tausaga mulimuli ane, na ave ai i matou e taupousa i se isi lotoā e telē atu i Zaragoza, lea e tausia ai tagata matutua. Na manaʻomia ai ona matou galulue mamafa e faamamā le umukuka, ma fna matuā lagona ai le vaivai.

Felisa: Ina ua ave oʻu uso i le lotoā o taupousa i Zaragoza, na filifili ai loʻu tinā ma lona tuagane  patele e avatu ai foʻi ma aʻu. Na mananaʻo ou te faamamao ese mai i se tama na fia alu iā te aʻu. Na ou naunau ou te nofo i se lotoā o taupousa, ona ou te alofa i le Atua. Ou te alu i le lotu i aso uma, ma sa ou manaʻo foʻi e avea o se misionare Katoliko e pei o loʻu tausoga tama i Aferika.

O le lotoā o taupousa i Zaragoza, Sepania (itu agavale) le Tusi Paia Nácar-Colunga (itu taumatau)

Peitaʻi, e leʻi tele ni mea na mafai ona ou faia e pei ona ou faanaunau i ai. E leʻi faalaeiauina aʻu e taupousa e auauna i le Atua i se isi atunuu e pei ona ou manaʻo i ai. O lea, i le tausaga na sosoo ai na ou toe foʻi ai i lo matou aiga, ma tausi le tuagane patele o loʻu tinā. Na ou faia ana feʻau i le fale, ma lau le ma losalio i afiafi uma. Na ou fiafia foʻi e fai teu o le falesā ma teuteu faatusa o Maria ma sagato.

Araceli: A o oʻu iai i Zaragoza, na fai ai laʻu tautoga muamua ina ia avea ai aʻu ma taupousa. Sa filifili taupousa e tuu eseese i matou ma oʻu uso. Sa latou ave aʻu i se lotoā o taupousa i Madrid, ave Lauri i se lotoā i Valencia, ae nofo ai pea ia Ramoni i Zaragoza. Na fai lau tautoga lona lua e avea ai o se taupousa i Madrid. E toʻatele tagata na ō mai ma nonofo i le lotoā, e pei o tamaiti aʻoga ma tagata matutua. Sa matuā tele galuega na faia ai i lenā nofoaga. Sa ou galue i le falemaʻi o le lotoā.

Na ou tulimataʻia loʻu olaga o se taupousa. Sa ou manatu o le a tele le taimi e faitau ma aʻoaʻo ai le Tusi Paia. Peitaʻi, na ou faanoanoa ona e lē o le tulaga lenā. E leai se isi na faaaogāina le Tusi Paia, pe talanoa foʻi e faatatau i le Atua po o Iesu. Na ou aʻoaʻoina le gagana Latina, suʻesuʻe olaga o sagato Katoliko, ma tapuaʻi iā Maria. Peitaʻi, o le tele o taimi e faia ai galuega mamafa.

Na amata ona ou popole ma atuatuvale. Sa ou manatu e tatau ona ou saʻilia se tupe e tausi ai loʻu aiga, nai lo o le galue i le lotoā o taupousa ma tamaoaiga ai isi tagata. O lea, na ou talanoa ai loa i le taupousa e vaaia le lotoā, ma ou fai i ai o le a ou alu ese. Ae na ia lokaina aʻu i totonu o se potu. Na ia manatu o le faia o lenā tulaga, o le a suia ai loʻu mafaufau.

Na tatala aʻu i fafo e taupousa, ae ina ua latou iloa e lē o suia loʻu mafaufau, na latou toe lokaina aʻu i le potu. Ina ua uma ona loka faatolu aʻu, na latou faapea mai e mafai ona ou alu ese pe a ou tusia le faaupuga lenei: “Ua ou alu ese ona ua ou manaʻo e auauna iā Satani nai lo o le Atua.” Na faateʻia aʻu. Na ou fia alu ese ae ou te lē fia tusia na upu. Na ou talosaga atu i ai ou te fia talanoa i se patele, ma na ou taʻua i ai le mea ua tupu. Na maua le faatagaga mai i le epikopō ou te toe foʻi ai i le lotoā o taupousa i Zaragoza. Ina ua mavae ni nai masina i inā, ona faatagaina ai lea o aʻu e tuua lea nofoaga. E leʻi umi ae tuua foʻi e Lauri ma Ramoni le lotoā o taupousa.

