Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

ALA MAI! OKETOPA 2015

Pe a Maʻi Sē e Pele iā te Oe

Pe a Maʻi Sē e Pele iā te Oe

“Ina o le a teʻa lo matou tamā mai i le falemaʻi, na matou talosaga atu i le fomaʻi ina ia toe siaki suʻesuʻega na faia i lona toto. E ui na faamautinoa mai e le fomaʻi o loo lelei mea uma, ae na malie lava o ia e toe siaki. Na faateʻia o ia, ona na ia mātauina ai ni vaega se lua o loo faalētonu. Na faatoese mai ma saʻili atu loa mo le fesoasoani a se isi fomaʻi faapitoa. Ua manuia nei lo matou tamā, ma e matou te fiafia ona na matou toe fesili i le fomaʻi.”—Maribel.

A o leʻi ō e vaai le fomaʻi, ia tusi i lalo āuga o le maʻi, faapea vai ma fualaau o loo inu e lē o loo maʻi

O le vaai o le fomaʻi ma le taofia i le falemaʻi, e ono lagona ai e se tasi le popole. Ae e pei o le tulaga na tupu iā Maribel, e tāua tele le mauaina o le fesoasoani mai i se uō po o se tauaiga, ma e ono faasaoina ai le ola o se tasi. E faapefea ona e fesoasoani i sē e pele iā te oe?

A o leʻi ō e vaai le fomaʻi. Ia fesoasoani i lē o loo maʻi e tusi i lalo ni āuga o lona maʻi, faapea vai ma fualaau o loo ia inuina. Ia tusi foʻi i lalo ni fesili e tatau ona fesili ai i le fomaʻi. Fesoasoani i lau uō ia manatua so o se faamatalaga i lona maʻi, po o ni faamatalaga i nisi o lona aiga na maua i lea maʻi. Aua neʻi manatu ua iloa e le fomaʻi na faamatalaga, pe faatali foʻi seʻiloga ua fesili mai le fomaʻi.

Ia faalogologo lelei, fesili atu ma le faaaloalo, ma ia fai ni faamaumauga

A o siaki e le fomaʻi. Ia faamautinoa o loo oulua malamalama uma ma lē o loo maʻi i faamatalaga a le fomaʻi. Ia fai atu ni fesili ae aua le faia ni faamatalaga e lē faavaea. Ia tuu le avanoa i lē o loo maʻi e talanoa ma fesili atu ai i le fomaʻi. Ia faalogologo lelei ma fai ni faamaumauga. Ia fesili e faatatau i ni togafitiga eseese e aogā. I nisi tulaga, atonu e lelei pe a fesili i lē o loo maʻi pe e manaʻo e vaai se isi fomaʻi mo sona manatu.

Ia toe iloilo faatonuga mai i le fomaʻi, ma ia siaki po o saʻo vai ma fualaau

Pe a uma ona siaki e le fomaʻi. Ia toe iloilo ma lē o loo maʻi mea na outou talanoa ai ma le fomaʻi. Ia faamautinoa e saʻo vai ma fualaau e aumai. Ia faalaeiau lē o loo maʻi ia saʻo vai ma le aofaʻiga o fualaau e na te inuina i le taimi saʻo o loo faatonu mai, ma ia vave ona toe vaai le fomaʻi pe afai e iai ni aafiaga lē lelei o na fualaau. Ia fesoasoani i lē o loo maʻi ia saʻo pea lana vaai, ma faalaeiau o ia e usitaʻia so o se faatonuga faaopoopo, e pei o le toe foʻi e fai ana siaki. Ia fesoasoani iā te ia ina ia malamalama atili i le tulaga o lona maʻi.

 I le Falemaʻi

Ia faamautinoa ua saʻo ona faatumu pepa uma

Ia toʻa ma ia mataalia. Atonu e lagona e lē o loo maʻi le popole ma le lē mafesoasoania pe a alu i le falemaʻi. Peitaʻi, o le faaalia o le toʻa ma le faalogologo lelei, o le a e fesoasoani ai i tagata uma ina ia toʻa ma ʻalofia ai le faia o se mea sesē. Ia faamautinoa ua saʻo ona faatumu pepa faataga e taofia ai i le falemaʻi. Ia amanaʻia le aiā a lē o loo maʻi e faia ai lana faaiʻuga i le itu tau togafitiga. Pe afai e lē mafai ona ia faia faapea ona ua maʻi tele, e tatau la ona e amanaʻia le faaiʻuga a le tagata ua filifilia e lē ua maʻi e faia lana faaiʻuga. *

Ia faailoa atu ma le faaaloalo i fomaʻi ni suiga ua e mātauina i lē o loo maʻi

Ia tausolomua. Aua le matamuli pe fefe e talanoa atu. Pe a lelei ou foliga vaaia ma faaaloalo ou uiga, o le a uunaʻia ai fomaʻi e faaalia le manatu mamafa i lē o loo maʻi ma tausia faalelei o ia. I le tele o falemaʻi, e fesuisuiaʻi fomaʻi e vaaia tagata mamaʻi. O lea, e mafai ona e fesoasoani e ala i le faailoa atu i isi fomaʻi o manatu na taʻua e isi fomaʻi. Talu ai e te malamalama lelei i lē o loo maʻi, ia faailoa atu la i fomaʻi ni suiga e te mātauina i le tino po o le mafaufau o lē o loo maʻi.

Ia fai le mea sili e te mafaia ae ia aua neʻi faalavelavea ai galuega a fomaʻi

Ia faaalia le faaaloalo ma lotofaafetai. E masani ona feagai i latou o loo galulue i le falemaʻi ma le tele o tulaga e faapopoleina ai. Ia feutagaʻi ma i latou i se auala e te manaʻo i isi e feutagaʻi ai ma oe. (Mataio 7:12) Ia amanaʻia lo latou iloa ma le poto masani, ia maufaatuatuaina o latou tomai, ma ia faaalia le lotofaafetai mo a latou taumafaiga. O le faaalia o le lototalisapaia o le a faalaeiau ai i latou e fai le mea sili e latou te mafaia.

E leai se tasi e mafai ona ʻalofia maʻi. Peitaʻi, o le fuafua mamao ma le avatu o se fesoasoani talafeagai, o le a mafai ai ona e fesoasoani i sau uō po o sou tauaiga ina ia fai le mea sili e na te mafai, e ui i lona tulaga maʻi.—Faataoto 17:17.

^ pala. 8 E eseese tulafono ma faiga masani a atunuu e tusa ai o aiā tatau ma faaiʻuga a tagata mamaʻi. Ia faamautinoa o loo iai i faamaumauga a lē o loo maʻi, ia faamatalaga saʻo uma e faatatau i ona manaʻoga e tusa ai o togafitiga faafomaʻi.