Skip to content

Skip to secondary menu

Skip to table of contents

Molimau a Ieova

Faa-Samoa

Ala Mai!  |  Tesema 2015

 MATAUPU AUTŪ | TAUSIA LE FILEMU I LE AIGA

Auala e Foʻia ai Misa i le Aiga

Auala e Foʻia ai Misa i le Aiga

AE FAAPEFEA pe afai e foliga mai e misa soo le lua aiga? Atonu ua avea ma mea masani ma ua faateteleina. Atonu e te lē iloa pe na faapefea ona amata le vevesi. Peitaʻi o le mea moni e alofa le tasi i le isi, ma e te lua lē mananaʻo e faatigā e le tasi faalogona o le isi.

E tāua ona e manatua, o le eseese o manatu e lē faapea ai ua lē taulau lou aiga. Peitaʻi, e faalagolago le filemu po o le vevesi o lou aiga, i le auala e te taulima ai faafitauli e tulaʻi mai. Seʻi iloilo nisi o auala atonu e fesoasoani e taofia ai misa i le aiga.

1. AUA LE TOE TAUI ATU.

E masani lava e toʻalua tagata e faia aʻe ai se misa, ae afai e amata ona faalogo atu le isi e aunoa ma le tautala, atonu o le a amata ai ona fai ifo le feeseeseaʻiga. O lea, taumafai e aua le toe taui atu pe a faatigā mai se isi. Ia faatumau pea lou faaaloalo ma lou mamalu e ala i le pulea o oe lava. Ia manatua, e sili atu ona tāua le filemu i le aiga, nai lo o le taumafai e manumalo i se finauga.

“E mate le afi pe a leai ni fafie, ma e lē toe iai ni vevesi pe a leai se tagata faitala taufaaleaga.”Faataoto 26:20.

2. AMANAʻIA FAALOGONA O SUI O LOU AIGA.

O le faalogologo lelei ma taumafai e malamalama nai lo o le faasalavei atu ma vave fai se faaiʻuga, e telē lona aogā i le faaitiitia o le ita ma le faatumauina o le filemu. Ia amanaʻia faalogona o le isi tagata nai lo o le tuuaʻia i ni uunaʻiga sesē. Aua le tuuaʻia sesē isi sui o le aiga i ni faanaunauga leaga, ia atonu e māfua mai ona le tulaga lē lelei atoatoa. Atonu e māfua upu faatigā ona o le lē magafagafa po o le loto tigā, ae e lē ona o le tauimasui po o le faauiga sesē o mea.

“Ia oofu outou i le alofa mutimutivale, le agalelei, lotomaulalo, agamalu ma le faapalepale.”Kolose 3:12.

3. IA IAI SE TAIMI E FAATOʻAFILEMU AI OE.

Pe a tigā ou faalogona, atonu o se faiga atamai lou alu ese mai i se auala faaaloalo mo sina taimi, seʻia oo ina toʻafilemu. Atonu e lelei lou alu i se isi potu, pe alu e savalivali seʻia e toʻa lelei. E lē faapea ai ua e tetee pe lē tali saʻo atu i le mea ua tupu, pe faapea foʻi ua e lē fia talanoa. Nai lo o lea, pe afai e vave ona aafia ou faalogona, atonu o se taimi lelei lenā e tatalo ai i le Atua mo le onosaʻi, tofā mamao, ma le malamalama.

“Ia e tuua lea mea a o leʻi tetele le misa.”Faataoto 17:14.

 4. MAFAUFAU LELEI I TALA E FAI ATU MA LE AUALA E FAI ATU AI.

E lē mafai ona foʻia se mataupu pe afai e te taulaʻi atu e sauni se faamatalaga tutui e tali atu ai. Nai lo o lea, ia taumafai e fai atu se faamatalaga e faatoʻafilemu ai faalogona ua aafia o sē e te alofa i ai. Nai lo o le taʻu o le auala e te manatu e tatau ona lagona ai, ia talosaga i ai ma le lotomaulalo e faamatala mai ona faalogona, ma faafetai atu mo so o se fesoasoani ua ia faailoa mai iā te oe.

“O le tagata e tautala lē mafaufau, ua pei o le tutuʻi o le pelu, a o le laulaufaiva o ē e atamamai, e mālōlō ai.”Faataoto 12:18.

5. IA TUUTUU I LALO LOU LEO MA TALANOA I SE LEO MĀLŪ.

Pe afai e lē onosaʻi le isi sui o le aiga, o le a faigofie ona mapuna aʻe le ita o le isi. Ia ʻalofia le fai atu o ni upu faifai pe faatigā, pe soona leotele atu e tusa lava po ua tigā ou faalogona. Ia ʻalofia faaupuga tautuuaʻi e pei o le, “E lē taitai ona e ano mai,” pe “E lē taitai ona e fia faalogo mai.” Nai lo o lea, taʻu atu i lau paaga i se auala mālū le aafia o ou faalogona ona o ana amioga (“E tigā oʻu faalogona pe a e . . . ”). E lē talafeagai ona tulei, pō, kiki, pe fai se isi ituaiga gaoioiga sauā. E lē talafeagai foʻi ona faaaogā ni igoa faifai, faamatalaga lē faaaloalo, pe taufaamataʻu.

“Ia tuu lo outou ita umi, ma le itaitagofie, ma le lotoa, ma le soona ʻeʻē, ma upu masoā, atoa foʻi ma mea leaga uma.”Efeso 4:31.

6. IA VAVE FAATOESE ATU, MA FAAILOA ATU LE MEA O LE A E FAIA E FOʻIA AI LE FAAFITAULI.

Aua neʻi avea faalogona tigā ma pogai e galo ai lou faanaunauga autū, ia tausia le filemu. Manatua, pe a lua misa ma se tasi, e te lua faiaʻina uma lava. Ae afai e te lua tausia le filemu, ua lua manumalo uma lava. O lea, ia iloa lau vaega na fai ua māfua ai le vevesi. E tusa pe e te manatu e saʻo oe, e mafai lava ona e faatoese atu ona o le auala maʻemaʻeā na e tali atu ai, po o se gaoioiga e te leʻi mafaufauina ua māfua ai le vevesi. E sili atu ona tāua le iai o ni faiā lelei, nai lo o le faamaualuga ma le manumalo. Pe afai e faatoese mai se isi iā te oe, ia vave ona faamagalo atu.

“Ia e faamaulalo iā te oe ma ia e talosaga atu pea i lou tuaoi.” Faataoto 6:3.

Pe afai ua uma le vevesi, o ā mea e te faia ina ia faatumau ai le filemu i le aiga? O le a talanoaina lenā fesili i le mataupu o loo sosoo mai.