SE TUSI NA MATOU FEESEESEAʻI AI

Felisa

Felisa: Na ou faaipoipo i se taimi mulimuli ane, ma siitia atu i Cantabria, o se vaipanoa i Sepania. Na faaauau pea ona ou toʻaga i le lotu. I se tasi o Aso Sa i le lotu, na matuā ita ma ʻeʻē mai le faifeʻau, “Vaai mai i le tusi lenei!” Na ia faaali mai le tusi O Le Upu Moni E Taʻitaʻi Ai I Le Ola Faavavau. Na ia faapea mai, “Pe afai e avatu e se tasi iā te oe se tusi faapea, ona aumai lea iā te aʻu pe tiaʻi!”

E leʻi iai saʻu tusi faapena, ae sa ou manaʻo ai. Ae i nai aso mulimuli ane, na ō mai ai ni fafine se toʻalua i loʻu fale. O i laʻua o ni Molimau a Ieova, ma na la aumai iā te aʻu lenā tusi. Na ou faitauina ai lava i le pō lenā. Ina ua toe foʻi mai ma fesili po ou te manaʻo e suʻesuʻe le Tusi Paia, na ou taliaina la laʻua talosaga.

Le tusi o le Upu Moni

Na ou naunau lava e faafiafia le Atua. O lea, na ou aʻoaʻoina ai le upu moni e faatatau iā Ieova, ma amata ai ona ou atiaʻe le alofa loloto mo ia. Na ou manaʻo e talanoa i so o se tasi e faatatau iā te ia. Na ou papatiso i le 1973. Na ou taumafai lava e talanoa i loʻu aiga i le upu moni. Ae na matuā teena aʻu e loʻu aiga, aemaise lava loʻu uso o Araceli.

Araceli: Talu ai sa faileagaina aʻu i le lotoā o taupousa, o lea na ou ita ma ou lē fiafia ai i laʻu lotu. Peitaʻi, na faaauau pea ona ou alu i le lotu i le Aso Sa, ma lau laʻu losalio i aso uma. Na tumau pea loʻu faanaunauga e fia malamalama i le Tusi Paia, ma na ou talosaga i le Atua e fesoasoani mai. Na taʻu mai e Felisa iā te aʻu mea na ia aʻoaʻoina. Na matuā olioli ai o ia, ae na ou manatu ua tau faalētonu lona mafaufau. Ou te leʻi ioe i mea na ia fai mai ai.

Araceli

Mulimuli ane, na ou toe foʻi i Madrid e faigaluega ma na ou faaipoipo ai. A o faagasolo taimi, na ou mātauina ai e lē o faatatauina e tagata mapolotu aʻoaʻoga a Iesu. O lea, na ou lē toe alu ai i se lotu. Na ou lē toe talitonu foʻi i sagato po o seoli, ma e lē mafai e patele ona faamagaloina agasala. Na ou lafoaʻia foʻi faatusa uma na iā te aʻu. Ou te leʻi iloaina po o saʻo laʻu gaoioiga na fai. Na ou lotovaivai ae na faaauau pea ona ou tatalo i le Atua e fesoasoani mai ina ia ou iloa o ia. Ou te manatua, le tele o taimi e tuʻituʻi mai ai Molimau a Ieova, ae ou te leʻi taliaina. E leai se lotu na ou toe talitonuina.

O loʻu uso o Lauri na nofo i Falani, ae o Ramoni sa nofo i Sepania. Pe tusa o le 1980, na amata ai ona la suʻesuʻeina le Tusi Paia ma Molimau a Ieova. Na ou talitonu ua pei i laʻua o Felisa, o loo la aʻoaʻoina le tele o aʻoaʻoga pepelo e aunoa ma le iloaina. Mulimuli ane, na ou feiloaʻi iā Angelines, o se tasi o oʻu tuaoi ma sa avea o se uō lelei. O ia foʻi o se Molimau a Ieova. E tele taimi na fesili mai ai Angelines ma lana tane, po ou te manaʻo e suʻesuʻe le Tusi Paia ma i laʻua. E ui lava na ou fai i ai ou te lē fiafia i lotu, ae sa la iloaina loʻu faanaunauga e fia malamalama i le Tusi Paia. Mulimuli ane, na ou faailoa iā i laʻua: “Ua lelei, e mafai ona tatou suʻesuʻe ae ou te manaʻo e faaaogā laʻu Tusi Paia!” Na iai laʻu Tusi Paia o le Nácar-Colunga.

AUTASIA I MATOU ONA O LE TUSI PAIA

Felisa: Ina ua ou papatiso i le 1973, pe tusa e 70 Molimau i Santander, o le laumua o Cantabria. Sa manaʻomia ona matou faimalaga i oganuu mamao, ina ia talaʻi atu i tagata uma i le faitau selau o nuu i lenā vaipanoa. O lea, na matou malaga ai i pasi mai lea nuu i lea nuu, ma mulimuli ane faaaogā taavale.

