Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! NOVEMA 2015

 FESOASOANI MO LE AIGA | TAUSIAINA O FANAU

Auala e Faamālō Atu ai i Fanau

Auala e Faamālō Atu ai i Fanau

LE LUʻI

E manatu nisi e lē tatau ona e soona faamālō atu i sou alo. Ae e manatu isi o le faaauau ona faamālō atu, e lē lelei mo lou alo ma e ono manatu ai ua iā te ia le aiā e faia ai so o se mea e manaʻo ai.

E ao ona e iloa po o le ā le tele e te faamālō atu ai i lou alo, ae po o le ā foʻi le ituaiga o faamālō e avatu. O le ā le ituaiga faamālō o le a faalaeiau ai lou alo, pe e ono faavaivaia ai o ia? E faapefea ona e avatu le faamālō e maua ai iʻuga e sili ona lelei?

MEA E TATAU ONA E ILOA

E lē tutusa uma faamālō. Seʻi iloilo manatu o loo mulimuli mai.

E ono iai ni aafiaga lē lelei o le soona faamālō. O nisi mātua ua faamālō atu i fanau e aunoa ma se māfuaaga tatau, ina ia lagona ai e fanau e tāua i latou. Ae ua lapataʻi mai Dr. David Walsh: ʻE popoto tamaiti, e latou te iloa lelei ua e soona faatelē se faamatalaga, ma manatu ai loa e lē moni au tala o loo fai atu. E latou te iloa sa lē tatau ona e faamālō atu, ma e ono iʻu ai ina latou lē toe talitonuina oe.’ *

E lelei le faamālō atu ona o se tomai. Seʻi faapea e lelei le tusiata a lou alo teine. O le tulaga masani, e te faamālō atu i ai ona o lenā tulaga, ma uunaʻia ai o ia e faaleleia atili lenā tomai. Ae e iai itu e lē lelei ai. O le faamālō e taulaʻi atu tau lava o le taleni ua iā te ia, e ono faapogaia ai lou alo e mafaufau e pau tomai e ao ona ia tuliloaina, o tomai e faigofie ona maua. E ono faatalatū foʻi o ia e tuliloa isi tomai ona e mafaufau ina neʻi lē taulau. E manatu o ia, ʻPe afai o se mea e manaʻomia ai ni taumafaiga, e lē mafai la ona ou faia ma aiseā e maʻimau ai fua le taimi?’

E sili atu ona lelei le faamālō i ai ona o taumafaiga. O tamaiti e faamālō i ai ona o a latou galuega ma taumafaiga fitā, nai lo o le tau ina faamālō i ai ona o a latou taleni, e latou te iloaina le mea moni e faapea, e manaʻomia  le onosaʻi ma taumafaiga malosi ina ia tomai ai e faia se mea. O le iloaina o lenā tulaga, ua taʻua ai i le tusi Letting Go With Love and Confidence, ʻE faia e nei tamaiti ni taumafaiga ina ia ausia ai se sini o loo naunau i ai. E tusa foʻi pe e lē taulau, ae e lē manatu ai iā i latou lava o ni ē ua lē taulau, ae o ē ua aʻoaʻoina ni mea.’

MEA E MAFAI ONA E FAIA

Ia faamālō i taumafaiga ae e lē na o taleni. E sili ona lelei le faapea atu i lou alo, “Ou te iloa na tele au taumafaiga na fai i le tusiaina o lau ata,” nai lo o le faapea atu, “O oe e lelei lava lau tusiata.” O faamatalaga uma e lua o ni faamālō, ae o le faamālō lona lua e ono avatu ai le manatu sesē i le tamaitiiti e faapea, e pau lava mea e lelei ai e na o tomai na fanau mai ma ia.

Pe a e faamālō atu ona o ni taumafaiga, ua e aʻoaʻoina lou alo e mafai ona faaleleia ona tomai pe a galue malosi. E ono fesagaʻia ai foʻi ma le mautinoa e lou alo nisi luʻi fou e tulaʻi mai.—Mataupu silisili o le Tusi Paia: Faataoto 14:23.

Fesoasoani i lou alo ia feagai ma tulaga e lē taulau ai. E oo lava i tagata lelei e sesē foʻi, atonu i le tele o taimi. (Faataoto 24:16) Peitaʻi pe a sesē, e latou te aʻoaʻoina ni lesona mai i na mea sesē ma toe taumafai atili. E faapefea ona e fesoasoani i lou alo ia atiaʻe lenā vaaiga saʻo?

Ia taulaʻi atu pea i taumafaiga. O se faataʻitaʻiga: Seʻi faapea e fai ma au masani lou fai atu i lou alo teine, “O oe e lelei a lau numera,” ae mulimuli ane ua lē pasi lana suʻega. E ono manatu o ia ua lē toe iai sona tomai, aiseā la e toe taumafai ai fua?

Pe a e taulaʻi atu i taumafaiga, o lenā ua e fesoasoani i lou alo ia atiaʻe le onosaʻi. Ua e fesoasoani foʻi i lou alo e manatu i itu na lē taulau ai, o se mea e mafai ona ia toe faaleleia. O lea, nai lo o le faavaivai ae o le a ia taumafai e sui se isi auala pe fai nisi taumafaiga atili.—Mataupu silisili o le Tusi Paia: Iakopo 3:2.

Ia avatu ni faitioga e aogā e faaleleia ai. Pe afai e saʻo le auala e avatu ai faitioga, o le a lē faavaivaia ai la lou alo. Pe a fai foʻi ma au masani le avatu o se faamālō talafeagai, atonu o le a talia e lou alo ni fautuaga i le auala e faia ai nisi faaleleiga. O le iʻuga o le a avea mea e taulau ai lou alo, ma itu e faamalieina ai o ia faapea foʻi oe.—Mataupu silisili o le Tusi Paia: Faataoto 13:4.

^ pala. 8 Mai i le tusi No: Why Kids—of All Ages—Need to Hear It and Ways Parents Can Say It.

Faitau Atili

Le Auala e Aʻoaʻo ai Lau Fanau

O aʻoaʻiga e aofia ai le faamatala atu i lau fanau o le māfuaaga na e faia ai se tulafono po o se faasalaga.