Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NOVEMA 2015

 LE MANATU O LE TUSI PAIA

Le Iʻuga o le Lalolagi

Le Iʻuga o le Lalolagi

Ua taʻua i le 1 Ioane 2:17: “E mavae atu foʻi le lalolagi faapea ma ona tuʻinanauga.” O le ā lenā lalolagi? E faapefea ma o afea e mavae atu ai?

O le ā le “lalolagi” lea o le a mavae atu?

LE MANATU O LE TUSI PAIA

Talu ai o le lalolagi lea e taʻua e iai ona “tuʻinanauga” e lē fiafia i ai le finagalo o le Atua, e manino mai la e lē o faasino atu i le lalolagi paneta. Nai lo o lea, e faasino atu i le lalolagi o tagata o ē e teena le Atua ma ua fai ai ma fili o le Atua. (Iakopo 4:4) O tagata ua faia aʻe ai lenei lalolagi o le a “oo i ai le faasalaga tonu o le faaumatiaga e faavavau.” (2 Tesalonia 1:7-9) Ae i le isi itu, o ē e usiusitaʻi iā Iesu e ala i le tumau ona lē avea “o ni tagata o le lalolagi,” e latou te maua le faamanuiaga o le ola e faavavau.—Ioane 15:19.

Ua taʻua i le vaega faaiʻu o le 1 Ioane 2:17: “O lē e faia le finagalo o le Atua e tumau e faavavau.” Ioe, e maua e lenā tagata le faamoemoe o le ola e faavavau i inei i le lalolagi, e pei ona taʻua i le Salamo 37:29: “E fai lava le lalolagi mo ē e amiotonu, e nonofo ai pea i latou e oo i le faavavau.”

“Aua le manaʻo i le lalolagi po o mea o iai i le lalolagi. Afai e manaʻo se tasi i le lalolagi, e lē o i totonu iā te ia le alofa o le Tamā.”1 Ioane 2:15.

O le a faapefea ona mavae atu le lalolagi?

LE MANATU O LE TUSI PAIA

E lua laasaga autū. Muamua, o le a faaumatia e le Atua lotu sesē lea e faaāta mai e se fafine talitane, e igoa iā “Papelonia le Aai Tele.” (Faaaliga 17:1-5; 18:8) E ui ua taʻutino mai lotu o loo faamaoni i le Atua, a o le taimi e tasi o loo faifaimea faatasi ma taʻitaʻi o malo faapolotiki o lenei lalolagi. Peitaʻi, o le a liliu atu nei taʻitaʻi e faasagatau i lotu. E “latou te ʻinoʻino i le fafine talitane, ma faataugā ma faatelenoa iā te ia, latou te ʻaina foʻi lona tino [po o ʻoa] ma susunu uma o ia i le afi.”—Faaaliga 17:16.

Lona lua, o le a liliu atu le Atua i taʻitaʻi faapolotiki, po o “tupu o le lalolagi uma.” O le a faaumatia i latou faatasi ma tagata amioleaga i le “taua o le aso tele o le Atua o Lē e ona le malosi uma lava,” lea ua taʻua o “Amaketo.”—Faaaliga 16:14, 16.

“Ia saʻili iā Ieova o outou uma o ē ua agamalu i le lalolagi . . . Ia saʻili le amiotonu, ia saʻili le agamalu. Atonu e lilo ai outou i le aso o le toʻasā o Ieova.”Sefanaia 2:3.

 O afea o le a mavae atu ai le lalolagi?

LE MANATU O LE TUSI PAIA

O le a oo mai le iʻuga pe a māeʻa ona lapataʻia tagata e ala i le talaʻia i le lalolagi atoa o le Malo o le Atua, o se pulega o le a suia ai pulega faaletagata. (Tanielu 7:13, 14) Na fetalai Iesu Keriso: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mataio 24:14) O lenei talaʻiga e faaatagia mai ai le faamasinotonu ma le alofa mutimutivale o le Atua, o se vaega o le “faailoga” e tele ona vala lea e iloa ai taimi o le iʻuga. O lenei faailoga e aofia ai foʻi ma taua i le lalolagi, mafuiʻe, oge ma faamaʻi.—Mataio 24:3; Luka 21:10, 11.

E lē gata o loo valoia i le Tusi Paia mea ua tutupu i le lalolagi, ae o loo faamatala mai ai foʻi uiga o tagata i “aso e gata ai.” Ua taʻua i le 2 Timoteo 3:1-5: ʻO le a oo mai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, o ē e lē usiusitaʻi i mātua, o ē e lē amio pulea, o ē e sauā, o ē e lē fiafia i mea lelei, o ē e pupū i mea faafiafia nai lo o le alolofa i le Atua.’ *

Ua lē o toe umi ae “mavae atu” le lalolagi amioleaga o loo iai i aso nei.—1 Ioane 2:17

O nei vala uma ua faailogaina ai le vaitaimi lea na amata i le pe tusa o le taimi o le Taua Muamua a le Lalolagi i le 1914. E lē gata i lea, talu mai lenā tausaga, ua faasilasilaina atu le Malo o le Atua i itu uma o le lalolagi, ma o se faaeaga i Molimau a Ieova le iloa e tagata, o i latou ia o loo faia lenei galuega. O le mekasini autū o loo faaaogā e Molimau a Ieova, ua faamatuaina Le Olomatamata Faasilasilaina le Malo o Ieova.

“O le mea lea, ia faaauau ai ona outou mataala, auā tou te lē iloa le aso po o le itula.”Mataio 25:13.

^ pala. 14 Mo nisi faamatalaga, tagaʻi i le mataupu e 9 o le tusi O ā Aʻoaʻoga Moni a le Tusi Paia? lomia e Molimau a Ieova. O loo maua foʻi i le www.jw.org/sm.