A o faagasolo tausaga, sa ou suʻesuʻeina le Tusi Paia ma le toʻatele o tagata, ma o le toʻa 11 o i latou ua papatiso. O le toʻatele o ē na matou suʻesuʻe o ni Katoliko. Na manaʻomia ona ou onosaʻi iā i latou. I le pei foʻi o aʻu, latou te manaʻomia se taimi umi e iloa ai e sesē mea o loo latou talitonu ai. Na ou iloa e na o le Tusi Paia ma le agaga paia o Ieova e mafai ona suia ai manatu o tagata, ma malamalama ai i le upu moni. (Epe. 4:12) O laʻu tane o Bienvenido o lē na avea muamua ma leoleo, na papatiso i le 1979. Na suʻesuʻe foʻi e loʻu tinā le Tusi Paia a o leʻi maliu.

Araceli: Ina ua amata ona ou suʻesuʻeina le Tusi Paia ma Molimau a Ieova, na faigatā ona ou talitonuina i latou. Peitaʻi, na mou atu na faalogona a o faagasolo taimi. E lē gata na aʻoaʻo e Molimau a Ieova le Tusi Paia, ae na o latou mulimuli foʻi i ai. Na amata ona tuputupu aʻe loʻu faatuatua iā Ieova ma le Tusi Paia, ma na ou lagona ai le fiafia. Na mātauina e nisi o oʻu tuaoi na suiga ma na latou faapea mai, “Araceli, ia tumau ai loa i lau filifiliga!”

Ou te manatua laʻu tatalo, “Faafetai lava Ieova i le faaauau ona e fesoasoani mai, ma le tele o taimi na e tuuina mai ou te saʻilia ai le upu moni, o le Tusi Paia.” Na ou talosaga foʻi i loʻu uso o Felisa e faamagalo aʻu ona o aʻu faaupuga soona lafo. Na amata mai ai i le taimi lenā ona matou talanoa fiafia faatasi i le Tusi Paia, nai lo o le finau. Na ou papatiso i le 1989 ina ua 61 oʻu tausaga.

Felisa: Ua 91 nei oʻu tausaga. Ua maliu laʻu tane, ma ua lē mafai foʻi ona ou toe faia mea sa masani ai. Ae o loo faaauau pea ona ou faitauina le Tusi Paia i aso uma, auai i sauniga, ma fai se sao i le galuega talaʻi pe a talafeagai ma loʻu malosi.

Araceli: E ese loʻu fiafia e talanoa e faatatau iā Ieova i patele ma taupousa, ona sa avea aʻu ma taupousa. E mananaia nisi o a matou talanoaga, ma o le toʻatele e fiafia e ave a latou tusi ma mekasini. Ou te manatua pea se tasi patele. Ina ua uma ni a ma talanoaga, na ia ioe i mea na ou taʻua. Peitaʻi na ia faapea mai: “Ua leai se mea e mafai, ua ou matua. O ā manatu o laʻu ʻaulotu ma loʻu aiga?” Na ou faapea atu: “Ae o le ā le finagalo o le Atua?” Na ia iloa e saʻo oʻu manatu, ma na ou vaaia ona foliga faanoanoa. Ae e foliga mai, e lē o iā te ia le lototele e fai ai se suiga.

E lē galo iā te aʻu le taimi na manaʻo ai laʻu tane e ma te ō i le sauniga. Na auai i le sauniga i le taimi muamua ina ua silia ma le 80 ona tausaga, ma e leʻi toe misia lava se sauniga. Na ia suʻesuʻeina le Tusi Paia ma amata ona talaʻi. Ou te manatua le tele o taimi mananaia na ma galulue faatasi ai i le talaʻiga. Na maliu o ia a o toe lua masina oo i le aso o lona papatisoga.

Felisa: Na tetee oʻu uso lāiti e toʻatolu iā te aʻu, ina ua amata ona ou auauna iā Ieova. Ae mulimuli ane, na o latou taliaina le upu moni. O se tasi lenā o faamanuiaga sili i loʻu olaga. Talu mai lenā taimi, ua matou olioli faatasi ma talatalanoa e faatatau i lo matou Atua pele o Ieova, ma lana Afioga! O lea, ua autasia i matou e tapuaʻi iā Ieova. *

^ pala. 29 Ua 87 tausaga o Araceli, o Felisa e 91, ma Ramonie 83. O loo latou auauna pea ma le faamaoni iā Ieova. Na maliu Lauri i le 1990 a o faamaoni pea iā Ieova.